Masursuruan kada Alma ken Amulek
Namnamaek a dagiti pimmanaw iti dana ti kinadisipulo ket makakita nga usarenda ti pusoda ken masursuruan kada Alma ken Amulek.
Alma nga Ub-ubing
Maysa kadagiti kangrunaan a di malipatan a tao iti nasantuan a kasuratan ket ni Alma nga Ub-ubing. Nupay isu ti anak a lalaki ti maysa a naindaklan a propeta, nayaw-awan iti dalanna iti apagapaman ket nagbalin a “tao a nadangkes ken managrukbab iti didiosen.” Kadagiti gapu a ditayo ammo, napasnek isuna a nangsuppiat iti amana ken kinalikagumanna ti mangdadael ti Simbaan. Ket gapu iti kinalaingna nga agsarita ken mangallukoy, dakkel ti balligina.1
Ngem nagbalbaliw ti biag ni Alma idi nagparang ti Apo kenkuana ket nagsao a kas iti timek ti gurruod. Iti uneg ti tallo nga aldaw ken tallo a rabii, ni Alma “nasaplit iti awan inggana a panagtutuok, … a simmarut ti saem ti nailunod a kararua.” Ket kalpasanna, no kaskasano, nalagipna ti maysa a banag a nakatulong kenkuana—ti agnanayon a kinapudno, nga insuro ti amana: nga umayto ni Jesucristo “a mangsubbot iti basbasol ti lubong.” Idi pay laeng a saan nga inawat ni Alma dagiti kasta a sursuro, ngem ita “ iti pannakatiliw ti isipna iti kastoy a panunot,” ken sipapakumbaba, ken sipapasnek a nagtalek iti pangsubbot a bileg ni Cristo.2
Idi narimbawan ni Alma daytoy a padas, nagbalbaliw isuna. Manipud iti dayta a kanito, impaayna ti biagna iti panangatur kadagiti dadael a gapuananna. Isu ti nabileg a pagwadan ti panagbabawi, panagpakawan, ken panagibtur iti kinapudno.
Idi agangay napili ni Alma a mangsukat iti amana a kas pangulo ti Simbaan ti Dios.
Nalabit nga ammo ti tunggal makipagili ti nasion a Nephite ti estoria ni Alma. Nalabit a napno dagiti Twitter, Instagram, ken Facebook iti panawenna kadagiti ladawan ken estoria maipapan kenkuana. Nalabit a masansan a maipakita isuna iti akkub ti Zarahemla Weekly ken isu ti pagsasaritaan dagiti editorial ken network special. Iti ababa a pannao, nalabit nga isu ti kalatakan a tao iti panawenna.
Ngem idi nakita ni Alma a maliplipatanen dagiti taona ti Dios ken itagtag-ayda ti bagbagida iti kinapalangguad ken panagsusupanget, pinilina ti aglusulos iti opisina publiko ket impaayna ti bagina “a naan-anay iti nangato a saserdote ti nasantuan nga urnos ti Dios,”3 a mangikaskasaba iti panagbabawi kadagiti Nephite.
Idi damo, dakkel ti balligi ni Alma—agingga a napan isuna iti siudad ti Ammonihah. Ammo unay dagiti tao iti dayta a siudad a saanen a lider ti pagilianda ni Alma, ket saanda unay a dinayaw ti turayna iti priesthood. Indanemda, inumsida, ken pinapanawda isuna iti siudadda.
Nagladingit unay, pinanawan ni Alma ti siudad nga Ammonihah.4
Ngem imbaga kenkuana ti maysa nga anghel nga agsubli.
Panunotenyo daytoy: naibaga kenkuana nga agsubli kadagiti tao a gimmura kenkuana ken adda gurada iti Simbaan. Maysa daytoy a napeggad ken nalabit a makapatay a pagrebbengan. Ngem saan a nagkedked ni Alma. “Nagdardaras a nagsubli.”5
Nagayuno ni Alma iti adu nga aldaw idi sumrek isuna iti siudad. Idiay nga indawatna iti maysa a ganggannaet no mabalin nga “ikkanna ti nakakaasi a babaonen ti Dios iti ania man a makan.”6
Amulek
Amulek ti nagan daytoy a tao.
