Te Iteraa Papu o te Peropheta Iosepha Semita
Te Ekalesia a Iesu Mesia i te Feia Mo‘a i te Mau Mahana Hopea Nei
Iosepha Semita: Te Hoê Peropheta a te Atua
I te ahuru ma maha raa o to Iosepha Semita matahiti, ua hinaaro oia ia ite teihea te Ekalesia e tiʻa iaʻna ia amui atu, no reira oia i ani atu ai i te Atua na roto i te pure mau. Ei pahonoraa i teie pure, ua fâ mai te Atua te Metua e Taʻna Tamaiti, o Iesu Mesia ia Iosepha e ua parau maira iaʻna e, aita roa te Ekalesia mau a Iesu Mesia e vai nei i niʻa i te fenua nei, e ua maiti raua ia Iosepha ia faatiʻa faahou mai i te reira.
Mai taua mahana mai â, ua haa o Iosepha i roto i te ohipa a te Atua, te raveraa i te ohipa no te faatiʻaraa i te Ekalesia a Iesu Mesia i te Feia Moʻa i te Mau Mahana Hopea Nei e no te paturaa i te Basileia o te Atua i niʻa i te fenua nei i te mau mahana hopea nei. Te faaite papu nei te mau melo haapaʻo maitai o te Ekalesia e, o Iesu Mesia, o te Faaora e te Taraʻehara ïa o te ao nei. Te arataʻi nei Iesu i Taʻna Ekalesia i teie nei mahana na roto i te heheuraa i te hoê peropheta i niʻa i te fenua nei. O Iosepha Semita taua peropheta ra. Noaʻtu e, e rave rahi te mau ohipa ta Iosepha i rave i roto i toʻna oraraa, te mea faufaa rahi râ, o toʻna ïa hinaaro ia riro ei pìpì e, ei ite no Iesu Mesia. Ua papaʻi oia, “ I muri mai i te mau parau faaite e rave rahi o tei horoʻahia noʻna ra, o teie hoi te parau faaiteraa hopea roa ra, o ta maua e faaite atu nei noʻna ra: Oia hoi te ora nei Oia! “ ( PH&PF 76:22).
Te feia i farii i te iteraa o te Peropheta na roto i te mana o te Varua Maitai, e ite ïa ratou i te parau mau o te ohipa i piihia iaʻna ia rave. E nehenehe atoa ia ratou ia ite i te hau e te oaoa e noaʻa mai na roto i te Faaora o Iesu Mesia o ta Iosepha Semita i haamori e i tavini.
A faaoti ai oia i to’na mana‘o o tei hea te Ekalesia e amui atu, hi‘o atura o Iosepha i roto i te Bibilia no te imi i te arata‘iraa. I reira ua tai‘o oia, « E ani i te Atua. »
Teihea te Ekalesia Mau?
Ua fanauhia o Iosepha Semita i te matahiti 1805 i te oire ra o Sharon, i te tufaa fenua no Vermont. I te taime a haamata ai teie nei aamu, 14 ïa toʻna matahiti, e te faaea ra oia e toʻna utuafare i New York e te tuatapapa ra oia teihea te ekalesia e amui atu. Teie ïa to Iosepha aamu mai te au i taʻna iho mau parau i papaʻi ra.
Iroto i taua taime aehuehu rahi ra, ua tupu te fifi i roto i toʻu manaʻo… Ua parau pinepine au iaʻu iho e: Eaha ra ïa te rave? O vai tei tano i roto i taua mau pùpù atoa ra; e aore râ, ua hape anei ratou paatoa?
Mai te mea ua tano te hoê o ratou, o teihea ïa, e nahea vau e ite ai i te reira?
A faaea teimaha noa ai au i raro aʻe i te mau fifi rahi i faatupuhia e te mârôraa a taua mau pùpù faaroo ra, te taiʻo ra vau, i te hoê mahana, i te Episetole a Iakobo, pene hoê e te irava pae, o tei na ô mai e: “Te ere ra râ te hoê o outou i te ite, e ani oia i te Atua ra, o te horoʻa hua mai i te maitai i te taata atoa ra, ma te patoʻi ore; e, e horoʻahia mai taʻna.”
Aita roa â te hoê papaʻiraa moʻa i ô ma te puai rahi aʻe i roto i te aau o te taata nei, mai to teie nei irava i ô mai i roto i toʻu nei aau. E au ra e, ua ô mai te reira ma te puai rahi i roto roa i toʻu nei aau. Ua feruri pinepine noa vau i te reira, e ua ite au e, mai te mea e faufaahia te hoê noa aʻe taata i te ite no ô mai i te Atua ra, o vau ïa; aita hoi au i ite i te mea tiʻa ia rave, e ia ore toʻu ite ia faarahihia, e ore roa ïa vau e ite. E mea ê te tatararaa a te mau orometua o taua mau haapaʻoraa èê ra no niʻa i te mau irava i roto i te papaʻiraa moʻa, e na te reira i haamou i to te mau taata tiʻaturiraa i roto i te Bibilia no te faaafaro i te fifi.
I te pae hopea, ua faaoti au e mea tiʻa iaʻu ia parahi noa i roto i te poiri e te papu ore e aore râ, ia haapaʻo i ta Iakobo i faaite mai, oia hoi, ia ani i te Atua. I te hopea, ua faaoti au ia “ani i te Atua”, e mai te mea e horoʻa Oia i te ite ia ratou tei ere i te ite, e e horoʻa hua mai hoi ma te patoʻi ore,e tamata ihoa ïa vau.
