Ang Presyo kag Mga Bugay sang Pagkasumulunod

Ni Elder Jeffrey R. Holland

Sang Korum sang Napulogduha ka mga Apostoles

Litrato

Mangin mabakod kamo. Matutom kamo nga magtuman sang ebanghelyo bisan pa nga ang iban sa inyo palibot indi nagahimo sini.

Presidente Monson, ikaw ginapalangga namon. Nagahatag ikaw sang imo tagipusuon kag sang imo maayo nga lawas to tanan mo nga katungdanan nga ginhatag sa imo sang Ginuo, labi na gid ang sagrado mo nga katungdanan subong. Ang kabilogan sang Simbahan nagapasalamat sa imo sa imo debotado nga pag-alagad kag sa imo indi nagalubad nga pag-unong sa katungdanan.

Sing may paghanga kag kaisog para sa tanan nga nagkinahanglan nga magpadayon sing malig-on sa sining mga ulihing inadlaw, nagasiling ako sa tanan labi na gid sa mga batan-on sang Simbahan nga walâ pa matabô, makita ninyo nga kamo tawgon nga magpangapin sang inyo pagtuo kag magbatas sang personal nga pag-abuso bangod lang kay kamo miyembro sang Simbahan ni JesuCristo sang mga Santos sa Ulihing mga Adlaw. Inang mga tinion nagakinahanglan sang pareho nga kaisog kag pagtahud sa inyo bahin.

Bilang halimbawa, ang isa ka misyonero nga babaye nagsulat sining ulihi lang: “Ako kag ang akon kaupod nakakita sang tawo nga nagapungko sa bangkò nga nagakaon sang iya panyaga sa may plasa sa isa ka banwa. Samtang kami nagpalapit, siya nagtangla kag nakita niya ang amon mga tag nga may ngalan namon. Sing may makahaladlok nga panulok sa iya mata, siya naglumpat kag nag-alsa sang iya kamot nga sampalon ako. Naglihay ako sa tama nga tiyempo, husto lang nga ginluad ang iya pagkaon sa akon kag siya nag-umpisa nga buyayawon kami sang pinakamakasiligne nga mga butang. Nagpalayo kami nga indi nagsiling sang bisan isa ka tinaga. Nagtinguha ako nga pahidan ang pagkaon sa akon nawong, lamang nga nabatyagan ko ang bigol sang ginlupak nga patatas sa likod sang akon ulo. Kon kaisa mabudlay ang mangin isa ka misyonero kay man sang yadto nga tion gusto ko magbalik, liabon ang gamay nga lalaki, kag magsiling, ‘MAGHIPOS KA!’ Pero indi ko ginhimo ini.”

Sa sini nga misyonera nagasiling ako, palangga nga anak, sa imo kinaugalingon kag mapainubuson nga paagi, ikaw kaupod sa mga dungganon nga mga babaye kag mga lalaki nga, sa ginsiling ni propeta Jacob sa Libro ni Mormon, “(nag)tan-aw sang kamatayon( ni Cristo), kag (nag)batas sang iya krus kag (nag)antus sang kahuy-anan sang kalibutan.” ¹

Sa kamatuoran si Jesus mismo, sa ginsulat ni Nephi nga utod ni Jacob: “ Kag ang kalibutan, bangud sang ila kalautan, maghukom sa iya nga isa ka butang nga bale walâ; gani bunalon nila siya, kag batason niya ini; kag hampakon nila siya, kag batason niya ini. Huo, duplaan nila siya, kag batason niya ini, tungod sang iya mahigugmaon nga kaluoy kag ang iya pagkamainantuson tuhoy sa mga anak sang tawo.”²

Sa pagsunod sa inagihan mismo sang Manluluwas, may yara nga malaba nga maragtas sang pagsikway kag masakit nga presyo nga ginbayaran sang mga propeta kag mga apostoles, mga misyonero, kag mga miyembro sa kada henerasyon sang mga nga nagtinguha nga magsunod sa panawag nga magtib-ong sa panimalay sang katawhan sa “mas maayo nga paagi.”³

“Kag ano pa ang akon dugang nga ihambal [tuhoy sa ila]?” ang pamangkot sang tagsulat sang libro para sa mga Hebrews.

