Yokwe E Weeppān Ej Joļo̧k Lōļn̄o̧n̄
Jān likūt iturejet lōļn̄o̧n̄ ko ad im mour kōn lan̄lōn̄, ettā bōro, kōjatdikdik, im juon lōke edim bwe Irooj ej pād ippād.
Ro jeiū im jatū jitōnbōro, ro m̧ōtta rem̧m̧an, ej juon iien em̧m̧an im lan̄lōn̄ n̄an ioon doon āinwōt juon Kabun̄ ipeļaakin laļ in kuk ippān doon ilo tōmak eo ad im iakwe n̄an Anij.
Ij kam̧oolol kōn pād in an rikanaan eo ad ejitōnbōro, Būreejtōn Thomas S. Monson. Būreejtōn, kōm naaj iien otemjej likūt ilo būruwōm naan in tōl ko am̧, kapilōk, im māletlet. Kōmij iakwe im rejtake eok; im kōmij jar kōn kwe iien otemjej.
Iiō ko ļo̧k, ke iaar jerbal āinwōt stake būreejtōn ilo frankfrut, Germany, juon sister jitōnbōro bōtaab ejjab m̧ōņōņō eaar jibadōktok eō ilo jem̧ļo̧k in juon iaan kweilo̧k ko am an stake.
“Enana ke iien in?” liin eaar ba. “Emaron̄ in kar wōr emān ak ļalem armej ro raar kiki ilo kōnono eo am̧!”
Iaar ļōmņak jidik im uwaak, “Ij tōmak bwe kiki ilo jar ej ilubwilijin men ko rem̧m̧an tata an aolep kiki.”
Lio pāleeō, Harriet, eaar ron̄ bwebwenato in im tokālik kar ba bwe eaar juon iaan uwaak ko rem̧m̧an tata iaar kwaļo̧ke.
Eddōkļo̧k Eo Eļap
Jet buki iiō ko remootļo̧k ilo North America, juon em̧m̧akūt kar ņa etan “Eddōkļo̧k Eo Eļap” kar ajeeded ilo jikin ko ejjab lōn̄ armej ie. Juon iaan jibadbad ko an reļļap eaar n̄an kairuj armej ro me rej āinwōt kiki ilo men ko an mour in jetōb.
Josep Smith eaar reel kōn men ko me eaar ron̄ jān rikwaļo̧k ro me raar m̧ōttan kein eddōkļo̧k in kabun̄ ilo tōre eo an. Ej juon iaan un ko eaar jokālet n̄an m̧ool ilo kappukōt ankilan Irooj ilo jar.
Rikwaļo̧k rein ewōr juon ļōmān kwaļo̧k ekōpaļpaļ, ekōbōkakak, kōn kwaļo̧k ko me raar jeļā kaki kōn aer kanooj kalikkar kijeek in kamijak an hell me rej kōttar rijerawiwi.1 Kwaļo̧k kein aer rekar jab kakiki armej ro—men̄e remaron̄ in kar kwaļo̧k jet ettōn̄ak ko. Jibadbad eo aer im jon̄ak eo raar āinwōt kamijak armej n̄an ukweļo̧k.
Mijak āinwōt Kareel
Ilo bwebwenato, mijak ekkā kar kōjerbale āinwōt juon wāween bwe armej ren kōm̧m̧ane juon men. Ro jinen im jemen kar kōjerbale ippān ajri ro nejier, jikin jerbal ko ippān rijerbal ro, rikōm̧m̧an kien ro ippān ribout ro.
Ritijem̧ļo̧k ro ilo wia kake remeļeļe kajoor eo an mijak im ekkā aer kōjerbale. En̄in etke jet kareelel ko āinwōt ewōr ippāer ennaan eo kōjerbal me eļan̄n̄e jelikjab n̄an wiaik m̧ōn̄ā in jibbon̄ cereal eo aer ak jab pād ilo iien ikkure video game eo ak cell phone eo, jej pād ilo kauwōtata ilo mour juon mour enanan im mej make im jab m̧ōņōņō.
