Na cava na vu ni noda saumi ikatini?

Na saumi ikatini sa dua na madigi tabu. Ni da sauma na noda ikatini, eda sa vakavinavinakataka tiko kina na veika kece e solia vei keda na Kalou ka vakasuka lesu Vua e dua na tiki ni ka eda sa mai taura. E vakayagataki na ikatini me tara kina na valetabu kei na valenilotu, vakadewataki ka tabaki vakaivola na ivolanikalou, vakayacori kina na cakacaka ni kaulotu kei na tuva kawa, kei na sala tale eso ni kena tarai cake na matanitu ni Kalou.

Mo vakarautaki iko vakayalo

Vakasamataka na veivakalougatataki vakayalo kei na vakayago o sa ciqoma mai na nomu saumi ikatini. Na cava soti sa yaco vei iko ka rawa mo wasea vei ira na cauravou ?

Na cava na vuna ena bibi kina vei ira na cauravou me ra saumi ikatini? E rawa vakacava mo vakavulici ira ena bibi ni kena bulataki na lawa ni ikatini?

Na ivolanikalou kei na ivurevure cava tale eso ena vukei ira na cauravou me ra kila na vuna eda saumi ikatini kina?

Malakai 3:8–10; 3 Nifai 24:8–10; V&V 64:23 (Veivakalougatataki yalataki ni ikatini)

V&V 119 (Vakatakilai na lawa ni ikatini)

David A. Bednar, “Na Kaukauwa ga Vakalomalagi,” Ensign se Liaona, Me 2012, 48–51

Henry B. Eyring, “ Na Veivakalougatataki ni iKatini, ” Liaona, June 2011, 4–5

Carl B. Pratt, “Nona Veivakalougatataki Cecere Duadua na Turaga,” Ensign kei na Liaona, Me 2011, 101–3

“iKatini,” Tudei Ena Vakabauta (2004), 22–24

“ iKatini Kei Na Soli Ka,” Me iSakisaki Ni iTabagone (2011), 34–35

Veivakavulici ena ivakarau ni iVakabula

A veivakabauti vei ira na Nona tisaipeli na iVakabula, ka solia vei ira na itavi me ra veivakavulici, veivakalougatataki, ka qaravi ira na tani. Mo na vakaraitaka vakacava ni ko sa vakabauti ira tiko na cauravou ka solia vei ira na madigi mera vakavulici ira na tamata?

Raica mera veiliutaki na cauravou

Me liutaka na bose ni kuoramu e dua na lewe ni mataveiliutaki ni kuoramu (se ivukevuke vua na bisopi ena kuoramu ni bete). Ena liutaki ira na cauravou okoya ena veivakasalataki vakaiira me baleta na bisinisi ni kuoramu, vakatavulici ira ena nodra itavi vakamatabete (mai na ivolanikalou kei na ivola iTavi Vua na Kalou ), vakayaloqaqataki ira ni wasea na veika era sotakaya ena vakayacori ni itavi vua na Kalou, ka sureta e dua na daunivakasala se dua tale na lewe ni kuoramu me vakatavulica e dua na lesoni vakosipeli. Ena rawa me vakavakarau o koya ena nona vola e dua na ituvatuva ni soqoni ni kuoramu ena gauna ni bose ni mataveiliutaki.

Tekivuna na gauna ni vuli-ka

Digidigi mai na veivakanananu oqo se vakasamataka ga vakaiiko na nomu mo raicalesu kina na lesoni ni macawa sa oti ka vakatakila na lesoni ni macawa oqo:

Vola ena vava ni volavola na taro mai na ulutaga ni lesoni ni macawa sa oti, ka kerea me dua na cauravou me sauma na taro o ya ni vakayagataka na ka sa vulica ena macawa sa oti.
Vola ena vava ni volavola, “Na cava na vuna o saumi ikatini kina?” Sureti ira na cauravou me ra raitayaloyalotaka ni dua na itokani mai na dua tale na lotu e tarogi ira ena taro oqo. Era na sauma vakacava? Vakauqeti ira me ra wasea na veika era sa sotava o ira se na nodra matavuvale ka semati ki na ikatini.

