Ang Problema sa Party
Ang tagsulat nagpuyo sa Corrientes, Argentina.
Usa ka bahin ni Luz gusto lamang nga moadto sa party. Apan mibati gihapon siya nga wala mahimutang.
“Magtuon niini diha sa imong hunahuna; unya … mangutana kanako kon kini husto” (Doktrina ug mga Pakigsaad 9:8). Kini nga istorya nahitabo sa Corrientes, Argentina.
Mibati si Luz og kalipay. Ang tingklase hapit na mahuman, ug busa daghang makapadasig nga mga butang ang nagpanghitabo. Sa dili madugay siya mogradwar gikan sa ikaunom nga grado. Sa sunod tuig, siya anaa na sa high school!
Kini nakapatingala kaniya kon unsa ka kusog siya nagtubo. Siya mas taas, ug siya dili na usa ka gamay nga bata. Kadto nga mga kausaban makapadasig, apan mibati usab siya og gamay nga kakulba.
Nakahukom siya nga makigsulti niini uban sa iyang mga ginikanan.
“Kini usa ka talagsaong panahon sa imong kinabuhi, Luz,” miingon si Papá. “Kini panahon alang kanimo sa pagkat-on, pagbuhat sa imong labing maayo, ug pagkab-ot sa mga tumong nga motabang kanimo nga mahimong tawo nga ang Dios nasayud nga ikaw mamahimo.”
“Apan ang kinabuhi moabut og tinagsa lamang sa usa ka adlaw,” miingon si Mamá. “Ikaw motubo ug mahimo niana nga tawo uban sa matag gamay, maayong pagpili nga imong himoon.”
Nakatabang kana ni Luz nga mobati og mas maayo. Siya nalipay nga siya dili kinahanglan nga motubo og kalit.
Usa ka adlaw sa eskwelahan, ang mga higala ni Luz misulti kaniya nga sila adunay graduation party. Nanobra ang ilang kadasig. Adunay panihapon, musika, mga suga, ug gani sayaw!
Apan samtang si Luz naminaw sa iyang mga higala nga nagsulti mahitungod sa party, siya misugod sa pagbati og ka dili komportable. Kini dili ingon og sama nga matang sa party diin siya mahimong mobati sa Espiritu Santo.
“Moadto ka, di ba, Luz?” usa sa iyang mga higala nangutana.
“Ikaw kinahanglang moadto!” laing higala miingon. “Sultihan nako ang akong mga ginikanan nga makig-istorya sa imong mga ginikanan. Niana sila motugot kanimo nga moadto.”
“Tingali.” Ang tiyan ni Luz nagdaguok. “Ako … ako mopahibalo kaninyo.”
Gigahin ni Luz ang nahibiling katapusan sa semana sa paghunahuna mahitungod sa party. Siya naghunahuna mahitungod niini samtang nagpraktis siya sa piano. Siya naghunahuna mahitungod niini samtang siya nakigdula uban sa iyang masuso nga igsoong lalaki. Bisan unsay iyang gibuhat, kini diha sa iyang hunahuna.
Usa ka bahin ni Luz gusto lamang nga moadto sa party. Apan mibati gihapon siya nga wala mahimutang. Ang kakulba nga pagbati nga diha sa iyang tiyan wala mawala.
“OK ka ra, hija [anak nga babaye]?” Nangutana si Mamá sa Dominggo sa hapon. Iyang gisudlay ang iyang mga tudlo ngadto sa taas, itum nga buhok ni Luz.
“Nan …,” miingon si Luz.
“Naghunahuna ka ba gihapon mahitungod sa party?”
“Wala ako kahibalo unsay buhaton,” miingon si Luz. “Gusto ko nga moadto. Apan nahibalo ako nga dili maayo ang akong pagbati didto. ”
Mipahiyom si Mamá. “Nahibalo ako nga mohimo ka og maayo nga pagpili,” miingon siya. “Paghunahuna mahitungod niini, himoa ang imong pagpili, ug sultihi ang Langitnong Amahan kon unsay imong nahukman. Siya motabang kanimo nga mahibalo kon kini husto. Mabati mo kini diha sa imong kasingkasing.”
Mitando si Luz. Siya miginhawa og lawom ug miadto sa iyang kwarto aron mag-ampo.
“Langitnong Amahan,” mihunghong si Luz. “Ang akong mga higala midapit kanako ngadto sa usa ka party, apan wala ako mobati og maayo mahitungod niini. Sultihan ko sila nga ako dili makaadto. Kini ba ang hustong butang nga buhaton?”
Usa ka dagsang nga dagaang miabut diha ni Luz. Siya wala na mobati og kalibug. Gibati niya ingon og siya napuno sa kahayag! Siya nahibalo nga siya naghimo og matarung nga pagpili.
Sa dihang si Luz migawas sa iyang kwarto, iyang gigakus og maayo si Mamá.
“Nakahukom ako nga dili moadto,” si Luz misulti kaniya.
“Mapasigarbuhon ako kanimo,” miingon si Mamá.
Si Papá migakos usab ni Luz. “Ako adunay ideya,” miingon siya. “Maghimo kita og atong kaugalingon nga graduation party. Kita adunay ice cream ug magsaulog isip usa ka pamilya!”
Mipahiyom si Luz. Ganahan siya og ice cream! Ug siya malipayong nakahibalo nga siya makahimo sa husto nga butang, bisan kon kini lisud. Sa matag gamay, maayong pagpili nga iyang gihimo, siya makahimo sa pagtubo ngadto sa tawo nga ang Dios nahibalo nga siya mamahimo. ●
Mga paghulagway pinaagi ni Tammie Lyon