Jej ettōn̄ kōn menin im ļōmņak jej jamin naaj kar po ilo kain kareel jab in, bōtaab jet iien jej. Nana eo, jet iien jej kōjerbal ejja ļamļam ko wōt n̄an kōm̧m̧an bwe ro jet ren kōm̧m̧ane ta eo jej kōņaan.
Ennaan eo aō ewōr ruo an jibadbad rainin: Eo m̧oktata ej n̄an libjerjer kōj n̄an kōļmenļo̧kjeņ im ļōmņak kōn jon̄ak eo me jej kōjerbal mijak n̄an kareel ro jet—ekoba kōj make. Eo kein karuo ej n̄an elmakote juon wāween em̧m̧anļo̧k.
Jorrāān eo kōn Mijak
M̧oktata, jān ekōnono kōn jorrāān eo kōn mijak. Kōn menin, wōn ilubwilijid ejjan̄in de kiel kōn mijak n̄an m̧ōn̄ā em̧m̧anļo̧k, kōļaak seat belt eo, kōļapļo̧k kājemourur, kōjparok jāān, joļo̧k eļāpļo̧k iien ippān ro rejitōnbōro, ak em̧ool ukweļo̧k jān jerawiwi?
Em̧ool bwe mijak ewōr an kajoor eļap in kareel ioon m̧akūtkūt ko ad im m̧wiliid. Bōtaab kareel jab in āinwōt an jidik wōt iien im pijpij. Mijak ejjab ļap an kajoor n̄an ukōt būruwōd, im ejjamin naaj ukōt kōj n̄an armej ro me rej iakwe ta eo ejim̧we im eo ekōņaan pokake Jemed Ilan̄.
Armej ro me rej mijak emaron̄ ba im kōm̧m̧ani men ko rejim̧we, bōtaab rejjab en̄jake men ko rejim̧we. Emakijkij aer en̄jake ajimakeke im matōrtōr, em̧ool illu. Āliktata en̄jake kein rej tōlļo̧k n̄an jab lōke, jab pokake, im jum̧ae.
Ejerata, jekjek in tōl pilo in n̄an mour im tōl ejjab wōr jon̄an n̄an tōmak ko an laļ in. Ekabūrom̧ōj eō n̄an ron̄ kōn membōr ro an Kabun̄ in me rej kōjerbal bōkjab ejjab wānōk—men̄e ilo m̧ōko im̧wer, kūr ko ilo Kabun̄ in, ilo jerbal, ak ilo iaio ko aer kajjojo raan ippān ro jet.
Emakijkij, armej ro remaron̄ in kwaļo̧k kakkure ilo ro jet, mekarta rejjab maron̄ loe ilo er make. Rej kōņaan uwaak eo kōn kakien ko aer make rej kōņaan, bōtaab n̄e ro jet rejjab ļoor kakien kein, rej kaen̄taan er ilo naan, en̄jake, im jet iien em̧ool ilo kanniōk.
Irooj eaar ba bwe“n̄e jej … kōjerbal ankoņak ak bōkjab ak kipel ioon jetōb ko an ro nejin armej raņ, ilo jabdewōt jekjek in jab wānōk, … lan̄ ko make rej jenļo̧k [im] Jetōb eo an Irooj ej būrom̧ōj.”2
Emaron̄ wōr iien ko n̄e jej po n̄an kapolel jerbal ko ad kōn tōmak bwe jerbal eo jej kōm̧m̧an em̧m̧an to̧o̧n wōt an em̧m̧an tōprak eo. Em̧ool jemaron̄ ļōmņak bwe n̄an kōjbwebweik ro jet, kōmedodoik, im lāj renaaj em̧m̧an n̄an ro jet. Ejjab āindein, bwe Irooj eaar kalikkare, “a leen Jetōb ej yokwe, lan̄lōn̄, aenōm̧m̧an, meanwōd, jouj, em̧m̧an, tiljek, ineem̧m̧an, [im] jatōr.”3
Juon Wāween Em̧m̧anļo̧k
An ļapļo̧k aō itok n̄an jeļā Jema Ilan̄, eļapļo̧k aō lo ekōjkan An im̧we im tōl ro Nejin. E ejjab illu, kakkure, ak komattōr.4 Lukkuun jibadbad eo An—An jerbal im An aiboojoj—ej n̄an katakin kōj, lelōn̄ļo̧k kōj, im tōl kōj n̄an wōj eo An.5
Anij eaar kwaļo̧k kadkad in Make n̄an Moses āinwōt “tūriam̧okake im jouj, rum̧wij an illu, im eļap an tūriam̧okake im m̧ool.”6
Iakwe eo an Jemed ilo Ilan̄ n̄an kōj, ro Nejin, eļapļo̧k jān ad maron̄ in keidi.7
Ej meļeļe in ke bwe Anij ej meļo̧kļo̧k ak jab kalimjōk m̧wiliid me rej jum̧ae kean̄ ko An? Jaab, lukkuun m̧ool jaab!
