Na Yalo ni Siganisucu
Lotu ni Siganisucu ni Mataveiliutaki Taumada
Siga Tabu, 5 ni Tiseba, 2021
Kemuni na taciqu kei na ganequ, au vakavinavinaka niu tiko kei kemuni ena lotu ni Siganisucu oqo e vuravura raraba. Na sere kei na vunau totoka sa mai tara na yaloda. E kauta mai na yalo dina ni Siganisucu, na reki e yaco mai ni da sokalou ka lomana na Turaga o Jisu Karisito. Eda sa mai vauci vata ena loloma kei na yalodina ki Vua.
E tubu na yalo ni sokalou oqo ena gauna yadua au wilika kina na ivolanikalou e vukea meu kila o cei taumada o Koya kei Koya nikua. Ena wiliwili kei na masumasu o ya, au sa kila kina ni o Jisu o Jiova, ena nona veidusimaki na Tamada Vakalomalagi, a Bulia kina o Koya na ka kecega. A vakamacalataka vaka oqo o Paula:
“Sai ira na parofita ka vosa kina e liu na Kalou vei ira na qase e na gauna e vuqa, kei nai valavala e vuqa,
“Ia sai koya na Luvena sa vosa kina vei keda ko koya, o koya sa lesia ko koya mei taukei ni ka kecega, o koya sa bulia talega kina na vuravura kecega;
“O koya sa cila kina na nona serau kei na yaloyalo ni nona itovo, a sa tokona na ka kecega e na nona vosa mana, a sa tiko sobu e na liga i matau i Koya sa levu sara mai cake ni sa vuya laivi oti vakataki koya na noda ivalavala ca;
“Ni sa yaco me uasivi cake vei ira na agilosi, ni sa taukena na yaca sa uasivia na yacadra.
“Io ko cei vei ira na agilosi sa kaya vua ko koya e na dua na siga, A Luvequ ko iko, au sa vakatuburi iko e na siga oqo? Sa kaya tale, Au na Tamana koi au, ena Luvequ ko koya?
“Ia ni sa kauta mai ko koya na Ulumatua ki vuravura, sa kaya, Me cuva vei koya ko ira kecega na agilosi ni Kalou.”1
Ni a parofisaitaki, na sucu i Jisu mai Peceliema era a lagasere na agilosi, ka me vaka e parofisaitaki, a cila mai e lomalagi e dua na kalokalo vou ka serauna na lomalagi, e vakarokorokotaka ni sa tadu mai na Luve ni Kalou me mai tamata.
Sa cecere vei keda, ia na veika a yaco ena Nona sucu mai vakayago sa vakacabea vei keda na yalo ni sa voleka vei keda. A digitaka me siro sobu mai na Nona tiko vakatui ena yasa imatau nei Tamana me taura Vua na bula vakayago. A cakava oqo ni lomani ira na luvena tagane kei na yalewa yadua nei Tamana era na sucu mai ki vuravura. A cakava oqo o Koya ni lomani iko—kei au.
A rawa me sucu ena ituvaki cava ga e vuravura. Ia a sucu o Jisu ena ituvaki vakaloloma ena dua na koro lailai. Era a kidavaki Koya na ivakatawa ni sipi. E vica na Tamata Vuku era a vakauqeti mera laki cuva Vua. A vakarota na iliuliu ni matanitu me na vakamatei o Koya. A kau kina ki na dua na vanua tani me taqomaki na Nona bula. Ni sa tukuna na agilosi vei rau na nona itubutubu ni sa rawa me lesu o Koya ki na Nona vanua, rau a kauti Koya ki Nasareci. A bula voli e kea me 30 na yabaki, ka tubu cake ka daunimatai e kea, ni bera ni qai tekivu na Nona cakacaka raraba vakalotu.
O na taroga beka, vakataki au, cava na vuna a talai mai kina na Luvena Lomani uasivi na Kalou ena ilesilesi vakaoqo. Nanuma na Nona a vakamacalataka na Nona ciqoma ena yalomalua na Nona veikacivi:
“Niu sa sega ni lako sobu mai lomalagi meu kitaka na lomaqu, meu kitaka ga na loma i koya sa talai au mai.”
