Kau ʻĀngeló mo e Ngaahi Meʻa Fakaofó
Fakamafola Ako ʻa e Potungāue Ako ʻa e Siasí• Sune 12, 2019 • Church Office Building Main Floor Auditorium
ʻI he lotu kamata ʻa Brother Peterson, naʻá ne fakaʻaongaʻi e foʻi lea “fāmili,” pea ne ongo ia kiate au pea ʻoku kei ongo pē kiate au he taimí ni. ʻOku ou fiefia lahi ke ʻi heni mo kimoutolu ʻi ha polokalama fakataʻu ʻoku ou pehē kiate au, ko ha fakatahataha faka-fāmili. Kuo ueʻi fakalaumālie au ʻi he ngaahi lea kotoa kuo fakahoko ʻe Brother Webb, Sisitā Cordon pea mo ʻEletā Clark. Pea ʻoku ou lotua ke u hokohoko atu ai pē he laumālie tatau ne vahevahe atu ʻaki e toko tolu kimuʻá.
ʻI heʻeku fakafeʻiloaki atu ʻo lau ki he lotu ʻa Brother Peterson, ko e foʻi fakakaukau ko ʻeni ʻo e fāmilí ʻa e ongo moʻoni ʻoku ou maʻu kiate kimoutolú, pea ʻoku ou loto ke mou tui ki ai. ʻOku ou ʻilo ʻoku pehē pē mo e kau ʻōfisa ʻo e Poaté, ka ʻoku makehe ʻaupito ia meiate au.
Naʻá ku fakamoʻoni mo Pat ʻi heʻema fuofua aleapau ngāue mo e Siasí he taʻu ʻe 54 kuohilí, ʻi he faʻahitaʻu māfana ko ʻení, pea kuó ma fengāueʻaki ai mo Pat pea mo kimoutolu ʻi ha ngaahi founga kehekehe he taʻu kotoa ʻo ʻema moʻuí talu mei ai. ʻI heʻema fakahoko e fili ko ia te ma feinga ke oʻi ʻema moʻuí, foungá mo e tōʻongá ʻi he Seminelí mo e ʻInisititiutí, ne ʻikai ke ma ʻilo te ma maʻu ai ha vā fetuʻutaki mālohi mo maʻumaʻuluta moʻoni. ʻI he tuʻunga veiveiua ne ma ʻi aí, kapau ne ʻikai e anga fakakaungāmeʻa mo e ʻofa fakatokoua moʻoni ne fakahaaʻi mai ʻe he kau faiako, supavaisa, kau pule, mo e niʻihi kehé kiate kimaua ʻi heʻema fuofua kamatá, mahalo ne ʻikai ke ma mei maʻu e loto-falala ke hoko atú. ʻOku kei hoko pē ʻema feohi ko ia he kamataʻangá ʻi he polokalamá ko e vā fakakaungāmeʻa lelei taha kuó ma maʻú, ʻo laka hake ʻeni ʻi ha vaeuaʻi senituli mei ai. Pea ko e moʻoni, ʻoku ʻikai kau ki ai e kau ako ʻe toko laungeau—pea ʻoku ou tui mahalo ʻoku totonu ke toko lauafe—ne ma akoʻi mo ʻofa ai he fakalau mai ʻa e taimí. ʻOku ou lotua he ʻikai mole e ongo fakafāmili ko iá meiate kitautolu ʻi he Potungāue Ako ʻa e Siasí. ʻOku kau ia ʻi he ngaahi ʻuhinga ne ma fie ngāue ai hení.
Pea ʻi he ʻofa ko ia kuó u kamata ʻakí, ko e taha ʻo e ngaahi meʻa ʻoku ou loto ke ʻoatu he ʻaho ní ko e lahi ʻo e ʻofa mo e falala ʻoku maʻu ʻe he kotoa ʻo e Kau Taki Māʻolungá mo e Kau ʻŌfisa Māʻolunga ʻo e Siasí kiate kimoutolú. ʻI heʻemau ngaahi fakataha alēleá mo e ngaahi kōmití, ʻoku mau fakaʻaongaʻi ha konga lahi homau taimí he meʻá ni, ʻo hangē ko ia ʻoku fakafofongaʻi ʻe ha tokolahi ʻo e kau ʻōfisa lahi ʻo e ngaahi houalotú ʻoku nau ʻi heni he ʻaho ní, ʻoku mau faaitahaai. ʻOku ʻikai ke u ʻilo e lahi ʻo e taimi ʻoku mau fakaʻaongaí, (ʻe lava ke nau toki fakatonutonu mai ʻa mui) ka te u pehē ko ha pēseti ʻe 30 pe 35, ʻa e lahi ʻo e taimi ʻoku fakaʻaongaʻi ʻe he kotoa ʻo ʻemau kau taki māʻolungá/ʻōfisa māʻolungá, ʻo talanoa kau ki he kakai kei talavou ʻo e Siasí—ʻa e ngaahi toʻu ko iá, ʻi hono fakalukufuá, ʻa ia ʻoku mou ngāue ai mo fakangāueʻi kimoutolu ke mou akoʻí, kau ki ai ʻa kinautolu ʻoku lolotonga teuteu ke kau maí. ʻOku mau talanoa ki he māmani ʻoku nau ʻi aí, ngaahi faingataʻa ʻoku nau fehangahangai mo iá, ʻa e ngaahi tūkunga makehe ko ia ʻoku aʻusia ʻe heʻetau kakai kei talavoú ʻi ha taʻu kei siʻi moʻoni. Sai, ʻoku ʻikai kovi kotoa e ngaahi tūkunga ko iá, ka ko honau niʻihi pē. ʻOku fie maʻu ʻe he kakai kei talavou ko ʻení e tokoni kotoa pē te nau ala maʻú, kae meʻamālié te nau lava ʻo maʻu ia. ʻOku ʻi he foheʻuli ʻo e vaká ni ʻa e ʻOtuá, pea ʻe tūʻuta lelei ia ki he taulangá. Kuó Ne fakahoko e ngaahi teuteu mahuʻinga kotoa pē.
Hangē ko ʻení, kuo teʻeki ke u fakakaukau naʻe tupukoso pē ʻetau fokotuʻutuʻu ke kamata ʻetau kau akó he polokalama seminelí ʻi he taʻu motuʻa tatau mo ia ne ʻi ai ʻa Siosefa Sāmita ʻi heʻene maʻu ʻa e ʻUluaki Mata Meʻa-Hā-Maí. ʻOku ou tui naʻe finangalo ʻetau Tamai ʻi he Langí, kuo matuʻotuʻa feʻunga ʻa Siosefa ʻi heʻene taʻu 14 ke ne kamata ʻi he hala ʻo hono misiona fakaepalōfitá. ʻE lava nai leva ke tau pehē, ko e taʻu motuʻa ʻeni ʻoku faʻa kamata ke maʻu ai ʻe he kakai kei talavou kehé ha fakamoʻoni mālohi ki he ongoongolelei ʻo Sīsū Kalaisí, pea tau vakai ki he tupulaki (tau fakatauange pē) ʻa e fakamoʻoni ko iá ʻi he ngaahi taʻu ka hoko maí ki he mālohi fakahinohino maʻongoʻonga ʻe ala aʻu ki ai he toenga ʻo ʻitānití?
