Imħejjija b’ Mod li Qatt Ma Konna Rajna Bħalu Qabel
Mill-Linda K. Burton
President Ġenerali tas-Soċjetà tal-Għajnuna
Jalla aħna nitħejjew sabiex b’ mod den nirċievu l-ordinanzi tas-salvazzjoni qatra qatra u nżommu l-patti assoċjati magħhom b’ qalbna kollha.
Meta t-tifla ż-żgħira tagħna ġiet lura d-dar wara l-ewwel jum tagħha l-iskola, jiena staqsejtha, ”Kif mort?”
Hija wieġbet, ”Mort tajjeb.”
L-għada filgħodu, madankollu, meta qajjimtha għall-iskola, hija rabtet idejha flimkien u b’ vuċi soda qalet, ”Jiena diġà mort skola!” Apparentament jiena ma kontx ħejjejtha jew spjegajtilha li l-iskola mhux xi ħaġa li tmur darba biss iżda li kien mistenni minnha li tmur l-iskola ħamest ijiem fil-ġimgħa għal ħafna, ħafna snin.
Hekk kif nikkunsidraw il-prinċipju li nkunu mħejjijin, immaġinaw miegħi din ix-xena. Intom tinsabu bilqiegħda fil-kamra ċelestjali tat-tempju u tinnutaw numru ta’ għarajjes li qed jiddaħħlu u jinħarġu b’ qima fil-kamra hekk kif huma jistennew li jiżżewġu għal din il-ħajja u għall-eternità kollha. Għarusa tidħol fil-kamra ċelestjali, id f’ id mal-maħbub tagħha. Hija liebsa libsa tat-tempju, sempliċi iżda sabiħa, u fuq wiċċha għandha tbissima kalma, trankwilla u sabiħa. Hija liebsa veru sabiħ iżda xejn bombastiku. Hija tpoġġi bilqiegħda, tħares ħarsa madwarha u mbagħad f’ daqqa waħda tibda tħossha verament emozzjonata. Jidher li d-dmugħ li nieżel ma’ ħaddejha huwa għaliex qed tħossha mqanqla tant minħabba s-sens ta’ qima kemm għall-post fejn qiegħda u għall-ordinanza sagra li hemm tistenna lilha u lill-imħabba ta’ ħajjitha. L-imġiba tagħha bħal qisha qed tgħid, ”Kemm jiena grata li llum ninsab f’ dar il-Mulej, lesta biex nibda vjaġġ etern ma’ sieħeb etern u maħbub. Hija tidher preparata għal ferm aktar minn sempliċi avveniment ta’ darba.
In-neputija ħelwa u żagħżugħa tagħna m’ilux ħalliet nota għalija fuq l-imħadda tiegħi li parti minnha kienet tgħid: ”Ħaġa li tolqotni meta nidħol ġewwa t-tempju huwa l-ispirtu trankwill u ta’ mħabba li jgħammar hemm. … In-nies jistgħu jmorru fit-tempju biex jirċievu l-ispirazzjoni.”1 Għandha raġun. Aħna nistgħu nirċievu l-ispirazzjoni u r-rivelazzjoni ġewwa t-tempju—u nirċievu wkoll qawwa li niffaċċjaw l-avversitajiet tal-ħajja. Dak li hija qed titgħallem dwar it-tempju hekk kif hija b’ mod konsistenti tipparteċipa billi tieħu l-ismijiet tal-familja tagħha biex b’ hekk jitwettqu l-magħmudijiet u l-konfermi se jippreparaha sabiex hija tirċievi aktar ordinanzi, patti u barkiet tat-tempju, kemm għaliha kif ukoll għal dawk fuq in-naħa l-oħra tal-velu.
Il-Presbiteru Russell M. Nelson għallem, ”Hekk kif it-tempji jinsabu preparati għan-nies, in-nies għandhom jippreparaw ruħhom għat-tempju.”2
Hekk kif qed nerġa’ naqra għal darb’oħra dwar il-Kaptan Moroni fil-Ktieb ta’ Mormon, qed nerġa’ niftakar li waħda mill-akbar ħwejjeġ li wettaq Moroni kienet ir-reqqa kbira li biha huwa ħejja lin-Nefiti sabiex huma jkunu jistgħu jikkumbattu t-terrur tal-armata Lamanita. Huwa ħejja lin-nies tiegħu tant tajjeb li naqraw, ”Araw, għall-għaġeb kbir tal-Lamaniti, in-Nefitikienu preparati għalihom, b’ mod li qatt ma kienu raw bħalu qabel.”3
Dik il-frażi, ”preparati … b’ mod li qatt ma kienu raw bħalu qabel,” laqtitni ferm.
Aħna kif nistgħu nitħejjew aħjar għall-barkiet sagri tat-tempju? Il-Mulej għallem, ”U għal darb’oħra, jiena se nagħtikom eżempju fuq xiex timxu f’ kollox.”4 Ejjew nikkunsidraw eżempju mill-iskrittura li jgħinna nitħejjew sew. Il-mod li bih Moroni ħejja għall-għadu kien jeħtieġ diliġenza konsistenti u kontinwa, u dan l-eżempju jitlobna nagħmlu l-istess ħaġa.