Ni Amulek ket maysa a nabaknang, am-ammo unay a makipagili ti Ammonihah. Nupay naggapu isuna iti kapuonan dagiti mamatpati, kimmapsut ti bukodna a pammati. Idi agangay impudnona, “Namin-adu a naawaganak ngem saanak a dimngeg; ngarud, naammuak ti maipanggep kadagitoy a banag, ngem diak pay [namati]; ngarud intuloyko ti immalsa a maibusor iti Dios,”7
Ngem insagsagana ti Dios ni Amulek, ket idi naam-ammo ni Amulek ni Alma, pinasangbayna ti katulongan ti Apo iti pagtaenganna, a nagyanan ni Alma iti uneg ti adu nga aldaw.8 Kabayatan dayta a panawen, linuktan ni Amulek ti pusona iti mensahe ni Alma, ket dakkel a panagbalbaliw ti napasamak kenkuana. Kalpasan dayta, saan laeng a namati ni Amulek, ngem nagbalin pay a mangsalsalaknib iti kinapudno.
Idi rummuar manen ni Alma tapno mangisuro kadagiti tao ti Ammonihah, adda kaduanan a saksi—ni Amulek, a kailianda.
Naglaon dagiti simmaruno a pasamak iti maysa kadagiti kararagsakan ken kalilidayan nga estoria iti amin a nasantuan a kasuratan. Mabasayo maipapan iti daytoy iti Alma kapitulo 8–16.
Ita, tarigagayak nga idawat kadakayo a panunotenyo ti dua a saludsod:
Umuna: “Ania ti masursurok ken ni Alma?”
Maikadua: “Kasano a maipadaak ken ni Amulek?”
Ania ti Masursurok ken ni Alma?
Bay-andak a mangirugi babaen ti panagsaludsod iti amin a napalabas, agdama, ken masakbayan a lider iti Simbaan ni Jesucristo, “Ania ti masursuroyo ken ni Alma?”
Nalaing ken adda kabaelanna a tao ni Alma. Mabalin a nalaka a panunoten a dina kasapulan ti tulong ti asino man. Nupay kasta, ania ti inaramid ni Alma idi nagsubli iti Ammonihah?
Nasarakanna ni Amulek ket nagpatulong kenkuana.
Ket natulongan ni Alma.
Para iti ania man a gapu, no dadduma agkedkedtayo kas lider a mangsarak ken agpatulong kadagiti Amulektayo. Nalabit nga ipagaruptayo a maaramidtayo a nasaysayaat dagiti trabahotayo no datdatayo laeng, wenno agkedkedtayo a mangsinga kadagiti dadduma, ipagaruptayo a saan a kayat dagiti dadduma ti tumulong. Masansan unay nga agkedkedtayo a mangawis kadagiti tao a mangaramat kadagiti inted ti Dios a talentoda ket makiraman iti naindaklan nga aramid ti pannakaisalakan.
Panunotenyo ti Mangisalakan—inrugina kadi nga impatakder nga is-isuna ti Simbaanna?
Saan.
Ti mensahena saan a “Ditaka laeng. Siak ti makaammo iti daytoy.” No di ketdi isu daytoy “Umaykayo, sumurot kaniak.”9 Pinaregta, inawis, insuro, ket kalpasanna pinagtalkanna dagiti pasurotna “nga aramiden dagiti banag a nakitayo nga inaramidko.”10 Iti kastoy a wagas, saan laeng a binangon ken pinatibker ni Jesucristo ti Simbaanna no di ketdi pay dagiti katulonganna.
Iti ania man a pagrebbengan nga agdama a pagserserbianyo—maysakayo man a deacons quorum president, stake president, wenno Area President—tapno agballigikayo, nasken a sapulenyo dagiti Amulekyo.
Mabalin nga isu ti maysa a tao a managpakumbaba wenno saan a makitkita kadagiti kongregasionyo. Mabalin nga isu ti maysa a tao a kasla dina kayat ti makiraman wenno dina kabaelan ti agserbi. Mabalin nga ubing wenno nataengan, lallaki wenno babbai, awan padasna, nabannog, wenno saan nga aktibo iti Simbaan dagiti Amulekyo. Ngem ti mabalin a saan a makita iti umuna ket ti panangnamnamada a denggen kadakayo dagiti balikas a ”Kasapulannaka ti Apo! Kasapulanka!”
Iti kaunggan ti pusoda, adu dagiti agtarigagay nga agserbi iti Diosda. Tarigagayanda ti agbalin a maysa a ramit kadagiti imana. Tarigagayanda ti mangipakan iti kumpayda ket mangikarigatan iti kabaelanda a mangisagana iti daga para iti panagsubli ti Mangisalakantayo. Tarigagayanda ti mangbangon iti Simbaanna. Ngem agkedkedda a mangirugi. Masansan nga agurayda a makiddaw.