Te Orama Matamua a Iosepha Semita
No reira, mai te au i taʻu faaotiraa ia ani i te Atua, ua haere atura vau i roto i te uru raau no te tamata. E poipoi ïa te reira no te hoê mahana nehenehe e te ata ore, i te haamataraa no te tau mahanahana o te matahiti 1820. O te taime matamua te reira i roto i toʻu nei oraraa a tamataʻi au i te reira, no te mea, i roto i toʻu manaʻo tapitapi, aita vau i tamata i te pure vaha.
I muri aʻe i toʻu taeraaʻtu i te vahi taʻu i manaʻo, ua hiʻo haaati au iaʻu, e no te mea o vau anaʻe to reira, ua tuturi ihora vau i raro e ua haamata i te pûpû atu i te mau hinaaro o toʻu aau i mua i te Atua. Aita vau i maoro i te na reiraraa, ua haruhia vau e te hoê mana tei hau aʻe i toʻu, e no te puai o taua mana ra i niʻa iho iaʻu, ua tapeʻa-roa-hia toʻu arero e aita taʻu e nehenehe ia parau faahou. Ua faaati-roa-hia vau e te poiri taʻotaʻo, e ua manaʻo vau e, e haamou-roa-hia vau.
Ua parau maira te hoê o raua iaʻu, ma te faatoro atu i toʻna rima i niʻa i te tahi, e ma te faahiti i toʻu iʻoa, i te na ôraa mai e: “O Taʻu Tamaiti Here Teie, a Faaroo Iaʻna!”
Area râ, ua faaitoito noa vau na roto i toʻu puai atoa ia tiʻaoro atu i te Atua ia faaora iaʻu i te mana o teie nei enemi tei haru mai iaʻu; e i te taime mau taʻu i manaʻo e ua fatata vau i te haamou-roa-hia – e ere hoi te haamouraa manaʻo noa, i te mana râ o te hoê varua mau no roto mai i te hoê ao ite- mata- ore hia, e tei iaʻna te mana maere rahi roa tei ore â i itehia e au i roto i te hoê noaʻtu taata- I taua taime mataʻu rahi ra, ua ite atura vau i te hoê pou maramarama i niʻa noa aʻe i toʻu upoo, e ua pou mai ra te reira i niʻa iho iaʻu. Ua hau atu hoi to te reira maramarama i to te mahana.
I te taeraa mai o te reira maramarama, ua tuʻuhia vau e taua enemi i tapeʻa iaʻu. I te mairiraa taua maramarama ra i niʻa iho iaʻu, ua ite atura vau e piti Taata, to raua teatea e te hanahana a tiʻa noa ai raua i niʻa aʻe iaʻu i roto i te reva ra, e ore roa ïa e tiʻa ia faaauhia i te hoê mea. Ua parau maira te hoê o raua iaʻu, ma te faatoro atu i toʻna rima i niʻa i te tahi, e ma te faahiti i toʻu iʻoa, i te na ôraa mai e: “O Taʻu Tamaiti Here Teie, a Faaroo Iaʻna!”
Te tumu vau i haere atu ai e ui i te Fatu, oia hoi, ia ite au e, o teihea râ i rotopu i taua mau haapaʻoraa atoa ra te haapaʻoraa mau, e ia ite au e o teihea taʻu e amui atu. No reira, i muri noa aʻe i toʻu hoʻiraa i toʻu ihora huru mau, e ua nehenehe faahou iaʻu ia paraparau, ua ani atura vau i teie na Taata te tiʻa ra i niʻa aʻe iaʻu i roto i te maramarama e o teihea te haapaʻoraa mau i roto i te mau haapaʻoraa atoa (no te mea i taua taime ra aita roaʻtu vau i manaʻo noa aʻe i roto i toʻu aau e, e mea hape anaʻe ratou atoa)– e o teihea hoi taʻu e amui atu.
Ua pahonohia maira vau e, eiaha roa vau ia amui atu i te hoê noaʻtu o ratou no te mea e mea hape anaʻe ratou; ua parau maira taua Taata ra o tei pahono mai i taʻu uiraa, na ô maira e, e mea ino rahi ta ratou mau haapaʻoraa i mua iaʻna; e mea ino anaʻe to ratou mau taata maramarama; e “te haafatata mai nei ratou iaʻu i to ratou ra mau utu, tei te atea ê râ to ratou aau iaʻu nei, te haapii ra ratou i te mau faaueraa a te taata nei ei parau haapiiraa, e huru paieti to ratou, ua huna râ i te mana mau no te reira.”
Ua opani faahou maira oia iaʻu eiaha ia amui atu ia ratou; e, e rave rahi atu â te mau mea taʻna i parau mai iaʻu, o te ore e nehenehe iaʻu ia papaʻi i teie taime. I toʻu hoʻiraa mai i toʻu ihora huru mau, ua ite au e, te tiraha ra vau ma te hiʻo tiʻaʻtu i niʻa i te raʻi . I muri aʻe i to te maramarama moʻeraaʻtu, aita toʻu e puai faahou; area râ, aita i maoro roa ua itoito faahou mai au , e ua hoʻi atu vau i te fare.
Te Haamani-Ino-raa
Ua haapaʻo o Iosepha i te faaueraa a te Atua e aita oia i amui atu i te hoê o taua mau ekalesia ra. A faaite ai oia i te taata i te mea taʻna i ite e i faaroo, ua haamata ihora oia i te farii i te patoʻiraa e te haamani-ino- raa.
