Mao ba?

Ni David A. Edwards

Mga Magasin sa Simbahan

Oo. Mao ba. Si Propeta Jacob mitudlo og usa ka mahinungdanong paagi sa pagsabot sa labing talagsaon nga reyalidad.

Imahe

ulo sa tawo

“Kanang tinuod.” “Pagmahimong reyalistik.” “Puy-i ang tinuod nga kalibotan.” Ang mga tawo usahay mosulti og mga butang nga sama niini kon magtuo sila nga dunay tawo nga inosente o nahilakip sa pagpangandoy lamang.

Ug tinuod kana—ang pagbaliwala sa reyalidad mahimo nga tinuod nga problema. (Dili kamo gusto og mga tawo nga maghunahuna nga, sama pananglit, ang balaod sa gibug-aton dili nila magamit. Mosangpot kana ngadto sa hilabihan nga pagkadili maayo.)

Apan ang reyalidad dako—mas dako kay sa maamgohan sa daghang katawhan. Gani, ang kinadak-an ug labing mahinungdanon nga bahin sa reyalidad molapas pa gayod niining kinabuhia ug sa pisikal nga kalibotan nga atong nakita pinaagi sa atong lima ka abilidad sa pagbatyag. Makita lamang kini pinaagi sa espirituwal nga paagi.

Ang propeta nga si Jacob sa Basahon ni Mormon mitudlo og mahinungdanong mga kamatuoran mahitungod niining mas dako nga reyalidad ug kon sa unsang paagi nga kita makahibalo ug makasabot niini.

Nganong Dili?

Gitudloan ni Jacob ang iyang katawhan mahitungod sa anaa nga labing talagsaon nga reyalidad: Si Jesukristo ug ang Iyang tahas sa plano sa Langitnong Amahan. Dayon si Jacob miingon, “Ayaw kamo og kahibulong nga ako nagsulti niini nga mga butang; kay ngano nga dili mamulong mahitungod sa pag-ula ni Kristo, ug mokab-ot ngadto sa hingpit nga kasayoran kaniya, aron makakab-ot sa kasayoran sa usa ka pagkabanhaw ug sa kalibotan nga umaabot?” (Jacob 4:12).

Niini nga pamahayag, si Jacob mitudlo og pipila ka mahinungdanon nga kamatuoran:

Adunay mas labaw pa kaysa niini lamang nga kinabuhi—adunay pagkabanhaw.
Adunay mas labaw pa kaysa niini lamang nga kalibotan—adunay “kalibotan nga moabot.”
Ang labing importante, si Jesukristo mihimo niining tanan nga posible alang kanato pinaagi sa Iyang makatubos nga sakripisyo.
Makaangkon kita og kahibalo mahitungod niining mga butanga.

Dagko kana nga mga reyalidad. Ug sama sa giingon ni Jacob, nganong dili man kini hisgotan?

Dayon si Jacob dunay pipila nga ikasulti bahin sa kon giunsa niya sa pagkahibalo niining mga butanga ug namulong sa hilabihan ka yano mahitungod niini.

“Mga Butang Ingon nga Sila Gayod Mao”

Si Jacob mitudlo: “Ang Espiritu namulong sa kamatuoran ug dili mamakak. Busa, kini namulong sa mga butang ingon nga sila gayod mao, ug sa mga butang ingon nga sila gayod mahimo unya” (Jacob 4:13).

Pinaagi lamang sa Espiritu Santo kita masayod sa kamatuoran—“sa mga butang ingon nga sila gayod mao,” sa hingpit nga reyalidad. Unsaon man nato sa paghimo niana?

Ang tinuod mao nga ang kadaghanan sa panabot sa usa ka tawo mahitungod sa reyalidad—sa pisikal ug sa espirituwal—mag-agad sa pagsalig.

Mosalig kita sa atong lima ka abilidad sa pagbatyag nga mohatag nato og direktang kasinatian pinaagi sa pisikal nga reyalidad. Gibutang usab nato ang atong pagsalig diha sa gawas nga mga tinubdan—mga ginikanan, mga magtutudlo, mga basahon, mga artikulo, mga website, mga litrato, mga mapa, mga bidyo—tanan nga matang sa mga butang. Paglabay sa panahon, masuta nato ang mga kamatuoran pinaagi sa pagsinati mismo sa mga butang, o makita nato ang mga kamatuoran nga napalig-on.

Ingon nga kita nagkat-on sa pagsalig sa atong lima ka abilidad sa pagbatyag, kita makakat-on sa pagsalig sa atong abilidad nga makabatyag og espirituwal nga mga butang.

Ug kinahanglan kitang magkat-on sa pagsalig sa piho nga mga tinubdan gikan sa gawas mahitungod sa espirituwal nga mga butang. Kinahanglan nga magbaton kita og hugot nga pagtuo sa Langitnong Amahan ug ni Jesukristo ug mosalig Kanila ug sa Ilang gugma. Kinahanglan nga mosalig kita sa Espiritu Santo. Kinahanglan nga mosalig kita sa mga propeta, sa mga kasulatan, ug sa ubang tinubdan sa gipadayag nga kamatuoran. Ug kinahanglan nga mosalig kita sa pagpamatuod sa uban.

Samtang gamiton nato ang hugot nga pagtuo ug pagsalig, kita mismo makaangkon og espirituwal nga mga kasinatian ug makita ang espirituhanong mga kamatuoran napalig-on paglabay sa panahon. Makita nato ang mas dako nga reyalidad nga gihisgotan ni Jacob:

Si Jesukristo tinuod gayod. Ang Iyang matubsanon nga sakripisyo tinuod gayod. Ang Iyang Pagkabanhaw tinuod gayod. Ang atong pagkabanhaw usab tinuod gayod. Kini nga kinabuhi tinuod gayod. Ug ang kinabuhi human dinhi tinuod gayod. Ang plano sa Langitnong Amahan tinuod gayod. Kini mao ang mga butang nga mao gayod ug mahitabo gayod. Ang paghangop niini nga reyalidad makapausab sa atong kinabuhi hangtod sa hangtod.