O Papatisoga ma Faamauga e Taua
O le Mataupu Faavae o le Faatuatua fa o loo faapea mai o le uluai sauniga o le talalelei a Iesu Keriso o le “papatisoga e ala i le faatofuina mo le faamagaloga o agasala” ma le “faaeega o lima mo le meaalofa o le Agaga Paia.” Na aoao mai Iesu o le papatisoga ma le faamauga e manaomia mo i latou uma e mananao e mulimuli ia te Ia ma toe foi atu i le Tama Faalelagi pe a maea lenei olaga. O le papatisoga la o le faitotoa i le ala o feagaiga lea e taitai atu ai i le mauaina o faamanuiaga uma ua finagalo lo tatou Tama Faalelagi e tuuina mai ia i tatou. O se ala faitotoa foi ina ia “faaatoatoaina ai ia Keriso" (Moronae 10: 32, 33) a o tatou opogi ma le atoatoa Lana talalelei.
I le amataga o Lana galuega, sa maliu atu Iesu, mai Kalilaia i le Vaitafe o Ioritana i Iutaia. Sa i ai iina Ioane le Papatiso, o loo aoao atu tagata ia salamo ma ia papatisoina. Na fai atu Iesu ina ia papatisoina, ae na musu Ioane aua na ia iloa e leai se agasala a Iesu. Na faamalamalama atu e le Faaola e manaomia ona papatisoina o Ia e “faataunuu ai meatonu uma” (Mataio 3:15) ma ia usitai i poloaiga a lo tatou Tama Faalelagi. O lea o Iesu Keriso na faia le faataitaiga mo i tatou uma ina ua ia ui atu i le vai ma papatisoina o Ia e Ioane (tagai i le 2 Nifae 31:5). Na maua foi e Ioane se molimau patino o lena aafiaga paia:
“Ua papatisoina Iesu, ona maliu ae loa lea o ia nai le vai: faauta foi, ua faaavanoaina le lagi ia te ia, ua ia iloa atu foi le Agaga o le Atua ua afio ifo e peiseai o se lupe,ua oo i ona luga:
“Faauta foi, o le siufofoga mai le lagi, ua faapea mai, O lo‘u Atalii pele lena, ua ou fiafia lava ia te ia” (Mataio 3:16-17).
Mulimuli ane, sa alu ane se faipule Iutaia e igoa ia Nikotemo ia Iesu i le po. Sa ia iloa o Iesu o Ia o “se a’oa’o e maliu mai mai le Atua” (Ioane 3:2), ma na manao o ia e aoao atili. Na aoao atu o ia e Iesu o mea uma e lua o le papatisoga ma le mauaina o le Agaga Paia e ala i le faamauga e manaomia mo le faaolataga:
“E moni, e moni, ou te fai atu ia te oe, afai e le fanau se tasi i le vai ma le agaga, e le mafai ona sao o ia i le malo o le Atua” (Ioane 3:5).
O le toe fanau i le vai e faasino atu i le papatisoga. O le toe fanau i le Agaga e faasino atu i le mauaina o le meaalofa o le Agaga Paia ( ua taua foi o le Agaga Sa) e ala i le faamauga. O nei sauniga e paia, ma tatou te faia feagaiga mamalu pe a tatou mauaina ia mea. Tatou te tautino atu o le a tatou loto ina ia ave i o tatou luga le suafa o Iesu Keriso, ma manatua pea o Ia ma tausi i poloaiga a le Atua. Ao tatou tausia ia folafolaga, ua tatou faailoa atu lo tatou faatuatua ia Iesu Keriso ma naunau e mulumuli ia te Ia.
Ina ua mavae Lona Toetu, na toe aoao atu e le Faaola le taua o le papatisoga. Na ia auina atu Aposetolo e o atu ma talai atu Lana talalelei i tagata uma , ma faiatu, O le faatuatua ma papatisoina e faaolaina ia” (Mareko 16:16).
