Nagakatulog Balá Kamo Halin sa Pagsugod Tubtob sa Katapusan Sang Pagpanumbalik?

Ni President Dieter F. Uchtdorf

Ikaduhang Manuglaygay sa Unang Pangulohan

Litrato

May madamo nga kapiyerdihan sa aton bilang mga nagaisahanon, bilang mga panimalay, kag bilang Simbahan ni Cristo sa pasapayan nga pagpangabudlay sa sining sagrado nga buluhaton.

Malapit sa 200 ka tuig nga nagligad, ang malip-ot nga istorya sa America, “Rip Van Winkle” gilayon nga nangin klasiko. Ang bida, si Rip, isa ka tawo nga walâ sing ambisyon sa kabuhi maayo gid sa paglikaw sa duha ka butang: trabaho kag iya asawa.

Sang isa ka adlaw sang siya nagalagaw sa mga kabukiran upód ang iya ido, nasapwan niya ang grupo sang mga tawo nga may katuhayan sa ila mga pangbayò nga naga-inum-inom kag nagahilinampang. Pagkatapos nga siya nag-inom sang ila alak, naglingin ang iya ulo kag siya natulugan sing madali. Sang liwat siya nga magmuklat sang iya mga mata, natingala siya sang makita nga nadula ang iya ido, ang iya pusil gintuktokan, kag subong siya may malaba na nga bigote.

Si Rip nakabalik sa iya baryo nga lamang madiskubriyhan nga ang tanan nagbag-o. Ang iya asawa napatay na, ang iya mga abyan nagtaliwan na, kag ang larawan ni Haring George III sa balay dalayunan ginbaylohan na sang isa nga indi niya nakilal-anni General George Washington.

Si Rip Van Winkle natulugan sang 20 anyos ka tuig! Kag, sa sulod sining lakat sang panahon, nalipasan niya ang pinakamakunyag nga mga tinion sa maragtas sang iya pungsod natulugan siya halin sang pagsugod tubtob sa katapusan sang Rebolusyon sa Amerika.

Sang Mayo 1966, si Dr. Martin Luther King Jr. naggamit sining istorya bilang isa ka larawan sang halimbawa sa iya pamulongpulong “Indi Kamo Magtulog Halin sa Pagsugod Tubtob sa Katapusan sang Rebolusyon.” ¹

Subong, gusto ko nga gamiton ining pareho nga halambalan kag magpanugyan sang isa ka pamangkot sa tanan nga nagakapot sang priesthood sang Diyos: nagakatulog balá kamo halin sa pagsugod tubtob sa katapusan sang Pagpanumbalik?

Kitá Nagakabuhi sa Panahon sang Pagpanumbalik

Kon kaisa nagapanumdom kitá sang Pagpanumbalik sang ebanghelyo nga isa ka tapos na, naglipas na sa atonsi Joseph Smith naglubad sang Libro ni Mormon, nagbaton siya sang mga yabi sang priesthood, ang Simbahan gintukod. Sa kamatuoran, ang Pagpanumbalik isa ka nagapadayon nga hitabo; nagakabuhi kitá subong sa sulod sini nga panahon. Ini nagalakip sang “tanan nga ginbugna sang Diyos, tanan nga Iya ginabugna subong,” kag ang “madamo nga daku kag importante nga mga butang” nga “Iya pa ibugna sa aton.” ² Mga kauturan, ang makakulunyag nga mga kauswagan sang sining panahon bahin sinang madugay na nga tinion sang paghanda sa mag-abot nga mahimayaon nga Ikaduhang Pagkari sang aton Manluluwas, nga si JesuCristo.

Ini isa sa pinakatalagsahon nga panahon sa maragtas sang kalibutan! Ang dumaan nga mga propeta naghandom nga makita ining adlaw.

