ពិធីបុណ្យគ្រីស្ទម៉ាស់ នៅជុំវិញពិភពលោក
មនុស្សជាច្រើននៅប្រទេសម៉ិកស៊ិកបានប្រមូលគ្រួសារ និងមិត្តភក្តិពួកគេ វាយបំបែក piñatas ដែលជាផ្នែកមួយនៃការសាទរបុណ្យគ្រីស្ទម៉ាស់របស់ពួកគេ ។
តើអ្វីខ្លះជាប្រពៃណីបុណ្យគ្រីស្ទម៉ាស់ដែលអ្នកចូលចិត្តនោះ ? ស្លៀកពាក់ខោអាវក្រាស់ៗ ដើម្បីទៅច្រៀងចម្រៀងបុណ្យគ្រីស្ទម៉ាស់នៅតាមផ្ទះឬ ? ជិះគាវទឹកកក បន្ទាប់មកផឹកភេសជ្ជៈកាកាវក្តៅៗឬ ? ទៅអាំងសាច់នៅឆ្នេរសមុទ្រ ?
ទោះបីជាក្រុមហ៊ុននានាបង្ហាញម៉ូដកាតជូនពរសម្រាប់រដូវកាលឈប់សម្រាកផ្សេងគ្នាក្តី បុណ្យគ្រីស្ទម៉ាស់ត្រូវបានប្រារព្ធឡើងក្នុងគ្រប់អកាសធាតុ វប្បធម៌ និងទីតាំង—ជារឿយៗវាគ្មានព្រិល ឬក្លិនដើមផាញដ៏ស្រស់ស្អាតអ្វីឡើយ ។
សូមមើលរបៀបមួយចំនួនដែលយុវវ័យនៅជុំវិញពិភពលោកសាទរចំពោះការប្រសូតរបស់ព្រះអង្គសង្គ្រោះ ។
រចនារូបភាពដោយ នីណា ហឹនធើរ
« ខែធ្នូ គឺជាខែតំណាងឲ្យសាមគ្គីភាពនៅគ្រួសារខ្ញុំ ។ យើងចូលចិត្តរស់នៅដោយធ្វើតាមគំរូរបស់ព្រះគ្រីស្ទ ហើយយើងព្យាយាមរំឭកខ្លួនយើងជានិច្ចអំពីទង្វើដែលទ្រង់បានធ្វើសម្រាប់យើង និងពរជ័យជាច្រើនដែលយើងបានទទួល ។ នៅក្នុងបន្ទប់ទទួលភ្ញៀវរបស់យើង យើងមានរូបភាពព្រះអង្គសង្គ្រោះមួយផ្ទាំង ដែលមានរូបបេះដូងពណ៌ក្រហមប្រមាណ ២០ ព័ទ្ធជុំវិញស៊ុមរូបនោះ ។
ពេលយើងត្រៀមខ្លួនដើម្បីបើកអំណោយរបស់យើងនៅពាក់កណ្តាលយប់ នោះខ្ញុំបានសម្លឹងមើលគ្រួសារខ្ញុំដំបូងគេ បន្ទាប់មកខ្ញុំមើលរូបភាពរបស់ព្រះគ្រីស្ទ ។ ខ្ញុំមានមោទនភាពដែលមានរូបភាពរបស់ទ្រង់នៅក្នុងបន្ទប់នោះ ហើយខ្ញុំមានមោទនភាពដែលខ្ញុំអាចនិយាយប្រាប់ខ្លួនខ្ញុំថា អ្វីដែលទ្រង់សព្វព្រះទ័យយ៉ាងខ្លាំងសម្រាប់ក្រុមគ្រួសារខ្ញុំនោះគឺកំពុងកើតឡើងហើយ ។
« ខ្ញុំកំពុងដាក់ផែនការទៅបម្រើបេសកកម្មពេញម៉ោង ។ គ្រាទាំងនេះត្រូវបានចែករំលែកនៅបុណ្យគ្រីស្ទម៉ាស់ផ្តល់ដល់ខ្ញុំនូវបំណងប្រាថ្នាកាន់តែខ្លាំង ដើម្បីចែកចាយដំណឹងល្អជាមួយនឹងមនុស្សដទៃ ។ ជាមួយនឹងដំណឹងល្អ បុណ្យគ្រីស្ទម៉ាស់ទទួលបាននូវអារម្មណ៍ផ្សេងមួយទាំងស្រុង ។ ជាមួយនឹងដំណឹងល្អ អ្វីៗគ្រប់យ៉ាងអំពីបុណ្យគ្រីស្ទម៉ាស់គឺផ្តោតលើព្រះគ្រីស្ទ និងក្រុមគ្រួសារ ហើយការធ្វើបែបនោះនាំមកនូវការលួងលោមដ៏ប្រសើរដល់ខ្ញុំ » ។
