Meda marau sa tadu mai Na Noda Tui Dokai

Lotu ni Siganisucu ni Mataveiliutaki Taumada ni 2022

Bonnie H. Cordon

Peresitedi Raraba ni Goneyalewa

Sigatabu, 4 ni Tiseba, 2022

Dolava Na Lomada meda Ciqoma

E dau vakasinaita na ivakatagi ena vakacegu kei na marau na yaloda.

Me nomuni na Marau ni Siganisucu!

Ena Tiseba ni 1943, ka yaco tiko e vuravura na veiraravui ni iKarua ni iValu Levu. Tamata kece era leqataka na nodra daulomani ena veivanua vakayawa, kei na lomaleqa ena nodra vanua ena kena sa lailai mai na ilavo kei na kakana. Ena kena taqomaki tu na ivurevure ni bula ni matavuvale, e veivakidacalataki vei tamaqu, Harold Hillam, ka se qai cauravou yabaki ciwa, ni a ciqoma e dua na iloloma veivakurabuitaki ni Siganisucu―a dua iyaya ni vakatatalo na sitima ni vanua. E sega ni dua walega na sitima ni vanua oqo; baleta ni a rawa ni toso vakai koya ga ena kena sala. Sega ni gadrevi me biligi. E veivakurabuitaki ni rawa ni dua nona iloloma na ka totoka oqo. Nona, sa vakamareqeta dina o Harold na sitima oqo.

Ni oti e vica na yabaki, ni roro mai na Siganisucu, sa lamata cake tale mai na vuravura ni oti nai valu. Ia e a sega ga ni vinaka tu na ituvaki vakailavo e St. Anthony, Idaho, ka ca vakalevu sara ki na vuvale nei tamaqu. Sa voleka sara tiko ni mate, na tamana o Harold, ka tauvimate bibi. E sega ni rawa ni levu na iloloma me soli vei dua ena Siganisucu oya―oka kina o Harold kei na tacina, o Arnold.

Ni vo e vica na siga me Siganisucu, e a lako mai vei Harold o tamana ka taroga lo, “Harold, e rawa beka ni o solia nomu sitima ni vanua vei Arnold me rawa ni dua kina nona iloloma ni Siganisucu ena yabaki oqo?”

A donu beka na ka a rogoca maivei tamana? Na nona sitima ni vanua vakamareqeti? Sa dua dina na ka dredre me kerea vua o tamana.

A tadu mai na mataka ni Siganisucu, ka kaila ena marau o Arnold ena nona ciqoma e dua na sitima ni vanua vaka na nei Harold.

Ia a raica o Arnold ni a sega ni qitora o Harold na nona sitima ni vanua. Ni toso tiko na gauna, a qai kila o Arnold ni nona iloloma vakamareqeti a sega ni vaka ga na sitima ni vanua nei Harold—e a nei Harold dina ga! Ni qai kila o Arnold na solibula me rawati kina na iloloma oya, sa yaco na sitima ni vanua oya me ka talei dina sara.

Vei au, na italanoa ni matavuvale oqo e isolisoli saraga vakataki koya―ka sega walega ni vakananuma vei au na tamaqu lomani kei na tacina taleitaki. E bibi cake sara, e vakananuma vei au na loloma kei na nona solibula na Luvena Duabau ga na Kalou―na nona siganisucu eda marautaka tiko.

O Jisu Karisito e a imatai ka na noda iloloma tawamudu ni Siganisucu. Au vakadinata na veika oqo: E a sucu o Koya, bula ka mai mate ena vukuda, ka sa bula―tiko oqo!

Eda kalougata dina nida mai ciqoma na isolisoli rekitaki oqo. Ena qaqa ni sere ni Siganisucu: “Me da marau, sa tadu mai na noda Tui dokai!”¹

E vakatavulica o Elder Neal A. Maxwell: “Nida raica na veika kece e solia vei keda na Kalou, sa dodonu meda dau ciqociqo ena vakavinavinaka, ia e sega ni vakakina. O keda eda kaya nida bula rawati keda ka sega ni vakararavi vua e dua, ia e vakavuqa meda dau sakasaka ena ciqociqo, ka vaka me dau dredre. …

“[Ia] na isolisoli ni Kalou, era isolisoli tawayalani ka sega ni madra rawa, ka vaka edua na Siganisucu ka na sega ni oti rawa, ka ra sega ni vaka na kena ka dau soli vagauna!”²

Eda na ciqoma vakacava e dua na iloloma totoka vakaoqo? Eda na digitaka vakacava e veisiga na iloloma ni noda iVakabula, Nona loloma, kei na Nona Veisorovaki tawayalani?

