Na cava era bibi kina na cakacaka vakalotu ki na noqu bula?

Na cakacaka vakalotu sa ikoya e dua na cakacaka tabu vakadonui, ka vakaibalebale vakayalo. Na cakacaka vakalotu e vakayacori ena lewa ni matabete ena ruku ni nodra veiliutaki o ira era taura tu na idola ni matabete. Na cakacaka vakalotu ena vukei keda meda nanuma se o cei o keda ka vakananumi keda ena keda isema vua na Kalou. Era na vukei keda meda lako mai vei Karisito ka ciqoma na bula tawamudu.

Mo vakarautaki iko vakayalo

Na cakacaka vakalotu cava ni kosipeli o sa ciqoma? Era sa vakalougatataka vakacava na nomu bula na cakacaka vakalotu oqo? Na cava era sa rui bibi kina vei iko?

Na cakacaka vakalotu cava era sa ciqoma oti na goneyalewa? Na cakacaka vakalotu cava era sa vakavakarau tiko kina mera ciqoma? Na cava e gadrevi kina mera kila deivaki na bibi ni cakacaka vakalotu ni kosipeli?

Vulica ena masumasu na veiivolanikalou kei na vei ivurevure oqo. Na cava ko sa bau vakauqeti mo wasea vei ira na goneyalewa me vukei ira mera kila na bibi ni cakacaka vakalotu?

Maciu 3:13–17 (Papitaiso nei Jisu Karisito)

Cakacaka 19:1–6 (E papitaisotaki ira tale o Paula e sega ni caka vakadodonu na nodra papitaiso)

3 Nifai 11:21–26 (Solia o Jisu Karisito na veivakadonui ni papitaiso ka veituberi ena kena cakacaka dodonu)

Moronai 8:10–12 (E vakavulica o Moronai na veika baleta na papitaiso)

V&V 84:19–21 (Na kaukauwa ni bulavakalou e dau vakatakilai ena cakacaka vakalotu ni matabete)

Yavu ni Vakabauta 1:3–5 (Sa yaga na cakacaka vakalotu ki na veivakabulai)

David A. Bednar, “Ka na Bokoci na Nomuni iValavala Ca,” Ensign se Liaona, Me 2016, 59–62

Gary E. Stevenson,“Nomu Va na Miniti,” Ensign se Liaona, Me 2014, 84–86

“Cakacaka Vakalotu kei na Veivakalougatataki ni Matabete,” iVoladusidusi 2: Veiliutaki ena Lotu (2010), 20.1

“Cakacaka Vakalotu,” Tudei ena Vakabauta (2004), 109–10

Vidio: “Faith in the Power of the Priesthood”

1:38

Wasea na veika o sa sotava

Ena itekivu ni veikalasi yadua, sureti ira na goneyalewa me ra wasea, vakavulica, ka vakadinadinataka na veika eso era sa sotava oti mai ena nodra bulataka na veika era vulica ena lesoni ni macawa sa oti. Oqo ena vakauqeta na saumaki ni tamata yadua ka na vukei ira na goneyalewa me ra raica na yaga ni kosipeli ena nodra bula e veisiga.

Vakamacalataka na ivunau

Digidigi mai na veivakasama oqo se digitaka ga na nomu mo vakamacalataka kina na lesoni ni macawa oqo:

Vola na vosa cakacaka vakalotu ena vava ni volavola, ka tarogi ira na goneyalewa mera vakatututaka na ivakamacala ni vosa( kevaka mera gadreva na veivuke, dusia vei ira na parakaravu ena itekivu ni ituvatuva oqo). Era na sauma vakacava na goneyalewa na nona kaya e dua ni na sega na betena na cakacaka vakalotu? (Kevaka era gadreva na goneyalewa na vakasama eso, sa rawa mera raica na ulutaga “Na Yalo Tabu kei na Cakacaka Vakalotu ni Matabete” ena vosa nei Elder David A. Bednar “Ka na Bokoci na Nomuni iValavala Ca.”)
Kerei ira na goneyalewa mera vola na levu ga ni cakacaka vakalotu e rawa ni ra vakasamataka. Vukei ira mera dusia na cakacaka vakalotu ena lisi sa volai tu ka na gadrevi me rawa kina na bula va-kalou (kevaka mera gadreva na veivuke, e rawa ni ra wilika na “Cakacaka Vakalotu ” ena Tudei ena Vakabauta). Na cava e solia kina vei keda na Tamada Vakalomalagi na cakacaka vakalotu oqo?

