Nco Ntsoov, Nco Ntsoov

2023 Thawj Pawg Thawj Tswj Hwm Kev Sib Ntsib Hawm Vajtswv hauv lub Caij Christmas

Tracy Y. Browning

Tus Pab Cuam thib Ob ntawm lub Koom Haum Me Nyuam Yaus

Hnub Sunday, Kaum Ob Hlis Ntuj 3, 2023

Pib thaum lub Kaum Ib Hlis ntuj hauv qhov chaw uas kuv nyob, zoo li txhua yam uas ntuj tsim los pib tsaug zog. Cov nplooj ntsuab uas ib txwm tshuab thiab hu nkauj rau kuv thaum lub caij nplooj ntoos hlav thiab lub caij ntuj sov, hloov los ua ntoo tsis muaj nplooj thiab tau hnov lub suab qhuav ntawm cov nplooj ua tau poob hauv qab kuv txhais taw. Cov noog uas ib txwm zoo siab nyob ntsiag to, thiab tus ntxiab paj tsw qab tawm ntawm huab cua. Tej yam nyob rau hauv lub ntiaj teb no uas ua kuv xav txog txoj sia rov qab mus, thiab nyob ntawm qhov ntsiag to thiab txhua yam uas tshuav—thaum lub xyoo pib xaus thiab ua ntej kuv tsis nco qab zoo siab—lub txiaj ntsim ntawm Christmas tuaj txog.

Thiab nyob rau hauv qhov chaw uas kuv nyob hauv Vajtswv lub ntiaj teb zoo, kuv nco ntsoov. Kuv nco ntsoov saib cov ntoo uas ntsuab tas li, uas tsw zoo li ntoo, ntsim, thiab cov av. Kuv nco ntsoov nrhiav cov paj thiab cov txiv hmab txiv ntoo uas liab los yog dawb thiab mloog tej nkauj uas nkag mus hauv lub siab thiab tej tsev thiab tej tsev teev ntuj, uas tshaj tawm “ntiaj teb zoo siab,” thiab kuv nrhiav cov cim Christmas uas qhia tias “tej ntuj thiab ntiaj teb hu nkauj” nrog kuv thiab caw kuv nco ntsoov.

Ib qho uas xav tsis thoob txog lub caij no yog qhov uas txhua tus uas ntseeg Khetos, thiab ntau tus dhau peb ciam teb, lawv siv sij hawm no nrhiav thiab ua kom lawv lub neej puv npo nrog lub cim nco ntsoov thaum txog lub caij Christmas.

Lub caij Christmas yog tus choj uas peb hla kom mus txog xyoo tshiab. Thiab thaum peb hla ib sab rau ib sab, peb raug caw xav txog qhov txuj ci tseem ceeb uas yog “tus Tswv uas yog Vajtswv tus uas muaj sia nyob mus ib txhis, nws tsim tag nrho lub ntiaj teb no,”¹ uas tau yug los yam li txo hwj chim rau hauv Daviv lub nroog thiab “qhwv khaub ncaws pw hauv lub dab zaub.”² Thaum peb taug txoj kev Christmas, tej zaum peb pom tau peb tus kheej zoo li cov txiv neej thiab poj niam txawj ntse niaj hnub no, tej zaum saib cov hnub qub saum cov ntoo ntsuab thiab cov teeb ci ntsa iab nyob ib puag ncig peb thiab “zoo siab kawg nkaus”³ rau tej cim uas coj peb txoj hau kev mus cuag Yexus Khetos, mus rau Nws uas yog qhov “kaj ntawm lub ntiaj teb.”⁴ Yog tias peb hnov ib yam txuj lom hauv huab cua thaum lub caij no, tej zaum peb yuav nco qab nqa tej khoom plig pub rau tus “Tub ntawm tus Vajtswv uas muaj sia nyob”⁵—tsis yog “tej kub, tej tshuaj tsw qab thiab tej roj tsw qab”⁶ tiam sis yog kev txi ntawm “ib lub siab mob thiab lub siab uas xav ua zoo.”⁷ Thiab rau cov nyob ib puag ncig peb uas hlub thiab tu cov me nyuam, tej zaum peb zoo li cov neeg yug yaj uas “saib xyuas [peb] pab yaj,”⁸ mloog cov tim tswv ntawm ntiaj teb uas los ntawm tus Tswv caw kom “tsis txhob ntshai,” rau qhov lawv muaj cov lus qhia seb peb nrhiav tau tus Cawm Seej qhov twg.⁹ Peb puas nco ntxhi tej lus tim khawv txog “txoj moo zoo uas yog txoj kev zoo siab kawg nkaus” rau peb cov me nyuam? Ua li ntawd kom thaum lawv xav tsis thoob pom tej Christmas xim liab thiab xim ntsuab, xim kub thiab xim dawb, lawv nco ntsoov tus Txhiv Dim, Yexus Khetos, txoj kev theej txhoj uas dawb huv thiab zoo kawg nkaus, uas muab lub txiaj ntsim uas yog txoj kev cawm seej thiab txoj sia tshiab nyob mus ib txhis.

