Mukenji wa ku Ngondu wa Liahona,, Ngondu Muitanu 2026

Masambila bua Ditalala

Kudi Mulombodi Mukulu Henry B. Eyring

Mubedi wa Kumpala mu Bulombodi Bukulu bua Kumpala

Patudi tutungunuka ne kusambila, kabiyi kulonda bikondu bia moyo, Mukalenga neatupesha ditalala Dienda ne tshishimikidi tshia kueyemena.

Bana Betu baluma ne bakaji ba muhsinga mukola, ndi ne disakidila dia kuikala nenu mu tshikondu etshi patudi mua kuvuluka kabidi dikankamika dia Mupandishi kudi Bapostolo Benda, pawuaye mumanya ne uvua ne bua kubashiya nkayabu, kayiku bua kubalombola, kubakuba, ne kusungila ku bipupu.

Bivua ku Didia dia Ndekelu adi kuakapeshaye bayidi ba lulamatua abu mulayi, udi utungunuka ne kunkankamika ne kukolesha bayidi benda ba lulamatu lelu mu ntatu yonsu itudi tututakenangana nayi mu mioyo yetu. Wakamba: “Ndi nushila ditalala, ndi nuha ditalala dianyi: tshiena nuhadi bu mudi ba ha buloba banuhadi. Mitshima yenu kayizakadi, kaitshinyi.”

Buloba budi bumueka buikala mu dilubakana. Kudi mvita ne bipupu bia mvita. Mabanji a bimenga bionsu adi amueneka anyanguka. Tshikisu tshiamba kudi baprofete tshidi tshimueka tshivula bikola bu mudi dipingana dia Mupandishi disemena pabuipi.

Nansha nanku pakumbusha tshimvundu ne lutatu, Bansantu ba Matuku a Ndekelu ba lulamatu badi mu lutatu mu buloba bujima mbûja diûlu ne masambila. Mu bantu ne pa nkaya, badi basengelela Mukalenga bua diambuluisha, bua dikankamika, bua buludiki, ne ditalala dia muntu nkaya bua badibu bananga.

Nudi mua kuikala bamona mu bikongu bienu ne mu mêku enu ne masambila kâvua anu a bungi kadi mikala alenga mutshima bia bungi.

Dikudimuka kudi Tatu wa mu Diûlu mu disambila dikola padi buloba bumueka mu lutatu lukola didi dia kala anu mudi bukuabantu. Mu bikondu bia bowa, dikenga, njiwu, tshimvundu, and disama, bantu badi misangu ya bungi bakudimuka kudi Nzambi mu disambila. Muenande munanga, Yezu Kilisto, utudi tusambila mu dina dienda, mmutumanya, udi utukuba, ne ututabelela. Udi mua kuvuluka mêyi a busambi a Mfumu Davidi ku mukanda wa misambu:

“Mukalenga neikale tshibumba tshile kudi bantu badi bakengeshibua. Neikale tshibumba tshile kudi bantu mu tshikondu tshia ntatu.

“Ne badi bamanye dina diebe nebakueyemene: bualu bua wewe, Mukalenga, kuena muanji kulekela bantu badi bakukeba”

Mu bikondu bia lutatu, dikala nkaya, anyi tshibuejakaji, tudi bamanye ne Tatu wetu wa mu Diûlu ne Muanenda Munanga badi bamanye ntatu yetu ne badi bajinga kutubenesha. Mêyi a Mupandishi adi matoka:

“Nulombe, nebanuhe; nukebe, nenumone; nukokole, nebanunzuluile.

“Bualu bua muntu yonso udi ulomba, neahete; udi ukeba neamone; udi ukokola, nebamunzuluile.”

Kunzulula madidishi a diûlu kupitshila ku disambila dikola kakuena kulomba dienzela dia mêyi a bungi anyi ngakuilu muimpa to. Kadi, kuikala ne lukunukunu mu disambila didi Tatu wa mu Diûlu ulomba kutudi kudi “kukudika misuka [yetu] ” mu muaba wa nkaya ne kuikala ne mitshima yetu “minamina mu disambila kudiye misangu yonsu.”

Mu kuamba kuenda ku Mukuna, Mupandishi wakalongesha:

“Kadi wewe hawatendelela nzambi, ubuele mu kasubu kebe ka tshisokomenu, winshile tshibi, utendelele Tatu webe, udi biandi mu tshisokomenu, ne Tatu webe udi umona mu musokoko neakuhe.

“Kadi hanuatendelela Nzambi, kanuakudi biakulakula bu mutu bantu babende benza; bobo batu belangana meshi ne, nebatumvuile bua mei etu adi a bungi.

“Kanuikadi bu bobo; bualu bua Tatu wenu udi mumanye binudi nabi bualu diambedi kanui banji kumulomba.”

