Na Vulagi Dokai
Era vakaitikotiko na dauvolaivola e Dar Es Salaam, Tanzania, kei Utah, USA.
E rawa vakacava ni vukea na nona matavuvale o Amoni me kidavaka na nodratou vulagi dokai?
“Dou tauyavutaka e dua na vale … vakaivakarau, me vale ni Kalou” (Vunau kei na Veiyalayalati 88:119).
E a yakavi ni Vakarauwai. A vinakata o Ammon me laki qito.
“Nau,” a kaya o koya, “e rawa niu lako i tuba meu qito?”
“Mo samaka mada e liu na nomu rumu,” a kaya o Nau.
“Ia, Nau,” a kaya o Ammon, “e rawa me wawa mada na noqu rumu?”
“Tou na via sureta tiko e dua na tamata dokai me nodatou vulagi. Sa vinakati kina me savasava ka maqosa na neitou vale.”
“E dua na vulagi dokai?” A kaya o Ammon. “Ena nodatou vale eke?”
“Io, sa rawa ni o veivuke me sureti koya,” a kaya o Nau. “Mo lako sara ka samaka na nomu rumu.”
Sa maqusa sara o Ammon. E dau taleitaki ira na vulagi o koya. A lomatarotaka o cei beka na vulagi. O turaganikoro? O qasenivuli liu mai koronivuli? Ena rairai beka o bisopi!
A lako ki na nona rumu o Ammon. A kunea e liu na nona sitokini duka ena vuloa. A biuta sara ena basikete ni sulu me sava. Sa qai biuta vakavinaka o Ammon na nona ivolanivuli ena desi. E vinakata o koya me kila o vulagi ni taleitaka me vulica na veika vovou.
A lako mai ki na nona rumu, o ganena o Angel. “Na cava o cakava tiko?” a taroga.
“E kaya o Nau ni dua tiko nodatou vulagi dokai,” a kaya o Ammon. “A kerei au o koya meu veivuke ena vakavakarau vua.”
Rau a rai cake yani ka raici Nau sa tu e katuba.
“Na cava tale me tou vakavakarau kina?” A kaya o Ammon. “Tou vinakata me vakila na nodatou vulagi dokai ni taleitaki.”
“Na cava na nomu vakasama?” A taroga o Nau.
“E rawa ni tou kaya karibu,”a kaya o Ammon. Ena vaka-Swahili e kena ibalebale, “O ni sa kidavaki ena neitou vale. O ni sa kidavaki mo ni vosa.”
“E rawa ni keitou vakarorogo,” a kaya o Angel. “Sa ka bibi na vakarorogo.”
“Oqori na vakasama vinaka,” a kaya o Mamma. “Meda raica mada na veika e kaya o Baba (Ta) ni sa yaco i vale.”
Ena loma ni dua na auwa, sa yaco mai o Baba.
Sa wawa tu o Ammon. “E kaya o Nau ni tou sa sureta tiko e dua na vulagi dokai ki na nodatou vale. Keitou sa vakavakarau tiko.”
A matadredredre o Baba. “Au marautaka. Lako Mai Dabe. Me datou veivosaki Angel, yalovinaka lako talega mai.”
Ni ratou sa yaco taucoko mai, a kaya o Baba, “Keirau sa veivosakitaka tiko kei Nau baleta na nodatou vulagi dokai kei na cava me tou cakava me vakila o koya ni taleitaki. iMatai, au na tukuna vei kemudrau o cei na nodatou vulagi. Sai koya na Yalo Tabu. O koya e dua vei ira na vulagi bibi duadua.”
Erau a veiraici o Ammon kei Angel. A sega ni namaki koya tiko o Ammon!
“O Koya e dua na vulagi e rawa ni da sureta me tiko vata kei keda ena veigauna kece,” a kaya o Nau. “Angel, na gauna iko sa papitaiso oti kina, o a vakadeitaki. Ka a soli vei iko e dua na isolisoli. O nanuma tiko beka na ka a kaya o Baba ena veivakalougatataki?”
“A tukuna vei au meu ciqoma na Yalo Tabu.”
“Sa donu vinaka,” a kaya o Nau. “O a sureti mo ciqoma na Yalo Tabu. Ia, Ammon, ena noqu kaya ni ko rawa ni veivuke me sureti kina o Koya, na cava au a vakaibalebaletaka?”
A vakasama o Ammon. A nanuma tiko me cakava e dua na kadi me sureta kina na nodratou vulagi. Ia e rawa vakacava me sureta na Yalo Tabu? “Au vakabauta ni noqu cakava na veika me vakila o Koya ni taleitaki, au sa sureti Koya tiko,” e kaya o Ammon.
“Donu vinaka. A kaya o Baba. “E dua na sala e rawa ni da sureti Koya kina ki na loma ni noda vale oya ena kena caka me maqosa ka savasava.”
“Oya beka na vuna e vinakata kina o Nau me tou samaka na nodatou rumu?” A taroga o Ammon.
“Io! A kaya o Nau. “Na cava tale eda rawa ni cakava meda sureti Koya kina me tiko vata kei keda?”
“Sa rawa meda masu,” a kaya o Ammon. “Ka wilika na ivolanikalou.”
“E rawa ni da vakarorogo ki na ivakatagi vinaka,” a kaya o Angel. “E rawa ni da lagata vata na serenilotu.”
“Eda rawa ni vinaka ka sega ni veivala,” a kaya o Ammon.
“Sa donu vinaka,” a kaya o Baba. “Ni da tovolea me da cakava na veika e vakavuvulitaka o Jisu Karisito, eda sureta na Yalo Tabu me tiko vata kei keda. Ka na vukea o Koya na noda vuvale me dua na vanua e rawa ni da vakila kina na loloma kei na vakacegu.”
A vakasama vakalailai o Ammon. “O dina, Baba. Na Yalo Tabu e dua vei ira na vulagi bibi duadua vei ira kece!”
Droinitaka o Mark Jarman