Lub caij Christmas cia peb taug kev ntawm sab ntsuj plig mus rau lub nroog Npelehees kom peb tus kheej pom tau peb tus Cawm Seej, Yexus Khetos, thiab tom qab ntawd peb yuav txhawb tej lus tim khawv ntawd mus tom ntej thiab npaj peb tus nplaig thiab ko taw thiab txhais tes kom “tshaj tawm”¹⁰ thiab ua tim khawv txog txhua yam peb paub txog Nws. Peb muaj peev xwm taug txoj kev ntawd mus rau tus Cawm Seej los ntawm kev nco ntsoov.

Vajtswv pub lub txiaj ntsim nco ntsoov rau peb kom peb nco qab tus muaj Siab Dawb, kom peb thiaj yuav hnov Nws txoj kev hlub rau peb uas tsis muaj qhov kawg thiab kom peb kawm hlub Nws thiab. Tus yaj saub thaum ub Maulaunais ntuas kom peb nco ntsoov tias “txhua lub txiaj ntsim zoo yog los ntawm Khetos los.”¹¹ Peb tus Cawm Seej tsis muab txiaj ntsim zoo li lub ntiaj teb muab—ib ntus, ib nrab, thiab yuav ploj zuj zus. Yexus Khetos muab tej txiaj ntsim uas kav mus ib txhis, tej txiaj ntsim tseem ceeb, xws li:

Tej txiaj ntsim ntawm tus Ntsuj Plig, zoo li kev txawj ntse, laj lim tswv yim, kev pov thawj, thiab kev ntseeg.¹²
Lub txiaj ntsim Vaj Ntsuj Plig Dawb Huv.
Lub txiaj ntsim nyob mus ib txhis.

Thiab thaum peb xav txog peb lub neej tag nrho thiab xav txog “tej khoom plig zoo” uas loj thiab me uas tau los rau hauv peb lub neej, peb puas pom tus Tswv txhais tes cawm peb, txhawb peb, thiab muab kev pab rau peb?

Txawm yog tej lub sij hawm peb tsis muab siab npuab Nws zuj zus los, Nws txoj kev nyob tas li pab peb tso siab tias tus Tswv yeej nco ntsoov peb—thaum lub caij Christmas los sis lwm lub sij hawm. Tus Tswv tau tshaj tawm tias [Nws] tau muab peb txaug rau hauv Nws tej xib teg.¹³ Nws cov lus cog tseg yeej ib txwm khaws cia. Nws nco txog tej kev khi lus uas Nws tau khi nrog peb thiab peb poj koob yawm txwv. Nws hnovthiab nco ntsoov peb tej lus thov Leej Txiv Saum Ntuj Ceeb Tsheej txawm peb txhos caug thov los sis thov hauv chav dai khaub ncaws los sis thov hauv peb lub siab. Nws nco ntsoov, ib yam li Thawj Tswj Hwm Russell M. Nelson tau qhia, “txaus siab pab cov neeg uas ntseeg Nws.”¹⁴ Nws nco ntsoov zam txim pub rau peb thaum twg peb hloov siab lees txim. Nws nco ntsoov hais lus rau peb los ntawm vaj lug kub thiab cov yaj saub kom pab peb nrhiav kev rov mus tsev—txawm peb nyob deb npaum li cas los xij los yog ntev npaum li cas. Thiab Nws nco ntsoov xa Nws tus Vaj Ntsuj Plig Dawb Huv los nyob nrog peb thaum peb siv zog ua raws li peb tej lus cog tseg dawb ceev kom “nco ntsoov nws.”¹⁵

Thawj Tswj Hwm Spencer W. Kimball tau qhia: “Thaum yus nrhiav lo lus tseem ceeb tshaj plaws, … tej zaum yog lo lus nco ntsoov. Vim hais tias nej sawv daws tau khi lus[,] … qhov tseem ceeb tshaj plaws uas peb yuav tsum ua yog kom nco ntsoov.” Nws hais ntxiv hais tias, “Yog li ntawd txhua leej txhua tus thiaj mus koom kev sib ntsib txais lub cim nco txog txhua Hnub Caiv—kom txais lub cim nco txog thiab mloog cov pov thawj thov kom lawv ‘nco ntsoov txog nws thiab ua raws li nws tej lus txib uas nws tau muab rau lawv.’ … Nco ntsoov yog lo lus tseem ceeb. Nco ntsoov yog lub ntsiab.”¹⁶