Ina ua toefuatai mai e Iesu Keriso Lana Ekalesia e ala mai i le Perofeta o Iosefa Samita, na Ia toe aoao mai foi o loo manaomia pea le papatisoga (Mataupu Faavae ma Feagaiga 22:4). Na ia faailoa mai foi le tulaga tonu e faia ai papatisoga. Na ia faamanino tonu mai o le papatisoga e ao ona faataunuuina i le faatofuina ma i le pule tatau o le perisitua (Mataupu Faavae ma Feagaiga 20:73–74).
E alofa le Atua i Ana Fanau Uma
O tagata uma o se atalii po o se afafine o le Atua. O tagata uma e taua tele ia te Ia. Na te silafia i latou ma e alofa o Ia i ai latou. Na Ia tautino mai, “Aua faauta, o la’u galuega ma lo’u mamalu lenei—ia aumaia le tino ola pea ma le ola faavavau o le tagata” (Mose 1:39). Ua Ia saunia se auala mo Ana fanau uma e toe foi atu ai ia te Ia pe a mavae lenei olaga. O lena auala, o le talalelei a Iesu Keriso.
Ua maua e le toatele o tagata le avanoa e talia ai le talalelei ma papatisoina ai i lenei olaga. Ae faapefea i latou ua maliliu e aunoa ma le papatisoina pe malamalama e uiga ia Iesu? E faapefea ona faasaoina foi i latou? E le’i faagaloina i latou e le Atua!
O le oti e le o le mutaaga lea o le olaga, ae o se laasaga i la tatou malaga toe foi atu i le Atua. A tatou feoti, o tatou agaga o le a tuua mo se taimi o tatou tino. Tatou te ulu atu i le lalolagi o agaga ma faatasi atu i tagata o aiga ma isi ua maliliu. O iina tatou te saunia ai mo lena aso matagofie lea o le a tatou toe tutu ai ma o a tatou agaga o le a toe faatasia ma tino ua faaatoatoaina. Ona tatou saoloto loa lea mai ma’i, faama’i, ma ni le atoatoa ma vaivaiga uma leatatou te onosaia i le taimi nei. I le lalolagi o agaga, oi latou ua maliliu e aunoa ma le avanoa e aoao ai e uiga i le talalelei i lenei olaga ua aoaoina e uiga i le Faaola ma le fuafuaga o le faaolataga (1 Peteru 3:18-20; Mataupu Faavae ma Feagaiga 138:16-19). E mafai ona latou filifili e talia le talalelei ma salamo.Ae e le mafai ona papatisoina iina ona e le o i ai o latou tino faitino. O se Tama Faalelagi alofa ua ia saunia se isi auala mo i latou e maua ai le papatisoga.
I le malumalu, e mafai ona papatisoina ma faamauina i tatou mo i latou ua maliliu e aunoa ma lena avanoa. I se isi faaupuga, e mafai ona tatou avea ma sui ma faatino mo i latou. O le faataunuuina o sauniga mo isi ua taua o sauniga sui (poo sui sauniga). Na aoao e le Aposetolo o Paulo le Au Korinito o le papatisoga mo e ua malliliu sa faataunuuina ona o tagata uma o le a toe tutu e ala i le Togiola a Iesu Keriso (1 Korinito 15:29 55–57).
O aoaoga faavae o sui saunigasa i ai pea o se vaega o le talalelei a Iesu Keriso. O le mea moni, o Lana Togiola o se faatinoga sui silisili ese i le talafaasolopito o le lalolagi. E ala i Lana taulaga, sa Ia faia mo tagata uma le mea sa le mafai ona tatou faia mo i tatou lava. Ona o Ia, o le a toe tutu tagata uma. O le a faalogo tagata uma i le talalelei, ma o le a maua uma le avanoa e toe foi ai i o tatou Matua Faalelagi.
O papatisoga ma faamauga i le malumalu ua faia mo i latou ua maliliu o ni meaalofa ua ofoina atu i le alofa Ma ona ua tatou talitonu e faaauau pea le olaga pe a mavae le oti, ua tatou talitonu foi o i latou ua maliliu ua silafia ia sauniga. Ona latou filifili lea pe taliaina ia sauniga pe leai.
