Blong Yufala I Save Glad Oltaem
Jisas Kraes i stamba blong evri hiling, pis mo wok we i no save finis.
Ol brata mo sista. Hem i wan glad blong stap wetem yufala. Mo hemia nao wanem we mi laekem blong tokbaot wetem yufala long moning ia—wan glad we i fulwan.
Wan bigfala storian long nius i rid olsem, “Ol disasta oli muvum nesen mo wol.”1 Stat long ol hariken mo wota we i kavremap ples go kasem weta we i hot tumas mo draetaem, ol wael faea mo graon i seksek, ol wo mo ol siknes, we i luk olsem “wol ia kasem en blong hem.”2
Milian pipol oli muv i go long nara ples, mo plante laef i bin safa from ol jalenj ia. Raorao insaed long ol famli mo ol komuniti, wanwan man i traehad wetem filing blong fraet, tu tingting mo wari from plan we i no gotru. Bae i had blong filim glad ia we Lihae i bin tijim se i stamba blong laef.3 Yumi evriwan i askem samtaem se: “?Bae mi go wea blong faenem pis?” “?kamfot blong mi wea?”4 Yumi wari se: “Be olsem wanem nao bae mi faenem glad nomata ol hadtaem blong laef long wol ia?”
Maet ansa ia i simpol tumas, be i gat pruf se hemia i tru stat long taem blong Adam finis. Glad ia we i no save finis yumi faenem taem yumi lukluk long Sevya blong yumi, Jisas Kraes, mo laef folem gospel olsem we Hem i bin soem mo tijim. Moa yumi lanem abaot, gat fet long, mo folem Jisas Kraes, moa yumi kam blong andastanem se Hem i stamba blong evri hiling, pis, mo wok we i no save finis. Hem i invaetem wanwan long yumi blong kam long Hem,5 mo hemia i wan invitesen we Presiden Henry B. Eyring i putum se hem i “invitesen we i moa impoten bitim ol narawan we eniwan i save kam blong akseptem.”6
Lanem Samting long Jisas Kraes
?Olsem wanem nao yumi kam long Hem?” Las Epril, Presiden Russell M. Nelson mo Elda M. Russell Ballard, tufala i leftemap tingting blong yumi blong stadi “Kraes we I Laef”7 olsem pat blong lanem abaot Sevya. Plante i akseptem jalenj ia mo bin kasem blesing. I no longtaem i pas, wan dia fren i givim wanwan atol pikinini blong hem wan kopi blong buk ia wetem pikja mo ol sot toktok andanit olgeta abaot gospel. Hem i leftemap tingting blong ol pikinini blong hem blong helpem ol apu pikinini blong hem blong andastanem mo save baehat. Samtaem afta, fren blong mi i serem wan vidio blong sikis yia apugel blong hem Laynie we i stap talem baehat ol ves wetem intres mo bilif long hemwan nomata i saonem nogud sam leta. Mi luksave se !sapos wan tri yia pikinini i save mekem, mi tu, mi save mekem!
Mi bin stap stadi long laef mo tijing blong Jisas Kraes wetem moa plante tingting, mo taem mi komitim mi blong lanem “Kraes we I Laef” baehat, tangkyu blong mi mo lav blong mi long Sevya i gro. Wanwan sentens blong naesfala pepa ia i gat wan tijing mo i bin givim plante moa save long mi abaot tabu wok mo misin blong Hem long wol ia. Wanem we mi bin lanem mo filim long taem we mi stap stadi mo dip tingting, i konfemem long mi se Jisas “Hem i laet, laef, mo hop blong wol.”8 Ol skripja blong longtaem bifo mo ol toktok blong ol profet blong lata-dei we oli bin raet o talem blong presem Hem, oli witnesem se “Rod blong Hem i rod we i lid i go long hapines long laef ia mo long laef we i no save finis long wol we bae i kam.”9
Gat Fet long Jisas Kraes
Taem yu stap stadi laef mo tijing blong Kraes long plante defren wei, fet blong yu long Hem bae i gro. Yu bae kam blong save Hem, se Hem i lavem yu mo andastanem gud yu. Long ol 33 yia blong laef blong Hem long wol ia, ol pipol oli no laekem hem, tok nogud long hem, Hem i harem nogud long bodi, i hanggri, i tosta, mo i filim taed;10 hem i harem nogud we Hem i stap Hemwan; Hem i fesem abius long toktok mo long bodi; mo long en, i fesem wan ded we i soa tumas long ol han blong man ol man nogud.11 Long Garen blong Getsemane mo long kros blong Kalvari, Hem i bin filim evri soa blong bodi, fulap hadtaem, temtesen, sik blong yumi, mo evri samting we yumi no strong long hem.12
Nomata wanem safaring yu gat, Hem i stamba blong hiling. Olgeta we i gat eksperiens long eni kaen fasin nogud blong man, ded long famli, sik we i stap longtaem o handikap, ol giaman blong agensem yu, strong toktok agensem yu, o damej long saed blong spirit from sin o sam konfius tingting, evriwan i save kam oraet bakegen tru long Ridima blong wol. Be, Hem bae i no kam insaed we yu no invaetem Hem. Yumi mas kam long Hem mo letem Hem i wokem ol merikel blong Hem.