Ua ite oioi râ vau e, no toʻu faaiteraa i taua mau parau ra, ua faahapa puai mai te mau orometua o taua mau faaroo ra iaʻu , e o te tumu hoi te reira no te hamani-ino-raa rahi tei tupu noa i te rahi; e noaʻtu e tamaiti matau-ore-hia vau, i ropu i te ahuru ma maha e te ahuru ma pae o toʻu matahiti, e noaʻtu aita te huru o toʻu oraraa i faariro iaʻu ei taata ite-maitai-hia i roto i teie nei ao, noaʻtu te reira, te vai ra te tahi mau taata tiʻaraa teitei tei hiʻo mai iaʻu e ua faatupu ratou i te riri o te taata i niʻa iho iaʻu e te hamani-ino-raa rahi. Mai te reira te huru o te mau faaroo atoa– ua tahoê ratou no te hamani ino mai iaʻu.
Ua maere pinepine au mai te reira taime, i te mea e, e tamaiti itea-ore-hia vau e te taata, hoê ahuru ma maha e tiʻahapa noa iho toʻu matahiti, e aore hoi e faufaa taʻu no te oraraa nei, maori râ na roto i te rave-noa-raa i te ohipa i te mau mahaha atoa, area râ, i roto i te mata o taua mau taata rarahi no taua mau haapaʻoraa roo maitai ra, e au e, e taata rahi au, i tupu ai i roto ia ratou te varua hamani ino puai roa, e te varua faahapa. Noaʻtu râ e mea maere ïa, o te reira ihoa ïa te huru, e na te reira i faautupu pinepine i toʻu oto rahi.
Area râ, oia mau roa, ua ite au i te orama. Ua manaʻo iho nei au e, ua riro vau mai ia Paulo i roto i toʻu feruriraa a paruru ai oia iaʻna iho i mua i te Arii ra ia Ageripa, e ua faaite oia i te aamu no te orama taʻna i farii i toʻna iteraa i te maramarama e i toʻna faarooraa i te reo; e mea iti roa râ te taata i tiʻaturi iaʻna; ua parau mai te tahi pae, e taata haavare oia, ua parau mai te tahi atu pae, e maamaa toʻna; ua atahia oia, e ua faainohia oia. Aita roa râ te reira i faaore i te parau mau no taʻna orama. I ite na oia i te hoê orama, ua ite oia e ua farii oia i te reira, e aore roa te taatoʻaraa o te hamani-ino-raa i raro aʻe i teie nei raʻi e faahuru ê i te reira; e noaʻtu e hamani ino ratou e tae noaʻtu ua pohe oia; ua ite râ oia, e e ite oia e tae noaʻtu i toʻna hutiraa aho hopea, e ua ite oia i te maramarama, e ua faaroo oia i te hoê reo i te parauraa mai iaʻna, e aore roa te mau mea atoa o teie nei ao e faahuru ê i toʻna feruriraa aore râ, i toʻna tiʻaturiraa.
No te mea, ua ite mau vau i te hoê orama; ua papu te reira iaʻu , e ua papu atoa iaʻu e ua ite te Atua i te reira, e aita e nehenehe iaʻu ia huna i te reira, e ua papu iaʻu e, na roto i toʻu hunaraa i te reira, e faariri au i te Atua e e faahapahia vau e aʻna.
Oia atoa iaʻu nei. Ua ite mau vau i te maramarama, e i roto i taua maramarama ra, ua ite au i na Taata toopiti, e ua paraparau mai ihoa raua iaʻu; e noaʻtu ua au-ore-hia vau, e ua hamani-ino-hia vau no te mea ua parau vau e, ua ite au i te orama; e parau mau ihoa ïa. E a hamani ino mai ai ratou iaʻu, e a faahapa haavare mai ai ratou iaʻu no toʻu parauraa i te reira, ua parau vau i roto i toʻu aau e: Eaha ratou e hamani ino mai ai iaʻu no te faaiteraa i te parau mau? Ua ite mau vau i te hoê orama; e o vai hoi au e tiaʻi iaʻu ia patoʻi i te Atua, aore râ, eaha hoi to te ao nei i manaʻo ai e, ia huna vau i taʻu i ite mata? No te mea, ua ite mau vau i te hoê orama; ua papu te reira iaʻu , e ua papu atoa iaʻu e ua ite te Atua i te reira, e aita e nehenehe iaʻu ia huna i te reira, e ua papu iaʻu e, na roto i toʻu hunaraa i te reira, e faariri au i te Atua e e faahapahia vau e aʻna.
Ua papu iaʻu toʻu feruriraa i teie nei no niʻa i te mau huru haapaʻoraa o te ao nei– e ere ïa i te mea tiʻa ia amui atu vau i te hoê noaʻtu o ratou, ia haere noa râ vau i toʻu haerea e tae noaʻtu ua parau-faahou-hia vau. Ua ite au e, e parau mau te parau faaite a Iakobo– e te taata tei ere i te ite, e nehenehe taʻna ia ani i te Atua, e roaa iaʻna te ite ma te patoʻi-ore-hia.
Ua rave tamau noa vau i taʻu mau ohipa i mâtauhia e tae roaʻtu i te piti ahuru ma hoê no Setepa, 1823, a hamani-ino-hia ai au e te mau huru taata atoa, to te pae faaroo e to te pae faaroo ore, no te mea ua parau tamau noa vau e i ite na vau i te hoê orama.
