Parehas nga Nagapatawad Si Cristo sa Inyo, Magpatawad Man Kamo
Kita tanan makabaton sang di-masambitan nga paghidaet kag pagugyon sa Manluluwas kon patawaron gid naton ang nakasala sa aton.
“Aga pa gid sang nahauna nga adlaw sang semana, nagkadto sila sa lulubngan, nga dala ang ginpreparar nila nga pahamot, kag iban pa nga mga upod.
“kag nakita nila nga ang bato nga gintakop sa lulubngan napaligid na.
Nagsulod sila, pero wala nila makita ang bangkay ni Ginoong Jesus.
Sang nagapalibog sila kon ano ang natabo, hinali lang nga may nagtindog nga duha ka lalaki sa tupad nila nga nakasuksuk sang bayo nga masilaw.
Hinadlukan gid ang mga babayi, gani nagduko na lang sila. Pero nagsiling ang duha ka lalaki, “Ngaa ginapangita ninyo ang buhi diri sa mga patay?
“Wala na siya diri, nabanhaw siya.”1
Buwas, ang Adlaw sang Pagkabanhaw, pagadumduman gid naton ang ginhimo ni Hesu Cristo para sa aton: “Kay ginahigugma gid sang Dios ang kalibutan, amo gani nga ginhatag niya ang iya bugtong nga Anak, agod nga ang bisan sin-o nga magtuo sa iya indi mawala kundi hatagan sang kabuhi nga wala sing katapusan.”2 Dugay-dugay, magabanhaw kita parehas sa iya, kag mabuhi nga wala sing katapusan.
Paagi sa milagro sang balaan nga pagbayad-sala ni Hesu Cristo, pwede naton mabaton ang kapatawaran sa aton mga sala, kon batonon naton ang oportunidad kag katungdanon sang paghinulsol. Kag paagi sa mga kinahanglanon nga ordinansa, pagtuman sang mga kasugtanan, kag pagpati sa mga kasugoan, makaangkon kita sang kabuhi nga wa’ay katapusan kag kataas-taasan.
Subong, magpokos ako sa kapatawaran, isa ka kinahanglanon kag mahal nga regalo nga ginatanyag ni Hesu Cristo, ang aton Manluluwas kag Manunubos.
Sang isa ka gab-i sadtong Disiembre 1982, ara kami sa amon balay sa Pocatello, Idaho. Kami sang asawa ko nga si Terry napukaw sang tawag sa phone. Sang ginsabat ko ang tawag, paghibi lang ang akon nabati-an. Dugay-dugay, ang mahinay nga tingug sang utod ko nagsiling, “Patay na si Tommy.”
Didto sa Denver, Colorado, nag-drayb ang hubog nga bente-anyos nga tawo lapaw sang 135 kilometers per hour, kag wala siya mag-pundo sa stoplight. Nabunggo niya ang salakyan sang manghod ko nga si Tommy, dayon napatay si Tommy kag ang asawa niya nga si Joan. Manugpauli na sila sa ila nga gamay nga bata halin sa Christmas party.
Kami sang asawa ko dayon nag-biyahe sa Denver kag nakadto sa punerarya. Nagtipon-tipon ang pamilya ko kag nangasubo kay napatay ang mga pinalangga namon nga si Tommy kag si Joan. Wala na sila tungod sa law-ay nga krimen. Nawasak ang amon tagipusoon kag amat-amat nagdako ang akon kaakig sa nagbuhat sang sala.
Abogado si Tommy sa United States Department of Justice kag sa pila na lang ka tuig tani mangin tag-bantay siya sang kadutaan kag natural nga manggad sang mga Native American sing madamo nga tuig nga maabot.
Nagligad ang panahon, kag ginkasohan ang lalaki nga may kulpa. Sa panahon sang ila pagpangasubo, ang akon mga ginikanan kag magulang nga si Katy nagtambong sa kaso. Ang ginikanan sang drayber ara man didto, kag pagkatapos sang kaso, nagpungko sila sa banko kag naghibi. Nakapungko ang akon mga ginikanan kag utod tupad sa ila kag ginpunggan nila ang ila kaugalingon nga paghibi. Pagkatapos pila ka minuto, ang akon mga ginikanan kag utod nagpalapit sa mga ginikanan sang drayber kag naghambal sang mga pulong sang pagpaumpaw kag kapatawaran. Nag-shake hands ang mga lalaki; nagkapyut-kamot ang mga babayi; naluoy sila sa isa kag isa kag gintandaan nila nga ang duha ka pamilya nakaagi sa grabi nga pagantos. Si Nanay, si Tatay, kag si Katy nangin ihemplo sang kusog kag kaisog kag nagpakita sa amon pamilya kon ano ang kapatawaran.