Kon ang aton tiyempo sa mamalatyon nga kabuhi tapos na, ano nga mga eksperyensya ang aton mapaambit nahanungod sa aton kontribusyon sa sining importante nga panahon sa aton mga kabuhi kag sa pagpadaku sang buluhaton sang Ginuo? Puwede balá kitá makasiling nga kitá nagpangabudlay sing maukod kag nagkabudlay sang tanan naton nga tagipusuon, ikasarang, hunahuna, kag kabakod? Ukon kitá mag-ako nga ang aton himuon halos ina sang isa nga nagatan-aw?

Ipananglit ko nga may madamo nga mga kabangdanan kon ngaa mahapos nga magtulog-tulog sing diutay nahanungod sa pagpasad sang ginharian sang Diyos. Tugoti ako nga magmitlang sang importante nga tatlo. Samtang ginahimo ko ini, ginaagda ko kamo nga magbinagbinag kon may yara nga nagatumod sa inyo. Kon makakita kamo sang posibilidad nga magbag-o, ginapangabay ko nga hunahunaon ninyo kon ano ang inyo mahimo nga magbag-o para sa pagka-masmaayo.

Pagkamakinaugalingon

Nahauna, ang pagkamakinaugalingon.

Inang mga makinaugalingon nagapalabi sang ila mga kalipayan kag mga kawilihan labaw sa tanan. Ang importante nga pamangkot sang makinaugalingon nga tawo amó ang “Ano diri ang para sa akon?”

Mga kauturan, naseguro ko nga makita ninyo nga ining panimuot maathag nga supok sa espiritu nga kinahanglanon nga magpasad sang ginharian sang Diyos.

Kon kitá nagahangad lang sang pag-alagad nga para sa kaugalingon labaw sa pag-alagad sa iban, ang aton mga ginapasulabi nasentro sa pagkilala sa aton kag sa aton kawilihan.

Ang nagtaliwan nga mga henerasyon may kabudlayan sa mga sari-sari nga pagpasulabi sang ila kaugalingon, pero subong ginahatagan naton sila sang seryoso nga kompetisyon. Ini ayhan nagsantò nga ang Oxford Dictionary sining ulihi lang nagbantala nga “selfie” [kaugalingon ko] amó ang tinaga sang tuig?³

Natural lang, nga tanan kitá may hangad nga kilalahon, kag walâ sing kasal-anan nga kitá maglingaw kag magkasadya sa aton mga kaugalingon. Pero kon ang paghangad sa “ganar kag pagdayaw sang kalibutan”⁴ yara sa tunga sang aton paghulag, malipasan naton ang nagatubos kag nagalipay nga mga eksperyensya nga nagaabot kon kitá maalwan nga nagahatag sang aton mga kaugalingon sa buluhaton sang Ginuo.

Ano ang bulong?

Ang sabat, sa gihapon, yara sa mga pulong ni Cristo:

“Kon sin-o man ang magsunod sa akon, indi siya dapat magpasulabi sang iya kaugalingon, kag siya magpas-an sang iya krus kag magsunod sa akon.

“Kay kon sin-o man ang magluwas sang iya kaugalingon madulaan sini; pero kon sin-o man ang madulaan sang ila kabuhi bangud sa akon kag sa akon ebanghelyo, ang amó man magluwas sang iya kabuhi.” ⁵

Sila nga lubos nga nagahatag sang ila mga kabuhi sa aton Manluluwas kag nagaalagad sa Diyos kag sa ila isigkatawo makasapo sang manggad kag kahimpit sang kabuhi nga ang makinaugalingon ukon mga nagapasulabi sa kaugalingon indi gid maka-eksperyensya. Ang indi makinaugalingon nagahatag sang ila mga kaugalingon. Ang mga ini basi kon mga gamay nga regalo sang paghigugma nga may daku nga kahulugan sa kaayuhan: isa ka yuhom, isa ka pangamusta, isa ka hakos, tion nga nagapamati, mahinay nga pulong sang pagpaisog, ukon isa ka sinyal sang pagpalangga. Ining tanan nga hinimuan sang kinaayo makapabag-o sang mga tagipusuon kag mga kabuhi. Kon kitá nagahingalit sang mga nagapadayon nga mga oportunidad nga maghigugma kag mag-alagad sa aton mga isigkatawo, lakip ang aton tiayon kag panimalay, ang aton ikasarang nga maghigugma sa Diyos kag mag-alagad sa iban daku nga magtubò.

