Vei Ira na Buladodonu, Na Siganisucu e Kena iBalebale Ni Na Vinaka na Ka Kecega
Lotu ni Siganisucu ni Mataveiliutaki Taumada ni 2022
Sigatabu, 4 ni Tiseba, 2022
Au vakavinavinakataka na Mataveiliutaki Taumada ni ratou solia vei au na madigi me‘u vosa ena bogi nikua. Na neitou matavuvale esa vakaitavi ena ivakarau tudei ni marautaki ni Siganisucu ena neitou vanua ga ka vakakina e Faranise, Jamani, kei Barasili. Ena vanua cava ga eda bula kina, vei keda taucoko eda vakabauti Jisu Karisito ka muri Koya, sa dei tu ga e dua na dina totoka: eda reki ni a kacivi o Koya mai na ivakatekivu, a namaki tu o Koya me vica vata na senitiuri, e sa Lewe Duabauga i Tamada o Koya, a lako mai—ena ituvuka ni gauna, ena ituvaki lolovira duadua—a lako mai o Koya. Ka baleta ni a lako mai o Koya, na bilioni era a bula tu ena vuravura oqo era na bula tale ka ra na rawa, ke ra digitaka, me ra na taukena na bula tawamudu, na isolisoli uasivi duadua ni Kalou.
Ena loma ni italanoa totoka ni Nona sucu ena gauna ni Siganisucu, e sa vuqa na lesoni eda rawa ni vulica kina.
Oqo na lesoni au na wasea kei kemuni ena bogi nikua: Ena maliwa ni lomaleqa kei na veilecayaki kece sara, na dredre kei na leqa e muri keda tu ena bula vakayago oqo, vei ira era sa buladodonu—ka ra vakabauta ka nuitaka na Turaga—mai muri; ena vinaka na ka kecega.
Vakasamataka mada na ivakaraitaki totoka eso oqo.
E dua na yalewa buladodonu ka yacana o Ilisapeci kei na watina, o Sakaraia, ka rau sa qase sara mai oqo, e rau a rarawataka ni rau a sega ni vakaluveni rawa. Ia e rau a vakabauta ka nuitaka tikoga na Turaga.
Dina ga ni sega ni volai tu ena ivolanikalou na veika e rau a vakila ka veitalanoataka o Sakaraia kei Ilisapeci, na drama ivakatagi na Savior of the World e vukei keda me da vakasamataka na veika e a tu beka e lomadrau. E a tukuna o Sakaraia vei Ilisapeci: “E daru sa sega ni digitaki me daru vakaluveni. Ia e daru sa vakararavi tikoga vua na Turaga.” Ka ra qai lagata: “Au na solia tawamudu vua na Kalou, ia me kua ni yaco na lomaqu. … Kevaka me sega ni vakakina, na solia tawamudu Vua e kena ibalebale me’u na waraka ka yadrava ka raica. … Au na … laivi Koya me liutaki au yani … me yacova ni sa takali na noqu veiaua, na noqu veisiga, na noqu veiyabaki.”1
Ia a qai yaco e dua na cakamana. E volai ena ivolanikalou ni a rairai na agilosi o Keperieli ki vei Sakaraia ena valetabu. A tukuna mai na agilosi ni: “na vakasucuma e dua na luvemu tagane ko Ilisapeci na watimu, ia ko na vakayacani koya ko Joni. … Ka na … vakarautaka na tamata me ra qai nona na Turaga.”2
A sa kaya ko Sakaraia, “Niu sa qase, a sa vuqa na yabaki ni watiqu.”3
A sa kaya mai ko Keperieli, “Ni ko sa sega ni vakadinata na noqu vosa,” “ko na galu ga, ko na sega ni vosa rawa, me yaco mada na siga ena vakayacori kina na veika oqo.”4
Vakasamataka mada na veika e rau na vakila o Ilisapeci kei Sakaraia. Ena vica vata na yabaki e rau a masulaka voli me rau vakaluveni, ia a sega ni yaco mai e dua. E rau a tomana tikoga na nodrau muria na ivakaro ka vakararavi vua na Turaga. Ia, a qai rairai mai e dua na agilosi vei Sakaraia, ia ni oti oya, a sa sega ni vosa rawa o koya. E a lomatarotaro taka beka me baleta na vanua esa tu kina ena mata ni Turaga. Ia ena kena gauna ga, a qai sucu mai na gone. A qai vosa rawa tale ko Sakaraia. A qai yaco na gonelailai me ko Joni na parofita, o koya ka a vakarautaka na sala vua na iVakabula. Ena veilecayaki kei na dredre taucoko, me baleti ira na buladodonu, mai muri, sa vinaka tu na veika kecega.
