Pagpangalagad Upod ang Gahum kag Awtoridad sang Dios

Ni Pangulong Russell M. Nelson

Magapangalagad kita sa Iya ngalan, upod ang Iya gahum kag awtoridad, kag upod ang Iya mapinalanggaon nga kaayo.

Pinalangga kong kauturan, salamat sa inyo debosyon sa Ginuo kag sa Iya balaan nga buluhaton. Malipayon ako nga makaupod kamo. Bilang bag-o nga Unang Panguluhan, nagapasalamat kami sa inyo mga pangamuyo kag sa inyo pagsuporta. Nagapasalamat kami sa inyo mga kabuhi kag pagserbisyo sa Ginuo. Ang inyo katutom sa katungdanan kag maalwan ng serbisyo pareho lang kaimportante sa amon sa amon mga calling. Sa bug-os kabuhi nga pag-alagad sa sining Simbahan, natun-an ko nga indi importante kon sa diin ka nagaserbisyo. Ang importante sa Ginuo amo ang kon paano ka nagaserbisyo.

Dako ang akon pagpasalamat kay Pangulong Thomas S. Monson, nga nangin halimbawa sa akon sa masobra 50 ka tuig. Kag sa iya mga manuglaygay, nga sanday Pangulong Henry B. Eyring kag Pangulong Dieter F. Uchtdorf, ginapahayag ko ang dako nga pagdayaw. Ginadayaw ko sila sa ila pag-alagad sa Ginuo kag sa Iya mga propeta. Ining duha ka debotado nga mga alagad ang nagbaton sang bag-o nga mga toka. Padayon sila nga nagaalagad sing mapagsik kag may kaukod. Ginapasidunggan kag ginapalangga ko sila nga duha.

Dako nga bugay ang mag-alagad sa matuod kag buhi nga Simbahan sang Ginuo nga may awtoridad kag gahum Niya. Ang pagpanumbalik sang priesthood sang Dios, lakip na ang mga yabi sang priesthood, nagabukas sa takos nga mga Santos sa Ulihing mga Adlaw sang pinakadako sa tanan nga espirituhanon nga bugay. Makita naton inang mga bugay nga nagailig sa mga babayi, mga lalaki, kag kabataan sa bug-os nga kalibutan.

Makita naton ang matinuohon nga mga babayi nga nakahangop sang gahum nga yara sa ila calling kag sa endowment kag sa iban pa nga ordinansa sa templo. Ining mga babayi nakahibalo kon paano magtawag sang gahum sang langit agud proteksyunan kag pabakuron ang ila mga bana, kabataan, kag ang ila mga pinalangga. Sila mabaskog sa espirituhanon nga mga babayi nga nagapanguna, nagatudlo, kag nagaalagad nga wala hadlok sa ila mga calling upod ang gahum kag awtoridad sang Dios!¹ Nagapasalamat ako tungod sa ila!

Subong man, makita naton ang matutom nga mga lalaki nga ginatindugan ang ila pribelihiyo bilang nagakapot sang priesthood. Nagapanguna kag nagaserbisyo sila paagi sa pagsakripisyo sa paagi sang Ginuo nga may gugma, kalulo, kag pasensya. Nagabugay, nagagiya, nagaamlig, kag nagapabakod sila sa iban paagi sa gahum sang priesthood nga ila ginakaptan. Nagadala sila sang mga milagro sa ila mga ginaserbisyuhan samtang ginatipigan ang ila pag-asawahay kag pamilya. Nagalikaw sila sa kalautan kag mabaskog sila nga mga elder sa Israel.² Dako gid ang pagpasalamat ko tungod sa ila!

Karon, mahimo bala ako magpabutyag sang kabalaka? Amo ini: Madamo kaayo sa aton mga kauturan ang wala nakaintiendi sing lubos sang konsepto sang gahum sang priesthood kag awtoridad. Nagagiho sila nga daw mas gusto pa nila busgon ang ila pagkamaiya-iyahon sangsa gamiton ang gahum sang Dios agud bendisyunan ang Iya mga anak.

Nahadlok ako nga kadamo sa aton mga kauturan ang wala nakahangop sang mga pribehiliyo nga mahimo mangin ila.³ Pila sa aton kauturan nga lalaki, halimbawa, nagagiho nga daw wala nakaintiendi kon ano ang priesthood kag kon ano ang sarang nila himuon bangod sini. Hatagan ko kamo sang pila ka halimbawa.

