Ikatag ang Inyong mga Tipik nga Pagkaon
Minahal nga kaigsoonan, minahal nga mga higala, akong gidala kaninyo ang pagtimbaya ug panalangin sa atong minahal nga propeta, si Presidente Thomas S. Monson. Mapasalamaton siya sa inyong mga pag-ampo ug gugma niining panahon sa Pasko ug sa kanunay.
Ganahan kaayo ko niini nga panahon sa tuig. Kini nga Debosyonal sa Pasko sa Unang Kapangulohan nahimo nang minahal nga tradisyon sa kadaghanan, lakip sa akong kaugalingong pamilya. Maghinam-hinam mi nga sugdan ang panahon sa Pasko uban sa makadasig nga musika sa Orchestra sa Temple Square ug sa kanunayng maanindot nga Mormon Tabernacle Choir. Ang mga mensahe ug ang musika makatabang sa pag-establisar og pagbati alang sa panahon sa Pasko ug mopahinumdom kanato sa lawom nga kahulugan sa unsay atong gisaulog ug ngano.
Pasko sa Germany
Sa akong pagkabata, ang akong mga pangandoy sa Pasko kanunay nga naglakip og nindot kaayo nga tingtugnaw, ug nasayud ko nga wala ako mag-inusara niini. Alang kanako nagpasabut kini og bugnaw nga hangin sa tingtugnaw, asul nga kalangitan, ug daghan kaayong presko, puti nga snow. Hinoon, ang panahon hapit kanunay lahi kay sa akong gikonsiderar nga nindot nga tingtugnaw, kasagaran magdagtum nga gabunon nga kalangitan, basaon nga snow, o gani mag-ulan.
Bisan pa man, sa Bisperas sa Pasko, ang akong inahan moputos kanamo sa mainiton nga mga sinina sa tingtugnaw ug ilakaw-lakaw kami sa among amahan sa kadalanan sa among lungsod.
Kaming mga anak nasayud sa tinuod nga rason niining tinuig nga paglakaw—si Mama nagkinahanglan og panahon sa pag-adorno sa Christmas tree, pagbutang sa mga regalo ilawom sa christmas tree, ug pag-andam sa among sala alang sa balaang gabii. Gisulayan namo ang tanang paagi aron mubo ra ang among malakaw. Apan ang among amahan abtik kaayong mangita og laing tuyukan o usa pa ka likoon aron sa paghatag ni Mama sa gikinahanglan nga panahon.
Niadtong panahuna, ang kadalanan sa Zwickau, Germany, medyo ngitngit kon magabii. Bag-o pa lang nahuman ang Ikaduhang Gubat sa Kalibutan, ug ang mga suga sa kadalanan nihit. Diyutay ra ang nangabli nga tindahan, ug ang uban nahimutang tapad sa mga balay nga naguba sa pagpangbomba, nga anaa gihapon ang lain nga baho sa gubat.
Adunay parte sa paglakaw nga kaming tanan ganahan kaayo—ang paghunong sa katedral sa tungang bahin sa Zwickau diin maminaw mi sa nindot nga mga kanta sa Pasko ug talagsaong musika sa organ nga daw kanunay nga magtukar sa Bisperas sa Pasko. Sa dili matinong paagi, kini nga musika mihimo sa mapaubsanong mga suga sa among siyudad nga makita nga mas hayag—daw sama sa naggilak-gilak nga mga bitoon—ug mipuno sa among batan-ong mga kasingkasing sa nindot nga pagbati sa paghinamhinam.
Sa pag-uli na namo, nahuman na si Mama sa iyang mga pagpangandam, ug magsunod kaming mosulod sa sala aron tagsa-tagsang motan-aw sa kanindot sa bag-ong giadornohan nga Christmas Tree. Nihit kaayo ang kahoy niadtong panahuna, ug gamiton namo ang bisan unsa nga anaa. Usahay kinahanglan mi nga modugang og pipila ka sanga aron makita kini nga tinuod nga kahoy. Apan sa akong batan-ong mga mata, ang Christmas tree kanunay nga mahimayaon kaayo.
Ang mag-awup-awop nga siga sa mga kandila nakahatag og misteryuso, daw makalumay nga kahayag sa kwarto. Mitan-aw mi uban sa kahinam ug kalipay sa mga regalo ilawom sa christmas tree ug naglaum nga ang among sekretong mga pangandoy matuman.
Ang kahinam nga makadawat og regalo hapit matupngi sa kalingaw nga mohatag niini. Kasagaran kini nga mga gasa hinimo ra sa kamot. Usa ka tuig sa dihang bata pa ko kaayo, ang akong giregalo sa akong igsoon mao ang akong gidrowing nga iyang hulagway. Mapasigarbuhon kaayo ko sa akong kinanindutang buhat. Ug mabination kaayo siya sa iyang mga pulong sa pagpasalamat ug pagdayeg.
