Na COVID-19: E dua na Madigi ni Vakanamata vou ki na Uto ni Kosipeli

Mai vei Tyler kei Kiplin Griffin kei Taylor Halverson

iVakatakilakila

iTaba ni ivolanikalou kei na dua na matavulo

Ena itukutuku ni veigauna sa oti, sa dau tiko kina na gauna dredre. E dai, eda sa sotava tiko vakararaba na bula drakidrakita ka vakavuna na COVID-19. Eda sa mai rogoca tiko vakawasoma: oqo na veigauna sega ni vakatauvatani. E vuqa vei keda eda nuiqawaqawataka tiko na noda bula kei na nodra tiko vinaka na noda daulomani. Eda sa vakila taucoko na revurevu ena bula vakailavo kei na noda tiko dei e vakavuna na virus oqo. E vaka ni sega ni dua na ka e davomatau. Ka sa mai vakalatilatia na veiqaravi ni kaulotu kei na cakacaka e valetabu. E vuqa na tamata era sa luvuci ena icolacola ni kena moici ni ituvatuva e vale.

Vakanamata ki na veimataka tawanamaki e rawa ni kauta mai na lomaleqa se taqaya saraga—e rairai o sa vakila tiko beka na ka oqo. Ia ena loma ni dredre oqo, e tiko na inuinui! Ena dela ni veilecayaki kei na veiveisau, na veika bibi ka ilutua ni ivakavuvuli ni kosipeli e se sega ni bau veisau:

Na soqoni kei na sokumuni davomatau ni lotu e rawa ni tarovi vakawawa se yalani, ia na bulataki ni kosipeli e sega! E rawa ni da tomana na sokalou, veiqaravi, kei na bulataki ni kosipeli ena noda itikotiko.
Na Kalou e bula tiko ga ena Nona lomalagi.
Na Luvena, o Jisu Karisito, e tucake tu e ulu ni cakacaka oqo. E kila vinaka tiko o Koya na sasaga ni vuravura oqo ka vakakina na noda veisasaga yadua. Sa yalataka o Koya, “Au na sega ni laivi kemudou mo dou luveniyali” (Joni 14:18). Ena tala mai na Yalo Tabu me tiko vata kei keda.¹
Na Kalou e sa kacivi ira na parofita, daurairai, kei na dauvakatakila. Mai vei ira, sa biuta tu mai kina o Koya na veika eda gadreva me da lako curuma kina na cava.² Vakasamataka mada na lewenivuli vou ni vuvale, kei na veisau tale eso, sa vukei keda meda vakavakarau ena gauna oqo ka bula ka veiqaravi ena sala e cecere ka savasava cake.³ Na veiveisau oqo era sega ni vakacalaka—era sa biuta mai na Kalou sa kilakila ka loloma.

E dina e tiko na dredre, kei na veivakasama vakaoqo, sa rawa ni da vakanamata vakamatua ki na uto ni kosipeli, ka okati kina na vakabauta na Turaga o Jisu Karisito.

Ia e rawa vakacava meda cakacakataka na vakabauta oqori? Mai na ivakatekivu, sa vakatara na Turaga vei ira na nona itisaipeli me ra vorata na veibolei ka sega ni sauma na nodra lomatarotaro. Na waka ni noda vakabauta ena lako me titobu ena gauna eda na vakayagataka kina na noda galala ni digidigi ka toso ki liu ena gauna ni veilecayaki. O Elder Neil L. Andersen ena Kuoramu ni iApositolo Le Tinikarua e a tokaruataka na ka oqo, ka kaya, “O sega ni kila na veika kece, ia sa rauta vinaka na kila sa tiko rawa!”⁴

Na italanoa kei Nifai kei iratou na tuakana ena nodratou sasaga me ratou rawata na peleti parasa e sa dua na ivakaraitaki cecere ni ka oqo. Eratou kila na veika eratou gadreva me ratou cakava: kauta mai na peleti! Eratou kila vakavinaka talega na vuna. Eratou sega ga ni kila me ratou cakava vakacava . Ni oti na nodratou druka vakarua (raica na 1 Nifai 3:10–27), sa sega ni rawa vei Nifai me vakararavi vakatabakidua ki na nona gugumatua. Ni sega tiko ni soro, e tovolea tale vakadua. Raica na kena vakayagataki vakadodonu na vosa nei Nifai ki na keda ituvaki nikua:

“A sa kauti au yani na Yalo Tabu, ia au sega ni kila na ka meu na laki kitaka.

“Ia au sa lako ga” (1 Nifai 4:6-7).

Se vakacava na levu ni cegutaro ena noda bula, kevaka eda “lako yani” me vakataki Nifai, ka vakararavi vua na Kalou ka muria na Nona parofita ka vakanamata ena vakabauta, ena tuberi keda ka tuli keda oKoya. Ena dua na vanua ena ikalawa oqo, na noda icegutaro veivakaleqai ena yaco me yavu ni vanua ni vakacibicibi.

Me da vakalevutaka na noda vakabauti Jisu Karisito, noda nuitaki ira na Nona italai, kei na noda veilomani ena noda sotava na veimataka. Na gauna oqo ni leqa kei na dredre e vuravura raraba e rawa ni yaco me vanua tabu me da toro voleka yani kina Vua. Ni da vakayacora vakakina, ena vakasinaita na yaloda ena Nona vakacegu kamica, ena loma sara mada ga ni yavavala, ka da na kunea na kaukauwa kei na isaunitaro eda gadreva.