“Nakaapekto Ba ang Imong Algoritmo sa Imong Espirituwalidad?,’” Liahona, Sept. 2026.
Gikan sa YA Matag Semana
Nakaapekto Ba ang Imong Algoritmo sa Imong Espirituwalidad?
Mabinantayon ka ba sa mga butang nga imong gibasa ug gitan-aw sa online?
Dili pa lang dugay, naghunahuna ko kon unsaon nako nga mahimong mas maayong disipulo. Gusto kong mohimo og mga kausaban aron matabangan ko nga mobati nga mas nahiuyon sa Espiritu.
Siyempre, ang direksyon nga akong gipangita gikan sa usa ka Apostol, sa dihang si Elder Ronald A. Rasband sa Korum sa Napulog Duha ka Apostoles mibisita sa Lima, Peru, ug mihatag og debosyonal sa mga young adult dinhi.
Siya misulti kanamo unsa ang bag-ohay lang nga gisulti sa propeta (Presidente Russell M. Nelson [1924–2025] niadtong panahona), kinsa gusto nga iyang isulti sa mga young adult kon unsa siya ka mapasalamaton nga kami mipili nga magpuyo nga matarong.
Gisugdan ni Elder Rasband ang paglista sa mga piho nga butang nga among gibuhat isip mga disipulo ni Jesukristo. Samtang naminaw ko, gibati nako nga maayo ang akong nahimo sa akong pagkadisipulo! Apan unya miingon siya, “Ug salamat nga mabinantayon kamo sa mga salida ug mga serye sa telebisyon nga inyong gitan-aw.”
Mibati dayon kog kabalaka. Nianang gabhiona, sinsero kong namalandong ug nangutana sa akong kaugalingon, “Mabinantayon ba gayod ko sa mga butang nga akong gitan-aw—mahitungod sa bisan unsa sa media nga akong natan-aw?”
Kong ako sa tinuod, ang akong tubag kay dili.
Hunahunaa ang Tanan nga Imong Tan-awon
Ania kita sa usa ka henerasyon nga walay kinutoban ang pag-akses sa media, ug bisan unsang matang (o gidaghanon) sa sulod nga magamit nga walay mga pagdili.
Sa personal, naningkamot ko nga likayan ang pagtan-aw og mga pasundayag o mga salida nga adunay mga bastos nga sulod, apan akong naamgohan nga ang komento ni Elder Rasband dili lang kay limitado sa telebisyon; kini magamit sa tanan nakong gibasa, gitan-aw, ug gipaminaw.
Nahunahuna nako ang social media ug ang tanang mubo nga mga bidyo, mga meme, ug mga imahe nga akong gi-like ug gipakigbahin niadtong mga plataporma—daghan niini adunay parehas nga dili maayong pinulongan, dili angay nga mga mensahe, o bastos nga pasiaw nga kasagaran akong likayan bisan asa pa.
Si Sister Becky Craven, kanhi Ikaduhang Magtatambag sa Kinatibuk-ang Kapangulohan sa Young Women, kausa mipakigbahin kon unsa ang gipasabot sa pagkaanaa sa “naa sa tunga,” diin ang atong mga aksiyon mahimong masagolan sa maayo ug dili kaayo maayo. Siya nangutana: “Mabinantayon ba kita o dili kaayo magtagad kon unsa ang atong gibasa ug unsa ang atong gitan-aw sa TV ug sa atong mga mobile device? Mabinantayon ba kita sa atong mga pinulongan? O yano nga modawat sa law-ay ug bastos?”
Wala ra gayod ko magtagad.
Usba ang Algoritmo
Mao nga nakahukom ko nga mohimo og “paglimpyo” sa social media ug i-reset ang akong algoritmo. Nag-unfollow ko sa pipila ka account, ug giusab nako ang akong mga filter ug settings. Nakatabang kini nako nga mas magmabinantayon sa akong mga pagpili.
Nakaamgo usab ko kon sa unsang paagi bisan ang gagmay, daw dili makadaot nga pagkabantang sa dili angay nga media makaapekto sa akong koneksiyon ngadto kang Jesukristo sa paglabay sa panahon.
Matag higayon nga mogamit kamo og teknolohiya, bantayi ang inyong tuyo. Mahimo kang modesisyon unsay imong makita, unsay imong madungog, kinsa ang imong i-follow, ug unsay imong ipakigbahin.
Si Elder Ulisses Soares sa Korum sa Napulog Duha ka Apostoles bag-o lang naghisgot bahin sa pagpalambo sa pagpugong sa kaugalingon, nga naglakip sa pagpili nga molihok uban ang espirituhanong kaalam. Siya miingon, “ang pag-ugmad og pagpugong sa kaugalingon usa ka makahuloganong paagi sa pagpanalipod sa atong mga kalag batok sa dili maklaro apan makanunayon nga espirituwal nga pagkahuyang tungod sa kalibotanong mga impluwensya nga makapahuyang sa atong pundasyon diha ni Jesukristo.”
Nagtuo ko nga daghang espirituhanong pagkaguba naggikan sa media nga atong giapilan.
Ang Ginoo wala magdahom nga kita mahimong hingpit karon, apan kon maningkamot kita nga dunay katuyoan ang atong paggamit sa media, atong ma-reset dili lang ang atong mga algoritmo sa social media apan lakip na usab ang atong espirituhanong mga algoritmo. Pinaagi sa pagpili og media nga makabayaw, makatudlo, ug makalingaw sa maayong paagi, atong madapit ug mamatikdan ang presensya sa Espiritu nga mas makanunayon sa atong kinabuhi.
Ang tagsulat nagpuyo sa Callao, Peru.