Tarava, ena italanoa ni Siganisucu, eda sotavi Meri daulomani, ka a digitaki me tinana na Luve ni Kalou. Ia e a tu na kauwai kei na veilecayaki ena nona bula. A rairai o Keperieli ki vei Meri, ka tukuna vua na nona veikacivi vakamarama. A taroga o Meri, “Ena yaco vakabekaevei na ka oqo, niu sa sega ni veiyacovi kaya e dua na tagane?”5 A vakamacalataka o Keperieli ni na lako sobu mai vua na kaukauwa ni Yalo Tabu, ka na vakarurugi koya na kaukauwa nei Koya sa cecere sara, ka na kunekunetaka o koya na Luve ni Kalou, ka na vakatokai na Yacana me o Jisu.
Vakasamataka mada na reki kei na marau e na vakila o koya ni sikovi mai vua e dua na agilosi ni Kalou. Sa na vakacava mada ga na luvuci ni yalona ni vakasamataka ni sa na yaco me na tina ni Mesaia a wacaki balavu tu mai. Ia, ni tukuni vei Josefa, a sega ni vinaka na veika kece. O Josefa a dua na tamata dodonu ka sega ni via vakamaduataki Meri, ia a sega ni matata vua na sala e a dodonu me muria. Ena nona leqa kei na veilecayaki, a lako mai vua e dua na agilosi ena tadra: “I Josefa, … kakua ni rere ni kauta vei iko na watimu ko Meri: ka ni sa tubu mai vua na Yalo Tabu na ka sa kunekunetaka. Ia ena vakasucuma ko koya e dua na gonetagane, ia mo vakayacani koya ko Jisu: ka ni sai koya ga ena vakabulai ira na tamata mai na nodra ivalavala ca.”6
Eda rawa ni kila eke na lomaleqa kei na veilecayaki nei Meri, ni vakasamataka tiko na sala ena yaco kina na veivakalougatataki veivakurabuitaki oqo. O Josefa, talega, a lomaleqa ka sega ni tiko dei. Ia sa qai matata mai oqo ni rau na muria vata na salatu oqo. Sa na dua na ka na marau nei Meri ni kila ni a rairai e dua na agilosi vei Josefa. Sa na dua na ka na marau nei Josefa ni kila ni oqo sa loma ni Kalou. Ena dela ni veilecayaki kei na dredre, me baleti ira na buladodonu, mai muri, sa vinaka tu na veika kecega.
Ia me vaka eda kila, a sa wawa tu mai na dredre; ena dau tu ga. Ni voleka mai na gauna me vakasucu kina o Meri, era a gadreva na kai Roma me lesu o Josefa ki na koro o Peceliema. E rau a navuca o Meri kei Josefa me rau lako vata. Eda taleitaka taucoko na italanoa totoka ni Siganisucu. Ni rau yaco yani ki Peceliema, a sa sega na tikina lala ena bure. A sa vakacava mada ga na lomaleqa nei Josefa. A rawa vakacava beka oqo? Na cava beka me a vakasucuma kina o Meri, ka a digitaki mai vei ira kece na yalewa, na Luvena sa Cecere Sara ena lolovira ni dua na vale ni manumanu? Ena sega beka ni dua na kena leqa se verevereya na vakasucu oqo?
Ena rawa ni rairai veivakurabuitaki beka, ka tawadodonu sara. Ia a sucu na gonelailai; a bulabula vinaka o Koya. Me vaka e tukuna na sere ni Siganisucu totoka, “Tokatani ena vale ni manumanu, sega na loga me nona idavodavo, Na Turaga lailai o Jisu ni vakotora sobu na uluna mareqeti.”7
Ni bera ni cava na bogi oya, a rairai e dua na agilosi vei ira na dauvakatawa sipi ena vanua veico ka kauta yani na tukutuku vinaka ni reki cecere. Ka ra lagata na agilosi, “Sa nona na Kalou na vakarokoroko ena veiyasana e cake sara, a sa veivinakati rawa ko ira e vuravura, sa lomani ko ira na tamata.”8
Era a gole ki Peceliema na dauvakatawa sipi, me ra lai raica na gonelailai o Jisu. Ni ra qai kunea na gone na Karisito, sa na dua na ka na vakacegu kei na veivakadeitaki rau a vakila o Josefa kei Meri ni rau qai kila ni sa tiko na inaki ena loma ni dredre a wavoliti rau tu. Era a kacivaka na agilosi na Nona lako mai kei na Nona ilesilesi vakaturaga. Ni oti na veilecayaki kei na dredre, me baleti ira na buladodonu, mai muri, sa vinaka tu na veika kecega.