“Ia sai koya oqo na lomai Koya sa talai au mai, meu kakua ni vakayalia e dua vei ira sa solia mai vei au ko koya, ka meu vakatubura cake tale ena siga mai muri.
“Ia sai koya oqo na loma i Tamaqu, me ra rawata yadua na bula tawamudu ko ira sa raica na Luvena, ka vakabauti koya: ia kau na vakaturi koya cake e na siga maimuri.”2
E vakaraitaka o Jisu na Nona loloma kei na yalomalua. Dina ga sa tu Vua na kaukauwa kei na cecere vata kei Tamana, a digitaka ga o Jisu mera Nona tisaipeli na lewenivanua, kei ira na gonedau, daukumuni vakacavacava, kei na dua na daugumatua.
A vunau voli ka maliwai ira na vukavuka, na tauvimate, na malai, kei ira sa vakalolomataki. A lomana ka ciqomi ira na vakaloloma dina sara, dina ga Nona siro mai na itikotiko vakalou mai lagi. A qaravi ira, lomani ira, ka laveti ira cake.
Na yalololoma cakavinaka totoka o ya kei na yalodei sa yaco me cecere sara ena icavacava ni Nona ilesilesi e vuravura. A sotava na veisaqasaqa kei na cati sa kila tu ni sa tiki ni ilesilesi a kacivi kina o Koya ka sa mai ciqoma. O ya me na mai vakararawataki ena vuku ni nodra ivalavala ca kei na malumalumu o ira kece era mai bula e vuravura.
O ni nanuma tiko na vosa nei Jekope ni a vakavulica na Veisorovaki i Jisu Karisito:
“Io na levu ni nona savasava na noda Kalou! Ni sa kila na ka kecega, ka sa sega ni dua na ka me sega ni kila.
“Ka sa lako mai ki vuravura me vakabulai ira na tamata kecega kevaka era na vakarorogo ki na domona; ia raica, sa colata ko koya na nodra mosi na tamata kecega, io, na nodra mosi na veika bula kecega, na tagane, kei na yalewa, kei na gone; ka ra lewe ni vuvale i Atama.
“Ka sa vosota ko koya na ka kece oqo me ra rawata kina na tucake tale mai na mate na tamata kecega, me ra na tu kecega e matana ena siga ni veilewai levu.”3
Na gonelailai ena ikanakana ni manumanu e Peceliema a Luvena na Kalou, sa tala mai na Tamana me mai noda iVakabula. O Koya na Le Duabau Ga nei Tamana ena yago. O Koya na noda Dauivakaraitaki.
Me noda na yalo ni Siganisucu, ena gadrevi meda na loloma me vakataki Koya. Na nona vosa vei kemuni kei au o ya “Mo dou veilomani, me vaka kau sa lomani kemudou.”4
Sa rawa mo vakila na yalo ni Siganisucu, me vakataki au, ena malanivosa oqori Au vakila na rarama kei na yalogu e yaco mai ena veivakauqeti ni Yalo Tabu ena gauna au nanuma ka tugana na ivakaraitaki ni iVakabula kei Vuravura.
Kivei au, e rairai beka ni ivakananumi kamica duadua sai koya ni sa tu vakarau na Turaga me vukei keda se cava ga e yaco. Me vaka a vakavulica o Momani:
“Raica, sa kila na ka kecega na Kalou, o koya sa bula mai na tawavakaiyalayala ki na tawavakaiyalayala, raica, sa talai ira mai na agilosi me ra vakavulici ira na luve ni tamata ka vakatakila vei ira me baleta na nona lako mai na Karisito; ia sa vu mai vei Karisito na veika vinaka kecega.
“A sa tukuna tale ga na Kalou vei ira na parofita ni na lako mai na Karisito.
“Ka raica, sa vuqa na sala sa vakatakila kina vei ira na luve ni tamata na veika vinaka; ia na veika kece sa vinaka sa mai vua na Karisito; kevaka e sega, era na lutu na tamata ka sega na ka vinaka e yaco vei ira.