I roto i taua area taime ra, mai te taime au i ite ai i te orama e tae noa mai i te matahiti 1823– ua opanihia vau eiaha e amui atu i te hoê noaʻtu o te mau haapaʻoraa i te reira tau, e e taata apî hoi au, e ua hamani ino mai te mau taata o tei au ia riro ei hoa noʻu e ei tauturu iaʻu; e mai te mea e manaʻo ra ratou e ua haavarehia vau, e mea maitai ia ratou ia tamata, na roto i te afaro e te aroha, ia faahoʻi atu iaʻu–Ua vaiiho-noa-hia râ vau i roto i te mau huru faahemaraa atoa. Ua amui au i te mau huru pùpù taata atoa, e ua rave pinepine au i te mau hapehape rii na roto i te huru paruparu o toʻu apîraa e te huru hape noa o te aau taata nei. Te peʻapeʻa nei au ia parau e, o te tumu ïa i topa ai au i roto i te tahi mau faahemaraa au ore i mua i te aro o te Atua. I toʻu tuuraa i teie parau faʻi , eiaha te taata ia manaʻo e ua rave au i te mau hara rahi e te ino. E ere ïa toʻu huru ia na reira.
E toru matahiti i muri a‘e i te orama matamua a Iosepha Semita, ua tono atura te Atua i te melahi ra o Moroni no te haapii ia Iosepha no ni‘a i te faaho‘iraa mai i te evanelia a Iesu Mesia.
To Moroni Fâraa Mai
Ua tamau noa te hamani-ino-raa a farii ore noa ai o Iosepha ia huna e ua ite mau iho oia i te Atua. I te 21 no Setepa 1823 i muri noa aʻe i toʻna taravaraa i raro no te taoto, ua pure o Iosepha no te ite i te huru o toʻna tiʻaraa i mua i te Fatu. Ua fâ maira te melahi o Moroni iaʻna.
No reira, i te ruʻi i faaitehia i mua nei, oia hoi i te piti ahuru ma hoê no Setepa, i muri aʻe i toʻu taravaraa i raro no te taoto, ua pure au e ua ani au i te Atua Mana-Hope ia faaore i taʻu mau hara atoa e toʻu mau hapehape, e ia faaitehia mai toʻu huru, e ia ite au i te huru o toʻu tiʻaraa i mua iaʻna; e mea papu roa iaʻu e farii au i te faaiteraa moʻa, no te mea i farii ê na vau i te hoê faaiteraa.
A tiʻaoro ai au i te Atua, ua ite ihora vau i te maramarama i te tupuraa i te rahi i roto i toʻu piha, e tae noaʻtu ua hau te maramarama o te piha i te mahana o te avatea, e i muri iho ua fâ mai te hoê taata i pihai iho i toʻu roʻi, i te tiʻa-noa-raa i roto i te reva, e aita hoi toʻna avae i taahi noaʻtu i te tahua.
E ahu roa topa noa toʻna tei hau atu i te teatea. E teatea to te reira tei hau i to te mau mea atoa taʻu i ite i roto i te ao nei, e i toʻu nei manaʻoraa aore roa e mea i te ao nei o tei tiʻa ia faaauhia mai te reira i te uouo e te anaana rahi. E mea tahaa toʻna mau manimani rima e toʻna atoa rima i niʻa rii noa aʻe i na fatiraa rima, e oia atoa toʻna avae i niʻa rii aʻe i toʻna fatiraa avae. E mea tahaa atoa toʻna upoo e toʻna atoa ra aʻi. Ite atoaʻtura vau e, o te reira anaʻe iho toʻna ahu i niʻa iaʻna, no te mea e te vai mahiti noa ra ïa , e ua ite au i toʻna ouma.
E ere ïa toʻna ahu anaʻe tei hau atu i te teatea, o toʻna tino atoa râ, ua hau atu ïa i te hanahana o te ore roa e nehenehe ia faaauhia, e toʻna mata, mai te uira ïa. Ua maramarama roa te piha, eiaha râ mai te maramarama tei faaati i toʻna tino. I toʻu hiʻo-matamua-raaʻtu i niʻa iho iaʻna, mataʻu ihora vau: aita râ i maoro, ore atura toʻu mataʻu iaʻna.
Ua faahiti mai oia i toʻu iʻoa, e na ô maira iaʻu e, e veʻa oia i tonohia mai mai mua mai i te aro o te Atua, e o Moroni toʻna iʻoa; e, e ohipa ta te Atua e horoʻa mai iaʻu ia rave; e, e haamaitaihia e, e faainohia toʻu iʻoa i rotopu i te mau nunaa atoa, te mau opu atoa, e te mau reo atoa hoi, oia hoi, e parauhia i rotopu i te mau taata atoa e, e taata maitai au e aore râ, e taata ino.
I te matahiti 421 hou te Mesia, ua huna te peropheta Moroni i te mau papâ’a parau mo‘a o to’na nunaa i te Aivi no Cumorah. I to’na ho‘iraa mai ei taata tei ti‘a-faahou-mai, ua faaite oia ia Iosepha Semita i te parau no te papâ‘a parau tahito, e tei roto i taua buka ra te îraa o te evanelia o tei horo‘ahia mai e te Faaora i te feia i tahito ra no te fenua Marite. Taua papâ‘a parau ra, o te Buka a Moromona ïa.
Ua parau maira oia e, te vai ra te hoê buka i papaʻihia i niʻa iho i te mau api auro, o tei hunahia i raro i te repo e o tei faaite mai i te tuatapaparaa o te feia tei parahi matamua i niʻa iho i teie nei fenua (Marite) e te fenua atoa no reira mai ratou ra. Ua faaite atoa mai oia e, tei roto i taua buka ra te îraa o te Evanelia mure ore o tei horoʻahia mai e te Faaora i taua feia tahito ra.
E, te vai ra e piti ofaʻi i roto i te fana ario. Ua haamauhia taua na ofaʻi nei i te hoê paruru ouma, e o te reira ïa tei parauhia e, e Urima e te Tumima–ua huna atoa-hia te reira i pihai iho i taua mau api ra; e o tei tapeʻa e o tei faaohipa i taua na ofaʻi ra i mutaa ihora, o tei parauhia ïa e mau “hiʻo”; e na te Atua i faaineine i te reira ei raveʻa no te iriti i taua buka ra.