Kanunay nakong mahalon kining nindot nga mga handumanan sa sayong bahin sa akong pagkabata sa East Germany.
Walay Kinutubang Gugma
Ang mga tradisyon sa Pasko gisaulog sa mga kultura ug mga nasud niining kalibutan sa talagsaon, managlahing paagi. Ang matag usa niini nindot ug talagsaon, ug sa gihapon lahi kaayo.
Apan kining tanan adunay komon nga pagbati, komon nga diwa nga daw anaa kanunay kon magsaulog kita sa pagkatawo ni Kristo ang Hari, ang atong Maghuhupay ug Pagsalig, ang Kalipay sa Israel!
Daghang mga pulong ang mahimong gamiton sa paghulagway niini nga pagbati: kalipay, paglaum, kahinam, kamaya. Ang matag usa niini naghulagway og parte sa unsay gitawag nato nga “ang diwa sa Pasko.”
Alang kanako, usa ka pulong ang labing maayong naghulagway sa mga pagbati nga atong masinati panahon sa Pasko. Kana nga pulong mao ang gugma.
Tutal, ang gasa nga atong gisaulog sa Pasko usa ka gasa sa gugma—ang gasa sa Dios nga Iyang Anak. “Ang gugma sa Dios gipadayag dinhi kanato pinaagi niini: gipadala sa Dios ang iyang bugtong nga Anak nganhi sa kalibutan, aron kita mabuhi pinaagi kaniya. Niini ania ang gugma.”1
Natandog niana nga gugma, ang atong kasingkasing mahumok. Mobati kita og kalumo nga makapahimo kanato nga motabang sa uban diha sa kamabination ug kalooy.
Ang Pasko nagdasig kanato nga mas maayo nga mohigugma.
Bisan nagsulti ako niini karon, akong giila nga ang pulong nga gugma kulang. Sa Iningles, sama sa daghan pang mga pinulongan, ang “love” mahimong daghan og kahulugan. Sama pananglit, tingali moingon ko nga “love” nako ang kahimtang sa panahon, o “love” nako ang imong bag-ong sinina, o tingali gani “love” nako ang kahumot sa bag-ong abli nga sudlanan sa mga bola sa tennis.
Apan ang gugma nga akong gihisgutan mas labaw pa ka lawom. Ang atong mortal nga konsepto sa gugma usa lang ka lugas nga balas diha sa lapad nga baybayon kon itandi sa gugma nga gibati sa Dios alang kanato.
Ang Iyang gugma walay kinutuban ug walay pagkahurot nga kalooy. Ang balaang gugma mopuno sa kahangturan. Tugub kini sa mahangturong grasya. Motabang ug mobayaw kini. Mopasaylo kini. Mopanalangin kini. Motubos kini.
Ang balaang gugma mopatigbabaw sa mga panaglahi sa personalidad, kultura, o tinuohan. Dili kini motugot nga ang kahilig ug pagpihig makapugong sa paghatag og kahupayan, kalooy, ug panabut. Kini wala gayuy pagpangdaug-daog, diskriminasyon, o kamapahitas-on. Ang balaang gugma nagdasig kanato sa pagbuhat sa unsay gibuhat sa Manluluwas: “[mo]tabang sa maluyahon, ipataas ang mga kamot sa nawad-an og paglaum, ug lig-unon ang mga tuhod nga mahuyang.”2
Kini ang matang sa gugma nga atong paningkamutan. Kinahanglang mao kini ang mga kinaiya nga maghulagway kanato isip mga indibidwal ug isip katawhan.
Tingali dili kita makahimo sa pagpalambo og kahingpitan sa balaang gugma niini nga kinabuhi, apan dili gayud kita mohunong sa pagpaningkamot. Kon adunay panahon sa tuig nga mas magkasuod pa kita kay sa bisan unsang panahon, kini mao ang panahon sa Pasko, nga ang atong kasingkasing ug hunahuna nakatutok sa pagkahimugso sa buhing pagpakita sa balaang gugma, gani ang Manluluwas nga si Jesukristo.
Ang Commissioner sa Siyudad ug ang Batang Lalaki
Tuguti ko nga mopaambit og istorya sa paghulagway kon sa unsang paagi kini nga gugma moimpluwensya sa atong kinabuhi. Sa Bisperas sa Pasko 85 ka tuig ang milabay, panahon sa Dakong Depresyon, usa ka commissioner sa siyudad nanginspeksyon sa mga dalan sa Salt Lake City human sa usa ka bagyo sa tingtugnaw. Samtang nagdrayb siya, nakakita siya og gamay nga batang lalaki sa daplin sa dalan, nagbarug sa tumang katugnaw nga walay kupo, guwantis, o botas. Ang commissioner mihunong, midapit sa bata pasulod sa iyang sakyanan, ug nangutana kon mahinamon ba siya sa Pasko. Mitubag ang bata, “Walay Pasko nga mahitabo sa among balay. Namatay si Papa tulo ka bulan ang milabay ug ang nahabilin si Mama ug ako ug akong manghud nga lalaki ug babaye.”