Wan naesfala dei mi lego doa i open blong filim fres win. Wan smol pijin i flae i kam insaed long open doa ia mo hem i luksave se hemia i no ples we hem i wantem stap long hem. I flae krangke raon long rum mo gohed blong stap flae i go long glas windo blong hem i ronwe. Mi traem sloslo nomo blong lidim hem tru long doa, be hem i fraet mo stap ronwe. Long en, hem i foldaon long kaliko blong windo we i taed tumas. Taem mi holem wan brum mo sloslo pusum en blong brum kolosap long leg blong hem, pijin ia i wokbaot wetem fraet i stanap long brum. Sloslo, mi wokbaot i go long doa we i open, mi traem blong holemtaet brum ia blong i no foldaon. Taem mifala i kasem doa, pijin ia i flae i go fri.
Olsem pijin ia, samtaem yumi fraet blong gat tras from yumi no save ful lav blong God mo wantem tumas blong Hem blong helpem yumi. Be taem yumi stadi plan blong Papa long Heven mo misin blong Jisas Kraes, yumi andastanem se stamba tingting blong Tufala hem i hapines blong yumi mo progres blong yumi we i no save finis.13 Tufala i glad blong help taem yumi askem, lukaot, mo kilkilim doa.14 Taem we yumi praktisim fet mo, wetem tingting we i stap daon, rere long ol ansa blong Tufala, yumi bae kam fri long ol mistek mo ol toktok blong tu tingting, mo bae oli soem rod blong muv fored.
Jisas Kraes hem i stamba blong pis. Hem i invaetem yumi blong “lei fulwan long han blong Hem”15 mo promesem “pis … pis we hem i givim, we i bigfala moa, i bitim save blong yumi,”16 wan filing we i kam taem Spirit blong Hem i “toktok pis long ol sol blong yumi”17 nomata wanem jalenj raon long yumi. Nomata se oli ol traehad blong yumiwan, ol trabol blong famli, o komuniti problem, pis bae kam long yumi taem yumi trastem Wan Pikinini ia nomo blong God blong kamfotem ol sol blong yumi we oli soa.
Snježana Podvinski, wan smol namba long ol Sent long Kalovak, Kroesia, i lei long Sevya taem hasban, papa mo mama blong hem oli ded long sikis manis taem nomo las yia. Wari i kavremap hem, be hem i gat testemoni ia se famli i stap fovea, mekem se hem i yusum evri mane blong hem blong i go long tempol, ples we hem i sil wetem hasban, papa mo mama. Hem i serem se ol dei insaed long tempol i bin wan haelaet long laef blong hem. From strong testemoni blong Jisas Kraes mo Atonmen blong Hem, hem i filim pis mo eksperiensem hiling we i bin stap tu olsem wan paoa long olgeta we oli stap raon long hem.
Fet long Jisas Kraes i tekem i kam moa presen bitim hiling mo pis. Olsem we Presiden Henry B. Eyring i serem: “Mi bin talem tangkyu from plante wei we Lod i bin visitim mi wetem Spirit blong Givhan taem mi nidim pis. Be Papa long Heven i no tingbaot nomo kamfot blong yumi be tu progres blong yumi i go antap.”18
From Atonmen blong Jisas Kraes, we i gat insaed ol presen blong fasin blong pemaot mo laef bakegen long ded, i mekem yumi save sakem sin, jenis, mo progres we i no save finis. From paoa we Hem i givim long yumi taem yumi obei, yumi save kam moa antap bitim we yumi save mekem yumiwan. Yumi no save andastanem fulwan olsem wanem, be wanwan long yumi we i bin filim se fet blong hem long Kraes i kam antap i bin kasem tu wan bigfala save long tabu aedentiti mo stamba tingting, we i lidim yumi blong mekem ol joes we i folem save ia.