I muri iho i toʻna faaiteraa mai i taua mau mea ra iaʻu, ua haamata ihora oia i te faahiti mai i te mau parau tohu o te Faufaa Tahito. Ua faahiti mai oia na mua i te hoê tufaa o te pene toru no te Malaki, e oia atoa i te pene maha, oia hoi te pene hopea, no te reira ihoa tohu ra, area râ ua huru ê rii te faahitiraa i to tei papaʻihia i roto i ta tatou nei Bibilia. Aita oia i faahiti i te irava matamua mai tei papaʻihia i roto i ta tatou mau buka; ua na ô mai ra oia:
“Inaha hoi; te fatata maira te mahana mai te umu ra i te amaraa, e te feia atoa i teʻoteʻo ra e te feia atoa i rave i te parau ino ra e ama ïa mai te aihere ra; e na ratou o te haere mai ra e tutuʻi ia ratou; te na reira maira te Iehova Sabaota ra, e ore e faatoehia te tumu e te amaʻa atoa ra.”
Ua faahiti atoa mai oia i te irava pae, i te na ôraa e: “Inaha, e tuʻu atu vau i te autahuʻaraa ia outou na roto i te rima o te peropheta ra o Eliaha, a tae atu ai i taua mahana rahi mataʻu o Iehova ra.”
Ua faahiti faahuru ê rii atoa mai oia i te irava i raro mai: “E e tuʻu hoi oia i roto i te aau o te mau tamarii te fafau i faaauhia i to ratou ra mau metua, e, e fariu hoi te aau o te mau tamarii i to ratou ra mau metua. Ahiri aita ra, e hope roa te fenua i te faainohia i toʻna taeraa mai.”
Taaê noaʻtu i teie nei mau parau tohu, ua faahiti atoa maira oia i te pene ahuru ma hoê o Isaia, i te na ô raa mai e, ua fatata roa te reira i te tupu. Ua faahiti atoa mai oia i te pene toru o te Ohipa, irava 22 e te 23, mai te au ihoa ïa i tei papaʻihia i roto i ta tatou Faufaa Apî. Ua faaite maira oia e, taua peropheta ra, o te Mesia ïa; aita râ i tae i te mahana e “tapu-ê-hiaʻtu ai mai roto atu i te taata te feia tei ore i faaroo iaʻna,” ua fatata râ.
Ua faahiti atoa maira oia i te pene piti o Ioela, mai te irava 28 e tae noaʻtu i te hopea. Ua faaite atoa mai oia e, aita te reira i tupu, ua fatata râ. E ua faaite atoa mai oia e ua fatata roa atoa te tau no te îraa o te Etene i te tae mai. E rave rahi atu â te mau irava parau taʻna i faaite mai e, e rave rahi atoa taʻna mau tatararaa o te ore e tiʻa ia faaitehia i ô nei.
Ua faaite faahou mai oia iaʻu e, ia noaa mai iaʻu taua mau api taʻna i parau maira– aita hoi i tae i te mahana e ravehiaʻi- eiaha ia faaite i te reira i te hoê noaʻtu taata; eiaha atoa i te paruru ouma e te Urima e te Tumima; maori râ ia ratou anaʻe tei faauehia mai iaʻu ra; ia ore râ vau ia haapaʻo ra, e haamouhia ïa vau. A paraparau noa mai ai oia iaʻu no niʻa i taua mau api ra, ua iritihia mai te orama i toʻu manaʻo, e ua ite au i te vahi i hunahiaʻi te mau api; e no te papu maitai hoi o toʻu hiʻoraa i te reira, ua ite papu vau i taua vahi ra iaʻu i haere atu i reira.
I muri iho i teie nei paraparauraa, ua ite ihora vau i te maramarama i roto i te piha i te faaatiraa i te tino o teie taata i paraparau mai iaʻu, e ua na reira noa e tae noaʻtu ua poiri faahou te piha, maori râ, na pihai iho iaʻna; I reira, ite oioi-atu ra vau , mai te mea ra e, i te hoê eʻa tei tae roa i niʻa i te raʻi. Ua haere atu oia i niʻa e tae noaʻtu ua moʻe roa, e ua vai faahou te piha mai te huru matamua hou taua maramarama ra no te raʻi mai i tae mai ai.
A tarava noa ai au ma te feruri i te mau mea huru ê i tupu, e te maere ra vau i te mau parau i parauhia mai e taua veʻa taa ê ra, e a feruri noa ai au ra, ua ite faahou atura vau i toʻu piha i te maramarama-faahou-raa, e ua fâ faahou mai taua veʻa no te raʻi mai ra i pihai iho i toʻu roʻi.
Ua haamata oia, e ua parau faahou mai i te mau parau iho i parauhia e aʻna i toʻna tae-matamua-raa mai, ma te faahuru ê ore i te hoê noa aʻe vahi. E oti aʻera te reira, ua faaara mai oia iaʻu i te mau faautuʻaraa rahi o te tae mai i niʻa iho i te ao nei, te mau haamouraa rarahi na roto i te oʻe, te ‘oʻe, e te maʻi; e e tae mai teie nei mau haavaraa rahi i niʻa i te ao nei i roto ihoa i teie nei uʻi. I muri iho i toʻna faaiteraa mai iaʻu i teie nei mau parau ra, ua haere faahou atura oia i niʻa i te raʻi mai to te matamua ra te huru.