Ina nga pagpaabot sang kapatawaran sang amo nga tion nagpahumok sang akon tagipusoon kag naghatag sang dalan para sa pag-ayo. Amat-amat ko natun-an kon paano makaangkon sang mapatawaron nga tagipusoon. Paagi lang sa bulig sang Prinsipe sang Paghidaet namag-an ang akon sakit nga palas-anon. Pirme ko mahidlaw kay Tommy kag Joan, pero tungod sa kapatawaran, madumduman ko sila nga wala may nagapugong sa akon kalipay. Kag kabalo gid ako nga magupdanay kami liwat bilang pamilya.
Wala ko ginasiling nga itugot na lang naton ang mga krimen. Kabalo gid kita nga may salabton ang maghimo sang krimen kag sibil nga sala. Pero kabalo man kita nga bilang mga anak sang Diyos, nagasunod kita sa mga tudlo ni Hesu Cristo. Dapat kita magpatawad bisan pa kon daw indi takos ang isa ka tawo sang aton kapatawaran.
Gintudlo sang Manluluwas:
“Kay kon patawaron ninyo ang mga tawo nga nakasala sa inyo, patawaron man kamo sang inyo Amay sa Langit:
“Pero kon indi kamo magpatawad sa mga tawo nga nakasala sa inyo, ang inyo Amay indi man magpatawad sa mga sala ninyo.”3
Kita tanan makabaton sang di-masambitan nga paghidaet kag pagugyon sa Manluluwas kon patawaron gid naton ang nakasala sa aton. Ini nga pagugyon nagadala sang gahum sang Manluluwas sa aton kabuhi sa pamaagi nga indi masal-an kag indi malipatan.
Ginlaygay ni Apostol Pablo:
“Bilang mga pinili sang Diyos, mangin maluluy-on kamo, mabinuligon, mapainubuson, malolo, pasensyoso;
“Nagapasensiya sa isa kag isa, kag nagapatawad sa isa kag isa … : parehas nga ginpatawad kamo ni Cristo, kamo man magpatawad.”4
Siling sang Ginuo Mismo:
“Gani, siling ko sa inyo, nga dapat kamo magpatawad sa isa kag isa; kay ang indi magpatawad sa iya utod nga nakasala pagabasolon sang Ginuo; kay yara sa iya ang mas dako nga sala.
“Ako, ang Ginuo, magapatawad suno sa akon kabubut-on, pero kamo ginakinahanglan nga magpatawad sa tanan.”5
Maathag ang pagtudlo sang aton Manluluwas kag Manunubos nga si Hesu Cristo; kinahanglan nga handa ang makasasala nga magpatawad sa iban kon gusto niya nga siya mismo patawaron.6
Mga kautoran, may ara bala mga tawo nga naghalit sa aton? May ginadala bala kita nga aligotgot kag kaakig nga daw matarong sa mata naton? Wala bala kita nagapatawad o nagabuhi tungod sa bugal naton? Ginahagad ko ang tagsa-tagsa sa aton nga magpatawad sing bug-os agod mag-ayo kita. Kag bisan pa kon indi naton masarangan nga magpatawad subong nga adlaw, kon ihandum naton kag tinguhaan, magaabot gid ina—parehas sa akon naagyan sang napatay ang utod ko.
Palihog tandaan man nga sakop sa kapatawaran ang pagpatawad sa aton kaugalingon.
“Ang naghinulsol na sa iya mga sala,” hambal sang Ginuo, “ang amo man patawaron, kag ako nga Ginuo, indi na magdumdum pa.”7
Subong nga adlaw, Nagapakilooy ako sa aton tanan nga dumdumon kag sundon ang ihemplo ni Hesu Cristo. Sang nagaantos siya sa krus sa Golgotha, ginhambal niya ini: “Amay, patawaron mo sila; kay wala sila kabalo sang ginahimo nila.”8
Kon may ara kita sang mapatawaron nga ugali kag patihon naton, parehas sa akon mga ginikanan kag utod, maangkon gid naton ang promisa sang Manluluwas: “Ginapabilin ko ang kalinong sa inyo, ang akon kalinong ginahatag ko sa inyo: indi ini pareho sang kalinong nga ginahatag sang kalibutan. Indi kamo magproblema, kag indi man kamo magkahadlok.”9
Ginapamatud-an ko nga ini nga kalinong magaabot sa aton kabuhi kon magpati kita sa mga tudlo ni Hesu Cristo kag sundon ang iya ihemplo paagi sa pagpatawad sa iban. Ginapromisa ko nga kon magpatawad kita, pabaskogon kita sang Manluluwas, kag ang Iya gahum kag kalipay mag-ilig sa aton kabuhi.
Wa’ay na tawo sa lulubngan. Buhi si Cristo. Kilala ko Siya. Palangga ko Siya. Nagapasalamat ako si Iya grasya, nga amo ang nagapabaskog nga gahum nga makapaayo sang tanan. Sa balaan nga ngalan ni Hesu Cristo, amen.