Ko hono ʻuhinga ia naʻe fokotuʻutuʻu ai ʻe he ʻEikí ʻetau polokalamá he tuʻunga ʻoku ʻi aí—ke ne liliu e loto ʻo ha kiʻi tamasiʻi pe kiʻi taʻahine ʻi honau kamataʻanga fakaʻofoʻofa ki he fakamatuʻotuʻá, fakamālohia ʻetau fetuʻutaki mo kinautolú, pea ʻoange kiate kinautolu ha ngaahi aʻusia ʻi he lolotonga ʻo e uiké, kae ʻikai ke nau fakafalala taha pē ki he aʻusia ako fakalotu ʻi he ʻaho Sāpaté. ʻI he ngaʻunu ʻa e Siasí ki ha naunau fakalēsoni ʻoku fakatefito ʻi ʻapi pea poupou ki ai ʻa e Siasí, ʻe lava ke tau pōlepole he kuo pehē maʻu pe e meʻa ne tokanga taha ki ai ʻa e CES ʻi hono polokalama fakauiké pea mo e ako ʻi ʻapí. ʻOku hanga ʻe he liliu ko ʻení ʻo ʻunuakiʻi e ngaahi seminelí mo e ʻinisititiutí ke toe fenāpasi ange mo e fokotuʻutuʻu ʻa e Siasí ki he tefitoʻi naunau fakalēsoní ʻi ha toe taimi ange ʻi hono hisitōliá.
Pea ʻi heʻeku lea ki he kaveinga ko iá, tuku muʻa ke u fakahoko atu ha pōpoaki fakaʻofoʻofa ne fakahoko ʻe he kau taki ko ʻení ʻi heʻenau kole mai ke fakatatau e naunau fakalēsoni ʻa e seminelí ki he tohi māhina fakataʻu ʻa e Siasí, ki hono ako fetongitongi fakataʻu fā e ngaahi folofolá. Ko ha meʻa makehe ia kiate kitautolu ke maʻu ha fakahīkihiki pehē, ka ʻoku toe fakafiefia ange hono fakahoko ia ʻe he sea ʻo ʻetau poaté. Tuku ke u fakamanatu atu e sea ʻo ʻetau poaté. Ko e lea ʻeni ʻa Palesiteni Nalesoni ʻi heʻene fanongonongo e fakalakalaká ni:
“ʻE kamata ʻi he 2020 ʻa e liliu e ngaahi kalasi ʻa e Seminelí ki ha polokalama ako fakataʻu. ʻE ako ʻe he ngaahi kalasí ʻa e tohi folofola tatau ʻoku fakaʻaongaʻi ki he naunau fakalēsoni ʻa e Haʻu, ʻo Muimui ʻIate Aú. ʻI hono fakahoko ʻa e liliu ko ʻení, ʻe fakalahi ai ʻa e fakatefito ʻi ʻapí, tokoni ʻi hono poupouʻi ʻe he Siasí ʻa e ako ʻo e ongoongoleleí ʻo fakafou ʻi ha ako fakataha ʻi ʻapi, Lautohi Faka-Sāpaté, pea ʻi he seminelí.
“ʻI hoʻo fakakaukau ki he liliu ko ʻení, ʻoku ou fakaafeʻi koe ke ke fakalaulauloto ki ho kahaʻú. Ko e lahi ange ko ia ʻa e meʻa te ke malava ʻi he māmaní ʻi ha toe toʻu tangata kimuʻá, ʻoku fakafalala kakato ia ki he tuʻunga hoʻo mateaki ki he ʻEiki ko Sīsū Kalaisí. ʻOku mou takitaha fatongia ʻaki ke tokoni ki hono akoʻi ʻo ʻEne ongoongoleleí ʻi homou ʻapí kiate kinautolu ʻoku mou nofó. ʻE tokoni atu ʻa e Seminelí mo e ʻInisititiutí ke liliu ho ʻapí ke hoko ko ha hūfangaʻanga malu ʻo e tuí—ko ha feituʻu ʻoku akoʻi, ako, moʻui ʻaki, mo ʻofa ʻi he ongoongolelei ʻo Sīsū Kalaisí.”
ʻOku ʻikai ke u ʻilo kiate kimoutolu, ka kuo fuoloa fau ʻeku ʻi he polokalamá ni, pea ʻoku ou pehē ko ha ngaahi taʻu lahi eni mei ai pea tau toki maʻu ha palesiteni ʻo e Siasí ʻoku lea fakapatonu mo poupou lahi ʻaupito ki he meʻa ko iá mo lea mai kiate kitautolu fakataautaha. ʻOku ou houngaʻia ai, Palesiteni Nalesoni. Sai, ʻi he vahaʻataimi ko ʻeni ʻo e ngaahi liliu lalahi mo īkí, kuo lahi ange hono talanoaʻi ʻe he kau takí, lahi ange ʻenau fakakaukauʻi mo fengāueʻaki hangatonu mo e kau ngāué pea mo e tuʻutuʻuni ʻa e seminelí mo e ʻinisititiutí ʻi ha toe taimi ange te u lava ʻo fakakaukau ki ai he ngaahi taʻu ʻeku ngāue hení. Ko ha taimi fakafiefia moʻoni ia ke kau ai he fāmili ʻo e Potungāue Ako ʻa e Siasí.
Sai, tuku muʻa ke u lea atu ki he taumuʻa ʻo e ngāue kotoa ko ʻení, ko e ʻuhinga ʻo ʻetau fakataha he ʻaho ní mo e ʻuhinga ʻetau faiako fakaʻaho mo fakauiké—ko e kau akó, ko e tefito ʻo ʻetau tokangá mo e ʻofá.