“[Sila] nga{nb … nagpugong sang mga babâ sang mga leon,

“Indi sila napasò sang nagadabadaba nga kalayo, nalikawan nila ang kamatayon sa espada, … maisog sila sa inaway, napierde nila [ang mga soldado] nga nagpalalagyo …

“[Nakita] nila ang ila mga minatay nga nabuhi [liwat] samtang ang iban ginsakit, …

“Kag … ang iban gintilawan sang mapintas nga pangyaguta kag mga panglatigo, … sang mga panggapos kag pagkapriso:

“Sila ginbató, … ginlagari, ginsulay, ginpamatay sa espada: … nagsurosuroy nga nagbayo sang mga panit sang karnero kag mga kanding; puwerte sila kaimol, sila ginsakit [kag] ginpintasan;

“([Sila] ang mga tawo nga ang kalibutan indi bagay mag-upod sa ila:) … … nagsuroysuroy sila sa mga disyerto, kag sa mga kabukiran, kag sa mga buho sang duta kag sa mga kuweba sang kalibutan.” ⁴

Segurado nga ang mga anghel sa langit nagtangis samtang sila nagsulat sang presyo sining pagkasumulunod sa kalibutan nga nagala-ut sa kasuguan sang Diyos. Ang Manluluwas mismo nagpungko sa Mount Olives kag naghilibion para sa mga tawo nga sa ibabaw sang pila ka gatos ka tuig ginsikway kag ginpamatay sa pag-alagad sa Iya. Kag karon Siya ginsikway kag ginpatay.

“O Jerusalem, Jerusalem, “si Jesus nagpanawag, “kamo nga nagpamatay sang mga propeta, kag nagpamató sa ila nga ginpadala sa inyo, daw ano ka dugay na nga ako nagatipon sang inyo mga anak, katulad sang mungâ nga nagatipon sang iya mga pisô sa idalom sang iya mga pakpak, kag indi kamo gusto sini!

“Yari karon, bahala kamo sa inyo balay nga nangin madulom kag mamingaw.” ⁵

Kag yari diri ang mensahe para sa kada batan-on nga lalaki kag babaye sa sining Simbahan. Basi kamo matingala kon bala takos nga mag-angkon sang may kaisog nga katarungan sa hayskul ukon sa pag-alagad sa misyon lamang nga ang inyo pinakabilidhon nga mga pagtuo yagutaon ukon magbatas sing madamo supak sa katipunan nga kon kaisa nagayubit sa relihiyoso nga debosyon sa kabuhi. Huo, takos ini, bangud ang baylo amó ang aton “mga balay” nga ginbilin sa aton nga “madulom kag mamingaw” —mga tawo nga masubô, mga panimalay nga mamingaw, masubô nga mga kasilinganan, kag mamingaw nga mga kapungsuran.

Gani diri kita may kabudlay sang mga gintawag nga maghatag sang mensahe sang kaluwasan. Dugang sa pagtudlo, pagpaisog, kag pagpasadya sa mga tawo (ina ang manami nga bahin sang pagkasumulunod), kon kaisa ining amó man nga mga mensahero ginatawag nga magkabalaka, magpaandam, kag kon kaisa magtangis lang (ina ang masakit nga parte). Lubos sila nga nakahibalo nga ang nagapanguna nga dalan padulong sa ginpanaad nga duta “nga nagailig sang gatas kag dugus”⁶ kinahanglanon nga nagaagi sa Mount Sinai nga nagailig sang “mga dapat” kag “mga indi dapat.”⁷