Qatt ma nixba nisma’ l-parabbola sabiħa li s-Salvatur qal dwar il-ħames verġni għaqlin u l-ħames verġni boloh. Għalkemm din il-parabbola tirreferi għat-Tieni Miġja tas-Salvatur tagħna, nistgħu nxebbħuha wkoll meta aħna nitħejjew għall-barkiet tat-tempju, li jistgħu jkunu bħal festa spiritwali għal dawk li jitħejjew sew.
F’Mattew 25 naqraw:
”Imbagħad is-Saltna tas-Smewwiet ixebbhuha ma’ għaxar xebbiet li ħarġu bl-imsiebaħ tagħhom biex jilqgħu l-għarus.
”Ħamsa minnhom kienu boloh u ħamsa għaqlin, …
”Huma li kienu għaqlin ħadu mhux biss l-imsiebaħ iżda wkoll iż-żejt fil-kwies.
”L-għarus iddawwar ma ġie, u għalhekk ilkoll ħadhom in-ngħas u raqdu.
”Mbagħad f’nofs ta’ lejl instama’ min jgħajjat, Ara l-għarus! Oħorġu ilqgħuh.
”Dawk ix-xebbiet qamu lkoll u ħejjew l-imsiebaħ tagħhom.
”Iżda l-boloh qalu lill-għaqlin, Agħtuna ftit żejt minn tagħkom, għax l-imsiebaħ tagħna jintfew.
”Qabżu l-għaqlin u qalu, Għandu mnejn ma jibqax biżżejjed, la għalina u lanqas għalikom: l-aħjar, morru għand tal-ħanut u ixtru għalikom.
”Xħin dawk marru biex jixtru jiġi l-għarus; dawk li kienu lesti daħlu miegħu għall-festa tat-tieġ, u l-bieb ingħalaq.
”Sa fl-aħħar waslu wkoll ix-xebbiet l-oħra, u bdew jgħidu, Sinjur, Sinjur, iftħilna!
”Iżda hu weġibhom u qal, Tassew, ngħidilkom, lilkom ma nafkomx.”5
Ma naħsibx li hawn xi ħadd, speċjalment dawk ta’ qalb tenera, li ma jħossuhomx imnikkta għal dawk it-tfajliet boloh. U xi wħud minna jixtiequ jgħidu lill-oħrajn, ”Tistgħu taqsmu dak li għandkom ma’ ħaddieħor ħalli kulħadd ikun ferħan?” Iżda aħsbu ftit dwar dan. Din hija l-istorja li qal is-Salvatur, u Huwa dak li sejjaħ ħamsa minnhom ”għaqlin” u ħamsa oħra ”boloh.”
Hekk kif nikkunsidraw din il-parabbola bħala eżempju tajjeb għat-tħejjija għat-tempju, ikkunsidraw il-kliem tal-profeta tal-aħħar jiem li għallem li ”ż-żejt tat-tħejjija spiritwali ma nistgħux naqsmuh ma’ ħaddieħor.”6 Il-President Spencer W. Kimball jgħinna biex nifhmu għalfejn il-ħames tfajliet ”għaqlin” ma setgħux jaqsmu ż-żejt tal-imsiebaħ tagħhom ma’ dawk li kienu ”boloh” meta huwa qal: ”Meta aħna nattendu l-laqgħat tagħna tas-sagrament, inkunu qed inżidu ż-żejt fl-imsiebaħ tagħna, qatra qatra tul is-snin. Is-sawm, it-talb tal-familja, it-tagħlim tad-dar, il-kontroll tal-kilbiet tal-ġisem, it-tixrid tal-evanġelju, l-istudju tal-iskrittura—kull att ta’ dedikazzjoni u ubbidjenza huwa qatra miżjuda ma’ dak li diġà għandna. Għemejjel ta’ tjubija, ħlas ta’ offerti u dieċmi, ħsibijiet u għemejjel puri … —dawn, ukoll, jikkontribwixxu b’ mod importanti maż-żejt li f’ nofs il-lejl nistgħu nerġgħu nimlew l-imsiebaħ tagħna bih.”7
Qegħdin tinnutaw l-eżempju ta’ tħejjija—qatra qatra—li jista’ jgħinna hekk kif naraw kif nistgħu nkunu aktar diliġenti fit-tħejjija tagħna li nieċievu l-ordinanzi sagri għalina nfusna u għal ħaddieħor? X’ inhuma l-ħwejjeġ żgħar u sempliċi oħra li nistgħu nagħmlu biex inżidu qtar ta’ żejt, prezzjuż spiritwali, fl-imsiebaħ tagħna tat-tħejjija?
Nitgħallmu mill-Presbiteru Richard G. Scott li ”nkunu personalment denji hija ħtieġa essenzjali biex aħna ngawdu l-barkiet tat-tempju. … L-aqwa mod kif tifforma karattru den huwa jekk tgħix ħajja mimlija għażliet konsistenti u korretti bbażati fuq it-tagħlim tal-Imgħallem. ”8 Verament togħġobni l-kelma konsistenti. Li tkun konsistenti hu li tkun sod, kostanti, u ta’ min joqgħod fuqek. X’ deskrizzjoni mill-isbaħ tal-prinċipju li wieħed ikun den!