Sila nga nagaalagad sa iban indi matulugan halin sa pagsugod kag katapusan sang Pagpanumbalik.

Mga Kahuyugan

Ang isa pa nga magbangud sa aton sa paglakat sa katulugon sa sulod sining importante nga kapanahunan sang kalibutan amó ang kahuyugan.

Ang mga kahuyugan masami nga ginaumpisahan nga walâ sa igtalupangod. Ang mga kahuyugan naga-umpisa nga diutay nga kon padayon nga ginahimo nagadaku kag sa katapusan nagadaug sa aton. Ang malain nga mga ugali may ikasarang nga mangin makahalalit nga mga kahuyugan.

Ining mga nagahigot nga kadena sang mga kahuyugan may sari-sari nga mga porma katulad sang pornograpiya, alak, seks, mga druga, tabako, sugal, pagkaon, trabaho, ang Internet, ukon virtual nga kamatuoran nga ginalaragway sang kompyuter. Si Satanas, ang aton kumon nga kaaway, may madamo nga mga kasangkapan nga iya ginagamit sa pagkuha sang aton diyosnon nga ikasarang sa pagtuman sang aton misyon sa ginharian sang Ginuo.

Nagakasubo ang aton Amay sa Langit nga makita kon paano ang iban sang iya mga dungganon nga mga lalaking anak nagatugot nga ikontrol sining mga makahalalit nga mga kahuyugan.

Mga kaututran, kita nagakapot sang walay kamatayan nga priesthood sang Makagagahum nga Diyos. Kitá mga lalaking anak sang Pinakamataas kag kitá ginhatagan sang indi masambit nga ikasarang. Kitá gintuga nga makaabot sa aton pinakamataas nga diyosnon nga ikasarang. Indi kitá gintumod nga limitahan sining kabuhi sa kalibutan, kag ibilanggo sang mga kahuyugan nga aton mismo hinimuan.

Ano ang bulong?

Ang una nga dapat naton hangpon amó nga ang mga kahuyugan mas madali nga tapnaon sang sa bulngon. Sa mga pulong sang Manluluwas, “Indi ninyo pagtugutan ang ano man sining mga butang nga magsulod sa inyo tagipusuon.” ⁶

Sang madamo nga tinuig ang nagligad, si Presidente Thomas S. Monson kag ako ginhatagan sang kahigayunan nga magsakay sa Air Force One ang grande nga eroplano nga ginasakyan sang presidente sang Estados Unidos. May madamo nga mauti nga mga pangseguridad nga pagsayasat sang Secret Service, kag ako diutay nga nagyuhom sang ila rekisahon ang propeta bag-o magsakay.

Ang komandante nga piloto nag-agda sa akon sa pulungkuan sang kapitan. Yadto isa ka indi matupungan nga eksperyensya nga sa liwat makapungko sa timon sang matahom nga nagalupad nga makina katulad sang akon ginpalupad sing madamo nga katuigan. Mga handurawan sang mga paglupad sa tabok sang mga kadagatan kag mga kontinente ang nagpunô sang akon tagipusuon kag hunahuna. Naglarawan ako sang mga makakulunyag nga mga paglupad kag mga paghugpa sa mga hulugpaan sa bisan ano man nga bahin sang kalibutan.

Halos sa walay pag-isip, ginbutang ko ang akon mga kamot sa apat ka pangduso nga kiwal sang 747. Sang hinali, ang pinalangga kag indi masal-an nga tingog sa akon likuran nabatian ko ang tingog ni Thomas S. Monson.

