“O Le Meaalofa a le Atua e Fesoasoani ia te Oe e Aoao,” Mo le Malosi o le Autalavou, Ape. 2023.
Fesoasoani o le Olaga
O Le Meaalofa a le Atua e Fesoasoani ia te Oe e Aoao
Ia matua faamalosia lou aoaoina e ala i le malamalama i le matafaioi a le Agaga Paia o i ai (i lou aoaoina).
Pe sa i ai se taimi na e manao ai e aoao se gagana fou, ae e te lei taumafai lava ona sa e manatu e te le mafaia? Na e manao e faataitai se fua fou, ia lelei atili i le Matematika, pe aoao foi ia iloa ona aau? E te iloa? Faatasi ai ma le fesoasoani a le Agaga Paia, le sui lona tolu o le Aiga Atua, e mafai ona faaleleia atili lou gafatia e aoao ai!
O le agaga o le aoaoina ma le malamalama o se tasi lea o meaalofa a le Agaga Paia. E mafai ona Ia fesoasoani ia te oe i le tele o auala, e aofia ai lou aoaoina.
E Faafefea Ona Fesoasoani Le Agaga Paia ia te Oe e Aoao
Ata na tusia e Emily E. Jones
1 Faamautu o mea ua e aoaoina e moni
(Tagai i le Moronae 10:5.)
Faataitaiga: E te lagonaina le filemu i lou loto ma lou mafaufau pe a uma ona e aoaoina se mea moni i le seminare.
2 E mafai ona fesoasoani ia te oe e manatua mea ua e aoaoina
(Tagai i le Ioane 14:26.)
Faataitaiga: A o talanoa ma se uo, atonu e te manatua se mea e te lei mafaufau i ai i se taimi umi lava. O lena manatu e mafai ona avea ma tali i a latou fesili pe tuuina atu ai foi ia i latou se faamafanafanaga.
3 Faamalamalamaina lou mafaufau ma le malamalama
(Tagai i le Mataupu Faavae ma Feagaiga 6:15; Alema 32:28. O le faamalamalamaina o lona uiga o le malamalama lelei i se mea.)
Faataitaiga: Sa e tauivi e aoao se fuafaatatau fou i le matematika. I le maea ai ona suesue ma ole atu mo se fesoasoani, e iu lava ina e malamalama i ai ma pe faapefea ona faaaoga i le lalolagi sa’o lava.
4 E mafai ona faatumuina oe i le olioli!
(Tagai i le Mataupu Faavae ma Feagaiga 11:13.) E mafai ona Ia faatumuina oe i le olioli ma fesoasoani ia te oe ia e iloa o loo e alualu i luma ma avea atili e faapei o le Atua.
Faataitaiga: Ua sau se tasi e pele ia te oe e aoao ia te oe a latou fua lauiloa mo se supo. E te lagona le fiafia ona o le taimi na outou faaaluina faatasi ma sa e aoaoina se mea fou!
Manatu mo le Valaauina o le Agaga Paia e Faatasi ma Oe
-
Usitai i poloaiga (tagai i le Moronae 8:25–26). Afai e te manao ia avea le Agaga Paia ma au soa, e tatau ona e taumafai e mulimuli i le Atua ma usitai ia te Ia. E le tau tuli ia e atoatoa, ae e fesoasoani pe afai o e taumafai.
-
Tatalo ma le faamaoni. “O le a tuu atu ia te outou le Agaga e ala i le tatalo o le faatuatua” (Mataupu Faavae ma Feagaiga 42:14). Tatalo mo le Agaga Paia ia faatasi ma oe ma fesoasoani i mea o loo e aoaoina.
-
Faalogo, aoao, ma faalagolago i auala e talanoa mai ai le Agaga Paia ia te oe. O le agaga o le aoaoina ma le malamalama o se tasi lea o meaalofa a le Agaga Paia. I tusitusiga paia, ua aoaoina ai i tatou e faapea e talanoa mai le Agaga Paia i o tatou mafaufau ma o tatou loto (tagai i le Mataupu Faavae ma Feagaiga 6:15, 22–24; 8:2; 9:7–9).
E mafai foi ona talanoa atu le Agaga Paia ia te oe i isi auala.
-
Faamalosia taumafaiga. Na saunoa Peresitene Russell M. Nelson, “E fiafia le Alii i taumafaiga” (i le Joy D. Jones, Ape. 2020 konefesi aoao [Ensign po o le Liahona, Me 2020, 16]). A o e suesue malosi, fai le mea sili, ma tuu i ai galuega manaomia e aoao ai se mea, o le a fesoasoani le Atua ia te oe.
Tatalaina o Faitotoa o Avanoa
O le a’otauina ma le aoaoina i le olaga atoa e mafai ona fesoasoani ia te oe e maua ai auala e alofa ma auauna atu ai i isi ia sili atu nai lo le mea na e mafaufauina e te mafaia. A o e sailia le Agaga Paia i le taimi e te aoao ai, e mafai e le Atua ona faaleleia au taumafaiga.