E Mafai Ona e Auauna Atu i Isi i le Malumalu
O malumalu taitasi ua i ai se potu papatiso i totonu ma se faatanoa tele mo papatisoga. O le faatanoa e tietie i patua o faatagata o povi e sefululua o le faatusa o ituaiga e sefululua o Isaraelu. O lenei mea e mulimuli i tu i taimi ua tea i le malumalu o Solomona i le Feagaiga Tuai (tagai i le 2 Korinito 4;2–4). O povi foi e faatusa i le malosi ma le mana o le talalelei a Iesu Keriso.
O tagata faatuatua o le Ekalesia e ono mauaina se pepa faataga o le malumalu e faataunuu ai papatisoga ma faamauga e amata ia Ianuari o le tausaga e atoa ai le 12 tausaga. Ina ia mauaina se pepa faataga o le malumalu, “faatulaga se faatalanoaga o le pepa malumalu” ma lou epikopo poo le peresitene o le paranesi. Atonu e mafai ona e alu i le malumalu ina ia papatisoina ma faamau mo i latou ua maliliu.
E faapei o lou lava papatisoga, o le a i ai se nofoaga patino mo lavalava ete sui ai iina i laei papae mo le faia o papatisoga mo i latou ua maliliu. A maea papatisoga, o le a e toe foi atu i le nofoaga o lavalava ma sui ai i ofu mago. Ona e alu lea i se potu ese o faamauga i le potu papatiso. O e umia le perisitua o le a latou tuu o latou lima i luga o lou ulu ma tuuina atu le mealofa o le Agaga Paia mo i latou ua maliliu. O le taimi lava e maea ai nei sauniga, e mafai ona latou filifili pe manao e talia ia mea. O papatisoga sui ma faamauga e na o totonu o malumalu e faatinoina ai.
I totonu o le malumalu, e mafai foi ona e maua le avanoa taua e papatiso ai mo tagata o lou lava aiga ua maliliu. Ao e suesue le tala faasolopito o lou aiga, o le a e maua ou tuaa. O le alu i le malumalu ma papatisoina ma faamau mo i latou e mafai ona avea o se fiafiaga ma se aafiaga patino.
E mafai ona e tuuina atu lenei auaunaga mo matua, matua o matua, tei, tauaiga tamaitai, tauaiga tane, tausoga, ma isi. E mafai ona faamalolosia aiga e ala i lenei faatinoga o le agalelei. E mafai ona e lagonaina sootaga loloto atili i lou aiga ma latalata atili atu i le Atua. O lenei lagona o le auai e mafai ona tuuina atu ai ia te oe le malosi, taiala, ma le mautinoa ma o le a faamanuiaina ai oe i auala e le mafaitaulia. E mafai ona e maua le filemu ma le malamalama mo lou oe lava olaga ao e saili ma auauna i ou tuaa. O le a e malamalama ma iloa atili le Faaola ao e faia foi mo isi mea latou te le mafai ona faia mo i latou lava.
O se Folafolaga Faapitoa mo Oe
Na saunoa mai Elder David A. Bednar: “Ou te faamalosiau atu ia te outou ia suesue, ia sailia o outou augatama, ma ia sauniuni outou lava e faia papatisoga sui i le maota o le Alii mo o outou aiga ua maliliu. … A outou tali atu ma le faatuatua i lenei valaaulia, o le a liliu atu o outou loto i tama. O folafolaga na faia ia Aperaamo, Isaako, ma Iakopo o le a totoina i o outou loto. ... O le a faateleina lou alofa ma lou lotofaafetai mo ou tuaa. O le a faalolotoina ma mausali lau molimau ma lou liua i le Faaola. Ma ou te folafola atu ia te oe o le a puipuia oe mai i uunaiga faateleina a le tiapolo. A o outou auai i le faatinoga ma outou fiafia i lenei galuega paia, o le a malupuipuia outou ... i lo outou olaga atoa” (“O le a Liliu Atu Loto o Fanau,” Ensign po o le Liahona, Nov. 2011, 26–27).
