Te Ibuobuoki ao Te Kairi ibukin Arom n Taai Aika A na Roko
Waakin te maiu e aki iriira n taainako are ko baaireia, ma onimakinan te Uea e na bita maium nakon ae tamaroa riki.
N tabetai ao e kona n taraan ae te aonaaba e onrake n te nanououa. Ko na kona n iangoia bwa tera ae tauraoi ibukim nakon taai aika a na roko. I a tia naba n namakina ae aron anne.
I kaaina te Ekaretia ma au karo ngke 16 au ririki ni maiu. I rangi ni mamaama n te tai anne. Imwiin kaainakin te Ekaretia, I karekea te nanomatoa. I reiakinna bwa antai ngai, I nako mai iaa, bukin tera I mena ikai, ao N na nakea imwiin te maiu aei.
I kunea i mwiina bwa e ngae ngke I aki ataa bwaninin rongorongona bwa tera bwaai ae N na karaoia ni maiu, iai te buoka ao te kairi are e kairai nakon maiu i mwiina ae korakora.
Bon titebo naba te koaua aio ibukim!
Te Kairi mairoun te Burabeti
Bon 17 au ririki ni maiu ngke te burabeti ae Beretitenti Spencer W. Kimball (1895–1985), e kawara Korea Maiaki n 1975. I nooria n te bwabwaro ike a bootaki iai 400 kairake mai Korea Maiaki n ongora irouna.
E tibwaia Beretitenti Kimball arona ni kamatebwaia koroboki aika tabu ao arona n tataro ni katoabong ma ngke te kairake ngaia. E taekina aron kakaawakin barongaan bwaai aika a moanibwai. E taku bwa ti riai ni kaekaea te tieminarii, katauraoi nakon te mitinare ao te mare ae akea tokina, ao ni mwakuri ni karekean te kamaiuaki. E kaota naba ana koaua.
E kaotaa au iango ana taeka te burabeti. I bon mena n te kauarinan, ma e bon aki bane nanou n au bwai n reirei. I tatangira te takakaro! I butibooro ngkana e reke au tai ao ni mwaiti riki au tai n takakaro nakon au kamatebwai. Bon tiaki ataein te reirei ngai ae I raoiroi. Imwiin ongoraau nakon te burabeti, I teimatoa n tatangira te butibooro, ma I baireia bwa N na karaoi bwaai tabeua aika a kakaawaki nakoiu.
I karaoa au kabanea ni konaa ni kamatebwai. N na nako ni karaoa au mwakuri ni mitinare, kabaeaki n te tembora, ao ni karekea au utu ae kukurei. I ataia bwa ngkana e na reke irou ae tamaroa aio nakon taai aika a na roko, N na riai ni iriira te burabeti—n aki tabe ma bwaai nako.
Ma reken bwaai nako ao kangaanga ae ko na kaitarai, ko na bon akea am kangaanga ngkana ko iriira ana kairi te burabeti ae maiu are e katauraoia.
Te Nanououa n te Mwakuri ni mitinare
I a tia ni karaoa au motinnano bwa N na beku ni mitinare, ma iai naba te beku ae riai ni karaoaki bwa te mwakuri n te tautia i Korea Maiaki. Imwiin au kauarinan, a mwaiti ataeinimwaane ake a rin te bootaki n tautia, a kakoroa nanon aia beku are e kantaningaaki, ao ni waekoa imwiina n reita aia reirei ao ni kareke mwakuri. E bon rangi ni kangaanga manga waakinan uoua te ririki nakon te mwakuri ni mitinare. Bon ti tabeman n te tai anne mitinare mwaane.
Ngke e koro 19 au ririki, I kawakina au motinnano ao ni katauraoi ao ni kanakoa beeban au mitinare. I weteaki bwa N na beku n te Korean Busan Mition. Teuana te ririki imwiina, I a kamwaingaki nakon te tabo n tautia. I bon rangi n nanokawaki ngke e toki au mwakuri ni mitinare.
Ngke e a bane tain au beku n te tabo n tautia teniua te ririki imwiina, I namakinna bwa e tuai tabwanin au mwakuri ni mitinare. A tuangai aomata, “Ko a tia ni beku ni mitinare. E bon ataa te bwai ae ko mena i nanon te Uea, e rang tau naba teuana te ririki ni beku.”
I tuanga raoraou man te tieminarii bwa tera ae I riai ni karaoia. E tuangai neierei bwa I riai n beku ni mitinare teuana riki te ririki. E anganai te nanomatoa ana onimaki ao ana kamatoa bwa N na mwakuri riki. I beku ni kakoroa au kauoua n ririki n te Korea Seoul Mition. E bane au tai, ao ai 25 au ririki ni maiu. I mareaki ma raoraou arei imwiina ao ti kabaeaki n te Laie Hawaii Tembora.
E reireinai te taneiei aei bwa ko na bon nakoraoi e ngae ngkana a aki waaki raoi bwaai nakon are ko tia ni baaireia. Ngkana e nakoraoi am babaire ma ana nonori te Uea ibukim, E na buokiko n am babaire nako i nanon maium.
E Na Reke te Aro ae Korakora N Taai Aika a na Roko
E ngae ngke I aki koaua raoi ngke te kairake ngai bwa tera aron maiu ae na reke irou, I kunea bwa karimoaan bwaai n tamnei bon te kiing ibukin te tokanikai—tiaki ti n te maiu aei, ma ibukin naba te maiu ae na roko.
Ngke ko a tia ni bwabetitoaki, ko karekea ana bwaintituaraoi te Tamnei ae Raoiroi. Ngke ko kabanea nanom nakon te wirikiriki are ko karekea, e na kamanoko te Tamnei ae Raoiroi. ao ni kairiko n te kawai ae eeti. Ko na namakina te mwengaraoi ao te rau.
Ngkai ko katauraoi ibukim nakon taai aika a na roko, ururingnga n:
-
Kamatebwai booki aika tabu.
-
Teimatoa n tataro.
-
Iriira te burabeti.
-
Onimakina te Uea n taainako.
Ngke au roro ngkami, I reiakina taekan anuan maiun te Tia Kamaiu ao arona ao arou bwa N na kangaa n riki n ai arona. E kororaoi. I aki kona n riki raoi n ai arona n te maiu aei, ma I kekeiaki nakon au kabanea n tamaroa, ao e na reke te tamaroa ngkana I mwakuria.
I ataia bwa e maiu Iesu Kristo. Ibukina, Iai au kaantaninga ibukin taai aika a na roko—ao ko konaa naba ngke!