“Dooládó’ nihiDiyin God binahat’a’ ayóó át’é!
T’áá’íiyisíí nihináágóó nik’i’diidíín dóó t’áá’aaníí nihee hólóonii daats’í baa ahééh niidzin.
Nihí ayóó bee nihik’ihójidlíigo díí ahwiis’áo áłah’áłii nehéekai binahjį’ dóó nihásizǫ́ǫ bá yáłti’í nihił danilį́ dóó Naat’áanii Thomas S. Monson. Naat’áanii nihijéí bee ayóó ádaniníí’ní dóó nił déiyiniilníísh!
Chidí naat’a’í naasht’a’ yę́ędą́ą́’ éí níłch’i t’áábí ntsékeesí yéego ba’ííníshłíigo na’asht’a’ ńt’ę́ę́’ shí éí doo áłahjį’ bee naashnish da. Naashnishdi éí naaltsoos ííł’íní shá yee nidaalnish łeh.
1994 biyi’ díí łahgo ádzaa Óholnííh baa Háasyáají atah dah nedáo. Lą’ígóó Diyin bá hashne’go hoolzhiizh, ndi wóne’í naaltsoos bi na’anishjí t’óó’ahayóigo na’anish lá—t’ahdoo baa ntsíjókees ánéelą́ą’ da.
Bik’eedésyiz, naanish bee ádeishłííł éí níłch’i nitsékeesí béego t’éiyá lá.T’áa shi níłch’i ntsékeesí bee.
Ts’ída k’ad índa ádzaa, ha’át’íshį́į doo bééházin da léi’ bóhoosh’áahgo baa nídiisdzá.
T’óó, níłch’i ntsékeesí dóó shí doo ahiniilk’is da.
Yéego yéé dahósinii ch’ééh nidashíntin. Shí naasį́įgo, bíla’ doo ndi daat’į́įgóó saad bee ál’íní nídeiniłtąsh.
“Kót’éego?” ájiił’į́įh dashiłníigo. “Eíí át’éego álį́ éí.”
Doo bik’i’ diishtį́įh da. Éí shił nahontł’ah.
Tsé yistł’in t’óó bínídiishgoh nahalin.
T’áá’íiyisíí shee hodíina’, nát’ą́ą́’ áná’ásh’į́įgo, ha’ííníshníigo; ił chohoo’į́ dóó óodlą’ biłgo, bił hinishnáanii bííníghah shiłníigo; dóó tódilchxoshí łą́ągo eíí doo haitéhígíí baa hane’ da.
K’ad, 22 nááhai, níłch’i ntsékeesí t’óó’ahayóí shinaagóó haal’á. Bił choo’ínígíí t’áá’ałtso shee hólǫ́. Béésh bee hane’é t’áá’ałtso bii’ hólónígíí naash’á, níłch’i bee ak’e’elchíhí da, dóó bee i’iilkeedí ílínígíí ałdó’. Azhą́shį́į lą’í shinááhai dóó áłchíní 7 binááhaii doo bíighahgi ééhasin da ndi, yá’át’éehgo é’ésh’į́į́ł.
Ndi łahgo baa ákoniizį́į́’. T’áá yéego níłch’i ntsékeesí bóhoosh’áahgo, doo shił ílíígóó baa ntsés-kees łeh.
Háálá ałk’idą́ą́’ éí, łį́į’ yildloshgo bee hane’ nidaat’áá ńt’ę́ę́’. Lą’í yiłkááh dóó nídadizi’go índa ha-ch’į’ náhánih. Dííshjį́ éí lą’í danízáádgóó yá biyi’góó dóó tónteel bitł’ááhgóó da bee ałch’į’ da-hwiilne’, dóó doo ts’į́į́ł nihich’į’ náháne’góó bik’ee haadaniit’ée łeh, doo ha’ííníilníi da.
Éí t’áá’ ákó daniit’ée shą’shin: azhą́shį́į t’áa doole’é ayóó’át’éego bóhwiil’ą́ą’ ndi, azhą́ bee ayóó-’át’éhę́ę dóó baa hoyoo’nah doo bíniidlį́į da déiidleeh.
T’áá’aaníniish Doo Nihił Danilį́į Da Yiidlééł?
Niłch’i ntsékeesí bee na’anish doo ilį́įgóó baa ntsíikeesígíí shį́į doo át’éhéda nahalin. Ndi díí éí baa yíní hasin, łahda Jesus Christ bina’nítin hool’áágóó bee iinánígíí ákót’éego baa nitsíikees łeh. Kojí óodlą́ą́jí yéego nihik’ihojisdli’. Ayóó’át’éego adinídíín dóó t’áá’aanínii nihai yílyá áko t’ahdii daats’í nihił nilį́ nísingo baa ntsékees.
