Sandei Moning Sesen
Stap Lukaotem Ol Ansa long Ol Kwestin long Saed blong Spirit
Samfala Pat
Blong askem ol kwestin mo lukaotem mining, i wan nomol pat blong eksperiens blong yumi long laef ia. … Plan blong God i fulap long sore from ol hadtaem blong yumi ol man long wol; i givim yumi Sevya, Jisas Kraes, blong stap wan Gudfala Man blong Lukaot long Sipsip; mo i givim yumi insperesen blong yusum ejensi blong yumi blong jusum Hem. …
Wei we God Papa mo Pikinini blong Hem i givim wisdom blong Tufala long yumi i fas samting blong invaetem paoa blong Tabu Spirit blong i stap tija blong yumi taem yumi putum Jisas Kraes long medel blong ol laef blong yumi mo taem yumi stap lukaotem ol ansa mo mining long Tufala wetem fet. …
… Lod i bin talem long yumi se tru long fasin blong yumi blong stap obei mo gat strong tingting, bae yumi save kasem save mo waes. Ol loa mo ol komanmen blong God i no stap blong blokem laef blong yumi be i wan get we i gat paoa blong mekem yumi kasem revelesen mo edukesen long saed blong spirit blong yumiwan. …
… Yumi kasem blesing blong gat Jisas Kraes olsem Masta blong Hilim yumi. Blong obei long ol loa mo ol komanmen blong God i save openem rod blong Sevya blong yumi blong givim save mo hiling we Hem i save se yumi nidim, folem plan we Hem i gat blong mekem yumi oraet.
Ol dia fren, mi testifae se ol tru kwestin blong gospel i save givim spesel janis ia long Papa long Heven mo Jisas Kraes blong helpem yumi blong gro. … Mi testifae se blong putum tras long Papa long Heven mo long ol profet blong Hem we Hem i sendem bae i helpem yu blong gro mo go fored long saed blong spirit mo kasem save mo eksperiens blong God we i moa bigwan.