មីរៀម ជី ទីក្រុងប៉ារីស ប្រទេសបារាំង
« នៅប្រទេសបង់ហ្គាល័រ បុណ្យគ្រីស្ទម៉ាស់ត្រូវបានប្រារព្ធឡើងយ៉ាងទូលំទូលាយ ។ មនុស្សគ្រប់គ្នាសារទដល់ពិធីនេះ ទោះបីពួកគេជាសាសនាហិនឌូ អ៊ីស្លាម ឬគ្រិស្តក្តី ។ មនុស្សជាច្រើនបានតុបតែងដើមគ្រីស្ទម៉ាស់ ហើយព្យួររូបផ្កាយនៅតាមផ្ទះរបស់ពួកគេ ។
« ប្រពៃណីមួយដែលយើងធ្វើតាមក្នុងគ្រួសារយើងគឺ ចូលរួមធ្វើតាមកាលវិភាគបំភ្លឺពិភពលោកដែល សាសនាចក្របានផ្តល់ឲ្យ ។ ម្តាយរបស់ខ្ញុំក៏ចាប់ផ្តើមរៀបចំធ្វើនំសម្រាប់អ្នកជិតខាង មិត្តរួមការងារ មិត្តភក្ដិ និងគ្រួសារ ។ នៅយប់ឆ្លងចូលថ្ងៃបុណ្យគ្រីស្ទម៉ាស់ យើងអញ្ជើញសមាជិកគ្រួសារទាំងអស់របស់យើងឲ្យមកផ្ទះយើង ។ យើងចាប់ផ្តើមការប្រជុំធម្មនិដ្ឋានបុណ្យគ្រីស្ទម៉ាស់នៅផ្ទះយើងនៅម៉ោង ១០:៣០ យប់ ហើយយើងច្រៀងចម្រៀង អានព្រះគម្ពីរ មើលវីដេអូមួយចំនួននៃបុណ្យគ្រីស្ទម៉ាស់ ហើយជជែកគ្នា ។
« យើងអញ្ជើញក្មេងតូចៗឲ្យដាក់រូបព្រះឱរសយេស៊ូវនៅលើគ្រែនៅពាក់កណ្តាលអាធ្រាតនៅថ្ងៃទី ២៥ ខែធ្នូ ។ យើងនិយាយជូនពរ ‹ រីករាយបុណ្យគ្រីស្ទម៉ាស់ › ដល់សមាជិកគ្រប់គ្នាក្នុងគ្រួសារយើង កាត់នំ ជាមួយគ្នាពេញមួយយប់ ហើយចូលដេករៀងយប់ជ្រៅបន្តិចនៅថ្ងៃនោះ ។
ឱយើងមានអំណរគុណអ្វីម៉្លេះដែលមានព្រះយេស៊ូវគ្រីស្ទជាផ្នែកមួយនៃជីវិតយើង ។ តាមរយៈទ្រង់យើងរកឃើញអំណរអស់កល្បជានិច្ច » ។
អែនគីតា បង់ហ្គាល័រ ប្រទេសឥណ្ឌា
« បុណ្យគ្រីស្ទម៉ាស់ឆ្នាំ ២០១៨ គឺជាបុណ្យគ្រីស្ទម៉ាស់ដ៏មានអត្ថន័យបំផុតរបស់ខ្ញុំ ។ មានអារម្មណ៍នៃភាពជួបជុំ និងមិត្តភាព ហើយខ្ញុំបានចូលរួមក្នុងព្រឹត្តិការណ៍មួយសម្រាប់ជនភៀសខ្លួន ។
ខ្ញុំបានធ្វើស្បែកជើងកវែងក្រដាសពណ៌ក្រហម ហើយបានបង្រៀនអ្នកដែលត្រូវបានអញ្ជើញឲ្យមកទទួលទានអាហារពេលល្ងាចឲ្យចេះធ្វើវា ហើយដាក់វានៅលើចាននីមួយៗ ។ អ្នកដែលត្រូវបានអញ្ជើញឲ្យមកល្ងាចនោះបានយកកាបូបស្ពាយមកជាមួយ ដែលមានឥវ៉ាន់សម្រាប់រក្សាអនាម័យផ្ទាល់ខ្លួន ដើម្បីពួកគេអាចចែកជូនគេនៅថ្ងៃអាទិត្យ ។
