“Sa Rawa Talega Mo Kila”
Lotu ni Siganisucu ni Mataveiliutaki Taumada
Siga Tabu, 5 ni Tiseba, 2021
Kemuni na taciqu kei na ganequ lomani, na Siganisucu e vale niu se gone kina a dau vakauqeti vakalevu kina na nodrau bula ni vanua na noqu itubutubu. A toki vakadua o tinaqu ki Amerika mai Suwiteni vakakina o tamaqu mai Finiladi.1 Ena vakavakarau ki na Siganisucu, keitou a sauna na neitou vunikau ni Kirisimasi ena iukuuku keitou cakava ga, ka buli keke vakaveitarataravi o tinaqu. Ocei e kila, de rau veiwekani talega kei nona Bu Lundgren o Sister Craig. A tekivu na neitou marau na Bogi ni bera na Siganisucu ena dua na kana magiti totoka ni kakana ni vanua a vakarautaka o tinaqu—na meatballs; purini raisi; kei na levu ni madrai, keke, kei na kuki. Na marau ni Bogi ni bera na Siganisucu a tini ena nona sa yaco mai o Jultomten—Santa Claus—a kau nodra iloloma mai na gone taucoko. Ia ni bera ni yaco mai o Jultomten a dau soqoni ira kece mai na taciqu, ganequ o tinaqu, kei au me vakarorogo vei tamaqu me wilika na italanoa ni Siganisucu mai na Veiyalayalati Vou.
O tamaqu e dau galugalu tu ga, sega tu ni dau vosa ena vosa ni nona vanua kei na Vakavalagi a qai vulica ni sa qase mai. E turaga daudina ga ka sega ni dau vakalagilagi koya. A sega ni dau raqataki koya, ka sega ni bau vakakurikuria na ka. Ena Bogi ni bera na Siganisucu a wiliwili mai o koya ena Luke 2. A wilika na nodrau a lako o Josefa kei Meri ki Peceliema, na nona rairai na agilosi vei iratou na ivakatawa ni sipi, na sucu i Jisu, kei na nona tugana tu o Meri e lomana na ka kece sa yaco. Ia a sega ni cegu o tamaqu ena tikina e 19; a tomana na kedrau itukutuku o Meri kei Josefa ena nodrau kauti Jisu na gonelailai ki na valetabu e Jerusalemi ka vakacabo isoro kina me vaka na Lawa i Mosese.
A wilika o tamaqu:
“Ka raica, sa dua na tamata mai Jerusalemi, ko Simioni na yacana …
“A sa vakatakila oti vua na Yalo Tabu, ni na sega mada ni mate, ena kunea e liu na Karisito ni Turaga.
“A sa vakavuna na Yalo Tabu na nona lako ki na vale ni soro: ia ni rau sa kauta mai [o Meri kei Josefa] na gone ko Jisu, …
“Sa qai keveti [Jisu cake o Simioni], ka vakavinavinakataka na Kalou, ka kaya,
“Kemuni na Turaga, ko ni qai laiva na nomuni tamata me lako ena vakacegu, me vaka na nomuni vosa:
“Ni sa qai raica na mataqu na vu ni bula mai vei kemuni.
“Io ko koya ko ni sa vakarautaka e na matadra na tamata kecega.”2
Ena tikina o ya, e dau galu kina o tamaqu. Ka qai cavuta na nona ivakadinadina. Ka vakawasoma me kaya ena sala vata oya ena itautau kei nai rogorogo ni domo ni vosa Vakavalagi vavaku, “Au na sega beka ni keveta e ligaqu na gone o Jisu, ia au kila, me vaka a kila o Simioni, ni gone o ya sa luve ni Kalou, na noqu iVakabula ka Dauveivueti. Sa ka dina o Koya, ka sa bula tiko.” Ni oti na itukutuku mana oqo, a raici keitou vakayadua ena yaloka ni matana dei karakarawa ka kaya ena deguvacu qaqa, “Ka sa rawa talega mo kila.”
