Autalavou Matutua
Tasi le Tali Faigofie i le Lagonaina o le Leai o se Mea e Faamoemoe i ai i se Lalolagi ua Faatamaia i Taua
Sa ou lagona le leai o se faamoemoe e uiga i feteenaiga uma i le lalolagi. Ona ou maua lea o se tali e lei faamoemoeina mai le Tama Faalelagi.
Sa ou lagonaina pea le filemu mai le ola ai i le talalelei a Iesu Keriso, e tusa lava pe le toatele isi tagata o le Ekalesia o siomia a’u.
Sa mafai lava ona ou vaavaai atu i le talalelei mo se taitaiga pe a ou lagonaina le lofituina. E mafai ona ou mafaufau i le tele o taimi na taitaiina ai a’u e le Tama Faalelagi i le faamoemoe ma le filemu i le lotolotoi o luitau.
Ae peitai, sa ou lagonaina talu ai nei lo’u faatuatuaina o le filemu o le Atua na vaivai ina ua oso ae se taua matautia i le atunuu o loo nofo ai la’u uo mamae. Sa ou lagona le vaivai. Sa oso ae i totonu ia te a’u le aasa o le ita ou te lei oo muamua i ai. Ou te lei iloa po o le a se mea e mafai ona ou faia e fesoasoani ai i la’u uo po o isi tagata o loo aafia i lenei sauaga ma le lotoita. Sa lagona e le lalolagi atoa le pogisa, ma sa amata ona ou taulai atu i le leaga lea sa faasalalauina ai le vevesi i le tele o nofoaga.
E mafai faapefea ona ou lagonaina le filemu i le iloaina o le toatele o tagata, e aofia ai ma la’u uo mamae, sa mafatia?
O Se Uunaiga Faigofie
Sa ou iloaina o le ita sa ou lagonaina ua amata ona faaumatia ai a’u. Sa manaomia ona ou toe maua le filemu. O lea sa ou alu ai i le Tama Faalelagi e pei ona masani ai muamua. Sa ou sasaa atu lo’u loto i le tatalo ma ta’u atu ia te Ia sa ou lagona le leai o se faamoemoe i se mea ou te faia aua sa tele naua sauaga o loo tutupu i le lalolagi. Sa ou fesili atu ia te Ia pe i ai se mea e mafai ona ou faia e toe maua ai le filemu.
Sa ou mauaina se uunaiga faigofie mai le Agaga:
Faitau i le Tusi a Mamona.
Sa ou faitauina soo a’u tusitusiga paia, o lea sa ou le mautinoa ai pe aisea o le a fai mai ai le Tama Faalelagi ia te a’u e fai se mea o loo o’u faia pea. Ae sa ou filifili e faatuatuaina le uunaiga. Sa amata ona ou gauai atili atu i mea sa ou faitauina i le Tusi a Mamona. Sa ou matauina le tele o taimi na feagai ai soo o Iesu Keriso ma sauaga, taua, ma le leaga ma lagona ai le leai o se faamoemoe i se mea e tetee atu ai i o latou luitau. Ae sa ou matauina foi, ina ua latou taulai atu o latou olaga ia Iesu Keriso i na taimi vevesi le mautonu, sa foliga mai sa latou lagonaina le filemu—e tusa lava po o le a. (Tagai i le 2 Nifae 4:16–35; Mosaea 24:8–25.) O lenei tulaga e tupu soo i le Tusi a Mamona. O folafolaga o le mauaina o le filemu ia Keriso o loo i ai i soo se mea.
Na aoao mai le perofeta o Eteru, “O le mea lea, soo se tasi e talitonu i le Atua e mafai lava ona faamoemoe mo se lalolagi sili atu ona lelei, ioe, se nofoaga lava i le aao taumatau o le Atua, o le faamoemoe lea e sau mai le faatuatua, e fai ma taula i agaga o tagata, lea o le a latou mautinoa ma mausali ai, ma faatumulia ai pea i galuega lelei e le aunoa, ma taitaiina ai e viia le Atua” (Eteru 12:4).
A o ou faitauina upumoni faapenei i le taimi o la’u suesuega, sa amata ona ou toe lagonaina le filemu o Keriso. Ma sa ou malamalama ai o Lona filemu e avanoa i taimi uma mo i latou uma o e saili i ai, e oo lava ia i latou o loo ola ai i taua ma feteenaiga.
Taulai Atu ia te Ia
O faafitauli i le lalolagi e mafai ona faafaigata ai ona taulai atu pea ia Iesu Keriso. Ou te lagona pea le leai o se faamoemoe i se mea ma le loto nutimomoia i nisi taimi. Ae e ui lava i lenei mea, e mafai lava ona ou lagonaina i taimi uma le filemu moni pe a ou tausia a’u feagaiga ma sii atu lo’u taulaiga ia te Ia. Ia te a’u lava ia, o le taulai atu ia te Ia o lona uiga o le faia o se tatalo a o lei aapa atu mo la’u telefoni i le taeao, faaavanoa se taimi mo tusitusiga paia i aso taitasi, ma faafouina a’u feagaiga e ala i le tagofia o le faamanatuga i vaiaso uma.
Pe a ou faaavanoaina se taimi mo lo’u Faaola, ou te iloa ai o le a fesoasoani pea o Ia ma le Tama Faalelagi ia te a’u i le lelei, le leaga, ma e oo lava i vaega le lelei o le olaga.
Na molimau mai Elder Ulisses Soares o le Korama a Aposetolo e Toasefululua: “I le avea ai ma Ona [Iesu Keriso] so’o, o i tatou o Lona nuu filifilia, ua valaauina e folafola atu Ona uiga paia, o e faalauiloaina le filemu ua matua’i ofoina atu ma le agalelei e ala atu ia te Ia ma Lana taulaga togiola. O lea filemu o se meaalofa ua folafola mai ia i latou uma o ē liliu atu o latou loto i le Faaola ma ola amiotonu, o lena foi filemu e aumaia ai ia i tatou le malosiaga e olioli ai i le olaga nei ma mafai ai ona tatou onosa’ia tofotofoga tiga o la tatou faigamalaga.”
O Iesu Keriso “o le malamalama ma le ola o le lalolagi” (3 Nifae 11:11). Ou te iloa ua sili atu nei ona moni lenei mea nai lo se isi lava taimi i lenei lalolagi valea. Pe tatou te lagona le fefe, leai se faamoemoe, pe le mautonu, e mafai ona Ia aumaia ia i tatou le malamalama, e tusa lava po o a tulaga tatou te oo i ai.
O Lona filemu e soloia ai le fefe ma le ita i lo’u loto—o taimi uma lava ou te aapa atu ai mo Ia.
E alala le tusitala i New Jersey, ISA.