“Pe a E Lagona Le Vaivai,” Mo le Malosi o le Autalavou, Ape. 2023.
Pe a E Lagona Le Vaivai
E mafai faapefea ona liua o tatou vaivaiga i le malosi?
Ata na tusia e Corey Egbert
E tofu uma i tatou ma vaivaiga—mo se faataitaiga, ou te popole i nisi taimi e uiga i mea e le mafai ona ou puleaina. O nisi taimi ou te faatusatusa ai a’u lava i isi. Ae faapefea oe? O i ai ni ou vaivaiga? Atonu o loo e tauivi ma le fefe po o faaosoosoga. Atonu e i ai sou vaivaiga faaletino e afua ai ona e maua i tiga po o faigata. Atonu o lou vaivaiga o se tauiviga e faamagalo atu i isi, po o le manao foi ia ita i le Atua mo mea na tutupu ia te oe. E tofu uma i tatou ma vaivaiga.
O le mea moni, sa i ai ni vaivaiga o le Aposetolo o Paulo. Na tusia e Paulo e faapea, ina ia taofia o ia lava mai le mitamita, sa tuuina atu e le Alii ia te ia se “mea matuitui i le tino” (2 Korinito 12:7). Tatou te le iloa po o le a lena mea, ae sa avea ma se ituaiga o vaivaiga. Sa le na ona ole atu o Paulo i le Alii ae sa aioi atu i le Alii e aveese lenei vaivaiga. Sa lei na o le tasi foi le taimi na ia augani atu ai. Sa faatolu ona ia aioi atu i le Alii e aveese lona vaivaiga (tagai i le 2 Korinito 12:8).
Atonu sa e lagonaina foi nei lava lagona e tasi. Atonu e tele taimi na e aioi atu ai i le Alii e aveese se mea matuitui patino i lou tino. Ae e lei aveesea e le Alii vaivaiga o Paulo. E ui ina sa faaauau pea ona aioi atu Paulo ina ia aveesea, ae sa fetalai mai le Alii, “Ua lava lo’u alofa tunoa mo oe: aua e faaatoatoaina lo’u malosi i le vaivai” (2 Korinito 12:9).
Mafaufau i ai i lena fuaitau. E moni ea lena mea? Pe mafai moni ea e le mana o Keriso ona tauia o tatou vaivaiga? Aua i le iuga o nei mea uma, sa Ia filifilia se alii talavou o le sa ola ae ma se tamā amioleaga e avea ma Aperaamo, le tama o malo e tele. Ma sa Ia filifilia se pagota e igoa ia Iosefa e taofia le matelaina i Aikupito ma filifilia se isi Iosefa, o lenei alii talavou e 14 tausaga e lei aoaoina, e toefuatai mai Lana talalelei. Sa ia ta’u atu foi ia Kitiona e faaitiitia lana autau i le 300 ina ua feagai Kitiona ma se autau e le mafaitaulia, ma sa ia fesoasoani i se fafine ese ua oti lana tane e igoa ia Ruta e amataina se laina o se gafa tautupu.
Pe mafai moni ea e le mana o Keriso ona liua o tatou vaivaiga i le malosi?
O Elia, na o ia lava, na mafai ona manumalo i le silia ma le 400 o faitaulaga a Paala. Ina ua valaauina Ieremia e le Atua, sa fai mai Ieremia, “ou te le iloa ona ou tautala: aua o a’u o se tama itiiti” (Ieremia 1:6). Ae na ia auauna atu o se perofeta i le tusa ma le 40 tausaga. Ma sa galue le Alii e ala atu i se teineitiiti Iutaia ua matuaoti e igoa ia Eseta e faasaoina se malo atoa. O le mea moni, e faia moni lava e le Alii le tele o vavega e ala i o tatou vaivaiga!
Manatua upu a le Faaola: “O lo’u malosi ua faaatoatoina i vaivaiga.” Pe a e lagona le vaivai ona o au lava mea matuitui i la le tino, ia manatua e mafai e le Atua ma o le a faaaogaina oe, faatasi ma ou vaivaiga ma mea uma, mo Ona faamoemoega.
Sa alu talu ai nei sa’u uo i le malumalu. A o ia faatali i le falesa, sa ia matauina se toeaina matua o loo taina le okeni. Sa faagaeetia o ia i le lelei o lana ta—ma sa sili atu foi ona faagaeetia o ia i le taimi lava na ia matauina ai e le o i ai sana musika. Sa ia taina ni pese se tele e toetoe lava a atoatoa. Sa ia fai mai ia te au, “Sa ou iloaina mulimuli ane o lenei tamaloa e tauaso. Sa ia faamanuiaina a’u ina ua ou ootia lava i lona olaga o le faapaiaga.”
O le mana o Iesu Keriso e matuai sili atu lava nai lo soo se vaivaiga e ono tauivi ma oe po o au. Atonu pe a tatou lagona le vaivai, o se faailoga lea ua vave mai se taimi e galue ai le mana o Keriso i o tatou olaga pe a tatou valaaulia o Ia i totonu.
O le alofa tunoa o le Faaola, po o Lona mana gafatia, o se vaega autu o Lana Togiola. E Na te “fesoasoani ia tatou ia vaai, faia, ma avea ma ni tagata lelei i ni auala e le mafai ona tatou iloaina pe ausiaina i o tatou gafatia faatapulaa faaleolaga nei.”1
E ala i Lana Togiola, o loo i ai le Faaola iina e fesoasoani ia i tatou ia salamo i a tatou agasala ma ia faamalolosia foi i tatou pe a tatou lagona le vaivai. Atonu e i ai mea e le mafai e oe ma a’u ona faia—i o tatou lava gafatia faatapulaaina—ae faatasi ai ma le mana gafatia o Keriso, e mafai ai ona tatou faia.
Na ta’u atu e le Alii ia Moronae: “Sa e faamaoni; o le mea lea, o le a faamamāina ou ofu. Ma ona ua e vaai i lou vaivai o le a faamalosia oe, e oo lava i le nofo i lalo i le nofoaga ua ou saunia i maota o loʼu Tamā” (Eteru 12:37).
Ia matau e lei tauina mai e le Alii ia Moronae, “O le a e malosi i lenei olaga.” I le tulaga e uiga ia Moronae, o le mauaina o le malosi atoatoa e oo mai i le olaga a sau. E pei ona aoao mai Peresitene Nelson, mo i tatou taitoatasi i le olaga nei, “o le tulaga atoatoa o lo faatalia pea. E mafai ona oo mai atoa pe a mavae le Toetu ma e na o le Alii e ala mai ai.”2
Ina ua uma ona maua lenei savali mai le Alii, sa fautuaina mai e Moronae le aufaitau i ona po nei i le ala e tumau ai i le alofa tunoa o le Atua. “Ma o lenei, ou te apoapoai atu ia te outou ia outou saili lenei Iesu o le ua tusi i ai le au perofeta ma aposetolo, ina ia i ai ma tumau ia te outou e faavavau le alofa tunoa o le Atua le Tamā, ma le Alii o Iesu Keriso, ma le Agaga Paia, o le ua molimau ia te i laua. Amene.” (Eteru 12:41).
A o tatou saili atu ia Iesu, o le a tatou lagonaina Lona mana faamalosiau lea e fesoasoani ia i tatou i luitau tatou te feagai. Pe a e lagona le vaivai, atonu o le ala lena a le Alii e valaaulia ai oe e utuvai mai Lona malosi ma le mana.