Mukalenga mmutupesha kabidi tshimueneshi tshia bukola tshia masambila adi kâyi menza ne mêyi mafila mu mitshima yetu. Mu Mukanda wa Molomo, tudi tubala pa bantu ba Alama Mukulu, bavua mua kuikala bashipibua bu bobo basambila ne dîyi dikola:

“Ne Alama ne bantu benda kabakabandisha mêyi abu kudi Mukalenga Nzambi wabu to, kadi bakinnamija mitshima yabu kudiye; ne uvua mumanya meji abu ne majinga a mitshima yabu.

“Ne biakalua ne dîyi dia Mukalenga diakabaluila mu ntatu yabu, diamba ne: Jikulayi mitu yenu ne sangalayi, bualu ndi mumanya tshipungidi tshinuakenza nanyi …Nempepeja kabidi majitu adi mateka pa makaya enu, bua kanuwumvu mena pa nyima yenu to, mena panutshidi mu bupika. …

“Ne mpindiewu biakalua ne majitu avua mateka pa mutu pa Alama ne bana babu akalua mapepela; eyowa, Mukalenga wakabakolesha bua bobu kuambulabu majitu abu kakuyi lutatu to, ne bakakôkesha ku disua dionsu dia Mukalenga ne disanka ne ditukija.”

Ndi jadika ne Mukalenga udi umvua ne wandamuna masambila a mitshima yetu, anu bu muvuaye muandamuna Alama ne bantu benda. Tudi mua kulonda mukenji wenda wa “kusambila misangu yonsu” mu kuikala ne disambila ditungunuka mu mitshima yetu. Bu muvua baprofete balongesha misangu ya bungi mu bikondu bishala, udi mua kumvua bu ne kuena usambila anyi kuena mua kumanya tshia kuamba, kadi Nzambi udi umvua masambila a mu musokoko a mutshima weba. Ngumvuilu ya mutshima weba ne dinanga bua Tatu wa mu Diûlu ne bua Muanenda Munanga bidi mua kuikala tshishiki muabanda masambila eba misangu yonsu.

Patudi tutungunuka ne kusambila, kabiyi kulonda bikondu bia moyo, Mukalenga neatupesha ditalala Dienda ne tshishimikidi tshia kueyemena. Ndi muvuluka bua tshilejilu tshia bana ba Mosiya, bavua ne bipeta bimpa mu diyisha lumu luimpa ne bavua bakola mu nyuma bualu bavua basambila tshishiki. Tudi tubala mu mukanda wa Molomo, “Bavua badifila ku disambila divula, ne dijila dia biakudia; bua nanku bavua ne nyuma wa buambi, ne nyuma wa dibuluila.”

Bidi ne diumvuija ne makanda abu a nyuma akafuma ku disambila ditungunuka pamutu pa dindila bua kusambila pakumbuna tshikondu tshia dikenga pavuabu bajinga diambuluisha dia bunzambi mu dipanga ditekemena. Disambila dia tshishiki mu bikondu bia disanka ne kabidi mu bikondu bia kanyinganyinga ne busami nebifutshibua bushuwa bilondeshela ku disua dienda ne tshikondu tshiakana.

Ndi mumanya ne Nzambi Tatu udi ne moyo. Udi mutunanga. Udi umvua masambila etu, ne bikondu bia bungi neandamuna ne ngumvuilu wa ditalala. Kabidi ku Mukanda wa Molomo: “Ne mpindiewu, ditalala dia Nzambi ditudila pa mutu penu, ne pa nzubu yenu ne malaba enu, ne pa bisumbu bia bimuna bikesa ne binena bienu, ne bionsu binudi nabi, bakaji benu ne bana bebu, bilondeshila ditabuja dienu ne midimu yenu mimpa, kubangila diba edi tô ne bua kashidi. Ne Ngambi nanku. Amena.”

Bana Betu Baluma ne Bakaji, Ndi mfila bujadiki buanyi ne mulayi wa Mupandishi udi mulelela ne disambila dia didipuekeshi bua ditalala mu mutshima weba nedinemekibua. Nankatshiumvua mu madilu a muena kuanyi wa bidimu 61. Mvua mukemeshibua ku diumvua dia ditalala ne pabuipi ne disanka. Bantu ku madilu bavua ne bua kuikala badiela nkonku buatshinyi mvua ntua mimuemue. Bivua bualu Mukalenga uvua muandamuna disambila dianyi bua ditalala ne dituishibua ku Nyuma wa tshijila, divua dinganyishila bua kupeta tshimônyi tshia dipetangana kabidi nenda dia disanka mu matuku alualua kumpala. Mukalenga wakampesha ditalala ne ditekemena bivuayi mulaya bayidi benda.

Wakamba: “Ndi nushila ditalala, ndi nuha ditalala dianyi: tshiena nuhadi bu mudi ba ha buloba banuhadi. “Mutshima weba kawulubakanyi.”

Ndi njadika ne Ndi mumanya ne Yezu Kilisto udi ne moyo. Mmutunanga ne udi utubenesha. Udi utungunuka ne kutupesha ditalala mu mioyo yetu kupitshila ku disambila dikola ne dilelela. Ndi njadika bua bintu ebi ne didipuekesha mu dina dia tshijila dia Yezu Kilisto, Amena.