Langitnong mga Gasa
Batang Lalaki
Walay bata ang nagpaabut sa Pasko nga labaw kay kanako. Ganahan ko niini! Ug ang akong mga ginikanan batid sa paghimo sa among balay nga talagsaong dapit sa Pasko. Dunay mga dekorasyon, musika, mga suga, mga makaon-kaon, ug siyempre mga gasa. Mahinamon kaayo ko sa mga regalo. Matag tuig kinasingkasing kong maghimo og listahan sa mga butang nga akong gipangandoy kaayo.
Kay sa umahan mi nagpuyo, kada buntag sa Pasko sa dili pa namo ablihan ang among mga gasa, magsul-ob kami og baga aron masugakod namo ang labihang katugnaw ug pag-atiman sa among mga hayop. Walay laing mas nindot kay sa humanon dayong ang trabaho ug magdali og uli aron makaapil sa buntag nga kalihokan sa Pasko.
Bag-o lang kong nagkat-on mahitungod sa tawo, nga si Jesukristo, kansang pagkatawo atong gisaulog. Apan daw nindot kaayo kini. Iyang Adlaw sa pagkatawo, apan kami ang nakakuha sa tanan nga regalo. Kinsang bataa ang dili ganahan niana! Ang Pasko pinakamaayo sa tanan.
Salamat, kay paglabay sa panahon, milambo ang akong panabut sa Manluluwas—sa Iyang pagkatawo ug birthday, sa Iyang gahum ug mga sakripisyo, sa Iyang Pag-ula ug Pagkabanhaw, apan pinakalabaw ang Iyang kahalangdon ug ang Iyang dili matugkad nga gugma. Oo, ang Pasko pinakanindot sa tanan, kana tungod kay si Jesukristo pinakamaayo sa tanan. O sa labaw nga pulong, si Jesukristo pinakatalagsaon sa tanan!
Misyonaryo nga Pagserbisyo
Sama sa daghang batan-on, naglantaw ko nga makamisyon uban sa dakong pagpaabut, apan nakalitan ko sa una nakong Pasko nga layo sa balay. Sa mga bulan sa hapit na ang akong ika-19 nga birthday, daw ang tanan nakong mahunahuna mao ang pagmisyon. Mas manghud ko sa akong mga classmate ug mga higala, ug daghan nila nagmisyon na, akong ang nahibilin. Mibati ko nga andam na usab nga mamisyonaryo. Ang bugtong babag mao ra ang akong birthday.
Human sa daw dili moabut nga adlaw nakasulod ra gyud ko sa MTC. Sayo sa Disyembre, nagsakay na ko sa eroplano padulong sa misyon sa Santiago, Chile. Sa katapusan padulong na gyud ko, ug unsay mas nindot, ang Pasko hapit na gyud moabut. Masaligon ko nga andam na ko sa pinakahimayaong kasinatian sa akong kinabuhi.
Apan sa pagkanaog nako sa eroplano, akong nabantayan nga lahi ra kaayo ang mga butang kay sa Utah. Oo, ang Pasko hapit na gyud moabut, apan akong gibati nga naa sa tunga sa ting-init. Asa ang snow? Asa ang mga boots ug mga kupo?
Diha dayon nag-atubang na ko sa mga hagit sa misyonaryo nga buhat. Nag-antus ko sa kalipong sa biyahe ug usahay makatulog atol sa among mga appointment sa pagtudlo. Lahi ra ang kultura, lisud sabton ang sinultihan—lahi ra gyud paminawon kay sa akong nakat-unan sa MTC—ug ang pagkaon lahi ra. Ug sa paghisgot sa pagkaon, basin ako ug ang akong kompanyon nakakaon og dili maayo, kay grabe ang among pagkasakit. Unya, labaw sa tanan, atong sa usa sa akong mga gabii sa Chile, gilinog pa gyud mi.
Kadto ang una nakong Pasko nga layo sa balay, ug grabe ang akong sakit. Naghigda ra ko naa sa dili pamilyar nga nasud, naningkamot sa pagsabut sa lisud nga sinultihan, kauban sa laing tawo nga wala kaayo nako mailhi. Ingon ani ba diay ang misyonaryo nga buhat, nganong nagdali-dali man ko?
Hinoon bisan niining tanan nga hagit, nasugdan nako ang paghigugma sa mga tawo sa Chile sa tibuok nakong kasingkasing. Nindot kaayo sila ug sayon nga higugmaon—ug daghan kanila gutom kaayo sa among mensahe bahin sa Manluluwas. Sa una, sa tinud-anay nga kahimtang sa kalibutan, matinguhaon kaayo ang mga tawo sa mensahe sa Manluluwas, bisan pa niana daw ang mga Christmas tree ug sinudlan nga mga medyas daw dili na kaayo sama kaimportante kay sa kaniadto. Kon gibiyaan man ni Kristo ang Iyang langitnong panimalay ug mianhi sa yuta aron mag-antus ug mamatay para natong tanan, siguradong mahimo ra nakong biyaan ang akong balay ug sagubangon ang ginagmayng kalisud aron mapaambit ang Iyang talagsaong mensahe.
