Onem Laet Blong Yu
Ol profet oli stap singaot long yumi, ol sista blong mi. ?Bambae yumi stap stret mo gud? ?Bambae yu talemaot klia bilif blong yu? ?Bambae yu onem laet blong yu?
Maet yu no save hemia, be Presiden Monson mo mi mitufala i ol twin. Long stret dei we mi mi bon—long stret aoa—long Not blong Kalifonia, Thomas S. Monson we i gat 36 yia long taem ia, oli bin sastenem hem i kam olsem wan niufala Aposol. Mi lavem spesel koneksen ia we mi gat wetem profet blong God ia, Presiden Monson.
Ol profet oli stap tokbaot ol woman.1 Bambae yu harem sam long ol toktok blong olgeta long miting ia. Long toktok blong mi, bae mi tekem i go bak kolosap 40 yia i pas long wan naesfala profesi we Presiden Spencer W. Kimball i bin raetem. Septemba 1979 hem i nambatu taem we ol woman blong Jos raon long wol oli kam mit tugeta long jeneral miting blong olgeta. Presiden Kimball hem i bin rere long toktok blong hem, be taem we dei blong konfrens i kam, hem i stap long hospital. Mekem se, hem i askem waef blong hem, Camilla Eyring Kimball, blong ridim toktok blong hem long bihaf blong hem.2
Sista Kimbol i bin ridim ol toktok blong profet, we i poenemaot paoa we ol LDS woman oli gat long ol gudfala woman long wol ia bifo Seken Kaming blong Sevya. Kolosap long en, i gat wan strong filing blong glad long ol woman blong Jos we yumi stap tokbaot yet kasem naoia.
Letem mi kwotem smol wanem we Presiden Kimball i bin talem:
“Laswan, ol dia sista blong mi, bae mi talem wan samting long yufala we oli neva bin talem bifo o oli neva talem olsem ia. Plante long ol bigfala samting we i stap mekem Jos i stap gro bigwan long ol las dei ia, bae i hapen from plante gudfala woman long wol ia … bae oli joenem Jos long ol bigfala namba. Hemia bae i hapen folem fasin ia se, ol woman blong Jos oli stap soemaot stret mo gud fasin mo oli gat fasin blong save talemaot samting i klia long laef blong olgeta, mo i go kasem mak ia we bae oli luk se ol woman blong Jos oli no semmak mo oli defren—long ol gudfala wei—defren long ol woman blong wol.
“Long medel blong ol tru mo impoten woman long wol ia we bae oli kam insaed long Jos, i gat ol woman we oli wari moa long saed blong stap stret mo gud bitim blong stap selfis. Ol tru mo impoten woman ia, oli gat tru fasin blong putum tingting i stap daon, we i mekem se oli lukluk moa long fasin blong stap tru bitim fasin blong soem olgeta olsem se i tru. …
“… Bambae hem i ol … eksampol blong ol woman blong Jos, we bae i stap olsem wan bigfala paoa blong mekem Jos i gro, tugeta long namba mo long saed blong spirit long ol las dei.”3
Toktok ia hem i visen blong wan profet. Long sot toktok:
-
Bambae hem i ol gudfala rilesensip blong ol woman we bae i mekem se plante samting bae oli kam antap bigwan insaed long Jos long ol yia we oli stap kam.
-
Ol frensip we ol Rilif Sosaeti woman, ol yang woman, mo ol Praemeri gel oli bildimap wetem ol tru, fetful, woman mo gel blong God blong ol narafala fet mo bilif, bae i wan bigfala paoa long olsem wanem Jos bae i gro long ol las dei.
-
Presiden Kimball i singaotem ol woman we i kam long ol narafala bakgraon ia ol “top woman” we bae oli wari moa long saed long stret mo gud fasin i bitim fasin blong stap selfis, we bae oli soemaot long yumi se fasin blong stap tru i moa impoten bitim fasin blong soem olgeta olsem se oli tru.