Meda toso tani mai na irairai totoka ni ivakatakarakara ni Siganisucu e boro tu ena katubaleka kei na idoko kamica, ka vuli mai na nodra ivakaraitaki malumalumu kei na veika era a cakava na ciqomi Karisito taumada.

Ciqoma Nona Savasava

Ni toro voleka mai nona sucu na iVakabula, erau a curuma yani o Meri kei Josefa na osososo ni bula e Peceliema, ia era sa oso kece tu na bure ni vulagi. E a sega beka ni dua e tiko vua e dua na tikina lala me nodratou? E a sega beka ni dua e vakacegui iratou? A kila o Meri na iloloma ka kauta voli tiko, ia a sega ni dua a tiko vua na rumu me ciqoma, me ciqomi Koya.

Eda na sega ni kila vakaidina na ka erau a vakila o Meri kei Josefa ena gauna oya, ia au sa dau raitayaloyalotaka me rau toso ki liu ena igu malua kei na vakararavi. Na nodrau ciqoma oti na veisureti ni agilosi me “kakua ni rere”³ ka vakavakarau tiko oqo ki na sucu i Jisu, sa rawa kina me rau vakanadakuya na vakanananu ni tiko vinaka ka kena isosomi e dua na valenimanumanu vakanomodi ka lolovira. E dua na ituvaki ka vaka me lala tu ena sega ni yaco me vakakina. Na Turaga ena vakasinaita na vanua lala oqori ena savasava.

Me vaka e wiliki ena Luke 2:7, “A sa vakasucuma na nona ulumatua na gonetagane, a sa viviraka vua na isulu ni gone, ka vakadavora ena nodra tikina na manumanu; ni sa sega na tiki ni bure me nodratou.”

Na noda iVakabula, na iloloma lagilagi ni bula, inuinui, kei na yalayala, sa tadu mai ki vuravura.

E rawa beka nida vakarautaka na rumu e lomada meda ciqomi Koya ka vakatara na Nona savasava me vakatawa na noda veitikina lala? Me vakataki Meri kei Josefa, ena tiko vei keda na yaloqaqa me vakararavi vei Koya ena ituvaki ka dau veirawai ena so na gauna? Na idusidusi—veivakurabuitaki—ena lako mai ki na noda bula ena sega beka ni yaco mai na veiosooso, se imatana levu, ia ena veivanua vakanomodi ena bula se cakacaka tiko kina—eda vasaqara kina na veivuke. Se evei ga na vanua e basika kina na noda gagadre malumalumu, ena rawa ni ciqoma na isau ni masu e vakasolokakanataki.

Ciqoma Nona Veisureti mo Cakacaka

E sega beka ni kurabuitaki ni o iratou na imatai ni ciqoma na Lami eratou a ivakatawa?

E a buto tu na lomalagi niratou a soqoni tu na ivakatawa ena kurabui levu e ruku ni dua na rarama lailai, nirau sota ko lomalagi kei vuravura ena sucu veivakurabuitaki ni iVakabula.

“A sa kaya vei ira na agilosi, … au sa kauta mai vei kemudou e dua na itukutuku vinaka mo dou reki vakalevu kina. …

“ Ni sa sucu vei kemudou ena siga oqo, ena koro i Tevita, na iVakabula, ko Koya na Karisito na Turaga.”⁴

Eda taleitaka na nodratou a sega ni lokuyarataka na ivakatawa yalodina na nodratou ciqoma, ia eratou a kusarawa me tavaka na nodratou Tui. Eda vulica mai vei iratou ni da dau veiciqomi e vosa e cakacakataki. O Luke e tukuna vei keda ni o iratou na ivakatawa eratou “sa lako vakatotolo yani, a ra sa kunea … na gone sa davo ena nodra tikina na manumanu.”⁵

Ena vuqa na gauna, ena sega beka ni ciqomi na noda veivakauqeti lalai mai vua na Turaga baleta nira sega ni veidonui ena noda vola ni vula, noda ituvatuva, se noda gauna. Na italanoa ni Siganisucu oqo ena vakananuma vei keda meda vakataki ira na ivakatawa ni sipi era sega ni vakabera nodra cakava na veika e gadrevi me ciqomi na Tui.