Id-Dizzjunarju tal-Bibbja jfakkarna: ”Hija biss id-dar li tista’ tqabbilha mat-tempju f’dik li hija qdusija.”9 Djarna u l-appartamenti tagħna nistgħu niddiskrivuhom b’ dan il-mod? Tfajla ħelwa fil-qasam tagħna m’ilux ġiet id-dar tagħna. Peress li kont naf li ħuha kien għadu kif irritorna mill-missjoni tiegħu, jiena staqsejtha kif qed tħossha issa li huwa ġie lura fosthom id-dar. Hija qalet li ferħana ħafna, iżda kultant huwa jitlobhom sabiex ibaxxu l-mużika. Hija qalet, ”U lanqas tgħid li hi xi mużika ħażina!” Jagħmel tajjeb jekk aħna kultant neżaminaw lilna nfusna biex niżguraw li djarna huma l-post fejn nitħejjew sabiex fih inħossu l-Ispirtu. Hekk kif inħejju darna biex tkun post li jilqa’ fih l-Ispirtu, aħna nkunu qed nitħejjew sabiex inħossuna aktar ”komdi” meta nidħlu fid-dar tal-Mulej.
Hekk kif inħejju lilna nfusna biex b’mod den nidħlu ġewwa t-tempju u nibqgħu fidili lejn il-patti tat-tempju, il-Mulej jitfa’ ”għadd kbir ta’ barkiet”10fuqna. Il-ħabiba tal-qalb tiegħi Bonnie Oscarson riċentiment tat tifsira ġdida lil skrittura partikolari meta qalet, ”Fejn hu mistenni ħafna minna, ħafna aktar jingħatalna.”11 Naqbel magħha perfettament! Peress li aħna mmorru t-tempju biex nirċievu l-barkiet eterni, m’ għandhiex tkun ta’ sorpriża għalina li minna huwa mistenni standard ferm ogħla sabiex nikkwalifikaw għal dawk il-barkiet. Għal darb’oħra l-Presbiteru Nelson għallem: ”Peress li t-tempju huwa d-dar tal-Mulej, il-kriterji li hemm bżonn biex nidħlu hemm jagħmilhom Hu. Min jidħol hemm hu l-mistieden Tiegħu. Li jkollkom rakkomandazzjoni tat-tempju huwa privileġġ imprezzabbli u sinjal tanġibbli ta’ ubbidjenza lejn Alla u l-profeti Tiegħu.”12
Ċerti atleti ta’ klassi mondjali u l-istudenti tal-mediċina tal-università jqattgħu sigħat sħaħ, jiem, ġimgħat u xhur u saħansitra snin jitħejjew. Huwa meħtieġ minnhom qtar ta’ tħejjija kuljum sabiex huma jilħqu l-quċċata. Bl-istess mod, dawk li jixtiequ jikkwalifikaw għall-eżaltazzjoni fis-saltna ċelestjali hu mistenni minnhom li jgħixu standard ogħla ta’ ubbidjenza li niksbuh billi nipprattikaw il-virtù tal-ubbidjenza, jum wara jum, qatra wara qatra.
Hekk kif b’ mod konsistenti u b’ diliġenza aħna nżidu ż-żejt, qatra wara qatra, lill-imsiebaħ spiritwali tagħna, jekk aħna nagħmlu dawn il-ħwejjeġ żgħar u sempliċi, aħna jista’ jkollna l-imsiebaħ tagħna ”lesti u jaqbdu” 13 bi tħejjija tal-għaġeb. Ir-raġel ħelu tiegħi, li huwa president tal-wited, riċentiment irrimarka li huwa kważi dejjem kapaċi jinduna meta xi ħadd ikun preparat u den li jidħol it-tempju, peress li ”huma jdawlu lill-kamra” meta jiġu jfittxu li jiksbu rakkomandazzjoni tat-tempju.
Fit-talba dedikatorja tat-Tempju ta’ Kirtland, il-Profeta Joseph Smith talab lill-Mulej ”li n-nies kollha li se jidħlu fuq l-għatba tad-dar tal-Mulej iħossu l-qawwa, … li huma jikbru fik, u jirċievu l-milja tal-Ispirtu s-Santu, … u jkunu mħejjija li jiksbu kull ħaġa meħtieġa.”14
Hija t-talba tiegħi li għalina, li mmorru ġot-tempju tkun aktar minn avveniment ta’ darba. Jalla aħna nitħejjew sabiex b’ mod den nirċievu l-ordinanzi tas-salvazzjoni qatra qatra u nżommu l-patti assoċjati magħhom b’ qalbna kollha. Hekk kif nagħmlu dan, jiena naf li aħna nikkwalifikaw biex nirċievu l-barkiet imwiegħda tal-milja tal-Ispirtu s-Santu u l-qawwa tal-Mulej fi djarna u fil-ħajja individwali tagħna. F’ isem Ġesù Kristu, amen.