Kar Tōl jān Jetōb eo, Em̧ool m̧okta jān Aō kar Jeļā Kake
Iaar tōl kar jān Jetōb eo elōn̄ alen ko m̧okta jān aō kar ekkatak ta kar lukkuun kar revelesōn.
Ke iaar 17, iaar etal n̄an kabun̄ eo an Protestant iaar loe ruo iiō ko m̧oktaļo̧k. Ekar jikin eo m̧oktata im iaar lukkuun in ekkatak kōn Anij im Jisōs Kraist. Ilo tōre eo, iaar ito-itak ilo juon baj juon raan ke juon likao eaar jijet iturō. Eaar jiron̄ eō ke ej kab diwōj jān kaļbuuj im eaar kōnono kōn en̄jake eo ke ejjamin naaj bar deļo̧n̄e jabdewōt im̧ōnjar n̄an jidik. Ilo iien eo, iaar jeļā bwe Anij eaar jilkinļo̧k eō n̄an ioon em̧m̧aan jab eo, im iaar kōketak e, jiron̄ e bwe ej aikuj pukōt juon im̧ōnjar.
Ke kōmro kar ekōnono, iaar jiron̄ e iaar ekkatak n̄an etal n̄an jikuuļ in psychology. Bōtaab innām eaar jidimkij aō ba bwe imaron̄ ekkatak kōn journalism. Eaar ba, “Kwo lukkuun in āinwōt juon journalist—kwoj aikuj kōm̧m̧ane!” Iaar lo bwe ekōjak kōnke ijjan̄in kar ļōmņak kōn erom juon journalist m̧oktaļo̧k. Ļōmņak eo eaar āinwōt itok jān juon jikin ijaje kake.
Ruo allōn̄ ko tokālik, teej eo me enaaj kar kōm̧m̧an bwe in etal n̄an university n̄an ekkatak psychology eaar itok wōt. Juon bon̄ iaar kile bwe iaar jab kanooj jeļā kōn jokāālet eo aō ļo̧k n̄an jidik. Iaar ilbōk kōnke eaar jab itok limoū ilo kappukōt jabdewōt men ko jet. Innām iaar keememej bwebwenato eo ippān em̧m̧aan eo ilo baj eo. Iaar jab jeļā jabdewōt kōn jikuuļ in journalism, bōtaab iaar lo website eo n̄an juon eo ilo state eo aō. Ilo jide, raan eo eaar raan eo āliktata n̄an rejijtōr. Ilo jab bar ļōmņak alen ruo, iaar kāālet n̄an rejijtōr. Im kōkaduik bwebwenato eo: Ej kab m̧ōj aō kam̧ōj jikuuļ in journalism.
Lo M̧ool Eo
Iaar jab kile ilo iien eo, bōtaab ijeļā bwe Anij eaar tōlļo̧k eō kōn revelesōn an juon make ilo jokāālet ta eo ij ekkatak. Ij en̄jake āinwōt iaar iien otemjej kar jeraam̧m̧an kōn jeļā eo kōn ta eo Anij ekōņaan n̄an n̄a—ta kain iien ko rem̧m̧an im jekjek ko Ej kōm̧m̧ani ilo mour eo aō n̄an kwaļo̧k n̄an n̄a iaļ eo Ekōņaan bwe in ļoor e.
Emān iiō ko tokālik, iaar lo Kabun̄ in im kar peptaij, barāinwōt kōn tōl eo an Jetōb Kwojarjar. Im āliktata iaar ekkatak ta eo revelesōn an juon make ej jān riiti Katak im Bujen Ko. Juon raan m̧okta jān iien peptaij eo aō, iaar riiti Bok in Mormon kōnke mijeneded ro raar kajjitōk ippān n̄an riiti. Ejjab to iaar kāālet n̄an riiti m̧oktaļo̧k kōn jet un ko, n̄an 2 Nipai 31, ijo Nipai ej kōmeļeļeik peptaij eo an Jisōs Kraist. Men̄e jekdo̧o̧n ijjan̄in kar jar kōn Bok in Mormon, iaar en̄jake āinwōt Jemedwōj Ilan̄ eaar kajjieon̄ jiron̄ eō kōn peptaij eo aō. Jebta eo tok juon eaar barāinwōt karreilo̧k eō, ijo iaar riiti bwe Jetōb Kwojarjar eo emaron̄ kwaļo̧k n̄an kōj aolep men ko me jej aikuj in kōm̧m̧ani (lale 2 Nipai 32). Naan ko eaar ļap meļeļeier n̄an mour eo aō.
