Ilabina na sa mga Bag-ong Kinasal
Paggahin og Luna alang sa Personal nga mga Kahuyang sa Kaminyoon
Ang mga kahuyang ug mga hagit makatabang nimo ug sa imong kapikas nga mas mapaduol ngadto sa Dios.
Upat ka tuig na nga naminyo ngadto sa akong kapikas sa pagkatinuod wala makahimo nakong eksperto sa kaminyoon. Apan niana nga panahon, kami adunay mga hagit, ang matag hagit nagbira namo sa paagi nga nakapalig-on sa among relasyon ug nakapalawom sa among gugma sa usag usa.
Apan ang matag leksiyon mipahinumdom usab namo nga kami dili hingpit nga mga tawo—kaming duha adunay mga kahuyang sa among kaugalingon—ug nga ang mahangtorong kaminyoon nagkinahanglan og nagpadayon nga paningkamot, sakripisyo, pagtubo, ug pagsalig nganha sa Manluluwas.
Aron matabangan ka ug ang imong kapikas nga malikayan ang wala kinahanglana nga panagbangi, ania ang importante nga mga leksiyon nga akong nakat-onan sa paggahin og luna alang sa personal nga mga kahuyang sa kaminyoon.
Moingon og “Gipasaylo Ko Ikaw” sa Tinuyo nga Paagi
Sa sayong bahin sa among kaminyoon, ang akong bana ug ako kanunay maghisgot sa mga aspeto nga palamboon. Atol sa usa ka seryoso nga panagsultihanay, nangayo ko og pasaylo nga nakapasakit ko niya ug misaad nga mohimo og mas maayo. Apan sa dihang mitubag siya og “gipasaylo ko ikaw,” nakuratan ko.
Naanad ko nga makadungog og “OK ra” human sa pagpangayo og pasaylo, apan kadto nga mga pulong wala makahupay sa kahasol sa akong tanlag. “Gipasaylo ko ikaw” lahi ra paminawon; wala kini motangtang sa akong pagkamaytulubagon. Nakahimo ko og sayop, ug dili diay kini “OK.” Nakapugos kini nako sa pag-atubang sa akong mga binuhatan.
Sukad niana, ang “gipasaylo ko ikaw” nahimong gamhanang bahin sa among kaminyoon. Gigamit namo kini sa tinuyo nga paagi, magsunod sa mga kausaban nga kinahanglan namong himoon. Gireserba namo karon kini nga hugpong sa mga pulong alang sa mga higayon nga kami tinuoray nga nagpasabot niini, nagpahinumdom sa matag usa sa epekto sa among mga binuhatan ug sa kaimportante sa pagpasaylo.
Paghimo sa Imong Kapikas nga May Tulubagon
Kon makita nato ang mga sayop sa atong kapikas, sayon kaayo ang paghimo sa balikbalik nga pag-monitor nila—pagsusi nila, pagpahinumdom nila o pagsamok nila aron pagseguro nga naghimo sila sa hustong butang. Mahimo kining makatental diha sa mga aspeto sama sa pinansiyal, pagsimba, o personal nga mga pakigbisog.
Wala ko makabantay kon unsa na kagrabe ang akong paghimo niini hangtod nga ang usa ka higala mipasabot nga ang pagsige nako og yawyaw sa akong bana dili makaugmad og pagsalig. Ako nagpugos niya nga manubag nako imbes tugotan siya nga mopakita og kaligdong ug sa iyang pagkamaytulubagon ngadto sa Dios. Kining pagsige og yawyaw mao ang usa sa akong mga kahuyang!
Paglabay sa panahon, nakakat-on kami sa pagsalig sa usag usa pinaagi sa paggahin og luna sa paghimo og mga pagpili sa among kaugalingon ug sa pagduol sa usag usa kon kami masayop o nagkinahanglan og tabang. Kita usab makapakita nga kita kasaligan kon kita mohimo og mga pagpili nga nahisubay sa atong gipakigbahin nga mga gituohan ug mopili nga manubag sa usag usa ug ngadto sa Langitnong Amahan. Kini nga paagi nakapalig-on sa among pagsalig sa usag usa. “Ang atong kabubut-on ug kagawasan adunay kahulogan tungod kita may tulubagon sa atubangan sa Dios ug sa atong mga kaugalingon alang sa kinsa kita, alang sa unsay atong nahibaloan ug gibuhat,” sama sa gitudlo ni Elder Gerrit W. Gong sa Korum sa napulog Duha ka Apostol.
Pagpasalig nga Maningkamot sa Pagbuntog sa Atong mga Kahuyang
Pipila nga kahuyang makaapekto sa emosyonal nga kasuod ug pagsalig, mao nga importante nga mogahin og luna alang niini samtang maningkamot sa pagbuntog niini. Tingali lisod kini nga hisgotan ilabi na kon ang piho nga mga batasan walay luna sa inyong kaminyoon. Alang sa akong bana ug nako, dawaton lamang namo ang pipila ka kahuyang kon kami mapasaligon sa pagpadayon sa pagpalambo ug pagkamatinuoron.
Diha sa basahon ni Alma, si Kapitan Moroni nagpalig-on sa siyudad sa mga Nephita aron mapanalipdan batok sa pagpang-atake, nagtukod og koral nga mga troso ug yuta hangtod nahimo kining lig-on kaayo (tan-awa sa Alma 53:4–5). Sa samang paagi, tingali lisod ang pagdawat sa pagkadili hingpit sa atong kaugalingon o sa atong mga kapikas, apan ang pagtan-aw nga ang usag usa naningkamot nga molambo makapalig-on sa emosyonal nga kasuod. Ang pagpaningkamot sa pagpalig-on sa mga kahuyang sa usag usa mao gayod ang mas makapasuod nato, pag-ugmad og mahangtorong kalig-on sa gugma ug suporta.
Ang Imong mga Pakigsaad ngadto sa Dios Nagdala og Gahom
Sa dihang naselyo kamo sa templo, mihimo kamo og mga saad dili lamang ngadto sa usag usa apan ngadto usab sa Dios. Kalabot niining relasyon sa pakigsaad, si Presidente Russell M. Nelson mipahinumdom nato, “Ang ganti sa pagtuman sa mga pakigsaad sa Dios mao ang langitnong gahom—gahom nga mas makapalig-on nato sa pagpakigbatok sa atong mga pagsulay, mga tintasyon, ug mga kasakit.”
Sa mga panahon sa kahuyang, hinumdomi nga pinaagi sa pagtuman sa inyong mga pakigsaad sa templo, kamo angayan nga makadawat og balaanong tabang sa inyong kaminyoon. Uban sa gahom sa Dios, Siya makatabang ninyo sa pagpasaylo, pagsalig, pagpanubag, paggahin og luna alang sa mga kahuyang sa usag usa, ug “himoon ang mahuyang nga mga butang nga malig-on” (Ether 12:27).