ʻI he fakaʻau ke poto ange ʻa e māmaní, kuo pau ke tau ako e founga ke toe lahi ange ai ʻetau tokoni mo e hoko ko ha tā sipinga ki heʻetau kau talavou mo e kau finemui kuo pau ke nau taukapoʻi ʻenau tuí lolotonga ʻenau nofo ʻi ha ʻulungaanga fakafonua ʻoku faʻa fakafisingaʻi pe fakasiʻia ai ia. Ko e faikehekehe ʻi he vahaʻa ʻo ʻetau toʻu tupu faivelengá mo e māmani faʻa fakafepaki ʻoku nau ʻi aí, ko ha tuʻunga fakalukufua ia, ʻoku fakaʻau ke fakalalahi ʻi he ʻaho kotoa pē. Ko ha “meʻa moʻoni” ia ʻi he ngaahi kikite ʻo e ngaahi ʻaho kimui ní, ka ʻoku ʻikai toe kehe hono talanoaʻí pe toe fakafiefia ange hono aʻusiá. ʻI he kiʻi fakamatala nounou ko ʻeni ʻo e māmaní, ʻoku ui ai ʻetau kau akó ko e Toʻu Tangata Z koeʻuhí ko ha ngaahi ʻulungaanga pau. ʻOku hanga ʻe he ngaahi ʻulungaanga ko ʻení ʻo huluʻi mai ha ngaahi faingataʻa ʻe niʻihi ʻi he faiakó:2
-
ʻOku nau femoʻuekina maʻu pē. “ʻOku teʻeki ke nau moʻui kinautolu ʻi ha māmani taʻe ʻi ai ʻa e ʻinitanetí, pe telefoni toʻotoʻó [pe meʻa fakaongo ki he telingá]. … Kuo ʻi ai maʻu pē ʻa e Google [kiate kinautolu].”3 Mahalo ʻoku teʻeki ke nau sio kinautolu ha telefoni ʻoku takai hono tailá pe tā telefoni mei ha kiʻi loki telefoni. Ka ʻoku sai pē ia he ʻoku saiʻia ange kulupu ia ko ʻení he text.
-
ʻI he netiueka fakaʻilekitulōnika ʻiloa ko ʻení, kuo fakafeʻiloaki kei taʻu siʻi ʻaupito ai kinautolu ki he ponokalafi taʻetaau mo fakatupu ʻauhá.
-
ʻOku nau fakahehema ke “[poupouʻi] e ngaahi totonu ke mali fakatangatá mo e totonu ʻa e tangata liliu fefiné mo e fefine liliu tangatá… [ko ha] konga ʻo e moʻui fakaʻahó. ʻOku tātaaitaha ke taʻe maʻu ʻe ha toʻu tangata Z ha kaungāmeʻa [ofi] mei he niʻihi LGBT.”4 Koeʻuhí ko e tuʻunga fakasōsiale ko ʻení, ʻoku kamata ke taʻemahino mo faingataʻa ai ke fakafaikehekeheʻi ʻa e fakakaungāmeʻa peé mo e poupou ki he tōʻonga moʻui ko iá.
-
“ʻOku fai ia ʻi he loto moʻoni. Meimei ki ha vahe fā ʻe taha,” (ʻoku ʻikai ko ha niʻihi ʻeni ʻo ʻetau kau ako he Siasí, ka ko hono moʻoní ko e māmani ia ʻoku ʻamanaki ke tau aʻu ki aí), “Meimei ko e vahe fā ʻe taha (pēseti ʻe 23) ʻo e kakai lalahi ʻo ʻAmeliká—mo ha vahe tolu ʻe taha ʻo e toʻu tupu he kuonga ní—ne nau fili ʻa e ‘ʻikai kau ki ha faʻahingá,’ ʻo ʻikai kau ai ki ha faʻahinga kulupu tui fakalotu ʻe taha. ʻOku tupu ha niʻihi tokolahi ʻo e toʻu tangata kimui ní ʻi ha ngaahi ʻapi ʻoku ʻikai ke ʻi ai ha faʻahinga tui fakalotu, [ʻo ʻikai ke nau maʻu ai] ha aʻusia [pe ha kihiʻi mahino] ki he tui fakalotú” 5ʻi heʻenau moʻuí.
-
Naʻe ʻasi ʻi he ʻuluʻi ongoongó ha fakatotolo kimuí ni mai fekauʻaki mo e tali ʻa e toʻu tupu ʻo ʻAositelēliá ki he tui fakalotú, ʻo pehē ʻe he ola ʻo ʻenau fakatotoló ʻoku ʻikai kau ha pēseti ia ʻe 52 ʻo e toʻu tupú ki ha faʻahinga tui fakalotu pea ko ha pēseti pē ʻe 37 ʻoku tui ki he ʻOtuá.6
-
Kuo faʻu ʻe he faifekau mo e tokotaha faʻu tohi ko ia ko James Emery White ha tohi fekauʻaki mo honau tūkunga fakalaumālié. Naʻá ne pehē, “ʻUluakí, ʻoku nau hē. ʻOku ʻikai ke nau kei moʻui mo puleʻi kinautolu ʻe ha tui faka-Kalisitiane kimuí ni. ʻOku ʻikai foki ke nau manatu ki he ongoongoleleí [pe ha puipuituʻa ʻo e ongoongoleleí]. ʻOku fakaofo ʻaupito e tūkunga ʻo ʻenau taʻeʻilo fakalaumālié. … [Uá], ʻoku ʻikai ha taha ke ne tataki kinautolu. ʻOku siʻi moʻoni pea mahalo ʻoku mātuʻaki hala pē ha fakahinohino ia mei honau ngaahi fāmilí, pea toe siʻi ange ʻenau feinga ke maʻu ha fakahinohino mei he ngaluopé.”7
-
Fakatatau ki ha fakamatala ne pulusi ʻi he USA Today, ko e toʻutangata Z ʻa e kulupu siʻi tuenoa taha ʻa ia kuo tau ʻilo he sōsaietí.8 Naʻe lave ʻa e fakamatalá ki ha fakatotolo ʻa BYU ʻi he 2010 naʻe ʻaofangatuku ʻo pehē, “ʻOku nunuʻa tatau pē ʻa e tuenoá ʻi he moʻuí ni, mo hono ifi ko ia ʻo ha foʻi sikaleti ʻe 15 ʻi he ʻaho, ʻo fakatuʻutāmaki ange ia ʻi he sisinó.”9
-
ʻOku fakafuofua ki he peseti ʻe 53 ʻo e fānau fefine ʻAmelika taʻu 13 ʻoku ʻikai ke nau fiemālie ki honau sinó. ʻOku tupu e fika ko iá ki ha peseti ʻe 78 ʻi he taimi ʻoku taʻu 17 ai e tamaiki fefiné, ʻa ia nau kei nofo pē hotau malumalú. ʻOku laka hake ʻi he peseti ʻe 50 ʻo e tamaiki fefine kei finemuí mo e peseti ʻe 30 ʻo e tamaiki tangata kei talavoú, ʻoku nau fakahoko ha ngaahi ʻulungaanga ʻoku ʻikai moʻui lelei hangē ko e taʻekai ʻi ha ngaahi houa kai, ʻaukaí, ifi tapaká, luá mo hono ngāue ʻaki ʻo e faitoʻo fakaholó.10
-
Fakaʻosí, ʻoku taimi nounou pē ʻenau tokanga ki ha meʻá. ʻOku pehē ʻe ha niʻihi ko e ʻavalisi hono maʻu ʻo e tokanga ʻa ha taha ʻi he toʻu tangata Z, ʻoku fakafuofua ki ha sekoni pē ʻe valu.11 Pea ne mei mole pē ʻenau tokangá ʻanautolu he ʻuluaki konga ʻe tolu ne u fakaʻasi atu hení.