Walay kabulahanan ang mga mensahero sang balaanon kag gamhanan nga mga kasuguan masami indi nga mas ginakilala subong sang sa dumaan nga panahon, kay sanglit man duha ka- ginduplaan, ginhabuyan-sang patatas nga mga misyonera ang makasaksi. Ang pagdumot isa ka malaw-ay nga tinaga, pero may mga yara subong nga nagasiling kaupod sang malain nga si Ahab, “Ginadumtan ko [ang propeta nga si Micaiah]; kay siya indi gid nagpanagna sang maayo para sa akon, pero masami [nagpanagna] sang malain.” ⁸ Inang sari sang pagdumot sa pagkatampad sang propeta ginbayaran ni Abinadi sang iya kabuhi. Sa ginsiling niya kay King Noah: “Kay sanglit ginsugiran ko kamo sang kamatuoran naakig kamo sa akon. … Sanglit naghambal ako sang pulong sang Diyos ginhukman ninyo ako nga buang ako” ⁹ ukon makadugang kita, probinsiyano, may pagkatatay, panatiko, walay kaluoy, makitid, dumaan, kag tigulang.

Ang Ginuo mismo ang nagpanganduhoy sa propeta nga si Isaiah:

“[Ining] kaanakan … indi magpamati sang layi sang Ginuo:

“[Sila} nagasiling sa mga manugtulok, Indi kamo magtan-aw; kag sa mga propeta, Indi kamo magpanagna sa amon sang husto nga mga butang, maghambal kamo sa amon sang tayuyon nga mga butang, magpanagna kamo sang mga pagtiplang:

Maghalin kamo sa amon alagyan, magliw-as kamo sa dalan, tunaan ang Balaan nga Isa sang Israel nga mag-untat upod sa amon.” ¹⁰

Masubo man, akon batan-on nga mga abyan, ini kinaugali sang aton panahon nga kon ang katawhan lunsay nga naluyag sang ano man nga diyos, gusto nila nga ining mga diyos nga walâ nagapaabot sang daku, masulhayon nga mga diyos nga indi nagadisturbo sang yara na nga nagaluntad pero indi man lamang nagahatag sang direksyon, mga diyos nga nagapikpik sa aton ulo, nagapahirihi sa aton, pagkatapos nagahambal sa aton nga maglakat na kag maghampang sing malipayon.¹¹.

Amó ini ang ginasiling nga ang tawo nagatuga sang Diyos sa iya imahen! Kon kaisa—daw ini ang pinakadaku nga kasulian sa tanan—ining mga tawo nagatawag sang ngalan ni Jesus katulad sa isa nga daw “masulhay” nga Diyos. Daw mapatihan balá ina? Siya nga nagsiling nga indi lamang nga indi kita maglapas sang mga kasuguan, kundi dapat nga indi gid kita bisan pa maghunahuna nga maglapas sang mga ini. Kon nagapensar man kita nga maglapas sa mga ini, naglapas na kita sa aton tagipusuon. Ina balá sa inyo pamatin-an daw “masulhay” nga doktrina, mahapos sa inyo dulunggan kag ginakilala dira sa baryo sang masulhay nga pagtililipon?

Kag paano ang mga yadto nga gusto lang magtan-aw sang mga salâ ukon magtandog sang mga ini sa malayo? Si Jesus maathag nga nagsiling, nga kon ang imo mata nagapakasalâ sa imo, lukata ina. Kon ang imo kamot nagapakasalâ sa imo, utda ina.¹² “Indi ako nagkari para [magdala] sang paghidaet, apang sang isa ka espada,”¹³ Siya nagpaandam sa mga yadto nga nagpanumdom nga Siya naghambal lang sang mga nagapakalma nga mga hulubaton. Kay gani man, sa wali-walihan, ang malapit nga mga banwa “[nag] pakitluoy sa iya nga siya maghalin sa ila lugar.”¹⁴ Gani, sa kamila-milagrohan, ang Iya gahum ginpabangdan indi sa Diyos kundi sa demonyo.¹⁵ Maathag nga ang nagapilit nga papel sa likod sang salakyan nga nagapamangkot “Ano ayhan ang dapat himuon ni Jesus?” indi pirme nga magdala sang uso nga sabat.