Ilo m̧ool, juon men iaar iien otemjej kile ej bwe eļan̄n̄e ij lo eō ilo jekjek eo me ijjab meļeļe kake, Anij ej kōtmene eō bwe in waļo̧ktok jān jekjek eo kōn juon meļeļe eo ekāāl. Ke iaar ekkatak kōn Josep Smith, iaar lo men ko reier wōt juon ikōtaamro. Iaar ekkatak n̄an kappukōt Anij kōn uwaak ko. Ilo tōre in ajri eo aō, em̧ool jekdo̧o̧n jab etal n̄an m̧ōnjar eo, iaar iien otemjej jar, eo eaar im̧we eō n̄an ukweļo̧k, kijenmej, im kajjieon̄ in jouj im iakwe n̄an aolep.
Ilo juon wāween iaar iien otemjej jeļā bwe Anij eaar ron̄jake eō. Ke iaar āliktata etal n̄an juon m̧ōnjar ke iaar 15 iiō detta im ekkatak kōn Baibōļ, iaar kalimjōkļo̧k ekanooj lōn̄ en̄jake ko im kar jeļā bwe jeļāļo̧kjeņ eo iaar bōke jān jar eaar itok jān Anij.
Meļeļe Revelesōn
Ilo 2 Nipai 32:5, Nipai ej katakin, “N̄e kom̧ naaj deļo̧n̄ ilo iaļ eo, im bōk Jetōb Kwōjarjar, enaaj kwaļo̧k n̄an kom̧ aolep men ko kom̧ij aikuj kōm̧m̧an.” Ekar juon men eo iaar ļōmņak iaar meļeļe m̧ae iien eo, ālkin peptaij eo aō, mijenede ro raar kajjitōk ippa eļan̄n̄e iaar jeļā ta kar revelesōn. Iaar jab jeļā kōn āt eo, bōtaab iaar ba bwe iaar ļōmņak eaar juon en̄jake iaar en̄jake elōn̄ kōttan, āinwōt Anij ej kōnono ippa ilo ļōmņak eo aō, uwaake kajjitōk ko aō im ļōmņak ko. Raar ba iaar jim̧we.
Kōn jeļāļo̧kjeņ eo kōn revelesōn im ippān menin letok eo an Jetōb Kwojarjar, iaar bōk juon ikdeelel eo ekāāl n̄an riiti Baibōļ. Iaar jino lo elōn̄ men ko eļap meļeļeier ijo—Iaar kile bwe eaar kōnke kar tōl eō jān Jetōb. Iaar iakwe riiti leta ko an Paul im lo waanjon̄ak eo an kōn an katak in jān Jetōb eo ilo m̧akūtkūt ko an im lōke eo an ekajoor ilo Rilo̧mo̧o̧r eo. Men ko rekar men ko iaar kili jān jeļā kōn Kabun̄ eo kar kōjepļaaktok.
Kōn menin ilo jem̧ļo̧kin, ekar jab aorōk dettam̧, ia eo kwoj jokwe ie, ak em̧ool ewi jon̄an jeļā eo ewōr ippam̧ kōn men ko an Anij. Men eo de eo kwoj aikuj in kōm̧m̧ane ej ļoor al in jar eo: “Inaaj ilo̧k ijo kwon kōnaan bwe in ilo̧k, jitōn bōro Irooj, … ; Inaaj erom ta eo kwoj kōņaan bwe in erom” (Hymns, no. 270). Mour im kwaļo̧k men ko raiboojoj Jetōb eo ej likūti ilo būruwōm̧, kōnke Jetōb eo enaaj kwaļo̧k n̄an eok iaļ eo n̄an kōjeraam̧m̧an ro jet im bōk kōjeraam̧m̧an ko n̄an kwe make ilo mour in.