“E Dua E Kila,” iTokani, Nove. 2023, 26–27.
E Dua E Kila
Era a sega ni kila na itokani nei Blair se vakacava tu na tauvi ni mate qo na Crohn.
Na italanoa oqo a yaco e Amerika.
“Au sega ni rawa ni lako yani nikua,” a kaya o Blair. A vakila ni katakata na matana mai na madua.
Erau a wadravi koya tu na nona itokani. “Ia iko a kaya ni o na lako mai!” A kaya o Sammy.
“Au kila.” A vakaraica sobu tu o Blair na yavana. “Au sega ni bula vinaka sara tiko. Vosoti au.”
“Oqori na ka o a kaya ena iotioti ni gauna,” a kaya mai o Jessica.
A sega ni kila o Blair na ka me tukuna. A diva o koya me a rawa ni lako ki na vale nei Sammy. Ia sa vutu dina na ketena nikua. A gadreva o koya me lako i vale ka laki vakacegu.
A tauvi Blair tiko na mate na Crohn. E vakavuna me momosi na ketena, ka vutu dina sara. Ena vuqa na siga e dau vutu vakalailai ga. Ia eso na siga dau ca vakalevu cake sara. Nikua a dua vei ira na siga vaka oya. A diva me rawa ni digia o koya na siga me dau mosi vakalevu cake kina. E vaka me dau vutu vakalevu na ketena ena veigauna e vinakata kina me cakava e dua na ka marautaki.
“Daru sa lako ga,” a kaya o Sammy vei Jessica.
Ni yaco i vale o Blair, a taura sara na mena wainimate. Sa qai tovolea me moce. Ia a rui vutu vakalevu o koya.
Erau a mai raici koya o Na kei Ta. A dabe ena nona idavodavo o Ta. “O sa bau vakaevei toka?”
“Daumaka. A veivuke vakalailai na wainimate,” a kaya o Blair.
“Au sa nanumi iko ni o sega ni rawa ni lako ki na vale nei Sammy,” a kaya o Na.
A vakila o Blair na tonawanawa ni matana. “Oqo e sega ni dodonu! Era sega ni kila na noqu itokani se vakacava tu beka.” A kolotaka yani o Blair e dua na ilokoloko ki lalaga. “Au vinakata ga meu bula vinaka cake.”
A mokoti Blair yani o Ta. “Au sa kila. O vinakata beka e dua na veivakalougatataki ni matabete?”
A deguvacu o Blair. Na veivakalougatataki e dau vukei koya me vakila vakalevu cake na vakacegu.
A tabaka na buradelai Blair o Ta ka vakalougatataki koya me vakacegu ka lomavinaka. A dua na vakalougatataki vinaka. A vukei koya me nanuma tiko ni lomani koya tu na Tamada Vakalomalagi. Ia e se rarawa tikoga o koya baleti rau na nona itokani.
Ni oti na veivakalougatataki, rau a reguci Blair ni vakamoce o Na kei Ta. Erau a biubiu yani me rawa ni moce o koya.
A davo sobu o Blair ka bobo na matana. A veivuke na veivakalougatataki oya, ia a se rarawa tikoga o koya.
A tekiduru o koya e yasa ni nona idavodavo me masu. Taumada a vaka ga e vuqa na nona masu. A tukuna o koya vua na Tamada Vakalomalagi na ka a vakavinavinakataka ka kerea me vakalomavinakataki. Ia ena gauna oqo a toso tikoga o koya.
“Tamaqu Vakalomalagi, au vakila niu rarawa dina. Au calata na noqu tiko vata kei rau na noqu itokani,” e kaya o koya. “Au vakila niu galili. E sega ni dua e kila na levu ni noqu dau mosi tu ena veisiga yadua. Au sa calata na noqu ituvaki ni bera niu a tauvimate.”
Na balavu ga ni nona masu o Blair, na levu ni nona vakila ni vakarorogo tiko na Tamada Vakalomalagi ki na nona masu. A sega ni rogoci se raici Koya rawa o koya, ia a vakila na Nona loloma. A kila o koya ni kauwaitaka tu o Koya na veika a tukuna tiko yani. A sega ni vinakata o Blair me cava na veika vakilai oqori.
A masu o Blair me yacova ni sa tukuna vei Tamada Vakalomalagi na veika kece a vakila tu o koya. A qai yaco mai vua e dua na vakanananu. Era na sega beka ni kila na itokani nei Blair na veika vakilai ni mate qo na Crohn, ia erau a kila tu na Tamada Vakalomalagi kei Jisu Karisito. Erau a kila na levu ni nona mosi kei na nona galili. Erau na dau tu ga e kea me baleti koya.
A vakila o Blair ni sa mokoti o koya ena dua na imoko levu duadua. Ni oti na nona masu, a laki raici rau nona itubutubu me tukuna vei rau na ka a yaco.
“E dua beka na nomu tadra ca?” A taroga mai o Na.
A matadredredre yani o Blair. “Sega. Au a masu tiko.”
A kurabui o Na. “Keirau a vakamoce vei iko ena dua na gauna sa oti. O a masuta tiko li na gauna taucoko oya?”
E a rui balavu dina beka? A deguvacu o Blair. “E a vaka e dua na veimokoti levu. Na Tamada Vakalomalagi kei Jisu Karisito e rau kila tu na veika au vakila. Ena Vukudrau, e sega ni dodonu meu galili!”
Droini mai vei Tammie Lyon