Ałk’ídą́ą́’ nahasdzáán bikáá’góó Yisdá’iinííł yił tádookai yę́ę dóó yił ahił ndahasne’ yę́ę baa ntsídaahkees. Bijéí dóó dabíni’ biyi’di shį́į yéego deidísingo yaa ahééh daniizį́į’ Yisdá’iinííł tséníí’dę́ę́’ náádiidzáago, bíla’ dóó booshk’iizh atélyaa yę́ę yídadilnihgo. Yéego be’íina’ łahgo ádaadzaa!
Joseph Smith yéé dahósin ’ę́ę dóó binááł Diyin bizaad ninályáhígíí binááł yaa nahasne’ yę́ę baa ntsínáádaahkees. Haadashą’ dabiilaa, nahasdzáán dóó yá’ąąsh bita’ na’níbaal yę́ę ą́ą́’ ánályaa hodoo’niid dóó yá’ąąshdę́ę́’ nahasdzáán bikáa’ji’ hane’ bił adaa’díídláádgo.
Ndi yéego, baa ntsíníkees, haash yinidzaa ts’ída t’óó God yisínídląąd yę́ędą́ą́’ dóó t’áá’aaníí be’awéé’ nílį́įgo nił bééhoozin yę́ędą́ą́’; dóó Jesus Christ ni bąąhá gi’át’éi yá ti’hooznii’ eíí naah tánásgiz yę́ędóó; eíí bibee’ádziil bítse’ii t’áá’aaníí dóó ayóó’ííní’nínii ts’ída doo yił ałts’ándoonił da-áádóó Diyin yá halne’ii hinánígíí dííshjį́ nihił hólǫ́, éí biníkáágóne’ God nihich’į’ yáłti’.
Díí t’áá’át’é baa ntséhákeesgo, doo dó’ sodizin bá hooghangóó ałnáájídááh doo bízhneedlį́į le’ át’ée ya’? Diyin bizaad wólta’ da bich’į’ hoł hóyée’go da ya’? Dii shį́į éí God diyinígíí dóó ayóó’át’éego niha’ níláhágíí doo nanihiiłnáa da sidĺ̨̨į́į’go éí ákódii’nííł. Iiná yá’át’éehii bee łahgo ádii’níiłii yiit’į́į dóó nihílák’ee siláa ndi łahda t’óó ajiłhosh nahalingo bíighah ch’íhiikááh. Áłahjį’ doo áajį’go da akéé’ ninéilwo’go nihiDiyin bik’ehgoyę́ę éí doo bikéé’yiidáał da. Atiin yiidááłgóó tsé ílíinii nideeztąąd ndi tsé doo ílíinii bił ał’ąą át’éhígíí doo nihił bééhózin da.
Hane’ Bééhózínígíí
Tsíłkéí nishłínéedą́ą́’, shik’is danilínígíí shi’oodlą’ yíndashídíłkid łeh. Áko bee ał’ąą ádaat’éhígíí bee bił hashne’, Words of Wisdom da. Łahda éí nááná łahdę́ę́’ oodlání bił ahidaniit’éhígíí bee bił hashne’ łeh. Doo hazhó’ó bił yá’ádaat’éeh da. Ndi Nihizhé’é God ba’áłchíní hool’áágóó ił hózhǫ́ nihá yinahaz’ą́ baa aho’niishnihgo éí, yéego da’íists’ą́ą́’ łeh.
Bénáshniihgo, yisdá’iildééh naashch’ąąhgo baa hashne’ łeh yah anéijahdi. Díí t’ahdoo nihi’dichíhę́ędą́ą́’ áádóó nihits’íís k’ad hinánígíí áádóó yá’ąąshgóó nídadeekaaígíí dishníigo na’ashch’ąąh łeh.
Ániid naasháago, díí baa hashne’go ayóo bíneeshdlį́į ńt’ę́ę́’. Hashne’go God bich’į’ ahééh nisinígíí shijéí bií háádíbį́įh, éí ba’áłchíní ayóó’áyó’ní dóó nihiYisdá’iiníiłii aniné nihá yik’eh deesdlį́į’. Ayóó’ó’ó’ni’ dóó ił hózhó dóó ił cho’hoo’į́ yaa halne’go ayóo baa shił hózhǫ́.