Awisenkayo a mangpanunot kadagiti tao nga adda iti branch ken wardyo, kadagiti mision ken stakeyo, a nasken a mabagaan a kasapulan ti tulongda. Ub-ubogen idan ti Apo—isagsaganana ida, palpaluknengenna ti puspusoda. Usarenyo ti pusoyo iti panagsapsapul kadakuada.
Tulonganyo ida. Suruanyo ida. Paregtaenyo ida. Agdamagkayo kadakuada.
Ibinglayyo kadakuada dagiti balikas ti anghel ken ni Amulek—a dagiti bendision ti Apo ket maitedto kadakuada ken iti balayda.11 Mabalin a masdaawkayo a makasarak iti maysa a maingel a katulongan ti Apo a no saan nagtalinaed koma a nakalemmeng.
Kasano a Maituladak ken ni Amulek?
Idinto a nasken nga agsapsapul ti sumagmamano kadatayo iti maysa nga Amulek, mabalin a para kadagiti dadduma daytoy ti saludsod “Kasano a Maituladak ken ni Amulek?”
Nalabit, iti pananglabas dagiti tawen, saankayo a nagpasnek iti panagbalinyo a disipulo. Nalabit a nagkudrep ti lawag ti pammaneknekyo. Nalabit nga inyadayoyo ti bagiyo iti Simbaan ni Cristo. Nalabit a napasakitankayo wenno nakagura pay. Kas iti sumagmamano a miembro ti nagkauna a Simbaan iti Efeso, mabalin a pinanawanyo ti “umuna nga ayatyo”12—dagiti nakaskasdaaw, agnanayon a kinapudno ti ebanghelio ni Jesucristo.
Nalabit, kas ken ni Amulek, ammoyo iti pusoyo a ti Apo “namin-adu nga inawaganna[kayo],” ngem “saankayo a dumngeg.”
Nupay kasta, makita ti Dios kadakayo ti nakitana ken ni Amulek—ti potensial ti maingel a katulongan nga addaan iti napateg nga aramiden ken addaan iti pammaneknek nga ibinglay. Adda serbisio a saan a maited ti asino man iti kasta met la a wagas. Intalek kadakayo ti Apo ti nasantuan a kinasaserdotena, a mangikut iti nadiosan a potensial a mangbendision ken mangparegta kadagiti dadduma. Dumngegkayo nga usarenyo ti pusoyo ket surotenyo dagiti parikna ti Espiritu.
Padas ti Maysa a Miembro
Nasagidnak ti padas ti maysa a kabsat a lalaki a nagdamag iti bagina, “No umawag ti Apo, mangngegko kadi?” Awagak iti David daytoy nasingpet a kabsat a lalaki.
Nagkameng ni David iti Simbaan sumagmamanon a 30 a bulan ti napalabas. Nagserbi iti mision ket kalpasanna nagadal iti abogasia. Bayat ti panagadal ken panagtrabahona tapno masuportaran ti pamiliana, adda nadamagna nga impormasion maipapan iti Simbaan a nakatikaw kenkuana. Bayat ti ad-adu a pannakabasana kadagitoy a negatibo a material, ad-adda met ti saanna a pannakaidna. Idi agangay, indawatna a maikkat ti naganna kadagiti rekord ti Simbaan.
Manipud iti dayta a kanito, kas ken ni Alma kadagiti aldaw a panagrebeldena, binubos ni David ti adu nga oras a pannakipagdebate kadagiti miembro ti Simbaan, pannakipagsarita iti online nga addaan panggep a mangsubok kadagiti pammatida.
Daytoy ti paglainganna unay.
Awagak iti Jacob ti maysa kadagiti miembro a kinadebatena. Kanayon a nasayaat ken managdayaw ni Jacob ken ni David, ngem natibker met isuna iti panangsalaknib iti Simbaan.
Iti panaglabas dagiti tawen, naaddaan iti respeto iti tunggal maysa da David ken Jacob ket nabalinda nga aggayyem. Ti saan nga ammo ni David ket inkararagan isuna ni Jacob ket sipupudno nga inaramidna daytoy iti nasurok a maysa a dekada. Inkabilna pay ti nagan ti gayyemna a maikararagan kadagiti templo ti Apo ket nangnamnama a mapaluknengto ti puso ni David.