Ang commissioner sa siyudad mipakusog sa heater sa iyang sakyanan ug miingon, “Karon, anak, hatagi ko sa imong ngalan ug address. Adunay moadto sa inyong balay—dili mo makalimtan.”
Kini nga commissioner sa siyudad nahitabo nga mao usab ang stake president sa downtown sa Siyudad sa Salt Lake. Nakigtrabaho siya sa mga miyembro sa iyang stake sa pagsangkap og pagkaon ug mga gasa sa mga pamilya kinsa dili makahimo sa pagsangkap sa ilang kaugalingon. Ang bata dili miyembro sa Ang Simbahan ni Jesukristo sa mga Santos sa Ulahing mga Adlaw, apan wala kini igsapayan sa commissioner. Nianang gabhiuna siya ug ang usa sa mga bishop sa iyang stake misiguro nga ang pamilya sa bata makadawat og puno kaayo nga Pinaskuhan nga basket.3
Ang pagkahimamat niini nga bata nakaapekto pag-ayo niini nga stake president. Mas nadeterminado siya sa pagpangita ug paghupay sa mga pag-antus bisan asa kini niya makit-an. Nahimo gani kining timailhan sa iyang kinabuhi.
Ang ngalan sa commissioner sa siyudad mao si Harold Bingham Lee, ug paglabay sa 40 ka tuig, nahimo siyang ika-11 nga Presidente sa Ang Simbahan ni Jesukristo sa mga Santos sa Ulahing mga Adlaw.
Si Presidente Lee usa ka mahinungdanong tawo sa pagpalambo sa dakong programa sa Simbahan sa paghupay sa mga pag-antus niadtong naglisud ug sa pagtabang sa tanang mga anak sa Dios nga mahimong mas self-reliant.
Sa hinapos nga bahin sa iyang kinabuhi, si Presidente Lee miingon nga nakasabut siya niadtong nag-antus ug nangandoy og kahupayan tungod sa iyang kaugalingong kabus ug yano nga kagikan.4
Dili Kini Kabahin Kon Unsa Ka Daghan ang Anaa Kaninyo apan Kon Unsa ka Dako ang Inyong Gugma
Morag nahibalo ko kon unsa ang gibati ni Presidente Lee.
Ang akong pamilya nakapuyo usab sa lisud kaayo nga mga kahimtang sa pipila ka higayon. Kaduha sulod sa pito ka tuig, mibiya mi sa among mga panimalay isip mga refugee ug gibiyaan ang tanan. Sa West Germany nagpuyo mi sa inabangan nga lawting sa karaan nga building sa umahan. Kini adunay duha ka gagmayng kwarto, ug kaming tanan matulog sa usa ka kwarto. Apiki kaayo ang lugar nga magtakilid ko maglakaw agi sa tunga sa mga katre.
Ang akong inahan adunay hot plate nga nagsilbing among stove. Ug kon gusto mi nga moadto gikan sa usa ka kwarto ngadto sa lain, kinahanglang molakaw mi agi sa mga nagbabag nga mga himan sa umahan, lain-laing mga kaban, ug nagkadaiyang gipreserbar nga mga karne nga nagbitay sa kisame. Kausa, dihang nasakit ko ug kinahanglang maghigda sa tibuok adlaw, mitan-aw ko sa mga ilaga nga ipon namo sa lawting nga nagdagan-dagan sa salog. Kinahanglang hakuton ang tubig ngadto sa among mga lawak, ug ang kasilyas anaa sa gawas sa bukas nga nataran, tupad sa kamalig. Ma-Dominggo molakaw mi og duha ka oras padulong sa building sa among Simbahan sa Frankfurt ug pabalik. Panagsa ra mi makahimo sa pagsakay og sakyanan.
Mahinumdom gihapon ko niadtong mga panahuna uban sa kaguol ug kalipay. Gibuhat sa akong mga ginikanan ang labing maayo nilang mahimo sa pagsangkap kanamo, ug nasayud kami nga gihigugma mi nila. Oo, mga panahon kini sa dakong panginahanglan, apan gikonsiderar ko kini nga malipayon nga mga panahon kay mabati nako ang gugma namo sa usag usa, alang sa Ginoo, ug alang sa Iyang Simbahan.
