E Uiga i Lenei Lomiga
O Le Autu o Lenei Masina: Atiina A’e o le Ola Tutoatasi
Le aufaitau pelē,
Sa matou tauivi teisi ma le faaupuga ola tutoatasi a o matou fuafuaina lenei vaega.
I le tasi itu, matou te mananao ia te outou ia i ai meafaigaluega e fausia ai se olaga lelei, faamalieina ma tausia outou lava ma o outou aiga o loo i ai nei po o le lumanai. Matou te faamoemoe ua outou iloa tou te le tau faalagolago i se isi tagata mo a outou molimau. Matou te mananao ia outou gafatia, saunia, ma, lelei, ola tutoatasi.
I le isi itu, matou te le mananao e auina atu le fe’au faapea, o le gafatia o lona uiga e tatau ona e faia mea uma na o oe. Aua, o le mea e ofo ai, o tagata e sili ona gafatia ma ola tutoatasi e i ai ni sootaga malolosi—ma le Faaola ma tagata o loo siomia ai i latou.
O lea la o la matou faauigaga o le ola tutoatasi e le faalagolago na o oe lava; o le i ai o tomai e fausia ai se olaga mautu ma anoa. Ma e le na o le faapea la o tomai faaletino e pei o le kukaina o se meaai maloloina po o le suia o se pa’u—o le ola faalagolago o le tagata ia te ia lava e faatatau foi i tomai faaleagaga, faalelagona, ma faaagafesootai.
Faatasi ai ma lena i le mafaufau, o nisi nei o tala e faamalosiauina ai oe i lou aoaoina:
-
O le ala na fesoasoani ai le mauaina o se faamanuiaga faapeteriaka ia Elder Morrison o le Fitugafulu e maua ai le taitaiga ma le faamoemoega i lona olaga
-
O le tauiviga umi a se talavou matua i Initia e totogi le aitalafu ma auauna atu i se misiona
-
O le mea na faaosofia ai se talavou matua i Filipaina e faaauau pea ona tulitulimatagau lana aoaoga, e tusa lava pe sa ia lagonaina le tuuatoatasi ma le fefe
-
O le ala na aoao ai e se talavou matua mai Peru e atiina ae ni mausa paia sili atu ina ua ia siitia ese mai le aiga
E i ai foi a tatou tala o se vaega o a tatou soloa’iga faifai pea:
-
Faigalotu Faapitoa: Fautuaga mai ia Elder Boom o le Fitugafulu e uiga i le faapaleniina o mea e faamuamua
-
Tomai o le Olaga: Tomai e fesoasoani ia te oe ia faamanuiaina i lau sailiga galuega
-
Faaaogaina o le Mataupu Faavae ma Feagaiga i Lou Olaga: Lagolago mo lau suesuega o le Sau, Mulimuli Mai ia te A’u e uiga i le sailia o le aoaoina i fafo atu o se aoaoga aloaia
-
Ae maise lava mo tagata faaipoipo fou: O le auala o loo taulimaina ai e se tane ma se tamā talavou le popole e uiga i le tausia o lona aiga
Po o a lava tomai o loo e galue e atiina ae, matou te faamoemoe o le a e faalagolago sili atu ia Iesu Keriso. Afai e foliga mai e taufaafefe le tamaoaiga, afai e te popole e le o gafatia lou soifua maloloina faalemafaufau ma luitau o le olaga i aso uma, pe afai foi o loo e tauivi ma au mausa o le talalelei, ia iloa o loo i ai o Ia iina e faamalosia oe. E talitonu o Ia ia te oe.
Aua e te manatu faatauvaa i lou gafatia e avea ai ma se soo agavaa, agaalofa o Keriso o le e mafai ona fausia Lana Ekalesia ma faamanuia Ana fanau.
O loo matou tapuai atu mo oe.
Alison Wood, YA Weekly Copyeditor