“Dieter,” ang siling niya, “indi ka gani maghunahuna sina.”

Indi ako mag-akò sa anuman, pero daw basi balá nga nabasa ni Presidente Monson ang akon hunahuna.

Kon kitá ginasulay nga maghimo sang mga butang nga indi naton dapat himuon, magpamati kitá sa mapinalanggaon nga mga paandam sang aton ginasaligan nga panimalay, kaabyanan, sa aton pinalangga nga propeta, kag padayon sa Manluluwas.

Ang pinakamaayo nga pangapin batok sa kahuyugan amó ang indi pag-umpisa.

Apang paano ang mga nagahiwaos na sa kahuyugan?

Kabay nga mahibal-an ninyo, labi sa tanan, nga may yara nga paglaum. Magpangita sang bulig sa mga pinalangga, mga lider sang Simbahan, kag batid nga mga terapista. Ang Simbahan nagahatag sang bulig pagpaumpaw sa mga kahuyugan paagi sa lokal nga mga lider sang Simbahan, sa Internet,⁷ kag sa iban pa nga mga lugar, paagi sa LDS Family Services.

Padayon kamo nga magpanumdom, nga sa pagbulig sang Manluluwas, madaug ninyo ang kahuyugan. Basi ini malaba kag mabudlay nga dalan, apang ang Ginuo magbulig sa inyo. Siya nagapalangga sa inyo. Si JesuCristo nag-antus sang Pagpasag-uli sa pagbulig sa inyo nga magbag-o, sa paghilway sa inyo sa bilangguan sang salâ.

Ang pinakaimportante nga butang amó ang padayon nga pagtinguha kon kaisa ini nagakinahanglan sang madamo nga mga pagtinguha bag-o magmadinalag-on. Gani indi kamo mag-untat. Indi kamo magdula sang pagtuo. Magpalapit kamo sa Ginuo, kag hatagan Niya kamo sang gahum sang pagkahilway. Hilwayon Niya kamo.

Pinalangga ko nga mga kauturan, padayon kamo nga magpalayo sa mga bisyo nga makadala sa inyo sa kahuyugan. Ang mga maghimo sini makahalad sang ila tagipusuon, puwersa, hunahuna, kag kabakod sa pag-alagad sa Diyos.

Indi sila magtulog halin sa pagsugod tubtob sa katapusan sang Pagpanumbalik.

Ang Nagapaindis-indis nga Ulunahon nga mga Butang

Ang ikatlo nga samong nga nagatapna sa aton sa lubos nga paghimo sining hilimuon amó ang madamo nga nagapaindis-indis nga ginapauna nga mga butang nga aton ginaatubang. Ang iban sa aton masyado ka masako nga kitá nagabatyag katulad sang kariton nga ginabutong sang isa ka dosena nga mga manugtrabaho nga mga hayop ang kada isa nagabutong sa natuhay nga direksiyon. Madamo nga puwersa ang ginagamit, pero ang kariton walâ nagahalin sa iya nahamtangan.

Masami ginahatag naton ang aton pinakamaayo nga mga kabudlay sa paghangad sang isa ka kalingawan, isa ka hampang, mga paningabuhi nga mga kaluyagan, kag mga banwahanon ukon pangpulitiko nga mga bagay. Ang ining tanan nga mga butang basi daw maayo kag talahuron, apang nagabilin balá sila sang tiyempo kag puwersa para sa mga pinakamataas nga ulunahon mga butang?

Ano ang bulong?

Sa liwat, ini nagahalin sa mga pulong sang Manluluwas:

“Higugmaon mo ang Ginuo nga imo Diyos sang bug-os mo nga tagipusuon, kag bug-os mo nga kalag, kag bug-os mo nga hunahuna.

“Amó ini ang labing importante nga sugo sa tanan.

