ʻOku Haʻi Kitautolu ʻe he Ngaahi Palōmesi ʻi he Temipalé ki he ʻOtuá mo e Niʻihi Kehé

Koeʻuhí ko e feilaulau ʻa Sīsū Kalaisí, te tau lava ʻo nofo mo hotau ngaahi ʻofaʻangá pea mo e ʻOtuá hili ʻa e moʻuí ni. Te tau lava ʻo fili ke muimui kiate Ia ʻaki hono fai ha ngaahi fuakava, pe ngaahi palōmesi, mo Ia.

ʻI he Peesi ko ʻEní

Ko e Hā ʻa e Temipale?Ko e Hā ʻa e Fuakava?ʻOku Mau Fakahoko ha Ngaahi Fuakava ʻi he Temipalé Ngaahi Fehuʻi Angamahení

Ko e Hā ʻa e Temipale?

Ko e temipalé ko ha potu māʻoniʻoni ia mo toputapu. ʻOku mau fakakaukau ki he temipalé ko e fale ia ʻo e ʻEiki ko Sīsū Kalaisí. ʻOku kehe ia mei he falelotu fakalotofonua ʻoku fai ai ʻemau ngaahi lotu he Sāpaté mo e ngaahi ʻekitivitī kehé. ʻOku fakatapui ʻa e ngaahi temipalé ki he ngāue toputapu taha ʻa e ʻOtuá.

ʻOku fonu ʻa e ngaahi temipalé ʻi he ngaahi fakataipe. Hangē ko ʻení, ʻoku tui ʻe kinautolu ʻoku ō ki he temipalé ha vala hinehina ʻoku sīpinga faingofua ke fakataipe ʻa e maʻá mo e tuʻunga tataú ʻi he ʻao ʻo e ʻOtuá. Ko e temipalé ko ha hūfangaʻanga māʻoniʻoni mo nonga ia ʻe lava ke fakafehokotaki lahi ange ai ʻa e kau muimui ʻo Sīsū Kalaisí kiate Ia.

Kae hiliō aí, ko e temipalé ko ha feituʻu ia te tau lava ai ʻo fakahoko ha ngaahi fuakava toputapu mo e ʻOtuá.

Ko e Hā ʻa e Fuakava?

Te tau lava ʻo fakamālohia hotau vā fetuʻutaki mo e ʻOtuá mo maʻu ha ngaahi tāpuaki makehe meiate Ia ʻo fakafou ʻi he ngaahi fuakavá. Ko e fuakavá ko ha fepalōmesiʻaki toputapu ia ʻi he vahaʻa ʻo e ʻOtuá mo ʻEne fānaú. ʻOku tuku mai ʻe he ʻOtuá ʻa e ngaahi makatuʻunga ki he fuakavá, pea tuku mai leva ke tau fili ke tali kinautolu.
Tau fakaʻaongaʻi e papitaisó ko ha sīpinga.

ʻI heʻetau papitaisó, ʻoku tau palōmesi ai ki he ʻOtuá te tau ngāue kiate Ia, tauhi ʻEne ngaahi fekaú, pea toʻo kiate kitautolu e huafa ʻo Sīsū Kalaisí. Pea kapau te tau fai ʻa e ngaahi meʻá ni, ʻoku talaʻofa mai ʻa e ʻOtuá ke fakamolemoleʻi ʻetau ngaahi angahalá, tāpuakiʻi kitautolu ʻaki Hono Laumālie Māʻoniʻoní, mo foaki mai kiate kitautolu ʻa e moʻui taʻengata ʻi Hono ʻaó.

ʻOku tau fakafoʻou ʻetau ngaahi fuakava ʻi he papitaisó ʻi heʻetau maʻu ʻa e sākalamēnití, ʻa ia ʻoku toe ui foki ko e feohiʻangá, ʻi he Sāpate kotoa pē ʻi he lotú. ʻOku muimui ʻa e sākalamēniti ko ʻení ki he sākalamēniti ʻo e ʻOhomohe Fakaʻosí ʻa ia naʻe fakafeʻiloaki ʻe Sīsū ki Heʻene kau ʻAposetoló kimuʻa peá Ne pekiá.