Bōtaab Ej kōņaan ukōt eļapļo̧k jān baj m̧wiliid. Ej kōņaan ukōt lukkuun in piktokiid. Ej kōņaan ukōt būruwōd.
Ej kōņaan bwe jān pukotļo̧k im pen ilo depdep ilo aen in depdep eo, jum̧ae mijak ko ad, im ilo peran wōnm̧aanļo̧k im lōn̄ļo̧k ilo iaļ eo eaidik im aidin̄. Ekōņaan menin n̄an kōj kōnke Ej iakwe kōj, im kōnke menin ej iaļ eo n̄an lem̧ōņōņō.
Kōn menin, ekōjkan an Anij kōlowetak ro Nejin n̄an ļoor E ilo tōre in ad?
Ekar jilkintok Nejin!
Anij eaar jilkintok Nejin Jitōnbōro Emake Wōt, Jisōs Kraist, n̄an kwaļo̧k n̄an kōj iaļ eo ejim̧we.
Anij ej kōketak kōj kōn wōt jeļā ņae, jān meanwōd, jān meoeo, ettā bōro, im jān iakwe jab ankilaan riab.8 Anij ej pād ilo rejet eo ad. Ej iakwe kōj, im n̄e jej bun̄lo̧k, Ej kōņaan bwe jān jerkak, bar kajieon̄, im erom kajoorļo̧k.
E ej ad rikakpilōklōk.
Ej ej ad kōjatdikdik ekam̧ōņōņō eļap.
An ikdeelel ej n̄an kōketak kōj kōn tōmak.
Ej lōke kōj n̄an katak jān likjab ko ad im kōm̧m̧ani kālet ko rejim̧we.
En̄in ej wāween eo em̧m̧anļo̧k in!9
Ta Nana ko an Laļ in?
Juon iaan wāween ko Setan ekōņaan kakkure ro jet ej kōn kalimjōk im em̧ool kōļapļo̧k nana ilo laļ in.
Em̧ool laļ in ad eaar iien otemjej kar, im enaaj wōnm̧aanļo̧k wōt n̄an erom, jab wānōk. Ekanooj lōn̄ armej ro ejjeļo̧k ruwier rej en̄taan kōnke kōn jekjek ko an piktok eo barāinwōt lāj an armej. Jorrāān eo im nana eo ilo tōre in ad ejej uwaer im kamijak.
Ak kōjekdo̧o̧n men kein, ikōņaan wōt mour in tōre in ijello̧kin mour ilo jabdewōt tōre ilo bwebwenato an laļ in. Eļap ad jeraam̧m̧an jān jon̄an ba n̄an mour ilo juon tōre ekanooj ļap jeraam̧m̧an ie, meļeļe, im wōnm̧aanļo̧k. Eļap jān men otemjej, jej jeraam̧m̧an n̄an bōk tarlep in gospel eo an Jisōs Kraist, eo ej letok n̄an kōj kōļmenļo̧kjeņ eo ejej uwaan kōn kauwōtata ko an laļ in im kwaļo̧k n̄an kōj ekōjkan ad jim̧or julo̧k ak ņa mejļaer.