Ko ia ai, he ʻikai malava ʻe he kau faiako seminelí mo e ʻinisititiutí ke fakaleleiʻi e ngaahi palopalema kotoa ko ʻení ʻi ha pō pē ʻe taha, ka ʻoku ʻamanaki mai e kau Taki Māʻolungá ʻoku mou mohu founga, mateuteu moʻoni, ongoʻi ngofua e laumālié, mo malava lelei ke tali e ngaahi fehuʻí ʻo ka ʻohake pea ke fakahoko ia ʻi he taimi mo e founga totonú. ʻI hoʻomou ngaahi fetuʻutaki he lolotonga e uiké, ʻoku lahi ange hoʻomou fetaulaki mo e kau akó ʻi ha niʻihi tokolahi—meimei kotoa— ʻo e kau faiako kehe ʻi he Siasí, ko ia ai, mou fakapotopoto ʻi he founga hoʻomou fakahoko iá, ka ke ʻilo, ʻoku ʻamanaki mai mo fie maʻu ʻe he kau Taki Māʻolungá hoʻomou tokoní—fakahangatonu pe ʻikai fakahangatonu, ʻi he kalasí mo tuʻa foki—ʻi hono akoʻi e ngaahi tuʻutuʻuní, ngaahi foungá mo e ngaahi tokāteline ʻo e Siasí.
ʻAi ke ke ongoʻingofua maʻu pe e Laumālié. Fakaʻatā ha kiʻi taimi ʻi hoʻo lēsoní ki ha meʻa kehe ʻe tānaki atu. Kapau ʻe fie maʻu ke fakanounouʻi ha lēsoni kae lava ke fakahoko hoʻo fakamoʻoní mo kamataʻi ha alēlea ʻi ha meʻa ʻoku hāhāmolofia, kātaki ʻo fai muʻa ia ʻi he taimi ʻoku ueʻi ai koe ʻe he Laumālié ʻoku lelei ke fakahoko iá.
ʻIo, kuo pau ke ke fakahoko ʻeni kae ʻoua naʻá ke toʻo e fatongia ʻo e taki lakanga fakataulaʻeikí pe taki ʻo e houalotú ʻa ia ʻoku ʻikai ʻatautolu ke faí. Kuo hoko e muimui pau ki aí ko ha meʻa faingataʻa ʻi heʻetau potungāué talu mei he kamataʻangá, pea ʻe pehē maʻu pē. ʻE fie maʻu ʻa e fakaʻutoʻutaleleí mo e fakahinohino ʻa e Laumālié ke fakahoko ia, ka ko ha pole ia ʻoku mahuʻinga moʻoni hono talí pea ʻoku taʻe-hano-tatau e fiefia ʻa e Kau Takí ʻi hoʻomou feingá. ʻOku fie maʻu e meʻa kotoa pē, pea kuo pau ke mahino mo tatau e pōpoakí ʻi he tuʻunga kotoa pē.
“He kapau ʻoku ongo noa mai ʻa e meʻaleá, ko hai te ne teu ia ki he taú? … Mou kumi ke mou poto hake ʻi hono langa hake ʻo e siasí.”12
Ko hono moʻoní, ʻi he ngaahi faingataʻa lahi ʻoku hoko hotau kuongá, ʻe fie maʻu ai ke akoʻi mālohi e ongoongoleleí ke ʻoua naʻa ueʻi ʻe ha meʻa e tui ʻo ʻetau toʻu tupú pe ofeʻi honau ʻalungá ʻi he taimi te nau hū mai ai mei hoʻo kalasí ʻo toe foki atu ki he māmaní. ʻOku faingofua ange hono lea ʻaki e faʻahinga akonaki ko iá ʻi hono faí, ʻoku ou palōmesi atu pea ʻoku mou ʻiloʻi ia, ka ʻe malava ke tau hoko ʻo toe lelei mo mālohi ange. Te tau lava ʻo hoko ko ha kau faiako lelei ange ʻi hatau ngaahi tūkunga ʻe niʻihi. ʻI he ʻamanaki ke tau fakahoko ha ngāue mafatukituki peheé, kātaki ʻo manatuʻi ʻeni mei heʻetau fakataha mo au ʻi he ʻaho ní—manatuʻi ko e tokotaha akó ʻoku ʻikai ko ha meʻa ia ke fakafonu; ko e tokotaha akó ko ha maama ia ke fakaulo.
ʻI heʻetau hoko ko ha kau faiako ʻo e ongoongoleleí, kuo pau ke tau hoko ko ha kau fakaulo maama fakalaumālie. Kuo pau ke hoko ʻetau ngaahi lēsoni ko ha naunau fakamaama. Kuo pau ke tau vilitaki ke hoko ko ha kau tutu maama, toʻo ʻa e “tutututú”—kae “fakamaama” pē. Sai, tuku ke u fakamatalaʻi atu naʻa mou lipooti au ki he kau Taki Maʻolungá pepolisí, heé?
Kuó u ofo maʻupē, ʻi he meimei kotoa ʻo e ngaahi ako mahuʻinga ʻi he Tohi ʻa Molomoná, ʻoku pehē e kupuʻi lea ʻoku ngāue ʻaki ke fakamatalaʻi ʻa e taimi ko iá, naʻe malangaʻi ʻa e fakafoʻituituí ʻaki ha “mālohi mo ha mafai.”13 Ko ʻeku fakaʻānaua taupotu taha ia ʻi heʻeku faiakó, pea ʻoku ou fakatauange pē ʻokú pehē pē mo koe.
Kātaki, ʻoua naʻa mou maʻuhala. ʻOku ʻikai ko ʻeku ʻuhingá ke hiki hake ho leʻó, pe te ke fakatātāʻi ha leʻo ʻo ha faiako kehe, kae tautautefito ki hono fakatātaaʻi ha ngaahi ongo hala. Ko ʻeku ʻuhingá ki ha meʻa ʻoku fakatefito moʻoni ʻi he laumālié, ko ha laumālie ʻe fakahaaʻi ʻi ha ngaahi founga kehekehe ʻo hangē ko hoʻo ngaahi foungá. Kuo pau ke ke ongoʻi fiemālie. ʻOku ʻikai fie maʻu ia ke ke hoko ko ha Bruce McConkie pe Boyd Packer pe Russell Nelson, ka ʻe lelei ke tau fehuʻi kiate kitautolu pe ko e hā ʻoku ongo pehē ai e kau faiako ko ʻení. Ako ʻa e meʻa kotoa te ke lavá mei he kau faiako ko ʻení (ʻi he kuohilí mo e lolotongá), ka ʻi hono fakaʻosingá kuo pau ke ke faiako ʻi ha founga fakanatula, ʻi he founga pē ʻaʻau. Ka neongo ia, ko e hā pē founga ʻe lava aí, ʻoku totonu ke hoko e olá ko ha ako mālohi mo falalaʻanga.