“O koya gona ena nodra veiqaravi na agilosi kei na vosa kecega sa lako mai na gusu ni Kalou, era sa tekivu vakabauti Karisito kina na tamata; ena vakabauta era sa taura matua kina na veika vinaka kecega; a sa vaka tu kina me yacova ni sa lako mai na Karisito.
“Ia ni sa lako oti mai ko koya, era sa vakabulai tale ga na tamata ni ra sa vakabauta na yacana; ia ena vakabauta era sa yaco kina me ra [luvena tagane kei na yalewa] na Kalou. Ia me vaka sa bula na Karisito, sa vosataka vakaidina na vei vosa oqo vei ira na noda qase ka kaya: Na ka kecega sa vinaka dou sa kerea vei Tamaqu ena yacaqu ka vakabauta ni dou na rawata, raica ena vakayacori vei kemudou.”5
Ena gauna oqo, e vuqa vei kemuni ena masu me vakaukauwataki me vosota na veika dredre me vakatovolea na yalomu o rairai vakila ni sa kemu icavacava. Au vakadinadinataka ni iVakabula kei na Tamana rau sa rogoca na nomuni kerea na veivuke ni veivakacegui mo ni vinaka kina kei ira o ni lomana ka qarava.
Na kena isau ena yaco mai me vaka a yaco vei Parofita Josefa Simici. O ni na kila rawa na masu nei Josefa me vaka e nomu. O na qai vakila na loloma ni Turaga vei Josefa vakakina vei iko ena Nona isau veivakacegui ki na tagi nei Josefa. A masu o Josefa:
“Oi kemuni na Kalou, ko ni sa tiko evei? Evei na vale ni vakaruru sa ubia na nomuni ivunivuni?
“A cava na kena dede ko ni na tarova tiko kina na ligamuni, kei na matamuni, io na matamuni savasava sara, ko ni sa sarava tiko kina mai na lomalagi tawamudu na veika rarawa sa yaco tiko vei ira na nomuni tamata kei ira na nomuni talai, kei na nomuni rogoca tiko na nodra tagi?”6
A qai sauma na Turaga ka rawa me cakava o Koya vei iko kei au:
“Me vakacegu na yalomu; raica sa lekaleka walega na gauna ni nomu rarawa kei na vutugu;
“Ia, kevaka ko sa vosota rawa, ena vakacerecerei iko cake na Kalou; raica ko na vakamalumalumutaki ira kecega na nomu meca.
“Era na totaki iko tiko ga na nomu itokani, io era na ciqomi iko ena loma marau kei na liga loloma.”7
Au kila vakaidina ni iyalayala sa dina sara vei kemuni, vei au, kei ira eda sa lomana. Sa vakila na Turaga na noda mosi. A digitaka me cakava ni sa lomani keda. E kila o Koya na sala meda vakila kina na vakacegu ena gauna dredre, ni yaco tiko mada ga na vakatovolei. Ena talai ira mai na itokani era agilosi mera tu e yasamuni “ena yalo vinaka kei na liga dauloloma.” Na yaloda yadua ena veisau me vinaka cake ni da vosota noda dui vakatovolei ena noda vakabauti Koya tiko.8 Ena veisau vou oqori, eda na yaco oi keda yadua meda sa itokani e rawa ni tala yani na Turaga mera agilosi kivei ira eso.
Niu sa Nona ivakadinadina, au sa vakadinadinataka ni gonelailai mai Peceliema sai Jisu Karisito, na Luvena lomani na Kalou. Au yalataka ni ko kerekere vua na Tamada Vakalomalagi ena vakabauta ena yaca i Jisu Karisito, ena kauta mai na Yalo na yalo ni vakacegu vei iko kei ira na nomuni daulomani.
Au sa lomani kemuni kau sa vakabauta ni sa nomuni na reki ni Siganisucu oqo—ena yabaki oqo kei na veigauna kecega. Ena yaca tabu i Jisu Karisito, emeni.