Shik’is ła’ ádaaníi łeh, díí hane’ bénáshniih nahalin, azhą́shį́į t’áadoo bee bił dahóone’ da ndi. T’áá’íídą́ą́’ t’áá’aaníigo át’é nahalingo yaa ntsídaakees, t’áá’íídą́ą́’ bijéí bii’ dahólónée t’óó bá biḱ’i’diiłdláád nahalin.
Bééhózinii hólǫ́!
Bíla’ ashdla’ii niidlíinii nihijéí biyi’dę́ę́’ iiná bína’ídídíilkiłgo nihee hólǫ́, Háádę́ę́’ shą’ hosélį́į’? Ha’át’íí biniiyé honishłǫ́? Haadeishnííł she’iina’ ninít’i’go?
T’áá hahóóyáádę́ę́’ kót’éego diné nida’ídíłkid. Dahalne’ii áádóó yéego da’ííłta’ii dóó yéego éédahósinii lą’í béédááhai yééda’deetįįhgo.
Baa shił hózhǫ́ Jesus Christ bahane’ ániid ánályaaígíí nantł’a ndi nizhónígo yaa halne’. Díí hane’ Gáamalii yah’anájahjí bee nda’nitin. T’áá’aaníinii át’é, doo nantł’agóó bik’i’diitį̨įh. T’áá’íiyisíí nizhóní dóó áłchíní yázhí táá’ binááhaigo bee ndaniitin.
Shik’is dóó shilah, hool’áágóó hináanii niidlį́, bee hahóót’i’ii dóó bee nihonít’i’ii ádin. T’áá’íídą́ą́’ honiidlǫ́.1 Dadiyinii dóó doo daatsaahii éí ba’áłchíní diyinii niidlį́.
Diyin God Ayóó’át’éí bił haz’ą́ą́dę́ę́’ niidzá. Elohim, Diyin Good Aláahdi át’éíbił haz’ą́ą́dę́ę́’ íit’į́. T’ahdoo nihi’dichíhę́ędą́ą́’ bił tádiit’áázh. Nihinááł yááłti’, yee ayóó’át’éi yiiltsą́, bíhwiil’ą́ą́’.
T’áá’áníidlah náházbązgi bił nahísíítą́ą́ ńt’ę́ę́’ ákwe’é Nihizhé’é ayóó’ánhó’níinii binahata’ nihinááł áyiilaa-nahasdzáán bikáa’jį’ diidááł, nihi ts’íís hodooleeł, yá’át’éehii dóó baa’ihii nihił bééhodoozįįł, áádóó bee náás díníilzééł.
Nihił bééhózingo aníbaal biníkáidzá áádóó nihokáa’jį’ nidzá, atséédą́ą́’ hinii’nánée éí doo bénéilniih da doo. Nihits’ą́ą́jí nilínígíí dóó azahont’aah hólǫ́ǫ doo. Ákondi nihits’íís hodooleeł éí íiyisíí biniiyé. T’áá’ákogi ít’éego iiná ts’į́įłgo bóhwiidiil’ááł bíká laanaa niidzin, Ch’įįdii bik’eh didiidleeł, áko yá’ąąshdi nihimá dóó nihizhé’é ba nídiidááł.
Adiilzih áádóó bąąhá gi’át’éí ádiilnííł éí nihił bééhózin—ákondi nihiYísdá’iiníiłii Jesus Christ nohokáa’gi deishááł nihidíiniidígíí éí ałdó’ nihił bééhózin, doo asiihgóó tádííyá áádóó be’iina’ nihá ninéidiní’ą́. Nihił bééhózingo nihijéí baa diniit’ą́ągo, ba’ííníídlíigo, áádóó t’áádoo nídí bikéé’ yiidáałgo, táánihi’didoogis áádóó Yá’ąądi Nihizhé’é bił yah’ańdiidááł.
Áko Jesus Christ be’íina’ nihá yee ni’nídláhígíí yiniidą́ǫ, ni dóó shí nidiilyáo, t’áá’ ániidláh nihi-Zhe’é Diyiníí binahat’a’ ádaa deet’ą́.
Éí biniiyé díí nahasdzáán hózhónígíí bikáá’ hosiidlį́į́’—Diyin God nihich’į’ kóyiilaa, dóó nihí éí nídiilyáo. Nihits’íís, yee’, éí t’óó hóníshgháníjį’ nihee hólǫ́ dóó t’áá éí nihits’íís daaztsanníjį’. Ndi biniiyé íit’ínígíí éí doo ádoodįįł da. Nihi yi’sizį́įnii éí t’áá hináa doo dóó Náá’diijeehjį’ yiba’ naagháa doo—Éí nihiZhé’é Diyiníí dóó BíYe’, Jesus Christ t’áájíík’eh nihainílá.2 Náá’diijeehgo, nihiyi’sizį́įnii dóó nihits’íís ałhiih nídoot’ash, nihił neegéi dóó ats’íís niyiiłchxǫǫh éí bąąh ádin doo.