Tuku muʻa ke u ngāue ʻaki ha ngaahi sīpinga mei he Tohi ʻa Molomoná. ʻOku hā ʻi he Hilamani 5ʻa e talanoa ʻo Nīfai mo Līhaí, ʻa ia ne fakatauhingoa ki heʻena kuí, ʻi hono fakafatongiaʻaki kinaua hono akoʻi e kau Leimana ʻi he fonua ko Seilahemalá. ʻIkai ngata ʻi hono akoʻi e falukunga kakai faingataʻa ko iá, ne toe fatongia ʻaki ʻe Nīfai mo Līhai ʻa e “kau [Nīfai] angatuʻu,”ne hē mei he moʻoní ʻo kau mo e kau Leimaná ʻo fakafepaki ki he kau palōfita ʻa e ʻOtuá. ʻOku ʻikai ke u ʻilo au kiate kimoutolu, ka ʻoku fakafofongaʻi ʻe he ongo kulupu ko iá ha kakai angatuʻu ʻoku ʻikai ke u faʻa fiefia he fetaulaki pongipongia mo kinautolu he Mōnité. ʻI he taimi ko ʻení, naʻe angatuʻu, ʻita, pea pito e kau Leimaná ʻi he loto fakapapau ke sāuni e kau Nīfaí koeʻuhí ko ha fakakikihi, ʻa ia kuo ngalo ʻi ha tokolahi hono tupuʻangá. Pea, kapau ne ʻikai feʻunga ia ʻi he kuonga ko iá, mou ʻomi kia Sīsū ʻa e kau Māmonga-tutukú, (ko ʻenau fakaʻaongaʻi ia e foʻi lea Māmongá,” ʻikai ko au ē?) ʻa e kau hē mei he moʻoní ʻa ia ne nau ʻosi ʻi he kōlomu taulaʻeikí, pea mahalo ne ngāue fakafaifekau hanau toko taha pe ua ka kuo nau mavahe mei he halá. Ne nau malanga maʻatautolu kimuʻa pea ko ʻeni, ʻoku nau malanga fakafepaki kiate kitautolu, ki he puleʻanga ʻo e ʻOtuá.
Ka neongo ia, ki he ongo kulupu faingataʻa ko iá, ʻoku fakamatala e folofolá kia Nīfai mo Līhai ʻo pehē, “Naʻá na malanga ʻi he fuʻu mālohi lahi, ʻo aʻu ki heʻena veuveuki ʻa e tokolahi ʻo e kau angatuʻu ʻa ia kuo nau ʻalu atu mei he kau Nīfaí. … Pea naʻe hoko ʻo pehē naʻe malanga ʻa Nīfai mo Līhai ki he kau Leimaná ʻi he fuʻu mālohi mo e mafai lahi, he kuo foaki kiate kinaua ʻa e mālohi mo e mafai ke na malanga, pea naʻe fakahā foki kiate kinaua ʻa e meʻa ke na leaʻakí.”14 Sai, tau kiʻi tuʻu taimi siʻi ai. Kiʻi tuʻu ʻo fakakaukau ki hono fakaʻofoʻofa kapau ʻe ʻilo ʻe he kau faiako kotoa ʻi he Potungāue Ako ʻa e Siasí—e meʻa ʻe ua ko iá—founga ke lea aí mo e meʻa ke lea ʻakí. ʻE hoko ia ko e meʻafoaki moʻoni ʻo e ngaahi lea kehekehé, naʻa mo hoʻo lea pē ʻi hoʻo lea fakafonuá. ʻI heʻene mahino kiate aú, ko e meʻafoaki ia naʻe foaki ki he ongo tamaioʻeiki ko ʻení ʻi heʻena malangá. Ne na maʻu ha “mālohi mo [ha] mafai lahi ke na malanga , pea [mo e] … meʻa ke na lea ʻakí. … Ko ia naʻá na lea pea naʻe fuʻu ofo lahi ai ʻa e kau Leimaná.”15
ʻOku ʻoatu nai ʻe he foʻi lea ofó ha faʻahinga fakakaukau kiate koe mei ha talanoa ki muʻa ange ʻi he Tohi ʻa Molomoná? Fakakaukau ki he Mōsaia 27, ʻi he taimi ne “ʻalu holo [ai e ngaahi foha ʻo ʻAlamā mo Mōsaiá] ʻi he angatuʻu ki he ʻOtuá.” ʻOku pehē ʻi he veesi 11, “Naʻe hā mai kiate kinautolu ʻa e ʻāngelo ʻa e ʻEikí; pea naʻá ne ʻalu hifo ʻo hangē naʻe ʻi ha ʻaó; ʻo ne lea ʻo hangē ko ha ʻuʻulu ʻo e maná, ʻa ia naʻe lulululuʻi ai ʻa e kelekele ʻa ia naʻa nau tuʻu aí.”16
Kātaki pē kau ʻoatu mo ha kiʻi meʻa kehe ʻe taha. ʻOku mou pehē ko ha mofuike moʻoni naʻe hokó? ʻOku mou pehē kapau ne mou fokotuʻu ha meʻafua mofuike ʻi he fute ʻe 40 kotoa pē, ʻe aʻu nai hono mālohí ki he nimá, pe onó pe valú pe hivá, ʻe tupu ai ha ngaahi peaukula ʻi he moana lolotó ʻo ne veteki kotoa e funga ʻo e māmaní? Mahalo pē. Mahalo ha taimi ʻe niʻihi. Mahalo ne hoko ia, ka ʻi he tūkunga ko ʻení (ʻi hono puipuituʻá), ʻoku hangē kiate au ne ʻikai peheé. ʻOku ou tui ko ha taha ʻeni ʻo e ngaahi mofuike fakataautaha ʻoku ʻomi ʻe he ʻEikí ki he fakafoʻituituí. ʻOku ou tui naʻe ngalulu e māmaní kia ʻAlamā mo e ngaahi foha ʻo Mōsaiá, ka ko hai ʻokú ne ʻilo pe naʻe toe ngalulu ki ha taha kehe.
Pau pē, kuo mou maʻu e aʻusia ko iá ʻi hano akoʻi ha kalasi. Ne ʻi ai haʻo lea ne ongo mālohi ki ha tokotaha ako pea ofo ai pe fakatē loʻimata pe hoko fakatoloua, ʻo ongo ki honau laumālié, kae hangē ʻoku ʻikai ke ne teitei ueʻi ʻe ia e tokotaha ako ʻi hono toʻomataʻú pe toʻohemá. ʻOku hoko maʻu pē ia ʻi he malaʻe ʻo e ngāue fakafaifekaú. ʻOku mou ʻilo mo aʻusia ia! ʻOku akoʻi ʻe ha ongo faifekau ha fāmili ʻi ha fale nofoʻanga ʻi ha feituʻu. ʻOkú na akoʻi ha lēsoni mahuʻinga fau mo liliu-loto moʻoni ki ha ongomeʻa mali pea ʻokú ne mātuʻaki ueʻi fakalaumālie ʻaupito e Loki fika 106, ka ʻoku sio American Idol fiefia pē e kakai ia ʻo e loki fika 105 he tafaʻakí, kae feinga e kakai ʻi he loki 107 ke kumi e kai ki he tau ʻa e Green Bay Packers mo San Francisco 49ers. ʻOku ʻikai ke u ʻilo pe ʻe hoko moʻoni e mofuike ʻoku tala ʻe he meʻafuá, ka ʻoku ou pehē ʻoku talaʻofa maʻu mai pē ʻe he ʻEikí mo e folofolá ha ngaahi mofuike fakataautaha ʻokú ne liliu moʻoni ha tokotaha ako ʻo aʻu ki hono lotó ʻo ʻikai ha mālohi ʻe taha ʻo e māmaní kiate kinautolu. Ka mou kātaki pē—kuó u heva atu!