យើងបានមើលរឿងមួយអំពីព្រះគ្រីស្ទជាមួយជនភៀសខ្លួននៅល្ងាចនោះ ។ វាជាបុណ្យគ្រីស្ទម៉ាស់ដ៏ល្អមួយដើម្បីចងចាំ » ។
អាឡិចស៊ី អិល ទីក្រុងប៉ារីស ប្រទេសបារាំង
« យើងបានធ្វើ បដាទឹកក្រូចឆ្មានេះដើម្បីប្រើនៅក្នុងរដូវក្តៅ ប៉ុន្តែបុណ្យគ្រីស្ទម៉ាស់គឺជាឱកាសដ៏ល្អបំផុត ដើម្បីប្រើវាក្នុងការឲ្យនំ និងឆូកូលែតក្តៅៗទៅគេ ! ខ្ញុំមានអាម្មរណ៍ខិតកាន់តែជិតព្រះអង្គសង្គ្រោះខ្ញុំ ពេលខ្ញុំរកឃើញរបៀបច្នៃប្រឌិតដើម្បីបម្រើមនុស្សដទៃ » ។
ប្រូកឃ្លីន អេច ទីក្រុងអាល់ប៊ើរតា ប្រទេសកាណាដា
« ខ្ញុំចូលចិត្តចំណាយពេល ជាមួយបងស្រីរបស់ខ្ញុំ ជាពិសេសពេលយើងលេងល្បែងកម្សាន្តជាមួយគ្នា ។ នៅបុណ្យគ្រីស្ទម៉ាស់យើងបានដុតទៀនដើម្បីទទួលទានអាហាររៀងរាល់យប់ ។ វាមានអារម្មណ៍សុខសាន្តណាស់ ។ ពន្លឺទៀនរំឭកខ្ញុំពីព្រះអង្គសង្គ្រោះរបស់យើង ដែលជាពន្លឺនៃពិភពលោក » ។
ដានី អេច ទីក្រុងអាល់ប៊ើរតា ប្រទេសកាណាដា
« មនុស្សជាច្រើនចាត់ទុក ភ្នំថាជាកន្លែងសុខសាន្តដែលពួកគេទាក់ទងជាមួយធម្មជាតិ និងមើលភាពស្រស់ស្អាតនៃការបង្កើតរបស់ព្រះ ។ ប៉ុន្តែនៅរដ្ឋហាវ៉ៃ យើងទទួលអារម្មណ៍ និងមានអំណរគុណចំពោះព្រះចេស្តានៃព្រះនៅក្នុងសមុទ្រ និងភាពអស្ចារ្យទាំងអស់ដែលរដ្ឋនេះមាន ។
គ្រប់ពេលដែលអ្នកចំណាយពេលនៅជាមួយធម្មជាតិ និងគ្រួសារ វាគឺជាបទពិសោធន៍មួយដែលធ្វើឲ្យយើងស្និទ្ធស្នាលគ្នា ។ អ្នកកាត់ផ្តាច់ពីការបង្វែរអារម្មណ៍នានាក្នុងជីវិត ហើយផ្តោតលើសម្រស់ដែលមាននៅជុំវិញអ្នក ទាំងអ្វីៗដែលអ្នកមើលឃើញ និងក្នុងមនុស្សដែលអ្នកមានបទពិសោធន៍ជាមួយ ។
បុណ្យគ្រីស្ទម៉ាស់គឺជាគ្រាដ៏ប្រពៃមួយដើម្បីទទួលអារម្មណ៍កាន់តែជិតស្និតនឹងផែនដីនេះ និងក្រុមគ្រួសារយើង ដូចយើងដឹងថា ចំណុចទាំងពីរនេះមានតួនាទីសំខាន់ក្នុងផែនការ ដែលបានបង្ហាញដោយព្រះវរបិតាដែលគង់នៅស្ថានសួគ៌របស់យើង និងព្រះអង្គសង្គ្រោះព្រះយេស៊ូវគ្រីស្ទ » ។
ដាយអែន អេ ជាមួយនឹងរូថតរបស់ ស៊្សីរ៉ាស អេ រដ្ឋហាវ៉ៃ ស.រ.អា.
