Usa ka Gasa gikan sa Amahan: Gidawat o Gisalikway
Pagkanindot sa musika ug kanindot sa mensahe ni Sister Eubank. Pagkaanindot nianang pagbanagbanag sa matubsanong kalooy! Nan, ania na ang Disyembre. Ang hangin bugnaw ug aduna na kitay snow. Alang sa kadaghanan, nagpasabut kini nga duol na kaayo ang Pasko. Apan alang nako, dili kini mao ang pagbati sa Pasko.
Sa tibuok nakong kinabuhi niining kalibutana, dugay na, panahon sa ting-init ug makahupay nga kagabhion maoy mosugat sa Pasko. Tungod kay ting-init man ang Disyembre sa Australia. Ug sa West Africa, diin ang akong asawa ug ako nagpuyo sulod sa milabayng lima ka tuig, init gayud kanunay.
Mao nga ang Disyembre kasagaran mao ang panahon sa pag-adto sa baybayon, pag-surf, ug pagsugba-sugba. Sa Pasko, ang among panimalay mangalimyon sa kahumot sa mga mangga ug mapuno sa tingog sa mga pagkinataw-anay. Apan ang diwa sa Pasko managsama ra bisan asa. Maanaa man sa Sydney, sa Salt Lake, o sa Sierra Leone; maanaa man sa Nuku’alofa, sa Newfoundland, o sa Nigeria, ang pagkatawo sa atong Manluluwas nakapadasig sa mga tawo sa pagbuhat og maayong mga butang.
Kadaghanan sa mga dapit, ang mga tawo magbinayloay og mga regalo, mobisita sa uban, ug mohimo og mga mabinationg buhat aron sa pagsaulog sa diwa sa Pasko. Ang among mga higala sa Samoa adunay usa ka tradisyon nga sa adlaw human sa Pasko, magbutang sila og pagkaon ug ubang mga makaon diha sa mga kahon ug ipanghatag kini ngadto sa labing timawa nga mga pamilya, dili lang sa ilang ward, apan ngadto usab sa uban sa ilang kumunidad. Aduna usab silay duha ka acre [punto utso ka ektarya] nga tanaman sa lagutmon, kadaghanan sa abut niini gipanghatag ngadto sa mga tawo kinsa nanginahanglan.
Usa ka pinangga kaayo namo nga higala gikan sa Senegal sa West Africa misulti kanako nga sa iyang gipuy-an nga balangay sa Ivory Coast, matag Bespiras sa Pasko, imbis magdala og mga regalo, ang mga taga balangay magdala sa bisan unsang wala masulbad nga kasungian ngadto sa ilang mga lider. Kadtong mga lider mogahin dayon og panahon sa pagtinabangay uban sa mga pamilya aron masulbad ang mga panagbangi. Ang mga lumulupyo sa balangay nagkinahanglan og kalinaw ug panag-uyon nga maanaa diha sa kada panimalay diha nianang balangay atol sa Pasko, tungod kay sila nagsaulog sa pagkatawo ni Kristo—Siya kinsa natawo alang sa mahinungdanon nga katuyoan sa pagdala og kalinaw sa kalibutan.
Sayo niining tuiga, among nahimamat ang usa ka batan-ong misyonaryo, si Sister Jeanne Ingabire gikan sa Rwanda, kinsa nagserbisyo sa iyang misyon sa Liberia. Gisaysay niya kanako ang makaguol kaayo nga istorya sa dakong epekto ngadto kaniya sa nahitabong kamatay didto sa Rwanda niadtong 1994. Ang iyang amahan gikan sa tribo sa Hutu, kinsa puno sa kasilag sa mga sakop sa tribo nga Tutsi. Apan ang iyang inahan usa ka sakop sa tribo nga Tutsi. Aron maluwas ang kinabuhi sa iyang asawa ug sa upat niya ka mga anak nga babaye, kining maisugon nga amahan mitago sa iyang pamilya didto sa layo ug mibalik sa iyang balangay nga nag-inusara. Iyang asawa ug mga anak nga babaye wala na gayud makakita kaniya pag-usab ug nanlimbasug aron lang mabuhi. Sa katapusan mibalik sila paglabay sa siyam ka tuig aron motambong og miting sa panag-uli nga gipasiugdahan sa gobyerno, diin ilang nahibaloan nga ang ilang bana ug amahan gipatay sa dihang mibalik siya ngadto sa iyang balangay. Apan, makapahingangha kaayo, nga ang inahang ni Sister Ingabire ug ang iyang mga anak mipasaylo niadtong mihunos sa kinabuhi sa ilang bana ug amahan.