Kadto nga pasko nagtudlo kanako sa lunsay nga kalipay sa pagtabang sa mga tawo aron maangkon ang talagsaong gasa sa Langitnong Amahan, ang Iyang plano sa kalipay,—nga akong nasayran nga maoy gusto kaayo sa tanan, dili lang sa Pasko, apan sa kanunay.
Batan-ong Biyudo ug Kaminyoon
Pipila ka tuig human sa akong misyon, nag-atubang ko og bag-ong hagit. Nasubo ko, naluya, ug nag-inusara. Pipila ka bulan sa una, ang akong asawa wala dangti og duha ka tuig namatay sa disgrasya sa sakyanan, nagbilin nako og 7 ka bulan nga anak nga nag-inusara.
Estudyante ko sa unibersidad, nag-eskwela, nagtrabaho ug naningkamot og kat-on sa pagka-single parent. Moabutay na ang Pasko, ug samtang ang uban namauli na sa ilang balay aron ikauban ang ilang pamilya ug mga minahal atol sa mga holiday, ako tungod sa mga buluhaton, kinahanglang magpabilin ko sa eskwelahan. Nag-inusara ko ug labihan kasubo. Miabut ang Pasko ug milabay, ug padayon sa pagdagan ang panahon.
Hapit na mag-usa ka tuig, samtang nagkaduol na sab ang Pasko, single lang gihapon ko. Karon, nag-ingon ang kasulatan nga dili maayo nga ang tawo mag-inusara (tan-awa sa Genesis 2:18 ug kinasingkasing kong miuyon. Kinahanglan ko og kaparis, ug ang akong anak nagkinahanglan og mama.
Mirason ko, “Basin dili kaayo swerte ang makaangkon nako, apan di ba diay ganahan ang babaye og tinuod, buhi nga batang babaye para sa Pasko? Dili lang monyeka—apan tinuod gyud?” Ug, kon duna may ganahan kaayo og bata, maapil pa ko sa package.
Nakagusto ko og batan-ong dalaga nga si Nancy sa akong klase sa biology, apan hapit na matapos ang semester ug wala pa koy natigum nga kaisug sa pagsulti niya. Gidapigan gyud ko sa langit tungod kay usa ka adlaw, swerte lang gyud, nagkadungan mi sa paggawas sa testing center sa samang oras. Nakahigayon gyud ko. Nakahigayon ko sa pakig-istorya ug nianang gabhiona dayon gitawagan nako si Nancy ug nakig-date ko niya. Nag-date mi, ug dayon sa sunod na pud ug sa gidundan pa. Apan, nasayud kong moabutay na ang Pasko, ug mopauli si Nancy. Unsaon nako aron padayong buhi ug molambo ang pagpitik nga bag-o lang namong napalambo?
Duna koy naplanuhan. Sa tabang sa igsoon ni Nancy ug sa iyang uyab, sekretuhan nako og hatag si Nancy og regalo sulod sa 12 ka adlaw hangtud sa Pasko.
Misalir ang plano. Padayong nakadawat si Nancy og mga regalo, apan wa gyud masayud diin kini gikan. Misteryo kini nga gisulayan sa pagsulbad sa iyang pamilya. Ang igsoon ni Nancy ug iyang uyab misaad nga dili gyud motug-an nga apil sila. Sekretong kombinasyon gayud kadto—lunsay nga nag-inusara nga motibo.
Hinoon, usa ka gabii ang pamilya nakakita og timailhan. Mibagting ang doorbel, nagdinaganay dayon ang pamilya sa pultahan, ug nakita ang mibulhot nga awto. Gikuha ang plate number, ug pagkasunod adlaw gitawagan ang driver’s license bureau aron mahibaloan kinsay tag-iya sa awto. Nahibaloan nila nga iya kini sa sakop sa pamilya sa uyab ni Nancy. Nasakpan na gyud mi. Miduol ang igsoon ni Nancy ug iyang uyab ug mitug-an nga apil sila sa akong giplano. Sa hilum, nalipay ko nga nasakpan kay tungod adto nagkauban mi si Nancy sa pagsaulog sa Pasko, ug nagsugod didto ang among paghigugmaay.
Ug sama sa akong gipanghinaot, ganahan gyud si Nancy og regalo nga buhi nga batang babaye sa Pasko. Gipangga niya ang akong anak sama nga iyang kaugalingon. Ug kasuwerte gyud kay apil ko sa package. Naminyo mi sa misunod nga summer. Usa kadto ka kinanindutang gasa nga akong nadawat.
Akong nasinati ang talagsaong plano sa Langitnong Amahan. May pamilya na ko nga mahangturon, ug na-seal kami sa hangtud. Ang gasa sa mahangturong kaminyoon ug pamilya gasa nga maangkon sa tanangmagmatinud-anon, dinhi o sa sunod kinabuhi. Unsa pay anaa nga mas dako nga gasa?