Iti panaglabas ti panawen, in-inut, a nagbalbaliw ni David. Nangrugi a malagipna a siraragsak dagiti naespirituan a padasna idi, ken nalagipna ti ragsak a nariknana idi miembro isuna ti Simbaan.
Kas ken ni Alma, saan a naan-anay a nalipatan ni David dagiti kinapudno ti ebanghelio a naminsan idi nga inawatna. Ken kas ken ni Amulek, narikna ni David ti Apo a mangtultulong kenkuana. Maysa itan ni David a partner iti maysa a law firm—maysa a prestihioso a trabaho. Naaddaan isuna iti reputasion a maysa a kritiko ti Simbaan, ken nalaus ti panagpannakkelna nga agkiddaw a maawat manen.
Nupay kasta, intuloyna ti mangrikna iti panangallukoy ti Pastor.
Impapusona ti nasantuan a kasuratan “No siasino man kadakayo ti agkurang iti kinasirib, agdawat koma iti Dios, isu a mangted a sikakaasi kadagiti isu amin, ket saan a mangpabain ket maitedto kenkuana.”13 Inkararagna, “Patpatgek a Dios, tarigagayak ti agbalin manen a maysa a Santo iti Ud-udina nga Aldaw, ngem adda dagiti saludsodko nga agkasapulan kadagiti sungbat.”
Rinugianna ti dumngneg kadagiti arasaas ti Espiritu ken kadagiti naparegta a sungbat dagiti gagayyem a dina pay pulos naaramid idi. In-inut, a nagbalin iti pammati dagiti panagduaduana, agingga a naamirisna iti kamaudianan a mariknana manen ti pammaneknek ni Jesucristo ken ti naisubli nga ebangheliona.
Iti dayta a punto, ammona a kabaelanna a parmeken ti kinapalangguadna ket aramidenna ti ania man a kasapulan tapno maawat manen isuna nga agsubli iti Simbaan.
Idi agangay, nabuniagan manen ni David ket kalpasanna pinadpadaananna ti aldaw a pannakaisubli kenkuana dagiti bendisionna.
Maragsakanak a mangipadamag nga iti daytoy napalabas a kalgaw, naisubli ken ni David dagiti bendisionna. Naan-anay a makiramraman manen isuna iti Simbaan ken agserserbi a kas maysa a mannursuro iti Gospel Doctrine iti wardna. Usarenna ti amin a gundaway a maisaritana iti dadduma maipapan iti panagbalbaliwna, tapno matarimaan ti dadael a gapuananna, ken tapno agpaneknek maipapan iti ebanghelio ken ti Simbaan ni Jesucristo.
Panangigibus
Patpatgek a kakabsatko, patpatgek a gagayyemko, saraken, sapulen, paregtaen, ken agpannuraytayo koma kadagiti Amulek kadagiti ward ken staketayo. Adu dagiti Amulek iti Simbaan ita.
Nalabit nga adda maysa nga am-ammoyo. Nalabit a maysakayo kadakuada.
Nalabit nga agar-arasaas ti Apo kadakayo, guyguyugoyennakayo nga agsubli iti umuna nga ayatyo, ibinglayyo dagiti talentoyo, sikakari nga usarenyo ti priesthood, ket agkakaduakayo nga agserbi kadagiti padayo a Santo iti yaasideg ken ni Jesucristo ken iti panangbangon iti pagarian ti Dios ditoy daga.
Ammo ti patpatgentayo a Mangisalakan no sadino ti yanyo. Ammona ti adda iti pusoyo. Tarigagayanna nga ispalennakayo. Tulongannakayo. Luktanyo laeng ti pusoyo Kenkuana. Namnamaek a dagiti immadayo iti dana ti kinadisipulo—uray no sumagmamano laeng nga addang—ket mautobda koma ti kinaimbag ken parabur ti Dios, makitada nga usarenda ti puspusoda, masursuruanda kada Alma ken Amulek, ken mangngeganda dagiti makapagbalbaliw-iti-biag a balikas ti Mangisalakan: “Umaykayo, sumurot kaniak.”
Allukoyenkayo a dumngeg iti awagna, gapu ta awan duadua a maawatyonto ti gunggona ti langit. Dagiti bendison ti Apo maitedto kadakayo ken ti balayyo.14
Paneknekak daytoy ket ibatik kadakayo ti pammendisionko kas maysa nga Apostol ti Apo, iti nagan ni Jesucristo, amen.