Rau sa kila tu o tamaqu kei tinaqu o cei na gone o ya mai Peceliema kei na cava ena rawata o Koya ni sa tubu cake. Na kila oqo a vakavoutaki rau. Rau a sega walega ni gadreva me keitou vakadinata na gone na nodrau vosa3 ia me keitou kila ga vakai keitou me rawa ni keitou vakavoui talega kina. Niu sa vakauqeti ena nodrau ivakadinadina na noqu itubutubu, au a lakova na salatu ni veiyalayalati ena gagadre meu “na kila talega.”
Niu a se yabaki 11 kina, a vakaitikotiko na neitou vuvale mai Göteborg, Sweden. A sureta o peresitedi ni kaulotu na itabagone taucoko mera wilika na iVola i Momani. A sega ni dodonu meu okati ena veisureti oqo, ia o taciqu a dikoni tiko ena gauna o ya, ka a ciqoma na ibolebole o ya. Au a dau vinakata tu meu vakataki taciqu ka cakava na ka e cakava, au a qai curu. Oi rau na noqu itubutubu a solia vei keitou yadua na veitacini na ivolanikalou, kau sa tekivu wilika ena veiyakavi.
Oti e vica na vula, a veivakauqeti o Peresitedi Gösta Malm, dua na daunivakasala ena mataveiliutaki ni kaulotu,4 e vakayaloqaqataki ira na itabagone mera wilika na iVola i Momani ka kerea vua na Kalou na kena dina. Au sa mani lewa meu sa cakava sara. Ena bogi o ya au a wawa toka me yacova ni sa moce o taciqu. Au a sobu mai na noqu loga, tekiduru ena vuloa batabata, ka tekivu masu. Au sa vakila sara me vaka sa tukuni mai vei au, “Au sa tukuna tiko mai vei iko ni sa ka dina.” Ena ka o ya, sa sobuti au mai e dua na vakacegu tawa vakamacalataki rawa. Au sa kila vakai au ena kaukauwa ni Yalo Tabu ni iVola i Momani sa ka dina sara.5
Me vaka ga sa yalataki tu ena iVakamacala taumada ni iVola i Momani, sa “[yaco] meu kila talega ena [kaukauwa ni Yalo Tabu] ni o Jisu Karisito na iVakabula kei vuravura, ni o Josefa Simici sa Nona daunivakatakila ka parofita ena gauna nikua, ni Lotu i Jisu Karisito ni Yalododonu Edaidai sa matanitu ni Turaga sa tauyavutaki tale e vuravura, me veivakarautaki ki na iKarua ni Lako Mai na Mesaia.”6 Na kila-ka o ya, a cokoti vata ki na ivakadinadina era tarava mai, a vakavoutaki au, me vakataki rau ga na noqu itubutubu.
Na kila-ka oqo—ni o Jisu Karisito sa Luve ni Kalou ka a mate ena vuku ni ivalavala ca kei vuravura—sa isolisoli vakayalo.7 Na isolisoli oqo e sega ni sema ki na dua na itutu ena matabete sega talega ena tagane se yalewa, ia, sa soli vei ira kece sa lavaki kina. E sega ni kerei meda kauta vua na iVakabula na isolisoli koula, ka boi vinaka, kei na mura meda lavaki ki na isolisoli vakayalo totoka oqo. Eda sa kerei meda soli keda.8 Na parofita ni iVola i Momani, o Amelekai, a kerei ira na tamata, ena nona kaya, “Ia oqo au gadreva mo dou lako mai vua na Karisito, o koya na Yalo Savasava ni Isireli, mo dou vakaivotavota ena nona veivakabulai, kei na kaukauwa ni nona veivueti. Io, dou lako mai vua, ka cabora na yalomudou taucoko me ivakacacabo kivei koya … ; ia me vaka ni sa bula na Turaga dou na vakabulai.”9
Niu sa qase cake, au raici rau noqu itubutubu ni rau qaravi ira na tamata. Au raica ni rau maroroya na nodrau veiyalayalati a cakava vua na Kalou. Au a raica na nodrau gugumatua ena veituberi ka siko vuvale, ka saga me qaravi ira rau dau sikova. Au a raica nodrau vakaitavi ena cakacaka vakalotu ni valetabu ka ciqoma na veikacivi ni Lotu. Ena veiyabaki yadua, ena Ivi ni Kirisimasi, e vakadinadinataka kina o tamaqu vata kei Simioni na iVakabula o Jisu Karisito. Ni toso na yabaki, a vakatetea o tamaqu na nona veisureti “mera kila talega” o ira na nei kei na momo kei na makubudra.