Hili e papitaisó, ʻe lava ke fakahoko ʻe he kakai lalahi ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ha ngaahi fuakava kehe mo e ʻOtuá ʻi he temipalé. ʻOku fakamālohia ʻe he ngaahi fuakava mo e ngaahi talaʻofa ko ʻení honau vā fetuʻutaki mo Iá mo ʻomi ha ngaahi tāpuaki ʻoku toe lahi angé.

ʻOku Mau Fakahoko ha Ngaahi Fuakava ʻi he Temipalé

ʻEnitaumení

ʻOku ʻuhinga ʻa e foʻi lea ʻenitaumení ki he “meʻaʻofa.” ʻI he ʻenitaumeni fakatemipalé, ʻoku fakahoko ai ʻe he kāingalotu lalahi ʻo e Siasí ha ngaahi fuakava molumalu, kau ai e ngaahi palōmesi ke talangofua ki he ngaahi fekau ʻa e ʻOtuá mo fakatapui honau taimí mo e ngaahi talēnití ki he ngāue ʻa e ʻEikí. ʻI heʻenau fai iá, ʻoku nau maʻu ai ha ngaahi tāpuaki hangē ko e ʻilo lahi ange ki he palani ʻa e ʻOtuá, mālohi lahi ange ke muimui ʻi he sīpinga ʻa Sīsuú, mo e faingamālie ke nofo mo e ʻOtuá ʻo taʻengata.

Sila

Ko e taha ʻo e ngaahi fiefia lahi ʻo e ongoongolelei ʻo Sīsū Kalaisí ko e talaʻofa ko ia ʻe lava ke hokohoko atu ʻa e ngaahi haʻi fakafāmilí ʻo ope atu ʻi heʻetau moʻui fakamatelié. ʻI he temipalé, ʻoku fehokotaki pe “silaʻi” fakataha ʻa e ngaahi fāmilí ki he taʻengatá.

Lolotonga ha ouau sila mali, ʻoku tūʻulutui ha husepāniti mo ha uaifi ʻi ha ʻōlita ʻo fehangahangai ke fakahoko ha ngaahi fuakava ʻiate kinaua pea mo e ʻOtuá. ʻOkú na palōmesi ke fefakaʻapaʻapaʻaki mo feʻofaʻaki kakato pea tukupā ke muimui ki he ngaahi akonaki mo e sīpinga ʻa Sīsū Kalaisí. Ko hono olá, kuo talaʻofa ange ʻe tuʻuloa ʻena nofo-malí mo e fāmilí ʻo taʻengata.

Young couple stands outside the Ogden Utah Temple. They are looking out at the temple in the background with the Angel Moroni being almost top center of the image. He is wearing a dark blue suit with white collared shirt. She is in a white dress. It is late afternoon/early evening.

Ngāue maʻá e ngaahi kui kuo pekiá

ʻOku mau tui ki ha ʻOtua fakamaau totonu mo ʻaloʻofa he ʻikai te Ne fakaʻikaiʻi mei ha taha ʻo ʻEne fānaú ʻa e ngaahi tāpuaki ʻo e moʻui taʻengatá koeʻuhí ko ha ngaahi tūkunga ʻoku ʻikai ke nau lava ʻo mapuleʻi.

ʻOku mau fakahoko ʻi he temipalé ʻa e papitaisó, ʻenitaumení, mo e silá maʻa ʻetau ngaahi kui naʻe ʻikai ke nau maʻu e faingamālie ke maʻu e ngaahi ouau ko iá kimuʻa pea nau pekiá. ʻI he ngāué ni, ʻoku hoko ai ha taha ʻoku moʻui ko ha fetongi pe fakafofonga ʻo ha taha kuo pekia.

Ko e ngaahi ouau toputapú ni ʻoku fakahoko pē ia ʻi he ngaahi temipalé. ʻOku mau tui ʻe lava ke fili ʻetau ngaahi kuí ke tali pe ʻikai tali ʻa e tokoni ko ʻeni naʻe fai ʻi he ʻofa maʻanautolú.

Ngaahi Fehuʻi Angamahení

ʻOku kehe fēfē ha temipale mei ha falelotu angamaheni?