Vulica vata

Na itaviqaravi ka koto oqo e ra ena vukei ira na goneyalewa mera kila na vuna e bibi kina na cakacaka vakalotu. Muria na veivakauqeti ni Yalotabu, ena nomu digitaka edua se sivia ka na ganita na nomu kalasi:

Ena vosa nei Elder David A. Bednar “Ka na Bokoci ni Nomuni iValavala Ca,” na wase “Rawati kei na Maroroi ni Bokoci ni iValavala Ca ena Cakacaka Vakalotu” e vakamacalataka tiko na veivakalougatataki ni cakacaka vakalotu ni papitaiso, na veitabaki ni liga ni isolisoli ni Yalo Tabu, kei na sakaramede. Me ra vukei na goneyalewa me ra vulica na cakacaka vakalotu oqo ena kena rawa ni vukei keda, sureta na goneyalewa yadua me ra digitaka e dua na cakacaka vakalotu ka vola na veika kece e kila kina mai na wase oqo. Mo qai sureta na goneyalewa me vakavulica vei ira na vo ni kalasi na veika sa vulica ena sala vou eso—me vaka na vakayagataki ni iyaloyalo se dua na qito.
Sureta e dua me mai vosa se dua na goneyalewa sa rawata na itavi eso e bibi me wasea na veika e gadrevi ena kena rawati o ya kei na sala a rawata kina (me vakataka nona rawata na icovi ni Torocake Yadudua, rawata e dua na icovi vakavuli, se rawata nona a digitaki ki na dua na vakatasuasua). Mo qai sureta na goneyalewa me wilika na parakaravu e tekivu tiko ena “Kei na sala vata ga” mai na vosa nei Elder Gary E. Stevenson “Nomu Va na Miniti.” Era sa yaco vakacava me ilalavaki na cakacaka vakalotu e wasea tiko o koya a vosa? Sa rawa talega mo wilika na vo ni vosa nei Elder Stevenson, mo raica kina na veika tale eso e vakavulica o koya baleta na cakacaka vakalotu.
Raica lesu kei ira na kalasi na lisi ni va na ka ena gadrevi me qaravi kina e dua na cakacaka vakalotu ena wase 20.1 ni iVoladusidusi 2. Sureti ira na goneyalewa mera wilika na 3 Nifai 11:21–26 ka qai vakaraica se a sotavi vakacava na veika e gadrevi ena nona ivakamacala na iVakabula baleta na papitaiso. Tarogi ira mera vakasamataka edua na cakacaka vakalotu era sa vakadinadinataka oti ka vakamacalataka na va na ka e gadrevi tiko. Na cava ena yaco kevaka me caka e dua na cakacaka vakalotu, qai sega ni sotavi na veika e gadrevi? Tarogi ira na goneyalewa se cava sa rui bibi kina mera kila tiko na veika ena gadrevi.
Sureti ira na goneyalewa mera raitayaloyalotaka ni ra vakavulica tiko e dua mai na dua tale na matalotu baleta na papitaiso, qai tukuna mai o koya, “Au sa papitaiso oti ena noqu lotu.” Era na vukei koya vakacava na goneyalewa me na kila ena ivakamacala malumu ni dodonu vua me papitaiso tale? Na ivolanikalou se veikacava era sa sotava mera na wasea? Mo na vukei ira mera raica na lisi ka na gadrevi mera kila ena wase 20.1 ni iVoladusidusi 2; Maciu 3:13–17; Cakacaka 19:1–6; 3 Nifai 11:21–26; se Moronai 8:10–12. Kevaka e rawa, sureti ira mai na daukaulotu tudei mera mai tiko ena kalasi ka wasea se na cava era dau tukuna vei ira na nodra dauvakatataro baleta na bibi ni cakacaka vakalotu (kerea taumada na veivakadonui nei bisopi).
Wasea vei ira na kalasi na vosa oqo nei Peresitedi Spencer W. Kimball: “Na cakacaka vakalotu e dau tu me vakalesuya mai na vakasama. O ya na inaki dina ni sakaramede, meda kakua ni guilecava, me vukei keda meda nanuma tiko” (Veivakavulici nei Spencer W. Kimball, ed. Edward L. Kimball [1982], 112). Tukuna vei ira na goneyalewa mera vola na cakacaka vakalotu ni kosipeli (me vaka e volai tu ena tabana e 109-10 ena Tudei ena Vakabauta) ka veitalanoataka se cava ena vukei keda kina e dua na cakacaka vakalotu meda dau nanuma tiko.

Kerei ira na goneyalewa mera wasea na veika era sa vulica nikua. Era sa kila deivaki li na bibi ni cakacaka vakalotu? Na cava era sa bau vakila se vakanananu kina? E tiko tale beka eso na nodra vakatataro? Ena yaga beka me tauri vakalevu na gauna ena ulutaga oqo?

Bulataka na ka eda vulica tiko

Sureti ira na goneyalewa me ra vakasamataka na sala me ra bulataka kina na veika era sa vulica nikua. Me kena ivakaraitaki, e rawa ni ra:

Vakavulica e dua na lesoni ni lotu ni matavuvale ena bibi ni cakacaka vakalotu.
Vakacavara na Yavunilewa ni Vakabauta 4 se Yavunilewa ni Bula Vakalou 4 ena Torocake Yaduadua.

Wasea kei ira na goneyalewa na ka era na vulica ena macawa mai oqo. Na cava e rawa ni ra cakava me ra vakavakarau kina ena vuli? Me kena ivakaraitaki, e rawa ni ra wilika e dua na vosa, sarava e dua na vidio, se vulica e dua na tiki ni ivolanikalou e semati ki na lesoni ena macawa mai oqo.

Veisemati ni iTaviqaravi ni iTabagone

Yavutaka e dua na itaviqaravi ni Muavata ka na rawa ni vukei ira na goneyalewa mera bulataka na veika era sa vulica mai na lesoni oqo.