Tini vakacaca na yabaki ni oti noqu kila vakaitabagone na iVola i Momani, au a kacivi meu sa Vakaitutu Raraba Vitusagavulu ka lesi sara meu vosa ena koniferedi raraba. A ratou vakadeitaka na ganequ me sarava o tamaqu yabaki 92 na koniferedi—vakabibi na noqu vosa. Ni oti na koniferedi raraba au a gole ki na nona itikotiko. Au a taroga, “Ta, o a sarava beka na koniferedi?” A kaya mai, “Ja.” Au a taroga, “O a rogoca beka na noqu vosa?” A kaya mai, “Ja.” Ena nuiqawaqawa, au a guraka yani, “Io, Ta, cava nomu nanuma?” A kaya mai, “Io, e a vinaka. Au a via dokai au kina.”
Oti e dua na gauna balavu a qai kaya mai, “Dale, au gadreva meu tukuna vei iko e dua na ka.” Au a qai siqema rawa ni gauna au a via vaqara meu dolei, a osooso tiko o tamaqu ena dua na ka e bibi cake sara mai na veivakacaucautaki. A tomana, “Au a tadra ena bogi. Au a tadra niu sa mate, kau a raica na iVakabula. A mokoti au o Koya ka kaya ni sa vosoti na noqu ivalavala ca. Kau a vakila na kena vinaka.” O ya ga na veika a kaya cake mai o Tamaqu. Ia na irairai ni matana sa titobu sara; ni sa kilai Jisu Karisito. E kila o koya ni gonelailai mai Peceliema, ka a “tubu cake ena vuku kei na yagona talega, a sa vinakati koya vakalevu cake tikoga na Kalou kei ira talega na tamata,”10 sa nona veivakabulai, ni Luve ni Kalou sa tubu cake ka sa sorovaka na nona ivalavala ca. Ka sa kila makawa tu mai o tamaqu ni bera nona tadra. Na tadra a dua ga na loloma veivueti totoka—a iloloma—mai vua na Tamada Vakalomalagi dauloloma vua e dua na qase, a mai mate ni oti toka e rua na vula. Mai na iloloma kece ni Siganisucu au sa bau ciqoma, au mareqeta duadua na iloloma ni ivakadinadina kei na vakabauta a vakacerecerea o tamaqu kei tinaqu.
Ena Siganisucu oqo, kerea vei Tamamu Vakalomalagi na iloloma vakayalo mo kila ni bula dina tiko na iVakabula kei vuravura. Na draki ni Siganisucu sa dua na gauna e dina ka totoka me vulici kina na Nona bula ka sagati meda vakatotomuria na Nona ivakarau kei na itovo. Ni ko cakava oqo, sa rawa mo kila ni o Jisu na Karisito, na Luve ni Kalou, ka sa sorovaka na nomu ivalavala ca. Na kila oqo e vinaka cake ka balavu cake mai na iloloma cava ga ni Jultomten e rawa ni kauta mai vei iko, baleta ni rawa ni veisautaki iko. O na qai vulica ni dau taleitaka na iVakabula me vakalesuya mai na veika o sega ni rawa ni vakalesuya mai, vakabula na we ni mavoa e sega ni mavo rawa, vakavinakataka na veika e sega ni rawa ni vakavinakataki, ka sauma na veika tawadodonu ko sotava, ka bonota na uto yadua sa kavoro.
Me vakataki tamaqu vakayago, au kila niu na sega beka ni keveta cake e ligaqu na gonelailai o ya o Jisu, ia au kila, me vaka a kila o Simioni, ni gone o ya sa luve ni Kalou, na noqu iVakabula ka nomu iVakabula, na noqu Dauveivueti ka nomu Dauveivueti. Sa dina o Koya, ka sa bula tiko.” Sa Rawa Talega Mo Kila. Ena yacai Jisu Karisito, emeni.