Indi lang madugay, nagtambong ako sa pang-sakramento nga miting kon sa diin may lapsag nga ginhatagan sing ngalan kag bendisyon sang amay. Ginkugos sang lamharon nga amay ang iya anak, ginhatagan sia sing ngalan, kag naghatag sang matahom nga pangamuyo. Pero wala niya ginhatagan sang bendisyon ang bata. Ang pinalangga nga lapsag gin-ngalanan pero wala ginbendisyunan! Yadtong mahal nga elder wala makahibalo sang kinalain sang pangamuyo kag bendisyon sa priesthood. Gamit ang iya awtoridad kag gahum sang priesthood, nabendisyunan niya kuntani ang iya anak, pero wala. Napensar ko, “Kanugon nga oportunidad!”

May iban pa gid ako nga halimbawa. May mga kauturan kita nga naga-set apart sang mga sister bilang mga lider kag titser sa Primary, Young Women, ukon Relief Society apang wala sila ginabendisyunan—bendisyunan sang gahum agud tumanon ang ila mga calling. Nagahatag lang sila sang mga paandam kag panulin. Makakita kita sang takos nga amay nga nagapalya sa paghatag sa iya asawa kag kabataan sang bendisyon sang priesthood sa tion nga amo gid ina ang ila kinahanglan. Ang gahum sang priesthood ginpanumbalik diri sa duta, pero kadamo sang kauturan naton nga nagasuong sang dalagko nga mga pagtilaw sa kabuhi nga wala nagabaton sang matuod nga bendisyon sang priesthood. Daw ano nga trahedya! Isa ina ka trahedya nga mahimo naton dulaon.

Mga kauturan, ginakaptan naton ang balaan nga priesthood sang Dios! Yara sa aton ang Iya awtoridad agud bugayan ang Iya katawhan. Panumduma lang ang dako nga pasalig sang Ginuo sa aton sang Sia magsiling, “Ang sin-o man ang inyo bendisyunan, pagabendisyunan ko.”⁴ Aton pribelihiyo ang mag-akto sa ngalan ni Jesucristo agud bugayan ang mga anak sang Dios suno sa Iya kabubut-on para sa ila. Mga stake president kag bishop, palihog siguroha nga ang kada miyembro sang mga korum sa idalom ninyo nakaintiendi kon paano maghatag sang bendisyon sa priesthood—lakip na ang personal nga katakos kag espirituhanon nga paghanda nga kinahanglanon agud magtawag sang gahum sang Dios.⁵

Sa tanan nga kauturan nga nagakapot sang priesthood, ginaagda ko kamo nga papagsikon ang mga miyembro nga tipigan ang ila mga kasugtanan, magpuasa kag magpangamuyo, magtuon sang balaan nga kasulatan, magsimba sa templo, kag magserbisyo nga may pagtuo bilang kalalakin-an kag kababayin-an sang Dios. Mabuligan naton ang tanan nga makakita gamit ang mata sang pagtuo nga ang pagtuman kag pagkamatarong magahilapit sa ila kay Jesucristo, sa pagpakig-upod sang Balaan nga Espiritu, kag maeksperiyensya ang kalipay sa kabuhi!

Tanda sang matuod kag buhi nga Simbahan sang Ginuo amo ang plastado, gingiyahan nga pagpangalagad sa indibidwal nga mga anak sang Dios kag sang ila pamilya.⁶ Tungod Iya ini Simbahan, kita bilang Iya mga alagad magapangalagad sa sinang isa, pareho sang Iya ginhimo.⁷ Magapangalagad kita sa Iya ngalan, upod ang Iya gahum kag awtoridad, kag upod ang Iya mapinalanggaon nga kaayo.

Isa ko ka eksperiyensya masobra 60 ka tuig ang nagligad sa Boston ang nagtudlo sa akon kon daw ano kakusog sang pribelihiyo sang pag-alagad isa sa isa. Isa pa ako ka resident surgeon sa Massachusetts General Hospital—kada adlaw, bal-ot bal-ot nga gab-i, kag bal-ot bal-ot nga Sabado-Dominggo. Limitado ang akon tion sa akon asawa, sa amon apat ka kabataan, kag sa kahiwatan sa Simbahan. Wala sapayan, gintokahan ako sang amon branch president nga bisitahan ang puluy-an ni Wilbur kag Leonora Cox nga nagalaum nga si Brother Cox magabalik sa Simbahan. Sia kag si Leonora nahugpong sadto sa templo.⁸ Pero pila na ka tuig si Wilbur nga wala nagasimba.

Nagkadto kami sang kaupod ko sa ila puluy-an. Sang gapasulod, gin-abiabi kami ni Sister Cox,⁹ pero gulpi lang si Brother Cox nagsulod sa isa pa ka kuwarto kag nanirado.

Nagkadto ako sa sirado nga kuwarto kag nanuktok. Pagkaligad sang pila ka tinion, nakabati ako sangmahinay nga “Sulod.” Ginbuksan ko ang pwertahan kag nakita si Brother Cox nga nagapungko tupad sang nagaraya nga gamit sa amateur radio. Sa sulod sinang gamay nga kuwarto, nagsindi sia sang tabako. Maathag gid, wala ginabaton ang presensya ko didto.