« គ្រួសារខ្ញុំ ចូលរួមក្នុងសកម្មភាពបម្រើនានាជានិច្ចនៅបុណ្យគ្រីស្ទម៉ាស់ ។ អ្វីមួយដែលយើងធ្វើគឺផ្តល់អាហារ និងនំដល់ជនទ័លក្រ ។ តាមរយៈការបម្រើមនុស្សដទៃ យើងអាចបង្ហាញសេចក្តីស្រឡាញ់របស់ព្រះ ។ ឪពុកម្ដាយខ្ញុំបានបង្រៀនខ្ញុំអំពីអត្ថន័យនៃបុណ្យគ្រីស្ទម៉ាស់ តាមរយៈការធ្វើជាគំរូល្អ ហើយបម្រើមនុស្សដទៃ ។ បទពិសោធន៍នេះបានជួយខ្ញុំឲ្យយល់ពីតួនាទីខ្ញុំនៅលើផែនដី និងអត្ថន័យពិតនៃបុណ្យគ្រីស្ទម៉ាស់ » ។
អើរ៉ុន អេស ទីក្រុងបង់ហ្គាល័រ ប្រទេសឥណ្ឌា
« ជួនកាលដោយសារយើងជាគ្រួសារធំមួយ យើងទាំងអស់គ្នាបានជួបជុំគ្នានៅក្នុងផ្ទះនេះ និងផ្ទះនៅក្បែរនេះ ។ យើងច្រៀង ។ យើងរាំ ។ យើងតែងតែនៅជុំគ្នាជាគ្រួសារតាមដែលអាចធ្វើទៅបានអំឡុងខែធ្នូ ដោយសារយើងអត់រៀននៅសាលាទេ ។
« យើងលេង ។ យើងជជែកគ្នា ។ យើងសើច ។ យើងបរិភោគអាហារ ។ នោះគឺជាប្រពៃមួយ ។ ពេលខ្ញុំរៀន ខ្ញុំគ្មានពេលដើម្បីធ្វើកិច្ចការទាំងនោះជាមួយគ្រួសារខ្ញុំទេ ។ ដូច្នេះយើងព្យាយាមបន្តរក្សាប្រពៃណីទាំងនេះទៀត ។ គ្រួសារគឺជារឿងសំខាន់បំផុត ។ ប្រពៃណីទាំងនេះជួយយើងឲ្យនៅជុំគ្នាជាគ្រួសារ ។
ហ្វ័ន ស៊ី ទីក្រុងបារ៉ាឃ្វីយ៉ា ប្រទេសកូឡុំប៊ី
« បន្ទាប់ពីភ្លើងឆេះ ខ្ញុំបានដឹងថា រឿងដែលសំខាន់បំផុតដើម្បីមាននោះគឺគ្រួសារ និងមិត្តភក្តិរបស់អ្នក ។ ដូច្នេះទោះបីយើងពុំបានទទួលអំណោយច្រើនក្តី វាជារឿងល្អបំផុតហើយដែលមានក្រុមគ្រួសារនៅក្បែរនោះ ។ វានៅតែជាគ្រាដ៏រីករាយសម្រាប់យើង ទោះបីវាពុំដូចជាបុណ្យគ្រីស្ទម៉ាស់ធម្មតារបស់យើងក្តី » ។
រ៉ាជែល ដ័បុលយូ
« ខ្ញុំត្រូវជួយ ដាក់ឥវ៉ាន់ និងរៀបចំឡានដឹកឥវ៉ាន់សម្ភារក្មេងលេងមួយចំនួនដើម្បីបរិច្ចាគ ។ បន្ទាប់មក យើងបានបើកទ្វារ ហើយឲ្យមនុស្សគ្រប់គ្នាចូល ។ វាពិតជាសប្បាយដើម្បីមើលក្មេងៗទាំងនោះ ។ ពួកគេមានទឹកមុខរីករាយ ។ ពួកគេមានចិត្តរំភើបខ្លាំងណាស់ ។ វាធ្វើឲ្យខ្ញុំរីករាយដែលឃើញពួកគេរីករាយ និងមានភាពសុខសាន្ត បន្ទាប់ពីរស់នៅឆ្លងកាត់បទពិសោធន៍អាក្រក់បំផុតនោះ » ។
អូត្រី វី
« វាជារឿងអស្ចារ្យណាស់ដែលឃើញ មនុស្សគ្រប់គ្នាហាក់ដូចជាត្រូវគ្នា ពឹងពាក់គ្នាយ៉ាងរួសរាយ ។… ខ្ញុំបានរៀនថា សម្ភារពុំមានជារឿងសំខាន់ទេ ។ ការបម្រើ គ្រួសារ និងពេលវេលាដែលបានចំណាយជាមួយគ្នាគឺសំខាន់ខ្លាំងជាង ។ ជីវិតគឺមានតម្លៃ ។ អ្វីៗអាចផ្លាស់ប្តូរទៅជាអាក្រក់ជានិច្ច ដូច្នេះយើងត្រូវតែព្យាយាមរីករាយនឹងគ្រាសប្បាយៗ ពេលយើងនៅជាមួយគ្នា ។ យើងគឺជាអ្នកដែលធ្វើឲ្យគ្រាសប្បាយៗនោះកើតឡើង ! »
ប៊ីលី អេ