Dili angay nga ikaulaw ang pagkakabus. Hinumdumi nga ang Manluluwas sa Kalibutan natawo sa kwadra ug gipahigda sa pasungan “kay wala na may luna alang [Kaniya] sa balay nga abutanan.”5 Dayon, sa wala madugay, Siya ug si Maria ug si Jose nahimong mga refugee, milalin ngadto sa Ehipto sa pagtinguha og proteksyon gikan sa mamamatay nga si Herodes. Panahon sa Iyang pangpubliko nga pangalagad, si Jesus milakaw uban sa mga masulub-on, sa gigutom, ug masakiton. Ang Iyang mga adlaw puno sa pagpangalagad kanila. Mianhi Siya aron “sa pagsangyaw sa maayong balita ngadto sa mga kabus.”6 Sa daghang paagi, Siya usa kanila, kay Siya usab “walay dapit nga kapahulayan sa iyang ulo.”7
Gidayeg Niya ang kabus nga biyuda kinsa, gikan sa iyang kakabus, mihulog sa iyang duha ka diyot ngadto sa panudlanan sa mga Judeo.8 Ug ang usa sa Iyang katapusang mga mensahe sa mortalidad mao nga ang atong kaluwasan mag-agad kon giunsa nato pagtratar ang uban—ilabi na niadtong gikonsiderar nga “labing gagmay”—tungod kay “maingon nga gibuhat ninyo kini ngadto sa usa [kanila],” miingon Siya, “gibuhat ninyo kini ngari kanako.”9
Usa ka English nga magbabalak sa ika-19 nga siglo misulat niini nga mga linya:
Taliwala sa makakaging nga snow,
Miabut ang maulawong langgam;
Sa kalooy ayaw ninyo siya abuga,
Apan ikatag ang inyong mga tipik nga pagkaon. …
Ang tanan dunay ikatampo, walay kabus ra kaayo,
Kon moabut ang panginahanglan panahon sa tigtugnaw;
Ang pan dili gayud inyoha ra,
Nan ikatag ang mga tipik nga pagkaon.
Sa dili madugay moabut ang tingtugnaw sa inyong kinabuhi,
Moabut ang adlaw sa panudya:
Batok sa inyong mga sala, pinaagi sa mando,
Timbangon kadtong gikatag nga mga tipik nga pagkaon.10
Bisan unsa pa ang atong kahimtang sa kinabuhi, ang matag usa kanato maulawon nga langgam—makililimos—sa atubangan sa Dios. Nagsalig kita sa Iyang grasya. Pinaagi sa sakripisyo ni Jesukristo, atong Manluluwas, isip kabahin sa mahinungdanong plano sa kalipay, nga kita adunay paglaum sa kaluwasan ug kalooy. Kining espiritwal nga gasa nagdasig kanato sa pagsunod sa mga sugo sa Dios ug motabang uban sa kalooy niadtong naglibut kanato. Bisan kon ang anaa kanato usa lang ka kumkom sa mga tipik nga pagkaon, malipayon kitang mopaambit niini niadtong nanginahanglan sa emosyunal, espiritwal, o temporal isip usa ka pagpahayag sa atong pasalamat sa balaang kumbira nga giandam sa Dios alang kanato.
Pagpanalangin sa Uban panahon sa Pasko
Atol niining minahal nga panahon sa Pasko, angay lang nga magmaya kita sa mga suga, musika, mga gasa, ug mga naggilak-gilak. Kining tanan parte sa unsay atong gimahal pag-ayo niini nga panahon sa tuig.
Apan dili gayud nato kalimtan nga kita mga disipulo ug mga sumusunod ni Jesukristo, ang buhi nga Anak sa buhi nga Dios. Aron tinud-anay nga mosaulog sa Iyang pag-anhi sa kalibutan, kinahanglan gayud kitang mobuhat sama sa Iyang gibuhat ug motabang uban sa kapuangod ug kalooy sa atong isig katawo. Mahimo nato kini kada adlaw, pinaagi sa pulong ug buhat. Himoon nato kining tradisyon sa Pasko, bisan asa pa kita—nga mahimong mas mabination og gamay, mas mapasayloon, dili kaayo mohukom, mas mapasalamaton, ug mas manggihatagon sa pagpaambit sa atong kaabunda ngadto sa nanginahanglan.
Hinaut nga ang pagpamalandong sa pagkatawo ni Jesus didto sa Betlehem makadasig kanato nga mahimong mas sama Kaniya. Hinaut nga ang misyon ug ehemplo ni Kristo mopuno sa atong kasingkasing sa balaang gugma sa Dios ug dakong kalooy alang sa atong isigkatawo. Ug hinaut ikatag nato ang atong mga tipik nga pagkaon sa mas labaw ka manggihatagon ug walay hunong nga gugma. Kini ang akong pag-ampo ug panalangin niini nga panahon sa Pasko ug sa kanunay, sa pangalan ni Jesukristo, amen.