Vulica vata

Na itaviqaravi ka koto qo e ra ena vukei ira na cauravou me ra na kila na lawa ni ikatini. Mai na veivakauqeti ni Yalotabu, digitaka e dua se sivia ka na ganita vinaka na nomu kalasi:

Kerei ira na cauravou me ra vakasaqara ena Malakai 3:8–10 kei na V&V 64:23 ka wasea na yalayala e baleti ira na dausaumi ikatini. Kerei ira na cauravou me ra vakasaqara se cava e namaka vei keda na Turaga meda sauma ena ikatini mai na wiliki niV&V 119 (vakamacalataka ni “tubu” sa ikoya na noda “ ilavo” eda rawata vakayabaki). Veisoliyaka yani na risiti ni ikatini, ka raici ira na cauravou me ra veivosakitaka vata na kena ivakavakayagataki. Wasea na nomu sa vakalougatataki ena nomu saumi ikatini.
Vola na iulutaga e tolu oqo ena tolu na iyatu ena vava ni volavola: Veivakalougatataki, Vakayagataki Ni iLavo, kei na iVakarau. Wasea na kuoramu ki na vica na ilawalawa lalai, ka lesia ki na ilawalawa yadua e dua vei ira na ulutaga mera vakadikeva ka tiko ena Me iSakisaki ni iTabagone: “iKatini kei na Soli Ka .” Kerei ira me ra vola ena vava ni volavola na cava era sa kunea ena iyatu e veiganiti kaya. Sureta e vica vei ira me ra wasea nodra ivakadinadina ena lawa ni ikatini.
Wilika, vakaraitaka, se tukuna na italanoa nei tukai Elder Pratt mai na “Nona Veivakalougatataki Cecere Duadua na Turaga.” Solia na ilavelave ni vosa vei ira na cauravou, ka kerei ira mera raica e dua vei ira na lesoni sa vulica rawa o Elder Prattt mai vei tukana ka wasea ki na kuoramu. Sureti ira na cauravou mera tukuna na gauna era a vakalougatataki kina kei na nodra matavuvale ni ra sauma na nodra ikatini (se wasea ga na ka o a sotava).
Wasea na kuoramu ki na rua na iwasewase. Kerea e dua na ilawalawa mera wilika na malanivosa nei Peresitedi Henry B. Eyring “Na Veivakalougatataki ni iKatini,” ka kerea na ilawalawa kadua mera wilika na parakaravu 2–13 ni vosa nei Elder David A. Bednar “Na Katuba ni Lomalagi.Kerei ira me ra wilika na vosa, me ra vola na veivakalougatataki eda ciqoma ena noda sauma na ikatini, ka qai vola na veivakalougatataki ena vava ni volavola. Sureti ira na cauravou me ra wasea na veivakalougatataki era sotava vata kei na nodra matavuvale mai na saumi ikatini. Tarogi ira ena veivuke vakacava ni ra sa na vakamau ka vakamatavuvale na kena bulataki na lawa ni ikatini.

Kerei ira na cauravou mera wasea na veika era sa vulica nikua. Era kila tiko beka na vuna eda sauma kina na ikatini? Na cava era sa bau vakila se vakanananu kina? E tiko beka eso tale na nodra vakatataro? Ena yaga beka me na tauri vakalevu na gauna ena ulutaga oqo?

Veisureti me caka

Me na tinia na soqoni na cauravou ka veiliutaki tiko. Sa rawa vua me:

Wasea na vuna e tiki bibi kina ni nona bula na saumi ikatini.
Bolei ira na lewe ni kuoramu mera dau sauma na nodra ikatini.