Mi bin mitim plante long ol gudfala woman ia taem mi stap mekem wok blong mi raon long wol. Ol frensip blong olgeta i spesel tumas long mi. Yu save olgeta tu long medel blong ol fren o neiba blong yu. Ating oli memba o no memba blong Jos yet, be yumi save joen tugeta long wan frensip we i impoten tumas. Okei. ?Olsem wanem nao yumi mekem pat blong yumi? ?Wanem nao yumi mas mekem? Presiden Kimball i tokbaot faevfala samting:
Faswan hem i blong stap stret mo gud. Blong stap stret mo gud i no minim se yu stap stret evriwan o neva mekem ol mistek. Hem i minim se yumi developem wan dip rilesensip wetem God, sakemaot ol sin mo ol rong blong yumi, mo glad blong helpem ol narawan.
Ol woman we oli sakem sin, oli jenisim rod blong histri. Mi gat wan fren we hem i gat wan aksiden long trak taem we hem i yangfala, mo aot long hemia, hem i gat wan adiksen long ol meresin blong daonem soa blong bodi. Afta, papa mo mama blong hem i divos. Hem i gat bel long wan sot rilesensip blong hem, mo adiksen blong hem i gohed. Be wan naet hem i luk trabol mo ol samting we oli stap olbaot long laef blong hem, mo tingting se “Inaf”. Mo hem i toktok i krae long Sevya Jisas Kraes blong helpem hem. Hem i talem se hem i bin lanem se Jisas Kraes i strong bitim situesen we hem i stap long hem, mo hem i save dipen long paoa blong Hem taem hem i stap wokbaot folem rod blong sakem sin.
Taem hem i kambak long Lod mo folem ol wei blong Lod, hem i jenisim rod blong histri blong hem, histri blong smol boe blong hem mo blong niufala hasban blong hem. Hem i stret mo gud; mo hem i gat wan hat we i wantem blong helpem olgeta we bin mekem ol mistek mo oli wantem blong jenis. Semmak olsem yumi evriwan, laef blong hem i no stret evriwan, be hem i save olsem wanem blong sakem sin mo gohed blong traem.
Nambatu hem i fasin blong talemaot samting i klia. Blong talemaot klia i minim se yu talemaot klia filing blong yu abaot wan samting mo from wanem. Long stat blong yia ya, i bin gat wan post long Fesbuk niuspej blong mi we i talem nogud fasin blong stap olsem wan Kristin. Mi bin ridim mo mi kros lelebet be mi no wantem tingbaot. Be, i gat wan fren blong mi we i no wan memba blong fet blong yumi i postem ansa blong hem. Hem i raetem: “[hemia] i agensem wanem we Jisas i wantem—hem i …talemaot strong ol tingting blong hem long taem blong hem from se hem i …mekem wol ia i stret gud. …Hem i [toktok] wetem ol woman blong rod…, i [kakae] wetem ol man blong kolektem takis …, i gud fren wetem ol woman mo ol pikinini we oli no strong …, [mo] i givim yumi stori blong Gudfala Man Sameria. … Hemia i minim se … ol tru Kristin, oli ol pipol long wol ia we oli stap traehad blong gat PLANTE lav.” Taem mi ridim hemia, mi tingting long miwan, “?From wanem nao mi no raetem hemia?”
Wanwan long yumi i nid blong kam moa gud long saed blong save talemaot i klia gud ol risen blong fet blong yumi. ?Olsem wanem nao yu filim abaot Jisas Kraes? ?From wanem nao yu stap long Jos? ?From wanem nao yu bilif se Buk blong Momon hem i skripja? ?Pis blong yu i kam wea? ?From wanem nao i impoten se profet i gat wan samting blong talem long 2017? ?Olsem wanem nao yu save se hem i wan tru profet? Yusum voes blong yu mo paoa blong yu blong talemaot klia wanem yu filim mo save—long sosol media, ol kwaet stori blong yu wetem ol fren, ol stori wetem ol apupikinini. Talem long olgeta from wanem yu bilif, yu filim olsem wanem, sapos yu bin gat tu tingting, olsem wanem yu winim hemia, mo Jisas Kraes i minim wanem long yu. Olsem we Aposol Pita i bin talem: “Yufala i no fraet … Yufala i mas mekem Kraes i Masta blong yufala, mo yufala i mas mekem hem i nambawan long laef blong yufala. Mo sapos ol man oli askem long yufala from wanem yufala i putum tingting blong yufala i stap long Kraes, oltaem yufala i mas rere blong givim ansa long olgeta.”4
Nambatri hem i blong stap defren. Bae mi talem wan stori long yu we i bin hapen long Julae ia long Panama Siti Bij long Florida.5 Long let aftenun, Roberta Ursey i bin luk tufala yang boe blong hem i stap singaot from help 90 mita aotsaed long solwota. Tufala i fas long wan strong taed we i stap karem tufala i go aotsaed. Wan man wetem woman blong hem i traem blong sevem tufala boe ia be tufala tu i fas long taed ia. Ol memba blong Ursey famli oli jiam i go insaed blong sevem olgeta be kwiktaem nomo naen man oli fas insaed long taed ia.