I teie nei, no te hohonu o taua mau mea ra i roto i toʻu manaʻo, ua ore roa toʻu vareʻa taoto, e te faaea noa ra vau i niʻa i toʻu roʻi ma te maere rahi i te mau mea taʻu i ite e taʻu hoi i faaroo. E rahi faahou atura toʻu maere i toʻu ite faahou-raa i taua veʻa ra i pihai iho i toʻu roʻi. Ua faaroo vau iaʻna i te tapiti faahou-raa mai i taua ihoa mau parau ra i parauhia mai e aʻna na mua aʻera. Ua faaara mai oia iaʻu e, e tamata Satane i te faahema mai iaʻu (no te huru veve o te utuafare o toʻu metua) ia rave i te mau api auro ei raveʻa e roaa mai ai te moni. Ua opani roa maira oia iaʻu eiaha roa vau ia na reira, ia hoê noa râ toʻu hinaaro ia roaa mai te mau api iaʻu, oia hoi, ia faahanahanahia te Atua e, eiaha te hoê atu opuaraa maori râ, ia patu i toʻna ra basileia. Ia ore au ia na reira, eita ïa taua mau api e tuʻuhia mai i roto i toʻu rima.
I muri aʻe i teie fâ-toru-raa mai, ua hoʻi faahou atura oia i niʻa i te raʻi mai te huru matamua, e ua vaiiho-faahou-hia vau ia feruri i te mea maere tei tupu mai iaʻu; e i taua iho taime ra, ua aaoa ihora te moa e ua taʻa ihora iaʻu e, ua fatata te ao, e ua pau te pô taatoa i to maua paraparauraa.
I muri rii aʻe i toʻu tiʻaraa mai i niʻa i toʻu roʻi, ua haere atura vau i te ohipa o te ao i mâtauhia e au, i toʻu tamataraa râ ia rave i te ohipa, mai taʻu i rave tamau noa, ua ite au, e ua paruparu roa toʻu tino e aita i nehenehe iaʻu ia rave faahou i te ohipa. Ua ite toʻu metua, o te rave ra i te ohipa i pihai iho iaʻu, e ere au i te mea maitai, e ua faaue maira oia iaʻu ia hoʻi i te fare. Ua haere atura vau ma te manaʻo e hoʻi au i te fare; area râ, a tamata ai au i te paʻuma i niʻa i te aua no te haere i rapae i te vahi raveraa ohipa, ua pau roa toʻu puai, e ua marua vau i raro i niʻa i te fenua; e ua faaea matapoiri noa vau no te hoê taime.
Te mea matamua taʻu i ite, o te hoê ïa reo i te parauraa mai iaʻu, ma te pii mai i toʻu iʻoa. Ua hiʻo ihora vau i niʻa e ua ite faahou ihora i taua iho veʻa ra i te tiʻaraa i niʻa noa aʻe i toʻu upoo, ua faaati-faahou-hia oia i te maramarama mai te matamua ra. Ua faaite faahou maira oia i te mau mea atoa taʻna i faaite mai i te pô ra, e ua faaue maira iaʻu ia hoʻi i toʻu metua tane, e ia faaite iaʻna i taʻu orama e te mau faaueraa taʻu i farii.
Ua na reira vau; ua hoʻi atura vau i toʻu metua tane i roto i te aua ra, e ua faaite atura iaʻna i te mau mea atoa. Ua pahono maira oia iaʻu e, no ô mai i te Atua anaʻe taua mau mea ra, e ua faaue maira oia iaʻu ia haapaʻo i te mau mea i faauehia mai e taua veʻa ra. Ua faarue ihora vau i te aua, e ua haere i te vahi ta te veʻa i faaite mai iaʻu e, tei reira te vairaa o te mau api ra; e no te papu maitai o taʻu orama no niʻa i te reira vahi, ua ite oioi au i te reira i toʻu taeraa i reira.
Te Papaʻa Parau Moʻa
Fatata atu i te vahi ra o Manchester, i te mataeinaa ra o Ontario, New York, te vai nei te hoê aivi huru rahi, e mea teitei aʻe ïa i to te reira pae fenua. I te pae i te tooa o te râ o teie nei aivi, e ere atoa i te mea atea i te tua aivi ra, e i raro aʻe i te hoê ofaʻi rahi, te vai ra te mau api i hunahia i roto i te hoê afata ofaʻi. E mea meʻumeʻu taua ofaʻi tapoʻi ra e, e mea menemene hoi i ropu i te pae i niʻa e, e mea rairai i te mau hiti, e no reira e itehia te ropuraa o te ofaʻi i niʻa aʻe i te repo o te fenua, te mau hiti râ, ua tapoʻihia te reira e te repo fenua.
Ua paraʻu vau i te repo, e ua rave mai au i te hoê raau pana e ua tuʻu i raro aʻe i te hiti o te ofaʻi, e na roto i te taumi-rii-raa i te raau pana, ua maraa maira te reira i niʻa. Ua hiʻo atura vau i roto, e ua ite ihoa vau i te mau api, te Urima e te Tumima, e te paruru ouma, mai tei faaitehia mai e te veʻa. Te afata i vaihia e taua mau mea ra, e mea hamanihia ïa i te ofaʻi apapahia e tapirihia i te hoê mea mai te tima te huru. I raro roa, i roto i taua afata ra, ua tuʻuhia na ofaʻi toopiti na te aanoraa o te afata, e tei niʻa iho i taua na ofaʻi ra te vairaa o taua mau api ra e te tahi â mau mea.
Ua ho‘i mai o Moroni hoê taime i te matahiti i roto i na matahiti e maha, e ua haapii atu â i te peropheta apî. I muri a‘e i taua na matahiti e maha râ, ua farii Iosepha i te mau api e ua haamata i te iriti i te Buka a Moromona.
