“Giunsa nga Ako Nabunyagan,” Higala, Agosto 2023, 12–13.
Giunsa nga Ako Nabunyagan
Kumusta! Ako si Aranoarii. Nagpuyo ko sa Tahiti. Ako 11 anyos, ug mapasigarbohon ko nga moingon nga ako miyembro sa Ang Simbahan ni Jesukristo sa mga Santos sa Ulahing mga Adlaw.
Giunsa nimo pagkahibalo mahitungod sa Simbahan?
Pipila ka higala ang midapit sa akong pamilya sa usa ka kalihokan sa Simbahan. Gidapit usab kami sa bunyag sa usa ka bata. Gipangutana nako ang akong mama kon pwede ba ko nga makigkita sa mga misyonaryo tungod kay ganahan kaayo ko nga makakat-on og dugang kabahin ni Jesukristo.
Kumusta man ang pagpakigkita sa mga misyonaryo?
Ang mga misyonaryo buotan kaayo! Ako kanunay nga mahinamon nga maadunay mga leksiyon uban nila kabahin ni Jesukristo ug sa Iyang ebanghelyo. Ganahan ko sa mga istorya nga ilang gisugilon nako ug ang among mga gidula aron matabangan ko nga makakat-on.
Sama sa unsa ang imong bunyag?
Ang akong papa ang mibunyag sa akong mama ug nako sa akong ika-11 nga adlawng natawhan. Nalipay kaayo ko! Nagdapit kami og daghang tawo nga among gimahal. Ang akong mga klasmet ug magtutudlo miabot aron suportahan ko.
Sa dihang mikawas ko sa tubig, napuno ko sa kamaya. Nagpahiyom ko kutob sa akong dalunggan! Malipayon kaayo ko nga makasunod ko sa ehemplo ni Jesukristo.
Sama sa unsa ang pag-adto sa Primary sa unang higayon?
Sa sinugdanan, gikulbaan kaayo ko nga hapit na ko mohilak. Apan dayon miadto ko sa usa ka kalihokan sa Primary. Nailaila nako ang tanan, ug nakahimo ko og mga higala.
Kon ikaw bag-o, ang akong tambag mao nga motambong ka sa imong klase sa Primary, bisan kon nahadlok ka sa sinugdanan. Ganahan kami og bag-o nga mga tawo!
Unsaon nimo pagsunod si Jesus?
Mag-ampo ko ug mosimba matag Dominggo. Makig-istorya ko sa akong pamilya kabahin sa ebanghelyo ni Jesukristo.
Maningkamot ko nga mangita sa ubang tawo nga nanginahanglan og tabang. Sa panimalay, motabang ko sa akong mama sa mga gimbuhaton. Motabang ko sa akong papa sa pagpananom, pagputol og kahoy, ug magtukod og mga butang. Pipila ka bulan ang milabay, ang among ward adunay pasundayag sa mga talento. Usa ako ka musikero, mao nga mipatukar ko sa tambol sa tibuok gabii!
Mga litrato pinaagi ni Stéphane Sayeb