I no gat rop. I no gat man sekiuriti blong solwota. Polis i bin sendem toktok from wan bot blong kam sevem olgeta be 20 minit finis i pas we olgeta i stap traehad long wota, mo naoia, oli taed mo hed blong olgeta i stap draon sloslo i go andanit long wota. Long medel blong ol man we oli stap lukluk i go, i gat Jessica Mae Simmons. Hasban blong hem i gat tingting ia blong ol man oli mekem wan jen blong ol pipol. Oli singaot long ol man long so blong helpem olgeta, mo plante man oli joenem ol han tugeta mo oli laenap i go aotsaed long solwota. Jessica i raetem: “!Blong luk ol man blong ol defdefren kala, man mo woman, oli kam tugeta blong helpem ol FUL strenja, hem i wan sapraes tumas blong luk!”6 Wan jen blong 80 man oli laenap i go long ol man we oli stap swim ia. Luk pikja ia blong bigfala taem ia.
Evriwan long so oli save tingbaot nomo ol nomol fasin blong help mo oli nomo save mekem wan samting. Be wan kapol, long wan sot taem nomo, i bin tingbaot wan narafala ansa. Fasin blong save mekemap mo krietem wan samting hem i ol presen long saed blong spirit. Taem yumi stap holem taem ol kavenan blong yumi, bambae i save mekem yumi defren aot long ol narafala long kalja mo sosaeti blong yumi, be i givim yumi wan rod blong kasem insperesen blong yumi save tingbaot ol defren ansa, ol defren rod, ol defren samting blong mekem. Bambae yumi no semak long wol ia samtaem, be blong stap defren long wan gudfala wei hem i save stap olsem wan sef ples blong olgeta we oli stap traehad.
Nambafo hem i blong no stap semmak wetem ol narawan. Blong no stap semmak wetem ol narawan hem i minim blong gat wan standet. Bae mi gobak long stori blong Jessica Mae Simmons long solwota. Taem we jen blong ol man ia i stap laenap i go long ol man we oli stap swim ia, hem i save se hem i save help. Jessica Mae i talem se: “Hem i isi blong mi save holem win blong mi mo swim raonem pul blong Olimpik. [Mi save olsem wanem blong kamaot long wan strong taed]. Mi save se mi save karem [wanwan long olgeta we oli stap swim ia] i kam long jen blong ol man ia.”7 Hem mo hasban blong hem i karem ol smol smol flota mo swim folem jen ia kasem we tufala i kasem ol man we oli stap swim ia mo karem olgeta wanwan i kambak long jen, we oli pasem olgeta kasem so mo oli sef. Jessica i gat wan skil we i no semmak: hem i save olsem wanem blong swim agensem wan strong taed.
Gospel we i bin kambak i gat sam standet we yumi save luksave. Be yumi mas folem long wan fasin we i defren. Olsem Jessica i praktis blong swim, yumi mas praktisim blong laef folem gospel long ol taem blong imejensi, blong bae yumi no fraet, bae yumi save stap strong blong helpem ol narawan taem we taed i stap pulumaot olgeta.