Nomata wol ia bae i traem blong kilim yumi i go daon long level we “yumi nomo impoten,”19 be taem yu save se God Hem i Papa blong yumi, i givim yumi hop se yumi gat wan tabu paoa mo promes blong king. Nomata wol ia i talem long yumi se laef ia i no gat hop blong gro, blong save se Wan Pikinini ia nomo blong God i bin mekem i posibol blong pemaot yumi mo kasem laef bakegen long ded i givim yumi hop blong progres we i no save finis.
Mekem Olsem Jisas Kraes
Taem yumi lanem moa abaot Jisas Kraes, fet blong yumi i gro long Hem mo yumi wantem folem eksampol blong Hem. Blong kipim ol komanmen blong Hem i kam wan bigfala wantem tumas blong yumi. Hat blong yumi i wantem tumas blong helpem safaring blong narafala man olsem we Hem i bin mekem, mo yumi wantem olgeta blong save pis mo hapines we yumi bin faenem.
?From wanem i gat plante paoa taem yumi folem hem? From taem yumi putum fet blong yumi long aksen, Tabu Spirit i talem witnes abaot trutok ia we i no save finis.20 Jisas i givim instraksen long ol disaepol blong Hem blong obei ol komanmen blong Hem from Hem i save se taem yumi folem eksampol blong Hem, bae yumi stat blong filim glad, mo taem yumi stap gohed long rod blong Hem, bambae yumi kam blong kasem wan ful glad. Hem i eksplenem: “Mi mi stap talemaot ol tok ya long yufala, blong yufala i save glad oltaem, olsem we oltaem mi mi glad, nao bambae yufala i glad we i glad.”21
?Yumi bildim ol testemoni blong yumi long stamba blong ston ia we i Jisas Kraes mo gospel blong Hem? ?Taem ol hadtaem blong laef ia oli strong tumas, yumi lukaotem wan buk we i tokabaot wanem blong mekem o postem long intanet blong kasem help? Taem yumi tekem taem blong bildimap mo mekem i kam strong save mo testemoni blong yumi long Jisas Kraes bae i givim plante rij gud samting long ol taem blong tes mo hadtaem. Ridim ol skripja evri dei, mo tingting hevi long ol toktok blong ol profet we oli stap laef, mekem ol impoten prea blong yuwan; kakae sakramen wetem plante mining evri wik, givim seves olsem we Sevya bae i mekem—wanwan long ol simpol aktiviti ia bae i kam wan brikis blong haos, blong wan laef we i fulap wetem glad.
?Wanem nao i givim glad long yu? ?Fes blong olgeta we yu lavem afta long wan long dei? ?Tok tangkyu from gudfala wok we yu mekem? ?Laet long ae blong wan man taem yu serem hevi trabol blong olgeta? ?Ol toktok long wan hym we i tajem hat blong yu? ?Wan gudfala fren blong yu i sapotem yu? Tekem taem, yuwan, blong lukluk long ol blesing ia, mo faenem wei blong serem olgeta. Taem yu gohed blong givhan blong givim seves mo leftemap ol brata mo sista insaed long eria blong yu o raon long wol ia we i no klia yet long plante samting, bae yu filim bigfala pis mo hiling mo iven progres.
Kam long Hem. Mi testifae se taem yu putum Jisas Kraes long medel blong laef blong yu, yu bae faenem glad long ol hadtaem blong yu, nomata wanem kaen hadtaem. I tru se, “Hem, Wan ia nomo,”22 hem i ansa. Mekem taem mo tekem taem blong kam blong save Jisas Kraes tru long stadi evri taem, developem fet long Hem, mo traehad blong kam moa olsem Hem. Taem yumi mekem olsem, yumi tu, bae yumi filim blong talem wetem smol Laynie: “Yumi talem tangkyu long God from presen ia we i Hae Pikinini blong Hem, presen ia we i no gat samting moa i semmak long hem.”23 Long tabu nem blong Jisas Kraes, amen.