Hoko atu ʻi he veesi 12 ʻo e Mōsaia 27:
“Pea naʻe pehē fau hono lahi [ʻo e] ʻohovale” ʻa ʻAlamā mo e ngaahi foha o Mōsaiá , “ʻo pehē fau hono lahi ʻo ʻenau ʻohovalé, naʻa nau tō ai ki he kelekelé, ʻo ʻikai mahino kiate kinautolu ʻa e ngaahi lea [naʻe] lea ʻaki [ʻe he ʻāngeló] kiate kinautolú. …
“ …Pea ko ʻeni ko ʻAlamā mo kinautolu naʻe ʻiate iá naʻa nau toe tō ki he kelekelé, he naʻe fuʻu lahi ʻa ʻenau ʻohovalé; he kuo nau mamata ʻaki honau mata ʻonautolú ki ha ʻāngelo ʻa e ʻEikí; pea naʻe hangē hono leʻó ko ha maná. …
…“Pea ko ʻeni naʻe pehē fau hono lahi ʻo e ʻohovale ʻa ʻAlamaá naʻá ne hoko ai ʻo noa, ʻo ʻikai faʻa lava ʻo lea; ʻio, pea naʻá ne hoko ʻo vaivai, pea naʻe ʻikai te ne faʻa lava ʻo ueʻi hono ongo nimá.”17
ʻI heʻeku fakakaukau fekauʻaki mo e, lotua mo fakakaukau ki ai pea ʻamanaki ʻe lava ke maʻu ʻi he Potungāue Ako ʻo e Siasí. ʻOku fie maʻu ke fakaofo ʻetau faiakó ki he kau akó pea fai ia ʻi he “mālohi mo e mafai ʻo e ʻOtuá” 18 ʻa ia ʻoku foaki ki ha faiako—pe ʻoku ngāue totongi pe ngāue tokoni—ʻokú ne akoʻi mālohi mo moʻoni ʻa e ongongolelei ʻo Sīsū Kalaisí. ʻOku mou ʻilo e tefito ʻo e foʻi lea astonish? ʻOku ʻikai ke u ʻilo pe ko e hā hono ʻuhinga ʻi he fakalea foʻou faka-ʻIsipité pe Hepeluú, ka ʻi he lea faka-Pilitāniá ʻoku toʻo ia mei he lea tefito ko e “tonare”—ko hono ʻuhingá ko e mana.19
ʻOku tokoni atu ia ke mahino kiate koe hono ʻuhinga naʻe lea ai ʻa ʻAlamā, hili e fepōtalanoaʻaki ko ʻení, ʻo ne pehē, “Taumaiā ko e ʻāngelo au, peá u lava ʻo maʻu ʻa e fakaʻamu ʻa hoku lotó, ke u ʻalu atu ʻo lea ʻaki ʻa e talupite ʻa e ʻOtuá, ʻi ha leʻo ke lulululuʻi ʻa e māmaní, pea Kalanga ʻaki ʻa e fakatomalá ki he kakai fulipē!
ʻIo, te u fakahā ki he kakai fulipē, ʻo hangē ko e ʻuʻulu ʻo ha maná, ʻa e fakatomalá mo e palani ʻo e huhuʻí, koeʻuhi ke nau fakatomala pea haʻu ki hotau ʻOtuá, koeʻuhi ke ʻoua naʻa toe ʻi ai ha mamahi ʻi he funga ʻo e māmaní kotoa.”20
Siʻoku ngaahi kaungāmeʻa ʻi he Potungāue Ako ʻa e Siasí, ʻoku hā mahino e ʻuhinga ne fie maʻu ai ʻe ʻAlamā ha tākiekina fakalangí, ha leʻo hangē ko e maná ke ongo ʻo hangē ko e talupite ʻa e ʻOtuá pea ke ne luluʻi e māmaní. ʻOku faingofua pē—ko e meʻa ne ngāue maʻaná, ʻe lava ke ngāue foki ia maʻá e niʻihi kehé. Ko e kau ako ko ia ʻoku nau feinga taʻetūkua ke fakatomala moʻoní, ko ha founga fakahaohaoa kāfakafa moʻoni ia ʻo ʻikai ke nau toe mavahe ai mei hono leleí, ʻoku nau moʻui līʻoa moʻoni ki hono langa ʻo e puleʻanga ʻo e ʻOtuá ʻo taʻengata. Sai, ko ha ako mālohi moʻoni ia. Te tau fakatokangaʻi ʻo hangē ko ʻAlamaá, ʻoku ʻikai ko ha kau ʻāngelo kitautolu, pea he ʻikai ke tau maʻu e faʻahinga mālohi ko iá ʻi he taimi kotoa pē te tau fehangahangai ai mo ha ha kau ako. Ka ko e meʻa fakaofo ʻi heʻetau ngāue mo e uiuiʻi ʻi he Potungāue Ako ʻa e Siasí, ko ʻetau maʻu ko ia e faingamālie ke feinga ke fakahoko iá, kuo toutou ʻoatu ha ngaahi tūkunga he loki akó ʻe lava ke tau ʻahiʻahiʻi.
Sai, tau foki ki he Hilamani 5. Manatuʻi foki naʻe ʻikai ko ha ʻāngelo ʻa Nīfai mo Līhai, ka naʻá na hoko ko ha ongo tangata faiako lelei ne ʻi ai hona misiona mo ha pōpoaki, peá na malanga ʻi he “mālohi mo e mafai lahi.” Ne mamata e ongo tangatá ni ki hono “papitaiso ki he fakatomalá” mo kau ki he Siasi ʻo e ʻOtuá.21ha kau Leimana ʻe toko 8,000. ʻOkú ke manatu ki he talanoa kau ki he afí ʻi heʻene ʻalu hifo mei langí pea vela ʻi honau lotó ʻi he ulo ʻo e laumālié, naʻe fakamaama ʻe he moʻoní e loto ʻo e “kau ako ,” kotoa ko ʻení. ʻI he kotoa ʻo ʻeku ngaahi aʻusiá, ne mei hoko e toko 8,000 ko iá ko ha lipooti fakasouni lelei moʻoni ia mei ha ongo fakafaifekau pē ʻi ha misiona ʻi ha feituʻu pē he māmaní.