N̄e ij ļōmņak kōn kōjeraam̧m̧an kein, ikōņaan bukwelōlō im kotak ainikiō ilo nōbar n̄an Jemedwōj Ilan̄ kōn An iakwe ejjab jem̧ļo̧k n̄an aolep ro Nejin.
Ijjab tōmak Anij ekōņaan ro Nejin n̄an mijak ak pād ilo nana ko ilo laļ in. “Bwe Anij ear jab letok n̄an kōj jetōb in lōln̄o̧n̄; a jetōb in kajoor im yokwe im kajim̧we.”10
Eaar letok n̄an kōj elōn̄ un ko n̄an lem̧ōņōņō. Jej aikuj in pukōti im kūli. Irooj emakijkij an kakememej kōj n̄an “jab mijak,” n̄an “peran wōt,”11 im n̄an “jab lōļn̄o̧n̄, bwij e dik.”12
Irooj Enaaj Tariņaik Tariņae Ko Ad
Ro jeiū im jatū, jej “bwij e dik” an Irooj. Jej Armej ro Rekwojarjar ilo Raan-ko āliktata. Jolete ilo etad ej kallim̧ur eo n̄an reim̧aanļo̧k n̄an jepļaaktok eo an Rilo̧mo̧o̧r im kōpooj laļ inn̄an bōk E. Kōn menin, jān jerbal n̄an Irooj im iakwe armej ro. Jān kōm̧m̧ane meinin kōn juon lōke, kōn ettā, jab n̄an jidik reilaļļo̧k n̄an jabdewōt bar kabun̄ ko ak kumi in armej. Ro jeiū im jatū, kar kappeik kōj kōn ekkatak naan an Anij im ron̄jake ainikien Jetōb, bwe jān maron̄ “jeļā kakōļļe ko an iien ko, im kakōļļe ko an itok eo an eo Nejin Armej.”13
Jej, kōn menin, jejjab ekkōl kōn idajon̄jon̄ ko an laļ in, ak jej ke jab ekkōl kōn apan̄ ko an tōre ko ad. Bōtaab ejjab meļeļe in jej aikuj kaddoik kōj make ak ro jet kōn mijak. Ijello̧kin pād ilo idajon̄jon̄ ko ad reļļap, enaaj ke kar em̧m̧anļo̧k n̄an kalimjōk wōj eo eļap, em̧m̧an eo ejjeļo̧k jem̧ļo̧kin, im lukkuun kajoor eo an ad Anij, lōke E, im pojak kōn juon bōro elan̄lōn̄ n̄an bar jepļaaktok eo an Jisōs Kraist?
Āinwōt armej in bujen ro An, jejab aikuj in leļn̄o̧n̄ in m̧akūtkūt kōnke kōn ta eo jej mijake emaron̄ waļo̧k. Ijello̧kin, jemaron̄ wōnm̧aanļo̧k kōn tōmak, peran, kije, im lōke ilo Anij ilo ad kepaakļo̧k idajon̄jon̄ ko im iien ko rem̧m̧an im̧aan.14
Jejjab etetal ilo iaļ eo an rikaļoor makeļo̧k. “Jeova am̧ Anij … eo ej karwaan eok; e jamin likjab jān eok, ak ilo̧k jān kwe.”15
“Jeova enaaj ire n̄an kom̧, im kom̧eo kom̧naaj ikōn̄.”16
Ilo ad ļo̧n̄tak kōn mijak, kōm̧m̧an bwe jān lo ad peran, kobaik ad tōmak, im bōk lōke eperan ilo kallim̧ur eo bwe “Jabdewōt kein tariņae em̧ōj ņa wāween ņae kōj.”17
Jej ke mour ilo juon tōre in kamijak im aen̄wān̄wā? Aaet jej mour ie.
Anij Make eaar ba, “Ilo laļ kom̧ij en̄taan: a kom̧win m̧ōņōņō; N̄a Iar bōk anjo̧ ioon laļ.”18
Jemaron̄ ke kōjerbal tōmak n̄an tōmak im n̄an jerbal ekkar n̄ane? Jemaron̄ ke mour ekkar n̄an kien ko im bujen ko rekwojarjar? Jemaron̄ ke kōjparok kien ko an Anij men̄e ilo jekjek ko reppen? Aaet jemaron̄!
