Rūm̧m̧an Ded ro
Juon Men kōn Ilju im Jekļaj Imaron̄ Kantōroole
Pija ko jān Getty Images
En̄jake eo ej pād wōt ilo buruō ekar pen ļo̧k wōt n̄an kōjekdo̧o̧ne. Kar 28 aō iiō, ejjan̄in wōr pāleeō im ikar jab lukkuun jeļā ta eo ikōņaan kōm̧m̧ane me inej tijem̧ļo̧k kake men̄e ekar wōr juon aō jerbal em̧m̧an āinwōt juon nuuj an kūrae. Ikar en̄jake ke aolep wāween ko ilo mour eo aō rekar jab kūrm̧ool. Ikar pere jokālet ko aō ilo mour in im ikar jab jeļā ewi wōt iaļ eo in bōke. Ikar en̄jake aō jōbwābwe.
Juon raan ke ikar en̄jake aō lukkuun ebbweer, juon m̧ōtta eo eto aō bar kōnnaan n̄an e ekar ko̧o̧le eō. Ke ekar kajjitōk ejet aō mour, ikar kōmeļeļeiki aolep en̄jake ko aō me eto aō apan̄ kaki. Ekar ron̄jake innem ba, “EMMAN, ak ejet mour in jetōb eo am̧?”
“O aaet, elukkuun jejjet,” ikar uwaake ilo aō jab ļōmņak. “Ijan̄in kar en̄jake aō lukkuun epaake Anij ilo mour eo aō.”
Ekar uwaak, “Innem kwojjab aikuj inepata kōn jabdewōt men.”
Lōke ilo Karōk eo Ewanōk an Anij
Jān iien bwebwenato eo am̧ro, ikar kile ruo men ko. M̧oktata, ikar kile ke eļap aō kam̧m̧oolol bwe ewōr aō naan in kam̧ool ekajoor kōn jepļaaktok eo an gospel im n̄an maron̄ mour kōn kien ko im en̄jake aō ekkeijel ippān lan̄.
Un̄n̄are peid make ilo jetōb elukkuun aorōk ippa, im ij ekkatak wōt wāween n̄an bōk revelesōn ko ilo mour eo aō. Jar im ekkatak jeje ko rekwojarjar aolep jibbon̄ rej ruo men ko reļam waan me ij en̄jake ej kōm̧m̧an eļap oktak ilo maron̄ eo aō n̄an bōk revelesōn eo aō make. Ij barāinwōt en̄jake an ļapļo̧k aō ekkeijel ippān lan̄ n̄e ij kōm̧m̧ani kijejeto n̄an jouj, mour ilo ājmour bwe Jetōb eo en maron̄ aō kōmpānien aolep iien, n̄an pokake kien ko, im n̄an ukweļo̧k ilo m̧ool.
Kein karuo, ikar kile bwe aō uwaak n̄an kajjitōk eo an eo m̧ōtta ekar jab lukkuun jim̧we—ikar ļōmņak ikar kōm̧m̧an “wānōk” ilo jetōb, ak ikar aikuj kōļapļo̧k aō tōmak, kabōjrak aō inepata, im lōke Anij n̄an jipan̄ kōn men ko me ijjab maron̄ kantōrooli.
Men̄e jet wāween ko ilo mour eo aō rejjab lukkuun em̧m̧an āinwōt aō kōņaan, ijeļā bwe men eo eaorōk ej n̄an jerbal ilo tōmak im kwaļo̧k n̄an Anij bwe ij kōjerbal anemkwoj in kālet n̄an kōm̧m̧ani jokālet ko rem̧m̧an. Ikar ekkatak bwe n̄e men ko rejjab bōk jikier ilo wāween ko jej kōtmeni, ej bwe imaron̄ ekkatak im eddōkļo̧k ilo wāween ko ijjab maron̄ kōm̧m̧ani.
Ijjab maron̄ pijaikļo̧k ke ekar 29 aō iiō ikar lo eō make kōn pere ilo jerbal eo aō im ta eo tok juon enej bōk jikin ilo mour eo aō. Jekdo̧o̧n, men̄e kōn aolepān men ko jejaji kaki, elukkuun ļap lōke eo aō bwe Anij ekar wōr juon an karōk ewānōk n̄an eō. Ekar lukkuun jeļā ta eo ej waļo̧k im ta eo ij aikuji, im E enaaj aolep iien kōjparok eō (lale Matu 6:28–34). Āinwōt an Elder L. Todd Budge jān Jiljilimjuonn̄oul eo kar katakin, “Toon wōt an pen n̄an meļeļe, eļaptata n̄e anjiwiwi ko rekajoor an mour in reppen, jemaron̄ en̄jake aenōm̧m̧an n̄an jeļā bwe em̧m̧an eo an Anij ejjeļo̧k jem̧ļo̧kin ej aolep iien uukļo̧k kōj n̄an kapijuknen” (“Lōke eo Ejjejet im Pen,” Liaona, No̧b. 2019, 48).
Lōke Eļap; Inepata Jidik
Juon raan mour enaaj pen ilo am̧ en̄jake, ak n̄e ij lukkuun ļōmņak kake, ijeļā bwe ijjab lukkun aikuj inepata. Jidik kōn jidik, ikar jino kile bwe ej aikuj ļapļo̧k jidik aō lōke Anij im inepata jidik kōn men ko ijjab maron̄ kantōrooli. Men eo imaron̄ kantōroole kōn ilju im jekļaj ej lōke Anij im jerbal n̄an eddōkļo̧k im epaake E aolep raan.
N̄e ij en̄jake aō jōbwābwe, aolep iien ebwe meram n̄an eō n̄an wōnm̧aanļo̧k wōt ilo jekjek ko me rejjab alikkar ilo mour eo aō im wōnm̧aanļo̧k wōt. Im toon wōt aō kōjerbal tōmak im dāpij bujen ko aō, toon wōt aō kemeemej kadkadū ilo m̧ool āinwōt juon jiron̄ nejin Jinō im Jema Ilan̄ im ij kajjieon̄ elōn̄ alen, men ko renaaj waļo̧k n̄aat im wāween aer nej, im en̄in ej men ko relukkun aorōk kā.