Sa panahon nga si Joseph Smith napuno unta sa kasuko, nga inosenting gibalhog sa Liberty Jail sulod sa pila ka bulan sa tibuok Pasko niadtong 1838, ang Ginoo mipadayag sa 121 nga seksyon sa Doktrina ug mga Pakigsaad. Niining pagpadayag ang Ginoo nagtabang ni Joseph sa pagbuntog sa mga pagbati sa kahigawad nga makita sa sinugdanan niini nga seksyon ug nagtudlo sa Propeta nga ang kamabination, pag-antus, kalumo, kaaghop, ug tiunay nga paghigugma mao ang Kristohanong mga kanaiya nga mahinungdanon alang sa pagkadisipulo.
Ang pasko adunay bililhong mga panumduman sa pamilya alang kanako. Hinoon, dili tanan niadtong mga panumduman mga maayo. Sa bata pa kaayo ko, nahinumdom ko nga nakadawat og usa ka primyo nga berdi nga dulaang panglumba nga sakyanan gikan sa akong amahan. Kabus kaayo kami, ug ganahan gyud ko niadto nga regalo. Hinoon, usa ka adlaw kalit lang nga nasuko sa butang nga walay hinungdan, gilabay nako ang dulaang trak-trak ngadto sa baga nga tanum nga ningkapot ngadto sa among kural. Diha-diha dayon naguol ko, dili lang tungod sa paglabay nako sa dulaan apan tungod sa akong nabati nga kini nagsimbolo sa pagsalikway sa pagpadayag og gugma sa akong amahan. Ako kining gipangita og maayo, apan kawang lang. Sa dihang miabut ang tingtugnaw ug ang labong nga mga dahon nangawala na, gipangita ko kini pag-usab, wala ko molampos. Gibati gihapon nako ang kasakit nga akong gipasakitan ang akong amahan. Sakit pa gihapon kini.
Kahibalo mo, nga kana susama usahay sa atong pagsalikway sa gugma sa atong Langitnong Amahan, ug sa iyang gasa ngari kanato, ang labing talagsaon niini mao ang Iyang pagpadala sa Iyang Anak aron mag-antus ug moula alang kanato. Pagkasubo nga trahedya kon atong isalikway ang Iyang maulaon nga sakripisyo o ang mga pakigsaad ug mga ordinansa sa Iyang ebanghelyo!
Oo nga unta kanunay kita nga mas mahisama niadtong kinsa naningkamot sa pagpakita og gugma ngadto sa uban. Bag-ohay lang, daghang naghago aron matabangan ang mga residente sa Florida ug sa Carolina kinsa nakasinati og makadaut nga bagyo ug sa pagtabang niadtong nag-antus sa samang paagi sa tibuok kalibutan.
Niadtong Disyembre 25, 1974, ang kaulohan sa Northern Territory sa Australia naguba. Sa sayo niana nga adlaw sa Pasko, ang Bagyong Tracy miigo sa siyudad sa Darwin. Daghang nangamatay, ug kadaghanan sa populasyon sa Darwin nagpabilin nga walay pinuy-anan. Mga hulagway sa bag-uhay lang nga pagkagun-ob sa Florida ikatandi sa panghitabo sa Darwin. Apan ang diwa sa Pasko milupig sa kawalay paglaum. Mga donasyon nangabut gikan sa mga tawo sa tibuok Australia, ug daghang mga indibidwal ang miadto dayon ngadto sa Darwin aron sa pagpabarug og balik niini.