Ena vuravura vou, na leqa, veilecayaki, kei na kauwai era sa tiko talega kei ira na buladodonu. Na parofita o Samuela a parofisaitaka ni na sucu na iVakabula ena lima na yabaki mai muri ka na dua na kena ivakatakilakila ni na dua na bogi taucoko ena sega ni butobuto rawa. Ni roro mai na siga oya, na ka e tawananumi rawa a sa tu ena ituvatuva. “E dua na siga [ka ra sa] lokuca ko ira na tawavakabauta, [ka ra tukuna ni sa sivi na kena gauna,] me ra na vakamatei kina ko ira sa vakabauta [ni na lako mai na iVakabula] vakavo kevaka ena rairai mai na ivakatakilakila.”9 Era a vakalialiai ira na vakabauta o ira na tawavakabauta, “Ia sa mate wale na nomuni reki kei na nomuni vakabauta ena vuku ni veika oqo.”10 Vakasamataka mada na nodra taqaya kei na kauwai na buladodonu. E tukuna na ivolanikalou ni o Nifai a “cuva vakatoboicu ki na qele ka masu vakaukauwa vua na nona Kalou ena vukudra na nona tamata.”11 Ka ni a masu tiko o Nifai, “sa rogo vua na domo ni Turaga, ka kaya: Mo laveta cake na ulumu ka marau; raica, ni sa yaco mai na gauna, sa na vakaraitaki kina na ivakatakilakila ena bogi ga oqo, ia ni mataka au sa na lako yani kina ki vuravura.”12
Na ivolanikalou e tukuna, “Sa vakayacori na veivosa kece ka tukuni vei Nifai, … ia raica, ni sa dromu sobu na matanisiga a sa sega na butobuto. … [Ka o] ira kece na tamata … a ra sa bale sobu ki na qele ena levu ni nodra kidroa. … [Ka] sa yaco ni sa sega na butobuto ena bogi taucoko ko ya, ka sa rarama me vaka ga sa sigalevu tutu. … O koya era sa kila kina ni sai koya oqo na siga sa sucu kina na Turaga me vaka na ivakatakilakila sa tukuni oti tu.”13
Ena dela ni dredre kei na veilecayaki kece, vei ira na buladodonu—vei ira era vakararavi vua na Kalou—mai muri, se ena bula oqo se ena gauna eda sa na tekiduru kina e Yavana, ena vinaka tu na veika kecega.14
Ni vakasamataki na gauna tabu ni sucu ni iVakabula, na cava a waraka kina na Turaga me sa iotioti sara ga ni bogi me sa qai tukuna kina vei Nifai ni sa na sucu o Koya ena mataka? E a rawa ni a tukuna o Koya vua ena macawa se vula eso yani ki liu. Na cava a laiva kina o Koya me rau sa qase sara ka sega ni vakaluveni o Ilisapeci kei Sakaraia me qai vakadeitaka ni na sucu ki vei rau na parofita o Joni? Kei na cava e a qai vakasamataka tiko kina o Meri na sala sa tu e matana kei Josefa me taroga na nona itutu ena italanoa ni vei italanoa kece? Na cava a tawakilai tu kina na itavi ni dua na vale ni manumanu kei ira na dauvakatawa sipi kei na agilosi me yacova ni qai mai yaco na veika oqo?
Ena Eparaama, e tukuna kina na Turaga na Kalou, “Io me da vakatovolei ira mada kina, era na muria na veika kece sa vakarota vei ira na Turaga na nodra Kalou.”15 Tomani mai na Vosa Vakaibalebale: “Mo vakararavi vei Jiova ena vu ni yalomu; ka mo kakua ni vakararavi ki na nomu yalomatua. Mo vakarogotaka vua na nomu sala kecega, ia ena vakadodonutaka na nomui lakolako ko koya.”16
Ena noda gauna vakai keda ni veilecayaki, ena noda veisiga ni leqa kei na dredre, ena noda sasaga eso, me da dau yalodina. O Jisu a lako mai ena bogi vakalou oya. Sa iKoya na iVakabula kei vuravura, na Tui ni Sautu, na Tui ni tui. E bula tu o Koya, ka “nai nuinui kei na taqaya sa mai sotavi tu [Vua].”17 Au vakadinadinataka ni da sa buladodonu, na wai ni matada taucoko ni rarawa, dredre, kei na veilecayaki ena sotavi ka na vakavinakataki mai vei Koya, na Luve ni Kalou lomani. “Me da marau, sa tadu mai na noda Tui.”18 Ena yacai Jisu Karisito, emeni.