Sa hingudto sang Iya pagministeryo sa katawhan, si Jesus nagsiling, “Maghigugmaanay kamo, pareho sang paghigugma ko sa inyo.”¹⁶ Agud mahangpan nila sing maathag kon ano nga sahi sang paghigugma ang amó ina, Siya nagsiling, “Kon ginahigugma ninyo ako, tumanon ninyo ang akon mga kasuguan,”¹⁷ kag bisan sin-o man … ang maglapas sang isa [ka] pinakadiutay nga mga kasuguan, kag magtudlo sang ini sa mga tawo, siya mangin … pinakakubos sa ginharian sang langit.”¹⁸ Ang paghigugma katulad ni Cristo isa ka pinakadaku nga aton kinahanglanon diri sa sini nga planeta parte bangud ang katarungan masunson nga dapat nagaupod sa ini. Gani kon ang paghigugma amó ang aton salandigan nga pulong, nga mangin dapat lang, gani paagi sa Iya pulong nga paghigugma nga ginpakatawo dapat nga isikway naton ang pagpakasalâ kag ano man nga sinyas sang pagduso sini halin sa iban. Si Jesus maathag nga nakahangop sang mga daw nalipatan sang aton moderno nga kultura: Nga may madalom nga kalaín sa tunga sang mando nga magpatawad sang salâ [nga sa diin Siya may walay katapusan nga ikasarang sa paghimo] kag ang paandam batok sa pagpasaylo sini (nga sa diin indi gid Niya ginhimo bisan kaisa lang).

Kaabyanan, labi na ang akon mga batan-on nga kaabyanan, pasudlon sa inyo tagipusuon. Ang himpit nga paghigugma ni Cristo nga nagatubod halin sa katarungan makapabag-o sa kalibutan. Ako nagapamatuod nga ang tunay kag buhi nga ebanghelyo ni JesuCristo yari sa kalibutan kag kamo mga miyembro sang Iya matuod kag buhi nga Simbahan, nga nagatinguha nga magpaambit sini. Nagasaksi ako sang ina nga ebanghelyo kag sina nga Simbahan, nga may kinatuhay nga panaksi sang ginpanumbalik nga mga yabi sang priesthood nga nagabukas sang gahum kag pagkamadinalag-on sang mga nagaluwas nga mga ordinansa. Ako mas nakaseguro nga ang yadtong mga yabi ginpanumbalik kag ang yadtong mga ordinansa sa liwat maangkon paagi sa Ang Simbahan ni JesuCristo sang mga Santos sa Ulihing mga Adlaw sang sa ako nakaseguro nga ako nagatindog sa inyo atubang sa sini nga pulpito kag kamo nagapungko sa akon atubang sa sini nga konperensya.

Magpakabakod kamo. Tumanon ang ebanghelyo sing padayon bisan pa nga ang iban sa inyo palibot indi nagasunod. Pangapinan ang inyo mga salandigan sing may pagtahud kag sing may kaluoy, pero pangapinan ninyo sila. Isa ka malaba nga karagtasan sang mga tingug, kaupod sang inyo mga mabatian sa sining konperensya,kag ang tingug nga inyo nabatian halin kay Presidente Thomas S. Monson, nagatudlo sa dalan sang Kristohanon nga pagkasumulunod. Ini makitid kag masipot nga alagyan nga may diutay nga pagpasibu, pero puwede nga lakton sing may kakunyag kag may pagkamadinalag-on, “sa … kalig-unan ni Cristo, … isa ka himpit nga kasanag sang pagla-um, kag isa ka gugma sa Diyos kag sa tanan nga mga tawo.”¹⁹ Sing may kaisog nga pagsunod sining alagyan, matukiban ninyo ang di-malingkang nga pagtuo, maangkon ninyo ang kahilwayan batok sa mamadlos nga mga hangin, bisan pa sa mga baslay sang buhawi, kag maangkon ninyo ang katulad sa bató nga kabakod sang aton Manunubos, nga sa diin kon inyo ginapasad ang inyo diyosnon nga pagkasumulunod, kamo indi mahulog.²⁰ Sa ngalan ni JesuCristo, amen.