Ua tamata vau i te iriti mai i te reira i rapae, ua opanihia râ vau e te veʻa, o tei faaite faahou mai e aore â i tae i te taime no te iritiraa mai i te reira i rapae, e tae noaʻtu ua hope na matahiti e maha mai taua taime atura; ua faaue maira oia iaʻu ia hoʻi mai i taua vahi ra i taua iho mahana i te matahiti i mua e, e farerei oia iaʻu i reira, e ia na reira noa vau e tae noaʻtu i te taime e farii mai ai au i te mau api.
No reira, mai te au i tei faauehia mai iaʻu ra, ua haere atu vau i taua vahi ra i te hopea o te mau matahiti tataitahi ra, e ua farerei noa vau i taua veʻa ra i reira, e ua roaa noa mai iaʻu te maramarama e te ite i to maua farereiraa i reira no niʻa i te opuaraa a te Fatu e te huru o te faatereraa i toʻna ra basileia i te mau mahana hopea nei.
E no te iti o te faufaa a toʻu metua tane, ua rave noa matou i te ohipa rave rima, e ua tarahu-mahana-noa-hia matou i te raveraa i te ohipa o tei roaa mai. I te tahi mau taime, tei to matou iho vahi matou, e i te tahi mau taime ra, tei te vahi atea matou. Na roto i te rave-noa-raa i te ohipa, ua roaa mai ia matou te faufaa e navaʻi no te oraraa nei.
Ua rave o Iosepha e rave rahi mau ohipa e ua horoʻa i te hoê oraraa maitai no toʻna ra utuafare. I te matahiti 1825 ua rave oia i te ohipa i te mataeinaa ra i Chenango, New York. I reira toʻna farereiraa ia Emma Hale, o taʻna i faaipoipo i te 18 no Tenuare 1827.
I te pae hopea, ua tae i te taime e roaa mai ai iaʻu te mau api, te Urima e te Tumima, e te paruru ouma. I te piti ahuru ma piti no Setepa, 1827, ua tae atura vau, mai tei mâtauhia i te hopea o te matahiti, i te vahi i vaiihohiaʻi taua mau mea ra, e na taua iho veʻa ra i horoa mai i te reira iaʻu, ma te aʻo mai iaʻu e: naʻu e haapaʻo maitai i te reira; e mai te mea e tuʻu haapaʻo ore noa vau i te reira, e tâpû-ê-hia ïa vau; mai te mea râ e imi au i te mau raveʻa atoa no te paruru i te reira e tae noaʻtu i te taime oia, oia te veʻa, e hoʻi faahou mai ai no te tii mai i te reira, e paruruhia ihoa ïa taua mau mea ra.
I muri iho i te hoê taime poto, ua taʻa iaʻu te tumu i faauehiaʻi au ia tiaʻi maitai i taua mau taoʻa ra, e te tumu i parau atoa mai ai taua veʻa ra e, ia oti taʻu ohipa e hoʻi mai oia no te tii faahou i te reira. Aita i maoro i muri i te ite-raa hia e te mau taata e tei iaʻu taua mau taoʻa ra, ua imi ihora ratou i te mau raveʻa puai atoa ia haru i te reira mai iaʻu atu. Ua imihia te mau raveʻa puai atoa no taua opuaraa ra. Ua puai faahou roaʻtura te hamani-ino-raa i to te matamua ra, e ua rahi te taata tei tiaʻi ineine noa no te haru i taua mau mea ra mai iaʻu atu, ahiri e tiʻa ia na reira. Area râ, na roto i te paari o te Atua ua vai maitai noa te reira i roto i toʻu nei rima, e tae noaʻtu ua oti iaʻu te ohipa i titauhia iaʻu ia rave. E i reira, mai te au i tei faaauhia ra, ua tiʻi mai te veʻa i te reira e ua faahoʻi au i te reira iaʻna; e tei iaʻna ra te vairaa e tae noa mai i teie nei â mahana, oia hoi, i te piti no Me, 1838…
I te 5 no Eperera, 1829, ua tae mai i toʻu fare te taata ra o Oliver Cowdery, o toʻu ïa farerei-matamua-raa iaʻna. Ua faaite maira oia iaʻu e, e orometua haapii tamarii oia i te vahi i parahihia e toʻu metua tane, e no te mea te tono ra toʻu metua tane i te tamarii i te haapiiraa, ua parahi rii oia i te utuafare o toʻu metua tane. I te reira taime ua faaite atu toʻu utuafare iaʻna i te parau no toʻu fariiraa i te mau api, o te reira te tumu i haere mai ai oia iaʻu, no te haapapu i te reira.
E piti mahana i muri aʻe i to Oliver Cowdery taeraa mai (oia hoi, i te 7 no Eperera), ua haamata vau i te iriti i te Buka a Moromona, e ua riro oia ei papaʻi parau noʻu.
I te avaʻe Eperera 1829 ua hamata ihora o Iosepha Semita, e Oliver Cowdery ei papaʻi parau, i te iriti i te Buka a Moromona na roto i te horoaraa e te mana o te Atua. I muri aʻe i to Iosepha faaotiraa i te iritiraa, ua farii te tahi atu mau taata i te haamaitairaa no te hiʻo mata i te mau api auro. Ua papaʻi atoa teie mau ite i to ratou mau iteraa papu no te mea, “Tei te vaha o na ite toopiti e tootoru ra e riro ai te mau parau atoa na ei parau mau.” (2 Korinetia 13:1)
I te pae i te tooa o te râ o teie nei aivi, e ere atoa i te mea atea i te tua aivi ra, e i raro aʻe i te hoê ofaʻi rahi, te vai ra te mau api i hunahia i roto i te hoê afata ofaʻi.
