Kusukela ezikhathini zasendulo, amadoda nabesifazane baye bamukela umculo ongcwele, izinhlobo ezahlukahlukene zomkhuleko, izingubo zenkolo ezigcwele izimpawu, ukushukuma komzimba, nemikhosi yokuveza imizwa yabo ejulile yokuzinikela kuNkulunkulu.
Izinhlobonhlobo zalezi zindlela zokubonisa zibanzi futhi zihlukahlukene njengomndeni wesintu. Nokho zonke zinenhloso efanayo ekugcineni: ukuxhumanisa ikholwa nento elizinikele kuyo ngendlela yomuntu siqu—ukusondela kuNkulunkulu.
Kulabo abangaphandle kwenkolo ethile, imikhosi nezingubo kungase kubonakale kungajwayelekile. Kepha kubahlanganyeli, zingashukumisa imizwa ejulile yomphefumulo, zibashukumisele ekwenzeni okuhle, futhi zilolonge ngisho nenkambo yempilo yonke yokusiza.
Isembatho sendela. Isembatho somphristi. Itshali lomkhuleko lamaJuda. Isigqoko samaMuslimi. Izivatho eziphuzi zezindela zamaBhudda. Konke kuyingxenye yeqoqo elicebile lokuzinikela komuntu kuNkulunkulu.
Akukona konke izingubo ezinjalo zenkolo eziboniswa esidlangalaleni. Ezinye izingubo zibonakala ezindaweni ezikhethekile zokukholwa kuphela. Isibonelo, izevatho zasethempeli leBandla likaJesu Kristu labaNgcwele beziNsuku zokuGcina, zaziwa njengezivatho zobuphristi obungcwele, zigqokwa kuphela ngaphakathi kwamathempeli abaNgcwele beziNsuku zokuGcina futhi zibekelwa imikhosi engcwele kakhulu yokholo lwabo. Izingubo ezimhlophe zifanekisela ubumsulwa nokulingana. Umholi weBandla ophakeme kakhulu kanye nelungu elisha kakhulu abehlukaniseki uma begqoke ngendlela efanayo. Abesilisa nabesifazane bagqoka izingubo ezifanayo, ezivusa izimpawu zenkolo okusikhumbuza amasiko asethempelini achazwe eThestamenteni Elidala.
EBandleni likaJesu Kristu labaNgcwele beziNsuku zokuGcina, azikho izingubo zenkolo ezikhethekile zasenkonzweni ezivamile zangeSonto.
Nokho, abaNgcwele beziNsuku zokuGcina abaningi abathembekile bagqoka isembatho ngaphansi kwezingubo zabo esinokubaluleka okujulile kwezenkolo. Lesi sembatho sangaphansi esinesizotha siba yizicucu ezimbili futhi ngokuvamile sibizwa ngokuthi “isembatho sasethempeli.”
Abanye abantu babuye babize izembatho zasethempelini ngendlela engafanele ngokuthi “izingubo zangaphansi ezinomlingo.” Lamazwi awagcini nje ngokungabi iqiniso, kodwa futhi ayeyisa kumalungu eBandla likaJesu Kristu labaNgcwele beziNsuku zokuGcina. Akukho okungumlingo noma okungaqondakali ngezembatho zasethempelini, futhi amalungu eBandla acela izinga elifanayo lenhlonipho nokuzwela okunganikezwa kunoma iyiphi enye inkolo ngabantu abathakazelayo.
Izembatho zasethempelini zigqokwa ngamalungu amadala eBandla amalungu enze izithembiso ezingcwele zokwethembeka emiyalweni kaNkulunkulu kanye nevangeli likaJesu Kristu.
Kumalungu eBandla, isembatho sasethempeli esinesizotha esigqokwa ngaphansi kwezingubo ezijwayelekile kanye nezevatho ezingokomfanekiso ezigqokwa ngesikhathi sokukhonza ethempelini zimele ingxenye engcwele neyomuntu siqu yobudlelwane babo noNkulunkulu kanye nokuzibophezela kwabo ekuphileni okuhle, nezimpilo ezihloniphekile.