E ciqimaka o Luke ena italanoa ni Siganisucu e dua na tikina rekitaki, ni Nona ciqomi e vaka ni da tukuni Koya yani, ka vakamacalataka, “Ia ni ra sa raici [Jisu], era sa tukuna yani na vosa sa tukuni vei ira e na vuku ni gone oqo”?⁶ Era a ciqoma na ivakatawa oqo edua na itukutuku mai lomalagi, era a lako vakatotolo, ka yaco mera dautukutuku vakalomalagi, ka ra kacivaka “meda marau” ni “sa tadu mai, Na noda Tui dokai!”⁷

Ciqoma ena Vakabauta Dei

Oqo meda raici iratou yani na Tamata Vuku. Eratou duatani mai vei ira na dau vakasaqarai Jisu Karisito. Era tu ka vakararai ena nodra bula taucoko ka vakasarava na ivakatakilakila vakalomalagi, ni sa yaco mai, eratou biuta na logavinaka ni vuvale, cakacaka, matavuvale, kei na itokani me muria na kalokalo ka vasaqara na Tui.

Na nodratou ilakolako a sega ni vaka na nodratou na ivakatawa, ka taura e dua na gauna. Eratou a vaqaqara ka vakatataro ka wawa ka toso, ka cakava tale, me yacova ni ratou sa raica na gonelailai kei Meri, na tinana. Eratou a vakacabora na iloloma e talei ka cuva sobu ka vakarokoroko vei Koya.⁸

Au sa dauvakananuma wasoma: Ena noda ciqomi Karisito, eda vakasaqarai Koya beka vagumatua ka vakatarai Koya me tubera noda ilakolako ki na veivanua kei na veimata tamata tawakilai? Eda vakaraitaka beka vakacava na noda vakavinavinaka ena noda isolisoli kei na noda sokalou?

Sa Kalougata Ko ira sa Ciqoma

Sai, koya oqori—na italanoa vakasakiti ni Siganisucu.

Oi kemuni na itokani lomani, sa kalougata ko ira sa ciqoma. Me vaka ga na talei ni loloma ni isolisoli nei tamaqu na sitima kei na isolisoli malumalumu ni gauna kei na veika talei vei ira na leweni vuvale e veivanua, ena sega ni rawa ni vakatauvatani kei na ciqomi ni solisoli dina ni Siganisucu—sai Jisu Karisito.

“A cava na kena yaga vua na tamata kevaka sa soli tu na isolisoli me nona, ka qai sega ni taura?”⁹

A vakavulica e dua na ivolanikalou lomani: “Ni sa lomani ira na kai vuravura vakaoqo na Kalou, me solia kina na Luvena e duabau ga sa vakatubura, me kakua ni rusa ko ira yadua era sa vakabauti koya, me ra rawata ga na bula tawamudu.”¹⁰

Au taleitaka na yalayala ni o koya e ciqoma vakaidina na isolisoli i Karisito ena bogi dokai koya ena rawata na bula tawamudu!

Sa da raica kina ena noda sasaga meda ciqoma vakataucoko na Karisito, eda na yaco me vakataka noda parofita, o Peresitedi Russell M. Nelson, ni veisureti: “na tamata sa tu vakarau, ka bula kilikili me ciqoma na Turaga ni sa lako tale mai, na tamata era sa digitaki Jisu Karisito.”¹¹

Eda na yaco me iyaloyalo ni Nona rarama, ka talai me kacivaka yani: “Me da marau, sa tadu mai na Turaga; Me qai ciqoma ko vuravura [kei keda vakayadua sara] na noda Tui Dokai!”¹² Ena yacai Jisu Karisito, emeni.