Nagtulok ako sa kuwarto nga nahalawhaw kag nagsiling, “Brother Cox, gusto ko gid bala magtuon pa parte sa obra sa amateur radio. Mahimo bala nga tudloan mo ako? Pasensya indi ako makatiner sing lawig subong, pero pwede ako magbalik sa dason?”

Nag-alang-alang sia sing makadali kag dayon nagsiling huo. Amo yadto ang ginsuguran sang nangin isa ka matahum nga pag-abyanay. Nagbalik ako kag gintudloan niya ako. Nagsugod ang pagpalangga kag respeto ko sa iya. Sang madason namon nga mga pagbisita, naggwa ang kadungganon sining tawo. Nangin suod kami nga mag-abyan, subong man ang amon mga asawa. Dayon, sa pagligad sang panahon, nagsaylo kami. Padayon nga gin-atipan sang lokal nga mga lider ang pamilya Cox.¹⁰

Mga walo ka tuig pagkatapos sadtong una nga bisita, ginpasad ang Boston Stake.¹¹ Pakta ninyo kon sin-o ang nangin una nga stake president sini? Huo! Si Brother Cox! Sang nagsinunod nga tuig, nagserbisyo man sia bilang mission president kag temple president.

Pila ka tuig ang nagligad, bilang miyembro sang Korum sang Napulo’g Duha ka mga Apostoles, gintokahan ako nga magpasad sang bag-o nga stake sa Sanpete County, Utah. Sa kinaandan nga mga interbyu, malipayon ako nga nasorpresa nga makita liwat ang akon abyan nga si Brother Cox. Ginpabatyag ako nga tawgon sia nga bag-o nga patriarka sa stake. Pagkatapos ko sia nga ordinan, naghaksanay kami kag naghibi. Ang mga tawo sa kuwarto natingala kon ngaa nagahinibi ining duha ka hamtong nga lalaki. Pero nakahibalo kami. Kag nahibal-an ni Sister Cox. Mga luha yadto sang kalipay! Malinong namon nga gindumdom ang matahum nga pagpanglakaton sa gugma kag paghinulsol nga nagsugod masobra 30 ka tuig na, isa ka gab-i sa ila puluy-an.

Wala didto natapos ang istorya. Ang panimalay ni Brother kag Sister Cox nagdako sa 3 ka anak, 20 ka apo, kag 54 ka apo-sa-tuhod. Idugang pa dira ang ila epekto sa ginatos ka misyonero, linibo pa gid sa templo, kag ginatos pa nga nagbaton sang bendisyon sang patriarka sa mga kamo ni Wilbur Cox. Ang impluwensya nila ni Leonora magapadayon sa madamo nga henerasyon sa bug-os nga kalibutan.

Ang mga eksperiyensya pareho sa ila ni Wilbur kag Leonora Cox nagakatabo kada semana—kuntani, kada adlaw—sa sining Simbahan. Ang matutom nga mga alagad sang Ginuong Jesucristo nagahikot sang Iya buluhaton, upod ang Iya gahum kag awtoridad.

Mga kauturan, may mga pwertahan kita nga mabuksan, mga bendisyon sang priesthood nga mahatag, mga tagipusuon nga mapaayo, mga problema nga maalsa, mga panaksihon nga mapabakod, mga kabuhi nga masalbar, kag kalipay nga madala sa puluy-an sang nga Santos sa Ulihing mga Adlaw—tanan bangod ginakaptan naton ang priesthood sang Dios. Kita ang kalalakin-an nga “gintawag kag ginhanda gikan pa sa sadsaran sang kalibutan suno sa nahibal-an na nga daan sang Dios, tungod sang [aton] tuman kadako nga pagtuo,” agud himuon ining buluhaton.¹²

Sini nga gab-i ginaagda ko kamo nga literal nga magtindog upod sa akon sa aton dako nga wala’y katapusan nga pag-ululutod. Kon lawagon ko ang inyo palangakuan sa priesthood, palihog tindog kag magpabilin nga nagatindog. Mga deacon, palihog tindog! Mga teacher, magtindog! Mga priest! Mga bishop! Mga elder! Mga high priest! Mga patriarka! Mga Seventies! Mga Apostoles!

Karon, kauturan, pwede magpabilin kamo nga nagatindog kag updan ang aton koro sa pagkanta sang tatlo tanan ka bersikulo sang “Rise Up, O Men of God.”¹³ Samtang nagakanta kamo, panumduma ang inyo katungdanan bilang makusog nga kasoldaduhan sang Dios sa paghanda sang kalibutan para sa Ika-duhang Pagkari sang Ginuo. Amo ini ang aton katungdanan. Amo ini ang aton pribelihiyo. Nagasaksi ako sa ngalan ni Jesucristo, amen.