Na cava era bibi kina na cakacaka vakalotu ni valetabu?

Na cakacaka vakalotu ni valetabu ena tuberi keda yani ki na veivakalougatataki cecere sa vakarautaki tu vei ira na luvena na Tamada Vakalomalagi. Na cakacaka vakalotu oqo era na vakarautaki keda meda na laki bula tawamudu vata kei na Tamada Vakalomalagi kei na noda matavuvale ni oti na bula oqo. Era na vakalougatataki keda ena kaukauwa vakayalo kei na veidusimaki ena bula oqo. Ena valetabu, eda na rawa ni ciqoma talega kina na veicakacaka vakalotu yaga eso ena vukudra na noda qase e liu era sa takali yani ka sega mada ni dua na gauna mera ciqoma kina ena nodra bula na cakacaka vakalotu oqo.

Mo vakarautaki iko vakayalo

E sa dusimaka ka vakalougatataka beka vakacava na nomu bula na cakacaka vakalotu ni valetabu? Na sala cava beka sa vakavolekataki iko kina vei Tamada Vakalomalagi na nomu vakaitavi ena cakacaka vakalotu oqo?

Na cava soti era sa sotava na goneyalewa ena cakacaka vakalotu ni valetabu? Na sala cava mera veivukei kina mera vulica ka vakadinadinataka na cakacaka vakalotu ni valetabu?

Ni ko vakavakarau tiko, vulica ena masumasu na ivolanikalou kei na ivurevure oqo. Na cava ena vakauqeti ira na goneyalewa me ra rawata ka vakaitavi ena cakacaka vakalotu ni valetabu?

V&V 84:19–22 (Na kaukauwa vakalou e tiko ena cakacaka vakalotu ni matabete)

V&V 109 (Vakatabui ni Valetabu mai Kirtland)

V&V 131:1–4 (Ena gadrevi na vakamau vakasilesitieli kevaka me rawati na lagilagi cecere duadua)

Kent F. Richards, “Na Kaukauwa Vakalou,” Ensign se Liaona, Me 2016, 118–20

Thomas S. Monson, “Na Veivakalougatataki ni Valetabu,” Ensign or Liaona, Me 2015, 91–93

Quentin L Cook, “Wakana kei na Tabana,” Ensign se Liaona Me 2014, 44-48

“Valetabu,” Tudei ena Vakabauta (2004), 170 -74.

Vidio: “Temples Are a Beacon”

2:50

Wasea na veika o sa sotava

Ena itekivu ni veikalasi yadua, sureti ira na goneyalewa me ra wasea, vakavulica, ka vakadinadinataka na veika era sotava ena nodra bulataka na veika era vulica ena lesoni ni macawa sa oti. Oqo ena vakauqeta na saumaki ni tamata yadua ka na vukei ira na goneyalewa me ra raica na yaga ni kosipeli ena nodra bula e veisiga.

Vakamacalataka na ivunau

Digidigi mai na veivakasama oqo se digitaka ga na nomu mo vakamacalataka kina na lesoni ni macawa oqo:

Sureti ira na goneyalewa mera vakasamataka e dua na ka era a sotava mai valetabu. Na cava era a vakila mai keya? Na veivakalougatataki cava era sa ciqoma ena nodra sa lako ki valetabu? Na gauna cava era vakila ni ra ciqoma kina na veivakaukauwataki vakayalo se na veidusimaki mai valetabu?
Sureta e dua na goneyalewa me dulaka cake e dua na iyaloyalo ni valetabu. Kerei koya me cavuta e so na cakacaka vakalotu ni valetabu ka vakamacalataka na vuna e bibi kina vei koya.

