Asa Kita Gikinahanglan? Mga Kasinatian sa Pagserbisyo sa Tibuok Kalibotan
Ang pag-atiman niadtong nanginahanglan mao ang usa ka paagi sa mga young adult nga makasinati og koneksiyon, gugma, ug paglambo.
Kitang tanan adunay mga gutlo sa kinabuhi diin ang mga butang wala mahitabo sa panahon o paagi nga gusto nato. Si Lydia nakasinati gayod niini sa dihang iyang gipahayag ang iyang pagbati diha sa hugot nga pag-ampo.
“Langitnong Amahan, naningkamot ko nga mahimong takos sa panalangin sa kaminyoon—nga makabaton og pamilya ug padak-on sila sa ebanghelyo,” nahinumdom siya nga nag-ampo usa ka gabii didto sa templo. “Apan walay nahitabo, ug dili ko makasabot kon ngano. Paapila ko sa dula! Gikapoy na kong maglingkod ra sa daplin. Tugoti ko nga mahimong usa ka asawa, tugoti ko nga mahimong usa ka inahan, tugoti ko sa pagpalambo sa buhat.”
Sa malinawon nga kahilom sa templo, ang Langitnong Amahan paspas nga mitubag: “Anaa na ka sa dula, busa pagsugod na sa pagdula.”
Isip mga young adult, kasaragan gusto kita nga adunay makab-ot ug mangandoy sa importante nga mga kauswagan, pagkaminyo man, pag-eskwela, o pagsugod og bag-ong trabaho. Normal ra nga mobati nga natanggong kon wala mahitabo ang giplano sa kinabuhi, apan sama sa nadiskobrehan ni Lydia, ang Dios adunay ipabuhat nato sa matag ang-ang sa atong kinabuhi.
“Misugod ko sa pagpangutana sa akong kaugalingon, ‘Unsa man ang gihangyo nga akong buhaton kon asa ko karon?’” Si Lydia mihinumdom. Iyang nasabtan nga, isip usa ka young single adult, anaa siya sa maayong nahimutangan sa pagtabang niadtong nanginahanglan: “Akong naamgohan nga kinahanglan kong magmakugihon sa pagserbisyo sa uban.”
Ang pag-atiman niadtong nanginahanglan mao ang usa ka paagi nga kita nagtahod sa atong mga pakigsaad sa bunyag ug sa templo. Kini usa ka gasa usab gikan sa Ginoo: usa ka paagi nga makasinati og koneksiyon, gugma, ug paglambo samtang kita “nagkahiusa sa kasingkasing ug sa hunahuna, [nagpuyo] sa pagkamatarong; [walay] kabos taliwala [kanato]” (Moises 7:18). Sa paghatag og gibug-aton ug pagsaulog niini nga buhat, Ang Simbahan ni Jesukristo sa mga Santos sa Ulahing mga Adlaw nag-andam og tinuig nga report aron ipakita ang buhat nga gihimo sa Simbahan ug sa mga miyembro niini sa pag-atiman niadtong nanginahanglan.
Matag tuig, ang mga young adult sa tibuok kalibotan mopakita sa ilang makugihon nga mga paningkamot nga “moapil sa dula” ug moserbisyo kon asa sila gikinahanglan. Ania ang pipila sa ilang mga istorya.
Pagserbisyo sa Komunidad sa Bolivia
Sobra sa 50 ka young single adult gikan Tarija Bolivia Tabladita Stake ang nagpundok alang sa usa ka kalihokan sa pagserbisyo sa Tarija Urban Bio-Park. Sa pagpalambo sa mga kahimtang sa parke alang sa ilang komunidad, ang mga boluntaryo mihimo sa ilang labing maayo gikan sa pagliha ug pagpintal sa mga railing, mga karatula, ug mga koral ngadto sa pagpanglimpyo sa mga kanal.
“Usa ka sugo nga atong gitahod mao ang pagtabang sa atong silingan,” miingon si Lidia, usa ka lokal nga lider sa Simbahan. “Isip mga miyembro sa Simbahan, kita andam kanunay sa paghimo sa boluntaryo nga paagi ug uban sa gugma. Espesyal kaayo kini nga kasinatian alang namo.”