Mou kātaki muʻa kau toe fakaʻaongaʻi ha miniti ʻe taha ke u lea atu ai fekauʻaki mo ha faiako ako ʻe taha, ʻa ia ne ʻikai ngata pe ʻi he vela hono lotó ka naʻá ne totongi e pale kāfakafa ʻo hono fatongiá ʻi he vela hono sino fakamatelié.
Talu mei heʻeku kei talavoú, mo e hoko ʻa ʻApinetai ko e taha ʻo e kau palōfita kuó u tanganeʻia ai ʻi he kotoa ʻo e folofolá. Naʻe taʻeʻiloa ʻa ʻApinetai ʻi he kamataʻangá, ʻo ʻikai ko ha hako ʻo ha palōfita pe fakahaaʻi ha faʻahinga tuʻunga ongoongoa fakafāmili. ʻI he fakaʻau ke hōloa hono puleʻi ʻe Sēnifi e fonuá, naʻe ui ʻa ʻApinetai ke ne malanga ʻaki e fakatomalá ki he foha fakamamahi ʻo Sēnifí, ʻa e Tuʻi ko Noá. ʻOku mou ʻilo pē e talanoá.
Ne fanongonongo leva ʻe Noa ha tuʻutuʻuni tautea mate, pea ne pau ai ke hola ʻa ʻApinetai. Hili ha taʻu ʻe ua ʻo e toi ʻa ʻApinetaí, naʻá ne toe foki mai ke malanga mo fakamoʻoni ki he ongoongoleleí. ʻOku ou kiʻi tuʻu hení ko ʻeku mālieʻia he tōʻonga kei siʻi ʻa e palōfitá ʻi heʻene taʻehalaiá. Ne ʻikai ke ne toe ʻiloa ʻi ha māhina ʻe 24, pea ko ʻeni ʻokú ne fakapuli ke ʻoua naʻa ʻiloʻi ia, ka ʻi heʻene foki maí ko ʻene fuofua meʻa naʻá ne lea ʻakí ko e, “Kuo fekau pehē mai kiate au ʻe he ʻEikí,—ʻE ʻApinetai, ʻalu pea kikite.”22 ʻI he tūkunga ko ʻení, kuo pau ke u fifili ki he tuʻunga ʻo ʻene fakapulí, ka he ʻikai ke tau veiveiua kau ki heʻene tuí mo e loto fakapapaú.
ʻI he kikite mālohi ʻa ʻApinetai ki he Tuʻi faiangahala ko Noá mo hono fakamāuʻangá, ne puke pōpula ai ia ʻo faifai pea ʻomi ki he fakamaauʻanga naʻá ne fakamalaʻiaʻí. ʻI hono fakafehuʻia mamafa ia ʻe he kau talatalaakí ni, naʻá ne “tali ʻa kinautolu ʻi he loto-toʻa, ʻo ne lava ʻo tali ʻenau ngaahi fehuʻí, … mo fakamaaʻi ʻa kinautolu ʻi heʻenau ngaahi lea kotoa pē.”23 Pea ʻi heʻene liliu mei he tali fehuʻí ʻo malangá, naʻá ne kamata malangaʻi ai ha tokāteline ne feʻunga mo ha vahe ʻe nima mo e konga, ʻa ia ʻoku hoko ko e taha ʻo e ngaahi malanga mālohi taha ʻi he kotoa ʻo e Tohi ʻa Molomoná. Ka neongo ia, ne ʻikai fuoloa mei ai, kuo tuʻutuʻuni ʻe Noa, ʻi heʻene ongoʻi halaiá, ke tāmateʻi ia.
Kuo hanga ai ʻe he ngaahi meʻá ni kotoa ʻo fokotuʻu ʻa e meʻa kuo tohitongi ʻi hoku laumālié, ʻo ʻikai tatau mo hono tā valivali ʻe Arnold Friberg,24kae meimei ofi pē ki ai. ʻI ha tūkunga pē, ʻi he hoko ʻa ʻApinetai ko ha pōpulá, mahalo naʻe haʻi seini ia, ʻo hangē ko e ngaahi seini loka ʻoku fakaʻaongaʻi he kuonga ní. ʻOku ʻikai ke tau ʻilo hono taʻu motuʻá. ʻOku tā valivali ia ʻe Friberg ko ha tangata matuʻotuʻa, pe motuʻa ange, ka ʻoku ʻikai ʻasi ia ʻi he folofolá. ʻIkai ke u ʻilo pe naʻe taʻu fiha. Mālohi fakatuʻasino? ʻIkai ke tau ʻilo, ka naʻe toki foki mai pē mei haʻane toitoi ʻi ha taʻu ʻe ua, pea mahalo naʻe nofo pe toi ʻi ha feituʻu ne ʻikai lahi ai ha meʻakai. (Fakakaukau ki hono fafanga ʻo ʻIlaisiā ʻe he fanga lēvení. 25Kuo mou mamata ʻi ha pesipesi ʻo ha lēveni? ʻOku ʻikai ke u tui au naʻe lava ʻe he fanga kiʻi manupuna ko iá ʻo hiki ha meʻa ʻoku lalahi.) ʻOku ʻikai ke tau ʻilo, kae mahalo ne fiekaia, ongosia mo ongoʻi vaivaia fakatuʻasino ʻa ʻApinetai ʻi he tūkunga ne ʻi aí.
Naʻe pehē ʻe he Tuʻi ko Noá, “ʻAve ʻa e tangatá ni pea tāmateʻi ia, he ko e hā ʻatautolu ʻe fai kiate ia. …
“ …Pea nau ʻunuʻunu atu ʻo feinga ke puke ia; ka naʻá ne taʻofi ʻa kinautolu, ʻo ne pehē kiate kinautolu:
“ʻOua ʻe ala kiate au, koeʻuhi ʻe taaʻi ʻa kimoutolu ʻe he ʻOtuá ʻo kapau te mou ala ʻaki homou nimá kiate au, he kuo teʻeki ai te u fakahā ʻa e pōpoaki ʻa ia naʻe fekau kiate au ʻe he ʻEikí ke u fakahaá. …
“He naʻe ʻiate ia ʻa e Laumālie ʻo e ʻEikí; pea naʻe ulo hono fofongá ʻo fuʻu ngingila ʻaupito, ʻo hangē pē ko Mōsesé, ʻi heʻene ʻi he moʻunga Sainaí, lolotonga ʻena fefolofolai mo e ʻEikí.
