Timi Vou i Samuela
Ena solia beka vua na gonetagane tale eso na madigi?
Oqo na mataka lailai ni Vakarauwai. A dabe toka o Samuela ena teveli ni valenikuro ka wadrava tu na nona veleti ni poreti. A sega ni lomana dina na kana.
“Ta?” a kaya mai vakamalua. “Au sa veisautaka na lomaqu. Au sega ni via sotava na noqu timi ni basiketepolo nikua.”
“Au kila ni sa dredre mo na gone vou tu, ia o na vakaitokani,” a kaya o Ta.
“Sega, e sega ni o koya qori … Au lomaleqataka ga na ka era na vakasamataka. ”
A dabe tikivi koya o Ta. “O vakataroga tu li se cava ena vakasamataka na nomu timi ena vuku ni dua na dauqito vou ka dua tu ga na ligana?”
A sucu o Samuela ka sega na ligana imawi. Na ligana imawi e yaco tu ga ena ilobi ni ligana.
“Io,” a kaya o Samuela. “Me vaka ni ra sega tu ni kilai au, era na nanuma beka ni sega ni rawa ni qito basiketepolo e dua na gone liga-dua.”
“Era na nanuma beka oqori, ia o iko e dua na dauqito vinaka. Ka na vukea na nomu qito vakavinaka sara na vakatovotovo o cakava voli,“ a kaya o Ta ena matadredredre. “Lako mai. Taura na nomu siqeleti kei na nomu tavaya wai. Daru laki sotava na nomu timi.”
A daga tu o Samuela. “Sa donu.”
Ena gauna ga rau curu yani kina ki na vale ni qito, a gole mai na dauniveivakatavulici.
“Drau bula! O au o Dauniveivakatavulici Monroe. Rairai o iko na noda dauqito vou.”
“Io, o au o Samuela.”
“Keimami marautaka ni o lewena na noda timi” a kaya o Dauniveivakatavulici Monroe. “Datou laki sotava mada na gonetagane tale eso.”
A dabe toka o Ta ena dua na idabedabe balavu. A taura na nona polo o Samuela ka muria na dauniveivakatavulici.
“Au via vakatakilai Samuela, na noda dauqito vou duadua,” a kaya o Dauniveivakatavulici Monroe. E vica na gonetagane a yalo vakalailai vei Samuela. “Eda kalougata ni tiko o koya me donuya na matai ni noda qito. Au vakabauta ni na dua na timi vinaka o keda, dua na qito vinaka, kei na dua na gauna vinaka!”
A uvuca na nona sici o Dauniveivakatavulici Monroe, ka tekivu vakatovotovotaka na timi eso na iwalewale. A raica o Samuela ni wadra voli e vica na nona lewe ni timi ni tavia sobu ka kolotaka na polo ena ligana imatau duadua ga. A tovolea o koya me kakua ni vakacalai kina.
Donuya e dua na vakacagicagi ni wai, a dabe tikivi Samuela e dua na gonetagane ena idabedabe balavu. Bula, o au o Jackson. Na cava a yaco ki na ligamu?”
“E sega ni dua na ka. E sa vaka tu kina na noqu sucu,“ a kaya o Samuela.
“Au se bera ni raica e dua ka liga dua me qitotaka na polo e liu,” a kaya o Jackson. “Iko sa vinaka saraga.”
A matadredredre o Samuela. “Vinaka.”
A uvuca tale na nona sici o Dauniveivakatavulici Monroe. “Ena iotioti ni 30 na miniti, eda na vakayacora e dua na qito ni vakatovotovo.” A wasea rua na timi ni gonetagane o koya. A marau o Samuela ni tiko ena nona timi o Jackson.
Ni vo toka e dua na miniti ena qito, rau a tai toka ena iwiliwili ni poidi na timi. A taura na polo e dua na lewe ni timi nei Samuela ka vakararai wavoki kivua e dua me pasitaka kina. A voleka tu o Samuela, ka vakarau me ciqoma na polo. Ia a pasitaka na gonetagane oya kivei Jackson.
A kalawa yani vakavica o Jackson. A qai raici Samuela o koya ka pasitaka vua na polo. A ciqoma o Samuela na polo, vuki, ka kolotaka yani ki na basikete.
Swish! A curu na polo ena gauna vata ga e uvuca kina na sici o Dauniveivakatavulici Monroe. A vakacaucau na timi i Samuela.
“Pasi totoka,” a kaya o Samuela vei Jackson ni rau torova yani na idabedabe.
“Vakacuru polo totoka,” a kaya o Jackson. “Ena vulica na vo ni tamata ni sa rauta tu na liga dua me qito basiketepolo.”
A matadredredre o Samuela ka rau vakasota liga icake kei Jackson. A vakila o koya ni sa dina o Dauniveivakatavulici Monroe. E sa na dua na timi vinaka, dua na qito vinaka, ka dua na gauna vinaka.
Droini mai vei Sandra Eide