Si Maria, ang biologist nga gisangonan sa Bio-Park, midugang: “Malipayon kaayo kami sa serbisyo nga gihatag niining mga batan-on. Kini nga dapit gipanag-iya sa tanan, ug ang ilang kontribusyon importante kaayo, kay makahatag kiini og kaayohan sa mga tawo nga mobisita.”
Pagtrabaho inubanan sa Gugma didto sa Bulgaria
Singkwenta ka young adult gikan sa napulo ka European nga mga nasod ang nagpundok sa Bulgaria sulod sa usa ka semana sa pagserbisyo sa usa ka eskwelahan alang sa kabataan nga nahikawan sa sosyal nga paagi. Ang usa ka semana nga kalihokan, giorganisar sa lokal nga mga lider, mitimaan sa sinugdanan sa upat ka hugna sa proyekto sa pag-ayo ug pag-landscape sa Dimitar Ekimov School of Arts and Crafts.
Ang mga partisipante mitrabaho sugod alas 9:00 sa buntag hangtod alas 5:00 sa hapon sulod sa lima ka adlaw aron sa pagpanghinlo sa mga sagbot, mga kahoy-kahoy, naglambod nga mga kahoy, ug mga bato, nag-usab sa libon nga luna ngadto sa umaabot nga dulaanan nga dapit alang sa mga bata nga nag-eskwela. Ang mga boluntaryo mitapos sa ilang semana sa paningkamot pinaagi sa usa ka alegreg pang-kultura nga pagsaulog nga puno sa tradisyonal nga Bulgarian nga mga folk song ug mga sayaw gikan sa tibuok kalibotan.
Pag-atiman sa mga Bata sa Turkey
Sa Turkey, 29 ka young single adult ang miapil uban sa lokal nga mga lider ug opisyales sa eskwelahan aron sa pag-usab sa gidumala sa estado nga mga pinuy-anan sa mga bata.
Sulod sa tulo ka adlaw, ilang gipanindot ang pasilidad pinaagi sa pagpintal sa mga bungbong, pag-landscape sa mga yuta, pagbutang og ekipo sa dulaanan, ug pagdonar og pang-hygiene ug pang-edukasyon nga mga pakete. Ang ilang mga paningkamot nakahimo og malungtarong epekto—ug nagdala og kalipay sa mga bata ug mga kawani.
Pagserbisyo Kon Asa Ka
Sama ni Lydia ug niining mga young single adult sa tibuok kalibotan, ikaw gikinahanglan sa imong ward, kasilinganan, ug uban pa. Ang pagserbisyo niadtong nanginahanglan mao ang buhat nga imong mahimo diha sa Relief Society o sa korum sa mga elder. Kini mahimong ingon ka yano sama sa pagpaminaw ngadto sa usa ka higala nga nanginahanglan o pagboluntaryo og pipila ka oras sa lokal nga pundohanan og pagkaon nga imong makit-an pinaagi sa JustServe.org. Human sa tanan, “pinaagi sa gagmay ug yanong mga butang, mahitabo ang dagkong mga butang” (Alma 37:6).
Samtang naglambo kita sa atong kapasidad sa pagserbisyo, kita mahimong masaligon nga ang Dios nakaila nato, nahigugma nato, ug makatudlo nato pinaagi sa Balaang Espiritu sa tinuoray nga pagsunod sa una ug ikaduha nga dagkong sugo (tan-awa sa Mateo 22:37–39).
Gustong makakita sa daghan pang paagi nga ang mga young adult nagserbisyo niadtong nanginahanglan sa tibuok kalibotan? Susiha ang “Pag-atiman Niadtong Nanginahanglan: 2025 nga Report” sa Simbahan aron makita kon sa unsang paagi nga ang mga miyembro sama nimo miatiman sa ilang mga silingan pagka-2025—usa ka gamayng buhat sa gugma sa usa ka higayon.