Daghang katuigan ang milabay, sa dihang ang among kinamagulangan nga anak nga babaye dos anyos pa, nabalian sa iyang batiis sa wala pa Magpasko ug migahin og mga semana sa ospital nga gigaid nga pinabitay ang iyang paa . Lisud kaayo kadto nga Pasko. Usa ka pamilya sa among ward nga dili kaayo luag ang kahimtang sa pangwarta mibisita niya sa Adlaw sa Pasko. Matag usa sa ilang gagmayng mga bata nagdala og ilang kaugalingong paborito nga mga regalo, aron ihatag ngadto sa among anak nga babaye isip iyang gasa gikan kanila. Ang akong asawa, si Kay, ug ako natandog nga nakahilak tungod sa ka tiunay sa pagkamabination niining mga bata ug sa ilang mga ginikanan.
Mao kini ang tinuod nga diwa sa Pasko—ang mga indibidwal nagtinabangay sa usag-usa. Total, ang usa ka importanting bahin sa kabilin sa Manluluwas mao man ang Iyang pagpangalagad ngadto sa “usa ka tawo” Kini mao gayud ang mga baruganan nga gihangop ug gigamit sa mga miyembro sa Iyang Simbahan sa Africa, ug maoy Iyang gipangayo kanato dinhi.
Si Presidente M. Russell Ballard namahayag nga ang Pag-ula mao ang labing importante nga buhat sa Manluluwas nga naghimo lang gayud niini alang sa matag “usa” kanato. Ang mga pulong ni Presidente Ballard:
“Kon tinud-anay kitang nakasabut sa Pag-ula ug sa mahangturong bili sa matag kalag, pangitaon gayud nato ang… matag … masinupakon nga anak sa Dios. Ato silang tabangan nga masayud sa gugma ni Kristo alang kanila. Atong buhaton ang tanan nga atong mahimo aron sa pagtabang nga maandam sila sa pagdawat sa makaluwas nga mga ordinansa sa ebanghelyo.
“Sigurado, kon ang Pag-ula ni Jesukristo nag-una diha sa mga hunahuna sa mga lider sa ward ug branch, walay bag-o o gipaaktibo og balik nga miyembro ang mapasagdan. …
“… Bisan tuod ang Pag-ula walay kinutuban ug mahangturon, kini gamiton sa tagsa-tagsa, usa ka tawo sa matag higayon. …
“Mga Kaigsoonan: Ayaw, ayaw gayud ipakaubos ang kabililhon sa usa. ”1
Dili ba nindot kaayo kini kon kitang tanan nagsunod niining tambag ug sa atong pinangga nga propeta, si Presidente Russel M. Nelson—sa pagsunod sa duha ka dagkong mga sugo sa mas halangdon ug mas balaan nga paagi. Ug kon kamo nagduha-duha sa inyong abilidad sa pagbaton og impluwensya sa pagbuhat sa ingon, nan hunahunaa kining African nga proverbio: “Kon sa imong hunahuna gamay ra kaayo ka aron makahimo og kalainan, nan wala pa gayud nimo makita kon unsay mahimo sa usa ka gamay nga lamok sa usa ka gabii.”
Dili na kinahanglan nga mobiyahe pa ta og Balaan nga Yuta aron makahimo og kalainan o mas maduol ngadto sa Manluluwas. Ang Pasko mao ang panahon nga atong matutukan ang atong personal nga gasa ngadto sa Manluluwas pinaagi sa padayon nga paghigugma ug pagtabang sa uban. Dayon dili na kaayo layo ang Bethlehem alang sa bisan kinsa kanato. Anaa ra kanato nga himoon si Kristo nga usa ka bahin sa atong kinabuhi—sa pagdawat sa mga gasa nga Iyang gitanyag kanato ug mohatag Kaniya sa gasa sa atong kasingkasing. Gihigugma nako Siya ug mopamatuod sa Iyang dili mamatay nga gugma alang sa matag usa kanato, sa ngalan ni Jesukirsto, amen.