Kōnke Anij eaar kallim̧ur, “Aolep men ko naaj jerbal ippān doon n̄an em̧m̧an eo ami, eļan̄n̄e kom̧ij etetal jim̧we.”19 Kōn menin, jen likūt iturejet lōļn̄o̧n̄ ko ad im mour kōn lan̄lōn̄, kōjatdikdik, im juon lōke edim bwe Irooj ej pād ippād.
Yokwe E Weeppān Ej Joļo̧k Lōļn̄o̧n̄
Ro m̧ōtta jitōnbōro, ro jeiū im jatū jitōnbōro ilo Kraist, eļan̄n̄e jenaaj lo kōj make mour ilo lōļn̄o̧n̄ ak inepata, ak eļan̄n̄e jenaaj lo bwe ad naan, m̧wil, ak m̧akūtkūt ko rej kōm̧m̧an lōļn̄o̧n̄ n̄an ro jet, innām jān ļōmņak kōn ijjitōn̄ eo ekwojarjar n̄an lōļn̄o̧n̄: kareel eo an iakwe eo erreo an Kraist n̄an ukōt laļ in, bwe “yokwe e weppān ej joļo̧k lōļņōņ.”20
Iakwe eo eweppān an Kraist ej kadikļo̧k kapo ko n̄an kakkure, kajoor, kōmattōr, ak lāj.
Iakwe eo eweppān an Kraist ej kōtļo̧k bwe jān etetal ilo ettā, kautiej, im ilo lōke ekije āinwōt rikaļoor ro an ad Rilo̧mo̧o̧r jitōnbōro. Iakwe eo eweppān an Kraist ej letok n̄an kōj lōke in ekije n̄an dipuk lōļn̄o̧n̄ ko ad im likūt ad lōke edipio ilo kajoor im em̧m̧an eo an Jemed wōj Ilan̄ im Nejin, Jisōs Kraist.
Ilo m̧ōko im̧ōd, ilo jikin pejnej ko ad, ilo kūr ko ad ilo Kabun̄, ilo būruwōd, jan bōk jikin mijak kōn iakwe eo eweppān an Kraist. Iakwe eo an Kraist enaaj bōk jikin lōļn̄o̧n̄ kōn tōmak!
An iakwe enaaj kōmaron̄ kōj n̄an kile, lōke, im wōr tōmak ilo em̧m̧an eo an Jemād wōj Ilan̄, karōk kwojarjar eo An, gospel eo An, im kien ko An.21 Iakwe Anij im armej ro enaaj ukōt ad pokake kien ko an Anij n̄an juon kōjeraam̧m̧ān ijello̧kin juon eddo. Iakwe eo an Kraist enaaj jipan̄ kōj erom jouj ļo̧k jidik, ļapļo̧k jeorļo̧k bōd, ļapļo̧k kea, im ļapļo̧k niknik ilo jerbal eo An.
Ilo ad kobrak būruwōd kōn iakwe eo an Kraist, jenaaj jerkak kōn juon jetōb ekāāl im etetal ilo lan̄lōn̄, lōke, im wāmourur ilo meram im aiboojoj eo an ad Rilo̧mo̧o̧r jitōnbōro, Jisōs Kraist.
Ij kam̧ool, ippān Rijilōk Jon, “Ejjeļo̧k lōļn̄o̧n̄ ilo yokwe [an Kraist].”22 Ro jeiū im jatū, ro m̧ōtta, Anij eweppān an jeļā kajiōm̧. Eweppān An iakwe eok. Ejeļā ta eo ilju im jekļaj ej kōttar eok kake. Ekōņaan bwe kwon “jab lōļn̄o̧n̄,” tōmak wōt”23 im “pād ilo Aō yokwe.”24 En̄in ej jar im kōjeram̧m̧aan eo aō ilo etan Jisōs Kraist, amen.