Higala ngadto sa Higala
Pagbati sa Gugma ni Kristo
Gikan sa usa ka interbyu uban ni Haley Yancey.
Samtang ako nagdako sa Japan, gihatagan ako og usa ka Biblia didto sa eskwelahan. Kini may Iningles ug Hinapon nga mga pulong tupad sa usag usa. Ang among prinsipal misulti kanamo sa paggamit niini sa pagtuon og Iningles.
Samtang nagbasa ako niini, ako nakakat-on mahitungod ni Jesus. Kinsa kini nga tawo nga puno kaayo sa gugma? Natingala ako. Ang mga pulong nga Iyang gisulti nakapalipay kanako. Gusto kong makakat-on pa og daghan mahitungod Kaniya.
Sa dili kaayo dugay, akong nahimamat ang mga misyonaryo. Sila mihatag kanako og Basahon ni Mormon ug mihangyo kanako sa pagbasa niini ug sa pag-ampo mahitungod niini. Gusto ko nga mobasa mahitungod ni Jesus diha sa Basahon ni Mormon. Nag-ampo ako ug mibati nga kini tinuod.
Walay usa sa akong pamilya nga gustong makakat-on mahitungod sa Simbahan. Si Jesus mitudlo nga kita kinahanglan nga motahud sa atong mga ginikanan, apan ang akong mga ginikanan dili gusto kanako nga mopasakop sa Simbahan. Malisud kana.
Akong gisultihan ang akong mga ginikanan kon unsa ang akong gibati. Akong gisultihan sila mahitungod sa akong mga pag-ampo. Wala sila makasabut. Nahibulong sila kon nganong gusto ko nga mobiya sa among relihiyon.
Nagpadayon akong naningkamot. Sa katapusan ang akong mga ginikanan miingon nga ako mahimong magpabunyag. Daghang mga katuigan ang milabay, ang akong inahan nabunyagan usab.
Ako nahibalo nga ako napanalanginan tungod sa kagustohan nga mosunod ni Jesus. Ako gustong magkat-on mahitungod Kaniya, ug ako nahibalo nga ang pagsunod Kaniya nagdala og mga panalangin.
Si Jesukristo Gusto Kanako nga Mosunod Kaniya
Si Jesus gusto kanato nga mosunod Kaniya pinaagi sa pagpabunyag. Basaha ang mga bersikulo. Dayon kolori ang katukma nga mga porma.
Paghulagway ni Alyssa Petersen
Paghulagway ni Beth Whittaker