2. Sursuruen ti ad-adu pay maipapan iti pannakaisubli ti priesthood

Kalpasan ti ipapatay dagiti Apostol ni Jesus iti Baro a Tulag, ti priesthood—ti bileg ken turay ti Dios—ket napukaw manipud iti daga. Idi rugi ti dekada 1800, nangibaon ti Dios kadagiti nailangitan a mensahero a mangisubli, iti priesthood. Babaen ti turay ti priesthood ken dagiti ordinansana, ti dakdakkel a pannakagun-od iti bileg ti Dios ket sidadaan a magun-odtayo amin manen.

Adtoy ti sumagmamano a saludsod ken aktibidad iti panagsursuro a mabalinmo a padasen:

Kasano a bendisionannatayo ti Mangisalakan babaen ti Aaronic Priesthood?

Basaen ti Doktrina ken Katulagan 13:1 ken 107:20. Ania dagiti karbengan ken turay nga insubli ni Juan Bautista kada Propeta Joseph Smith ken Oliver Cowdery? Isurat dagiti balikas a mangiladawan kadagiti bendision nga ited ti Dios babaen ti Aaronic Priesthood.
Kasano a bendisionannatayo ti Mangisalakan babaen ti Melchizedek Priesthood?

Isubli da Pedro, Santiago, ken Juan ti Melchizedek Priesthood kada Joseph ken Oliver. Basaen ti Doktrina ken Katulagan 107:18–19 ket ilistam ti sumagmamano kadagiti “naespirituan a bendision ti Simbaan” a mabalinmo a gun-oden babaen ti Melchizedek Priesthood.
Apay nga ibinglay ti Dios ti bilegna iti priesthood kadagiti annakna?

Babaen kadagiti ordinansa ti priesthood—kas iti panagbuniag, ti sakramento, ken dagiti ordinansa iti templo—“maiparangarang ti bileg ti kinadios” (kitaen iti Doktrina ken Katulagan 84:20–21). Pagsaritaanyo iti tunggal maysa no kasano a nakitayo ti bileg ti Dios iti biagyo gapu kadagiti ordinansa ti priesthood. Ania ngata ti biagmo no awan dagitoy nga ordinansa?
Kasano koma a naiduma ti biagmo no saan a naisubli ti priesthood?

© 2026 ti Intellectual Reserve, Inc. All rights reserved. Naimaldit iti Pilipinas. Pannakaanamongna iti Ingles: 6/19. Pannakaanamongna a maipatarus: 6/19. Pannakaipatarus ti Monthly For the Strength of Youth Message, September 2026. Ilokano. 20074 864