“Pea naʻe lea ia ʻi he mālohi mo e mafai mei he ʻOtuá.”26
“Mālohí mo e mafaí.” Tau toe vakai pē ki ai. ʻI he kamata ke u faʻu e leá ni mo loto ke fakaʻaongaʻi ʻa ʻApinetaí, ne ʻikai ke u manatuʻi, pe mahalo ne ʻikai ke u ʻiloʻi, ʻoku fakaʻosi ʻaki e talanoa ko ʻení e kupuʻi lea tatau ko iá, ʻa ia naʻá ne akonaki ʻi he mālohi mo e mafai. Ngaahi kaungāmeʻa, te tau lava ʻo lau ha ngaahi tohi ʻoku fai ʻi ha laʻipepa, ka ʻoku makehe ke tau ʻiloʻi ʻi heʻetau fakakaukaú mo ongo ki hotau lotó ʻo hangē ko e leʻo ʻo e maná, “ʻOua ʻe ala kiate au, koeʻuhí ʻe taaʻi ʻa kimoutolu ʻe he ʻOtuá ʻo kapau te mou ala ʻaki homou nimá kiate au.”27 ʻOku ʻikai ke u faʻa lava ʻo lau e ngaahi lea ko iá taʻe te u tangi. ʻOku kei ongo fakaʻeiʻeiki pē ia ʻi hoku lotó, ʻa e faʻahinga loto-toʻa mo e faʻahinga ivi maʻongoʻonga peheé. ʻOku ʻikai ʻasi ai naʻe kaikaila. ʻOku ʻikai ʻasi ai naʻe ʻi ai haʻane kiʻi ngāue ʻe taha. ʻI hono ʻākoloʻi ia ʻe ha kau leʻo kuo fakamahafú pea haʻí, ne ʻikai ke ne mei lava ʻo fai ha meʻa. Ka ʻoku mahino naʻe ʻi ai e ola ʻo e meʻa naʻá ne lea ʻakí mo e founga naʻá ne lea ʻaki iá. ʻOku ou fakaʻaongaʻi ʻa e “mahinó” koeʻuhí ʻoku ʻikai pehē ai naʻe feinga ha taha ʻo e kau leʻó ke tuli ia, naʻa mo e Tuʻi ko Noá pe ko ha taha ʻo e kau taulaʻeikí te nau toe lea ʻaki ha faʻahinga meʻa ʻi ha vahe fakatōʻoa loto ʻe fā.
He ʻikai lava ke tau fakakaukau ki he ngaahi sīpinga fakaofo kotoa ʻo e faʻahinga ako ko ia ʻi he folofolá, ka ʻoku nau ʻi he feituʻu kotoa pē. ʻOku ou fakaafeʻi kotoa kitautolu ke tau fekumi ki ai, fakakaukau ki ai, pea ke tau feinga ke maʻu ha konga ʻo e meʻa-foaki ko iá ʻi hotau ngaahi uiuiʻí.
Ko ha faʻahinga akonaki ʻeni ʻoku lahi e ngaahi fie maʻú ki aí mo faingataʻa ʻaupito. Kapau ne u ʻilo e founga fakafaiako ko iá, ne u mei lavameʻa ange hono fai iá. Ka ʻoku ou ʻilo ʻeni: kapau he ʻikai te ke ongoʻi moʻoni ha meʻá, he ʻikai te ke teitei lava ʻo ʻai hoʻo kau akó ke nau ongoʻi moʻoni ia. ʻE lava ke u toe fakaongo atu? Tukukehe kapau ʻokú ke ongoʻi moʻoni ha meʻa, he ʻikai te ke lava ʻo ʻai ke maʻu ʻe hoʻo kau akó ʻa e ongo tatau. Moʻoni, ko e tupuʻanga fakaofo ʻo e ongo moʻoni ko iá ʻa e meʻa ne lau ʻo kau kia ʻApinetaí: “He naʻe ʻiate ia ʻa e Laumālie ʻo e ʻEikí; pea naʻe ulo hono fofongá ʻo fuʻu ngingila ʻaupito;.”28
Kapau ko e Laumālié ʻa e founga ki he faiako fakaofó—pea ko hono moʻoní ia—ʻoku ʻi ai leva ha hohaʻa lahi ki hono akoʻi ʻo e ngaahi nouti motuʻá pe fakaʻaongaʻi ha taha ʻo e ngaahi sīpinga ʻo hoʻo kaungā faiakó he taimi kotoa pē, pe ko hono toutou ngāue ʻaki pē ha lea konifelenisi tataú. ʻOku nau lelei ʻaupito pē kinautolu ʻi hono fakaʻaongaʻí pea mahuʻinga he taimi ne fuofua fakahoko aí, ko ia ai, fakaʻaongaʻi ha faʻahinga meʻa pē ʻi ha faʻahinga taimi pē ke fakamānako mo fulifulihi ai hoʻo founga faka-faiakó. Ka ko e meʻa ʻe mahuʻinga tahá ko e ongote ke maʻu ʻi hoʻo puʻaki e ngaahi lea ko iá. He ʻikai ha toe meʻa te ne fetongi ia. “Taumaiā ko e ʻāngelo au … peá u lava ʻo … lea … ʻi ha leʻo ke lulululuʻi ʻa e māmaní!”29 Manatuʻi: ko e tokotaha akó ʻoku ʻikai ko ha meʻa ia ke fakafonu. Ko e tokotaha akó ko ha maama ia ke fakaulo. Pea ka lelei ʻaupito ʻetau fakahoko iá, mahalo te tau taau mo feʻunga ai ʻi ha ʻaho ke fetaulaki mo kinautolu naʻe tauteaʻi koeʻuhí ko ʻenau fai e meʻa tatau ke takiekina ʻenau kau akó. Kātaki ka mou ō atu, ʻa kimoutolu kau ʻāngelo nāunauʻia ʻi he funga ʻo e māmaní—tokanga ki he niʻihi ʻoku fakataumuʻa ki ai ʻemau leá—kātaki ka mou ō atu ʻo ʻai ke ofo hoʻomou kau akó. ʻOku ou fakamoʻoni ki he fakalangi ʻo e ngāue ko ʻení. ʻOku ou fakamoʻoni ki he fakalangi ʻo homou fatongiá. ʻE kāinga ʻofeina, ko e ngāue ʻeni ʻa e ʻOtua Mafimafí. Kuo ʻikai ke u foaki ʻeku moʻuí ki ha talanoa fananga. Kuo teʻeki foaki ʻeku moʻuí, pe ko hoʻo moʻuí, ki he meʻa ne pehē ʻe Pita ʻe tukuakiʻi kitautolu ki aí, ʻa ia ko ha tulifua ki ha meʻa taʻemoʻoni, ki ha meʻa launoa, ki ha kākā ke faʻufaʻu ha loi. Ko e moʻoní ʻeni. ʻOku ʻikai ko ha talanoa fananga kākā ia. Kuo foaki līʻoa ʻeku moʻuí, mo koe foki, pea kuo foaki pea ʻe foaki ʻe he kakai lelei taha ʻoku ou ʻiló ʻenau moʻuí. Ko e moʻoni ʻeni ʻo e ʻOtua Māfimafí, pea ʻofa ké Ne tāpuekina koe ʻi hoʻo faiakó ʻo tuʻuloa. ʻI he huafa ʻo Sīsū Kalaisí, ʻēmeni.
© 2019 by Intellectual Reserve, Inc. Maʻu ʻa e ngaahi totonu fakalao kotoa pē. Tatau: 5/19. Liliu ‘o e “Angels and Astonishment.” Tongan. PD60009021 900