Náá’diijéé’ bikéédóó, éí akwe’é Ánihwiit’áah dooleeł. Azhą shį́į́ t’áá’ ániit’é éí yisdándahidiikah dóó yá’ąąshdi ła’ haz’ą́nii biih diidááł, háíshį́į́ Diyin God yada’ólíhíí dóó bibee náhaz’áanii dóó bibee áda’óol’į́į́ł yik’eh dahół’ínígíí éí ts’ídá t’áadoo bináhóozhǫ́nídi hool’áágóó iiná baa nihaahididoot’ááł.
Ánihwiit’aah bijį́ eíí ááh hójooba’ dóó ayóó’ó’ó’ní hólǫ́ǫ doo—ajéí heestǫ’ę́ę nídadoodzih, yínííł hasinę́ęgi bił hózhǫ́ dadoodléełgo dacha doo, t’áá’ ałtsoní t’áá’ ákot’é ándadoolnííł.3
Aoo’, ákwe’é bąąhági át’éíi bąąh yíní na’adáadoo. Aoo’, ákwe’é bee ni’ayeelzí’ę́ę baah nihí’ni’ dóó bik’ee kaneidáadoo, t’áá’ ádzaagóó ntsíikeesę́ę, dóó doo ak’eh hóniil’į́į́góó bininaa eíí yá’át’éehii bi’oh dineedlį́į’go ch’ééh hasht’e’ niniidááh.
Ndi nihaa jííníshłí Diyin God éí baa hózhónígi ít’éego níhá nihodoo’ááł; Bí be’ajooba’ dóó be’ ayóó’ó’ó’ní’ ałdó’ baa ahééh díníídzįįł, Ba’áłchíní niidlínígíí. Nihi náanish yá’át’éehgo íilyáo, Diyin God hináanii yiniidlą́ągo ya’, áko índa Moroni yee haadzíí’yę́ę biká díníit’į́į’ doo “Jehovah, Hool’áágóó Ánihwii’aah bá dah áztáági be’elyaa doo.”4
Ha’át’íí lá Bee Niná’ílyé
Shik’is dóó shiláh ayóó’íínísh’nínii, da’ nihijéí dóó nihíni’diísh ił hózhǫ́ bii’ hadadeezbíngo díí nihiZhé’é Diyiníí nahat’á ayóó’át’éii nihá hasht’eyiilaii? Da’ ił hózhǫ́ t’áadoo baa hojólne’ígi át’éiiísh díí nihiBóhólníihii hool’áágóó iináagi nihá hasht’eh hoolaa?
T’ahdoo kót’éego yááh dóó ił hózhǫ́ nił bééhoozįįh dago, hanítá, baa ííníłta’, dóó baa nitsínkees hane’ yá’at’éehii t’áá’aaníí ániid ánályáii. “Bíni’dii hodiyin doo ninít’i’ii níni’go ánílééh.”5
Łah daásh kót’éego baa ntsídínkééz, dííjį́ bínandishkid “K’adísh ákót’éego baa ntsí[ní]-kees?”6
Ániid Belfast, Irelandóó Náhookǫsjóó ch’áá niséyá. Áadi naasháago, “Pro tanto quid retibuamus,” bikáa’go yiiłtsą́ “T’óó’ ahayóigo niha’ílyáhígíí ha’át’íí lá bidiníná ninádeidléeł lá?” níigo bikáá’?7
Díí na’ídikid baa ntsídaahkees doo. Ha’át’íísh éí nát’ą́ą́’ baa nídiilyééł adinídíín ch’inigo’ bik’é dóó Diyin God t’áá’aaníí nihik’ih yáyiinilíí?
Ła’ajį́ léi’ “t’áá’ałtso nitsidazhdidoogoh, dóó t’áá’ałtso ádaa dahozhdoolnih” God éí t’áá’aaníí dóó binahat’a’ t’áá’aaníí.8 Háálá ni dóó shi, bíni’ eííjį́ dííjį́ iilnííł. Tį́’ Jacob ałk’idą́ą́’ ádííniiyę́ę, Tį́’ bił kódii’ní, “Dooládó’ nihiDiyin God binahat’a’ ayóó át’é!”9
Díí kót’éego bee haasdzíí’, nihik’ihojidlíi dooleeł nihiZhe’é Diyinígíí, Jesus Christ bízhi’ binahjį’. Amen.