ʻOku fakaʻaongaʻi ʻa e ngaahi ʻapisiasí ki he ngaahi houalotu moihū ʻo e Sāpaté, ngaahi ʻekitivitī ʻa e toʻu tupú he lolotonga ʻo e uiké, ngaahi fakataha fakasōsialé, mo ha ngaahi meʻa fakakolo kehe pē, lolotonga iá ʻoku vaheʻi makehe ʻa e ngaahi temipalé ki he ngaahi ngāue mo e ngaahi ouau toputapú.
Te ke lava ʻo ʻiloʻi ha temipale ʻaki e ngaahi lea “Ko e Fale ʻo e ʻEikí” ʻi he falé, ka ʻe maʻu ʻe he falelotu angamahení ʻa e ngaahi foʻi lea “Talitali Lelei ʻa e Kau ʻAʻahí” mo e “Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní” ʻi tuʻa.
Ko e fengāueʻaki fakakulupu mo e langaki e feohi mo e kakaí ko ha konga lahi ia ʻo e ngaahi meʻa ʻoku hoko ʻi ha falelotu, ka ko e ngaahi temipalé ʻoku ʻi ai hono molumalu makehe. ʻI he ngaahi temipalé, ʻoku fakalongolongo mo faʻa fakakaukau ʻa e kakaí ke tauhi maʻu ʻa e fakaʻapaʻapa ki he ʻEikí.

Te u lava nai ʻo hū ki loto ki ha temipale?

Te ke lava he taimi ʻe niʻihi ʻo hū ki loto ki he temipalé! ʻI he taimi ʻoku fuofua langa ai ʻa e ngaahi temipalé, pe hili hano fakaleleiʻi lahi, ʻoku fakahoko ha ngaahi ʻoupeni hausi maʻá e kakaí. ʻIkai ngata aí, ʻoku lahi ha ngaahi temipale ʻoku ʻi ai ha ngaahi senitā takimamata, ngaahi feituʻu talitaliʻanga, pe kelekele ʻoku ʻatā ki ha faʻahinga taha pē.

Hili e kakato ha temipale, ʻoku fakatapui ia ki he moihū toputapu. Koeʻuhí ko e natula māʻoniʻoni ʻo e ngāue ʻoku fai ʻi he temipalé, ʻoku ava ʻa e temipalé ki he kāingalotu pē ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní kuo nau mateuteu ki he aʻusia ko iá.

Neongo he ʻikai te ke lava ʻo hū ki ha temipale he taimí ni, ka ʻoku fakaafeʻi e fānau kotoa ʻa e ʻOtuá ke nau ako lahi ange ki he ongoongolelei ʻo Sīsū Kalaisí mo kau ki he ngaahi vā fetuʻutaki fakafuakavá te ne fakaʻatā kinautolu ke kau kakato ʻi he ngaahi tāpuaki ʻo e temipalé.

ʻOku fēfē ʻa e mali temipalé?

Lolotonga ha ouau nounou mo faingofua, ʻoku pikinima ʻa e fefine malí mo e tangata malí ʻi ha funga ʻōlita. ʻOkú na fuakava mo e ʻOtuá te na fefakaʻapaʻapaʻaki mo feʻofaʻaki kakato mo tukupā ke muimui ki he ngaahi akonaki mo e sīpinga ʻa e Fakamoʻuí. Ko hono olá, ʻoku talaʻofa ange ʻe tuʻuloa ʻena nofo-malí mo hona fāmilí ʻo taʻengata.

Ko e ongomeʻa mali ʻoku mali ʻi he temipalé ʻokú na faʻa fakafiefiaʻi [e mali temipalé] mo e fāmilí mo e ngaahi kaungāmeʻá ʻi he hili e malí ʻaki ha maʻu meʻatokoni pe tukufakaholo fakafonua kehe. ʻE lava foki ʻa e ngaahi hoa mali ne mali fakapuleʻanga kimuʻa ʻi tuʻa he temipalé (hangē ko kinautolu ne kau ki he Siasí hili ʻenau malí) ʻo aʻusia ʻa e ngaahi tāpuaki ʻo e sila ʻi he temipalé.

ʻE Lava ke Nofo Fakataha Ho Fāmilí ʻo Taʻengata

ʻE lava ke akoʻi lahi ange koe ʻe he kau faifekaú fekauʻaki mo e founga ʻe lava ke hoko ai e ngaahi tāpuaki ʻo e papitaisó mo e ngaahi fuakava ʻo e temipalé—kau ai e talaʻofa ʻo ha fāmili taʻengatá—ko ha konga hoʻo moʻuí.