Dihang namalandong ko sa mga adlaw sa akong pag-inusara ug kasubo, akong naamguhan nga si Jesukristo kausa mibati nga biniyaan ug nag-inusara usab. Siya, labaw kay ni bisan kinsa, nasayud sa akong kasakit. Bisan sa mga panahon sa grabe nakong kasubo, wala gyud ko mobati nga Iyang gibiyaan. Dili kay Siya akong Manluluwas, Siya akong igsoon ug suod nga higala.
Batan-ong Amahan
Nag-anam og dako ang gamay namong pamilya, ug mga tuig ang milabay nag-atubang na pud ko og labihang kabalaka. Samtang nagkaduol ang Pasko, nagtinan-away mi ni Nancy ug nakaamgo nga wala diay mi nahipos para pangregalo sa Pasko sa gagmay namong anak nianang tuiga.
Bag-o lang kong migradwar sa kolehiyo, anaa pa gihapon mi sa among paningkamot. Bisan maayo ko’g trabaho, maklaro nga ang dagkong gasto sa pagpakabuhi milapaw sa among badyet. Ang nagpadayon ra namo mao nga full-tithe kami. Bisan walay nahibalo sa among sitwasyon, ang Langitnong Amahan ug ang Manluluwas nahibalo, ug nasugod Sila sa paghatag og milagro sa Pasko.
Usa ka adlaw mibagting ang doorbell. Usa ka silingan naggunit og kinartong dulaan. Miingon siya, “Nanglimpyo mi sa among balay ug nakita namo kining mga dulaan nga dili na gamiton sa among mga anak. Naghunahuna mi basin ganahan ang inyong mga anak niini.” Siguradong ganahan sila!
Sa laing adlaw mibagting na pud ang doorbell. Karon mga miyembro na sa among ward. Nagbarug sila nga may dalang bisiklita para sa batang babaye. Miingon sila, “Wala na mi magkinahanglan ani nga bisiklita ug nakahunahuna mi sa inyong pamilya. Mogamit kaha ang imong anak niini?” Sobra ang among kalipay!
Pipila ka semanang milabay miapil og coloring kontest ang among anak nga lalaki sa lokal nga tindahan. Usa ka adlaw gitawagan mi nagpahibalo nga siya ang nakadaog sa kontest. Napremyuhan siya og usa ka sikat nga video para sa mga bata. Nakalitan kami!
Gikan niining tanan nga gagmayng milagro—may regalo na ang among mga anak sa Pasko. Gibayaran namo ang among ikapulo, ug giablihan sa Langitnong Amahan ug sa Manluluwas ang mga bintana sa langit ug gibubu ang Ilang mga panalangin—diha gayud sa among balay.
Nakapamalandong ko nga ang batang si Kristo natawo sa ubos nga kahimtang, apan gipangita Siya sa uban ug gihalaran sab og bililhong mga gasa. Isip yutan-ong amahan, gusto gyud kong makahatag sa akong mga anak sa tanan kutob sa akong mahimo.
Sama usab sa gibati sa atong Langitnong Amahan. Sa gihapon hingpit ang iyang gugma, tinguha Niyang ihatag kanato ang tanan nga naa Kaniya. Dili matugkad kini nga gasa.
Panapos
Mga kaigsoonan, tanan kita kausa o sa lain mibati nga nag-inusara, may sakit, nagsubo, kabus, o nalayo sa balay. Salamat, may Mahangturon kitang Amahan ug Manluluwas nga nakasabut kanato. Kon duolon nato Sila, Ila kitang agakon ug tabangan latas sa atong matag hagit.
Ug mga kaigsoonan, kausa o sa laing higayon may nailhan kitang nag-inusara, masakiton, nagsubo, kabus, o nalayo sa balay. Tultulan kita sa atong Amahan ug sa Manluluwas sa pagtabang sa uban, ug atong pribilehiyo ang paghimo niini.
Sa bata pa, nagtuo ko nga kausa ra sa tuig ang Pasko. Pagkahingkod na, akong naamguhan nga kada adlaw diay ang Pasko. Tungod sa kamaayo sa atong mapinanggaong Langitnong Amahan ug pinalanggang Manluluwas, si Jesukristo, tigdawat kita sa nagdagayday nga langitnong mga gasa—matag adlaw. Langitnong mga gasa nga labihan ka daghan nga litukon.
Ang akong pasalamat alang sa Amahan ug sa Anak dako kaayo ug hilabihan nga, sama ni Ammon sa karaan, “ako dili makasulti sa kinagamyan nga bahin [nga] akong gibati” (Alma 26:16).
Oo, birthday ni Jesukristo ang atong gisaulog matag Kapaskuhan, apan tungod sa kamaayo sa Amahan ug sa Anak, madawat gihapon nato ang tanang regalo. Niini ako mopamatuod sa pangalan ni Jesukristo, amen.