Ua Faahoʻihia Mai te Autahuʻaraa
Ua rave tamau noa maua i taua ohipa iritiraa ra, e i te avaʻe i muri mai (i te avaʻe Me, 1829), ua haere atura maua i roto i te hoê uru raau no te pure e no te ani i te Fatu i te ite no niʻa i te bapetizoraa ia matara te hara, o ta maua i ite i te faahitiraahia i roto i te iritiraa o te mau api. A pure ai maua ma te tiʻaoro atu i te Fatu, ua fâ maira te hoê veʻa no te raʻi mai na roto i te ata maramarama, e ua tuu maira oia i toʻna rima i niʻa iho ia maua, e ua faatoroʻa maira ia maua, i te na ôraa mai e:
“I niʻa iho ia orua, e toʻu mau taeae tavini, i te iʻoa o te Mesia ra, te horoaʻtu nei au i te Autahuʻaraa Aarona, o tei mau i te mau taviri no te utuuturaa a te mau melahi, e no te evanelia no te tatarahapa, e no te bapetizoraa utuhi, ia matara te hara; e, e ore roa te reira e rave-faahou-hiaʻtu mai niʻaʻtu i te ao nei, e tae noaʻtu i te taime e pûpû faahou atu ai te mau tamarii tamaroa a Levi i te hoê ô i te Fatu na roto i te parau-tiʻa ra.”
Ua parau maira oia e aore to teie nei Autahuʻaraa Aarona e mana no te tuʻuraa rima no te horoʻa i te Varua Maitai, i muri aʻera râ te reira e tuʻuhia mai ai i niʻa iho ia maua; e ua faaue maira oia ia maua ia haere e ia bapetizohia, ma te faaite mai e, naʻu e bapetizo ia Oliver Cowdery, e i muri iho, naʻna e bapetizo mai iaʻu.
No reira, ua haere maua, e ua bapetizohia. Naʻu i bapetizo iaʻna na mua; e i muri iho, naʻna i bapetizo mai iaʻu. E ia oti, ua tuʻu atura vau i toʻu rima i niʻa iho i toʻna upoo, e ua faatoroʻa iaʻna i te Autahuʻaraa Aarona, e i muri iho, ua tuʻu mai oia i toʻna rima i niʻa iho iaʻu, e ua faatoroʻa mai oia iaʻu i taua iho Autahuʻaraa ra– mai te reira hoi te huru o to maua faaueraahia.
Te veʻa o tei fâ mai ia maua i taua taime ra, e o tei tuu mai i teie nei Autahuʻaraa a Aarona i niʻa iho ia maua, ua parau oia e, o Ioane toʻna iʻoa, e o taua iho Ioane i parauhia o Ioane Bapetizo i roto i te Faufaa Apî, e ua haere mai oia i raro aʻe i te faatereraa a Petero, Iakobo, e Ioane, tei mau i te mau taviri no te Autahuʻaraa Melehizedeka, e taua autahuʻaraa ra, e tuʻu-atoa-hia mai ïa i niʻa iho ia maua i te taime tiʻa e, e parauhia vau te Peresibutero matamua no te Ekalesia, e o oia (Oliver Cowdery), o te piti ïa. I te ahuru ma pae no Me, 1829, i faatoroʻahiaʻi maua i raro aʻe i te rima o taua veʻa ra, e i bapetizo-atoa-hiaʻi maua ra.
I muri iho i to maua haereraa mai i rapae i te pape, i muri aʻe i to maua bapetizoraahia, ua tae mai i niʻa ia maua te mau haamaitairaa rahi roa e te hanahana no ô mai i to tatou Metua i te Ao ra.
I muri iho i toʻu bapetizoraa ia Oliver Cowdery ua mairi maira te Varua Maitai i niʻa iho iaʻna, e ua tiʻa oia i niʻa e ua tohu i te mau mea e rave rahi e fatata i te tupu. E i muri atoa iho i toʻu bapetizoraahia e ana ra, ua farii atoa vau i te varua tohu, e ua tiʻa ihora vau i niʻa, e ua tohu no niʻa i te tupuraa o te Ekalesia, e no niʻa atoa i te mau mea e rave rahi atu â no te Ekalesia, e no teie uʻi o te mau tamarii a te taata nei. Ua î maua i te Varua Maitai, e ua oaoa i te Atua o to maua ora.
Ua faati‘ahia te Ekalesia a Iesu Mesia i te Feia Mo‘a i te Mau Mahana Hopea Nei i te fare o Peter Whitmer metua, i te 6 no eperera 1830. Fatata e 60 taata i ite mata a rave hope ai na taata e 6 i te mau titauraa o te tuhaa fenua o New York no te faati‘araa i te hoê sotaiete faaroo apî.
Ua nene‘i-matamua-hia te Buka a Moromona, i te matahiti 1830, e i teie nei, hau atu i te 80 reo i roto i te ao nei.
O teie ïa te iteraa papu ohie e te afaro o Iosepha Semita, o tei faataa mai i te tahi mau ohipa i tupu o tei arataʻi tiʻaʻtu i te Faahoʻiraahia mai o te evanelia e te faatiʻaraahia o te Ekalesia a Iesu Mesia i te Feia Moʻa i te Mau Mahana Hopea Nei.
No te hoê aamu hope o Iosepha Semita, a hiʻo i te Aamu o Iosepha Semita i roto i te Buka Poe Taoʻa Rahi aore râ, Te Aamu o te Ekalesia, 1:2-79