Kev nco ntsoov Vajtswv txhawb kom peb siv peb lub hwj chim ntawm sab ntsuj plig muaj zog zuj zus tuaj thiab caw kom peb ua raws li Vajtswv txoj kev. Cia li xav txog tej lus qhia uas Thawj Tswj Hwm Nelson caw kom peb nco ntsoov:

“Cia Vajtswv yeej hauv nej lub neej” thiab “siv ib feem ntawm nej lub sij hawm pub rau Nws.”
“Nrhiav thiab tos ntsoov tej txuj ci tseem ceeb.”
“Muab tej kev tsis sib haum tso tseg hauv koj … lub neej”¹⁷ thiab ua rau neeg nyob sib haum xeeb.¹⁸

Lub caij Christmas yog lub sij hawm ua raws li cov lus caw no thiab ua raws li peb tej kev xav kom nco ntsoov Yexus Khetos ntxiv, xav txog qhov txuj ci tseem ceeb uas yog Nws txoj kev yug los, thiab ua raws li txoj kev sib raug zoo nrog Vajtswv cov me nyuam. Peb nco tau tej lub cim nco ntsoov uas los ntawm lub caij Christmas thaum peb:

Nco ntsoov tos txais txog lub caij Christmas rau phooj ywg, tsev neeg, thiab neeg tshiab.
Nco ntsoov pub khoom plig los ntawm kev hlub.
Nco ntsoov ua siab dawb siab zoo rau cov uas xav tau kev pab thiab siab zoo rau cov uas nkag peb lub tsev.
Nco ntsoov hais txog qhov tseem ceeb ntawm kev sib sau ua ke ntawm tsev neeg thiab tej kab lig kev cai ntawm lub caij Christmas uas txawv lwm tej.

Rau ntau tus neeg thaum lub sij hawm no, qhov uas peb nyiam npaj pluas mov tib yam, rov hais txog tsev neeg dab neeg, thiab kho peb cov ntoo Christmas thiab dai khoom rau kom zoo nkauj yeej yog tej hauj lwm tseem ceeb uas pab peb khaws peb txoj kev ntshaw kom nco ntsoov tej yam uas muaj los rau peb uas tseem ceeb. Pluas mov tshwj xeeb, tej dab neeg, thiab tej khom dai yog tej lub cim txog tej yam uas peb sawv daws nco qab ntsoov. Peb lub siab xav kom muaj lub siab dawb siab zoo thaum lub caij no pab peb xav txog peb lub hom phiaj kom nco ntsoov ris Vajtswv txiaj. Txoj kev hlub tshwj xeeb uas los rau peb thaum lub caij Christmas yeej yog ib lub cij fim rau peb muab peb lub hom phiaj thiab kev ua rau Yexus Khetos: “Nco ntsoov, nco ntsoov tias twb yog nyob rau saum lub pob zeb uas yog peb tus Txhiv Dim, tus uas yog Khetos, Vajtswv Leej Tub, uas neb yuav tsum cog neb lub hauv paus.”¹⁹ Nco ntsoov tias thaum xyoo pib xaus thiab peb taug kev hla tus choj mus txog xyoo tshiab—zoo li txiv neej thiab poj niam txawj ntse, zoo li cov neeg yug yaj—yog los ntawm dag zog ntawm tus Tswv txhais tes²⁰ peb thiaj li ua tau.

Txawm nej nyob qhov twg hauv ntiaj teb no los, nco ntsoov ua tib zoo nrhiav cov cim uas caw nej mus nrhiav tus Khetos. Nyob rau hauv lub caij no, txhua yam uas peb hais txog, txhua zaus peb tos txais lwm tus, txhua tus neeg uas peb xav txog, cia peb nco ntsoov tus uas muaj Siab Dawb tiag tiag—Nws yeej nco qab peb thiab muab hwj chim rau peb nco txog Nws los ntawm Nws tus Ntsuj Plig, thaum lub caij Christmas thiab txhua lub sij hawm. Nws coj “txoj kev zoo siab rau lub ntiaj teb” thiab caw kom peb “npaj peb lub siab”²¹ kom txais tus Vaj Ntxwv. Nws yog lub hauv paus ntawm txoj kev uas peb taug. Nws yog txoj Kev Kaj ntawm lub Ntiaj Teb thiab tus Tub ntawm Vajtswv uas muaj txoj sia nyob. Kuv ua tim khawv li no los ntawm Nws lub npe, Yexus Khetos, amees.