“Kag ang ikaduha kaangay man sa diri, Higugmaon mo ang imo kasilingan pareho sa paghigugma mo sa imo kaugalingon.”⁸

Ang tanan sa kalibutan dapat nga mangin ikaduha lang sa sining duha ka daku nga mga ulunahon.

Bisan sa pag-alagad sa Simbahan, madali nga kitá maggamit sang madamo nga panahon nga walâ sing pagbinagbinag sang aton tagipusuon ukon unod sang pagkasumulunod.

Mga kauturan, bilang mga nagakapot sang priesthood nagapanaad kitá nga mangin katawhan nga nagahigugma sa Diyos kag sa aton isigkatawo kag handa nga magpakita sinang paghigugma sa pulong kag sa hinimuan. Ina ang espiritu sang kon sin-o man kitá bilang mga sumulunod ni JesuCristo.

Kamo nga nagatuman sining mga prinsipyo indi magtulog halin sa pagsugod kag katapusan sang Pagpasag-uli.

Ang Panawag nga Magbugtaw

Ang Apostol nga si Pablo nagsulat, “Bugtaw ikaw nga nagakatulog, kag magbangon halin sa mga minatay, kag si Cristo maghatag sa imo sang kapawa.”⁹

Pinalangga nga mga kaabyanan, hibal-i ninyo nga kamo mga anak sang kapawa.

Indi ninyo pagtuguti ang pagkamakinaugalingon! Indi pagtuguti nga ang mga bisyo magdala sa inyo sa kahuyugan! Indi pagtuguti nga ang nagapaindis-indis nga ulunahon nga mga butang magtulod sa inyo sa pagkawalay- gana ukon sa pagpalayo sa inyo sa balaan nga pagkasumulunod kag dungganon nga pag-alagad sang priesthood!

May madamo nga kapiyerdihan sa aton bilang mga nagaisahanon, bilang mga panimalay, kag bilang Simbahan ni Cristo sa pasapayan nga pagpangabudlay sa sining sagrado nga buluhaton.

Ang pagkasumulunod ni JesuCristo indi isa ka kabudlay kada isa ka semana ukon sa isa ka adlaw. Ini isa ka kabudlay kis-a kag sa tanan nga tion.

Ang pangako sang Ginuo sa Iya matuod-tuod nga mga nagakapot sang priesthood halos sobra ka mataason nga mahangpan.

Sila nga mga masinulundon sa sining duha ka mga priesthood kag magpadaku sang ila mga katungdanan “ginakonsagrar sang Espiritu tubtob sa pagbag-o sang ila mga lawas.” Gani, ang tanan nga Iya sang aton Amay ihatag sa ila.¹⁰

Nagapamatuod ako nga ang nagapatinlo nga gahum sang Pagpasag-uli ni JesuCristo kag ang nagapabag-o nga gahum sang Balaan nga Espiritu makabulong kag maghilway sa katawhan. Ini aton pribilihiyo, aton sagrado nga katungdanan, kag aton kalipay nga magpamati sa panawag sang Manluluwas, nga magsunod sa Iya sing bug-os nga hunahuna kag bug-os nga tagipusuon. Kita “[maghukas] sang mga kadena nga nagagapos sa [aton], kag maggwa gikan sa kadudulman, kag magbangon gikan sa yab-ok.”¹¹

Kitá magbugtaw kag indi malapyo sa paghimo sang kaayuhan, kay kitá “nagapasad sang sadsaran sang isa ka daku nga buluhaton,”¹² bisan pa ang paghanda sa pagkari liwat sang Manluluwas. Mga kauturan, kon idugang ninyo ang kasanag sang inyo ehemplo bilang panaksi sa katahum kag gahum sang ginpanumbalik nga kamatuoran, indi kitá matulugan halin sa pagsugod kag katapusan sang Pagpanumbalik. Sa sini ako nagapamatuod kag ginabilin ko sa inyo ang akon pagpakamaayo sa sagrado nga ngalan sang aton Agalon, nga amó si JesuCristo, amen.