Mo laswan, namba faefhem i blong mekem nambawan kasem nambafo antap ia wetem glad. Blong stap glad i no minim se bae yu sakem wan plastik smael long fes blong yu nomata wanem i stap hapen. Be i minim blong folem loa blong God mo stap bildimap mo leftemap ol narafala man.8 Taem yumi bildimap man, taem yumi leftemap hevi blong ol narafala man, hemia i blesem laef blong yumi long ol wei we ol hadtaem blong yumi i no save tekemaot ol blesing ia. Mi gat wan kwot blong Presiden Hinckley we mi putum long wan ples we bae mi save luk evri dei. Hem i talem : “Yu no … bildimap samting aot long fasin blong nogat tras o tingting we i no stret. Yu lukluk wetem hop, wok wetem fet, mo bae ol samting oli hapen.”9
Wan eksampol blong spirit ia we i glad mo i gat hop, i wan gel blong 13 yia we nem blong hem i, Elsa, we famli blong hem bae i muv i go long Baton Ruj, Lusiana, 2900km aot long ol fren blong hem. Hem i no isi tumas taem we yu gat 13 yia mo bae yu muv i go long wan niu ples. Elsa i no harem gud tumas long muv ia mekem se papa blong hem i givim wan blesing long hem. Taem we oli stap givim blesing long hem, fon blong mama blong hem i kasem wan teks mesej. Ol yang woman we oli stap long Lusiana oli sendem wan foto wetem ol toktok ia “!Plis muv i kam long wod blong mifala!”10
Ol yang woman ia oli gat hop se bae oli laekem Elsa iven we oli no bin mitim hem yet. Intres blong olgeta ia i krietem intres insaed long Elsa abaot muv ia mo i ansarem prea blong hem se evri samting bae i oraet.
I gat wan paoa we i kam long fasin blong glad mo hop we i no blesem yumi nomo—be i bildimap evriwan raon long yumi. Eni smol samting we yu mekem blong mekem ol narafala man i glad i soemaot se yu stap karem toj ia finis we Presiden Kimball i bin laetem.
Mi bin gat 15 yia long taem we Presiden Kimball i givim toktok ia. Mifala, we mifala i gat ova long 40 yia i stap mekem wok ia we Presiden Kimball i tokbaot stat long dei ia finis. Naoia mi luk long olgeta we oli gat 8 yia, 15 yia, mo 20 yia, mo 35 yia mo bae mi pasem toj ia i kam long yufala. Yufala i ol fiuja lida blong Jos ia, bambae hem i wok blong yufala blong muvum wok ia i go fored mo mekem profesi ia i kamtru. Mifala we mifala i ova long 40 yia i joenem han blong mifala wetem yufala mo filim strong mo paoa blong yu. Mifala i nidim yufala.
Lisin long skripja ia we i stap insaed long Doktrin mo Ol Kavenan 49:26–28. Maet oli bin raetem long wan defren taem, be tunaet tru long Tabu Spirit, mi hop se bae yu tekem olsem wan koling blong yu long tabu wok ia.
“Luk mi talem long yu, go fored olsem we mi komandem yu; sakem evri sin blong yu; askem mo bae yu save kasem; noknok mo bae i open long yu.
“Luk, bae mi go fastaem long yu mo biaen long yu; mo bae mi stap long medel blong yu, mo bae yu no save lus.
“Luk, Mi mi Jisas Kraes, mo mi kam kwiktaem.”11
Mi askem strong long wanwan long yufala blong putum yu long wan ples we yu save filim bigfala lav we God i gat long yu. Yu no save stanap long ples we yu no kasem lav ia. Taem yu filim lav blong Hem, taem yu lavem Hem, bambae yu sakem sin mo folem ol komanmen blong Hem. Taem yu obei ol komanmen blong Hem, bae Hem i save yusum yu long wok blong Hem. Wok mo glori blong Hem, hem i blong mekem ol man mo ol woman oli kam olsem ol god mo kasem laef we i no save finis.
Ol profet oli stap singaot long yumi, ol sista blong mi. ?Bambae yu yu stap stret mo gud? ?Bambae yu yu talemaot klia bilif blong yu? ?Bambae yu yu save stap defren mo gat wan standet? ?Bambae hapines blong yu nomata long ol hadtaem blong yu i save pulum ol narawan we oli gud mo stret mo oli nidim frensip blong yu? ?Bambae yu onem laet blong yu? Mi testifae se Lod Jisas Kraes bae i go long fored blong yumi mo bae i stap long medel blong yumi.
Mi en wetem ol toktok blong profet we yumi lavem tumas, Thomas S. Monson: “Ol dia sista, hemia hem i dei blong yufala, hemia hem i taem blong yufala.”12 Long nem blong Jisas Kraes, amen.