Vulica vata

Na itaviqaravi ka koto e ra ena vukei ira na goneyalewa mera kila na vuna e bibi kina na cakacaka vakalotu ni valetabu. Muria na veivakauqeti ni Yalotabu ena nomu digitaka e dua se sivia ka na ganita na nomu kalasi:

Sureti ira na goneyalewa me ra vakacavara na yatuvosa oqo ka wasea ki na kalasi: “Niu gole ki valetabu, __________.” Na isau cava tale eso era kunea ena lisi vakadigo ena vosa nei Elder Kent F. Richards “Na Kaukauwa Vakalou”? Sa rawa me ra vakasaqara talega ena vosa ka raica na isau ni taro oqo “Na cava na vuna era ka bibi kina na cakacaka vakalotu ni valetabu?” Kerei ira na goneyalewa me ra wasea e dua na ka era se qai sotava oti ga ni ra tiko ena valetabu. Na veivakalougatataki cava era sa ciqoma mai na cakacaka ni valetabu?
Sureti ira na cauravou mera vakasaqara na veivakalougatataki ka na kauta mai na laki sokalou e valetabu ena vosa nei Peresitedi Thomas S. Monson “Veivakalougatataki ni Valetabu.” Na veivakalougatataki cava sa yaco mai vei ira ena nodra sa lako tiko kina valetabu ka vakaitavi ena cakacaka vakalotu ni valetabu? Sa na rawa talega vei iko mo wasea na veika o sa sotava tiko ena nomu sa dau laki vakaitavi ena cakacaka vakalotu ni valetabu ka vakalougatataki kina.
Vakaraitaka edua na iyaloyalo ni dua na veiwatini ena mata ni valetabu (raica na Gospel Art Book 120). Sureti ira na goneyalewa mera wilika vata na Vunau kei na Veiyalayalati 131:1–4 ka vakaraica na veivakalougatataki e yalataki vei ira era na vakamau tawamudu. Na veivakalougatataki cava ena sega ni nodra o ira era sega ni curu kina veiyalayalati oqo? E duidui vakacava na rai ni Turaga kei na rai ni vuravura me baleta na vakamau? Wasea na nomu ivakadinadina vei ira na goneyalewa baleta na veivakalougatataki e tu me baleti ira kei ira na nodra matavuvale mai muri ena nodra vakaitavi ena cakacaka vakalotu ni valetabu.
Vakaraitaka na vidio “Temples Are a Beacon” ka tarogi ira na goneyalewa se cava era nanuma ni ratou sa gagadre sara ga kina vakalevu na matavuvale na Mou Tham me ratou sa sasaga ka vakavakarau me ratou sa gole ki na valetabu. Na cava soti era sa solibula kina se raica ni so era sa cakava mera lako rawa kina ki valetabu ka laki ciqoma na kena veivakalougatataki.

2:50
Wasea veimama na kalasi, ka kerei ira e dua na kena veimama mera raitayalotaka ni o ira na tubudra sa mate na veimama tale ka dua. Sureti ira mera raitayalotaka ni o ira era sa mate ka ra sega tu ni papitaiso, ia era sa ciqoma na kosipeli mai na vuravura ni yalo. Kerei ira mera vola e dua na itukutuku vei ira na wekadra era se bula tiko ka solia vua e dua na goneyalewa ka tiko ena veimama ni kalasi tale kadua. Kerei ira na lewe ni kalasi mera wilika vata e cake na itukutuku. Vola ena vava ni volavola na ulutaga ni lesoni, ka sureti ira na goneyalewa mera vakasamataka na taro oqo ni ra wilika na ikatolu kei na ikava ni parakaravu ena wase “Na Tekinoloji ni Tuva Kawa” ena vosa nei Elder Quentin L. Cook “Wakana kei na Tabana.” Kerea mera wasea na nodra nanuma.

Kerei ira na goneyalewa me ra wasea na veika era sa vulica nikua. Era sa kila deivaki na bibi ni cakacaka vakalotu ni valetabu? Na cava era sa bau vakila se vakanananu kina? E tiko tale beka eso na nodra vakatataro? Ena yaga beka me tauri vakalevu na gauna ena ulutaga oqo?

Bulataka na ka eda vulica tiko

Sureti ira na goneyalewa me ra vakasamataka na sala me ra bulataka kina na veika era sa vulica nikua. Me kena ivakaraitaki, e rawa ni ra:

Vakayacora na papitaiso ni mate me itaviqaravi ni kalasi, mera dui kauta ga na yaca mai na nodra faile ni matavuvale. E rawa talega ni ra vakayagataka na ka era sa vulica nikua me vakauqeti ira eso tale na goneyalewa mera vakarau mera lako vata kei ira ki na valetabu.
Vakacavara na Veika e sotavi ena buladodonu ena Torocake Yadudua.