Ikaw Dili Kanunay Maghulat sa usa ka Tubag
Kasagaran makigbisog kita sa paghimo og mga desisyon nga walay madawat nga pagkumpirma gikan sa Dios, apan samtang kita mopadayon sa unahan inubanan sa hugot nga pagtuo, Siya motabang kanato nga mahibalo nga anaa kita sa sakto nga dalan.
Ang tagsulat nagpuyo sa New Mexico, USA.
Sa pagbalik na nako sa kolehiyo human sa akong misyon, naghunahuna ko kon si kinsa ang akong ikauban sa akong kwarto. Misugyot ang akong amahan nga makigsulti sa usa ka sister nga misyonaryo nga bag-ong miserbisyo sa among home ward ug bag-ohay lang nahuman sa iyang misyon. Mipasabut siya nga si Holly mobalhin sa akong eskwelahan ug tingali gamay ra iyang nailhan nga mga tawo didto.
Bisan nakaila ko og gamay ni Holly gikan sa iyang pagserbisyo sa among ward, apan nagpanuko ko sa pagdapit niya nga mopuyo uban nako. Nahadlok ko nga siya maghunahuna og dili maayo kay wala kaayo mi mag-ilhanay sa usag-usa—ug tungod pod dili ko kahibalo kon magkasinabot mi.
Bisan sa akong mga kahadlok, mibati ko nga ang pagsunod sa gisulti sa akong papa maoy maayo nga buhaton. Nag-ampo gyud ko nga makahimo og bag-ong mga higala sa akong pagsugod og eskwela og balik, mao nga akong gibati nga ang impluwensya sa Langitnong Amahan mahimong maanaa sa sugyot sa akong papa. Nakadesisyon ko nga buhaton ang gisugyot sa akong papa. Gidawat ni Holly ang akong pagdapit, ug sa panahon nga nagkauban mi sa pagpuyo, nahimo siyang usa sa akong pinakasuod nga mga higala. Mitanyag si Holly og tambag ug gugma sa mga malisud nga panahon sa akong kinabuhi, ug maanaa pod ako alang kaniya sa iyang lisud nga panahon.
Ang among mga kinabuhi napuno sa mga desisyon. Managlahi man sila sa gibug-aton, apan usahay ang mga ginagmay maoy adunay dakong epekto sa umaabot. Samtang ang Langitnong Amahan tingali dili pa mopadayag kanato unsa ang labing maayo sa matag sitwasyon, Siya mihatag nato ug kagawasan sa paglihok sumala sa mga baruganan sa ebanghelyo ug mopadayon sa unahan uban sa hugot nga pagtuo. Wala ko maghunahuna nga adunay malungtarong epekto sa akong kinabuhi ang pagpili og kauban sa kwarto sa kolehiyo, apan kini nahitabo. Human lamang sa pagtabang kang Holly akong naamguhan nga ang Ginoo mitugot nako sa paghimo og maayo nga desisyon, ug gipanalanginan ako tungod niini. Tungod kay misubay ko sa pagbuhat sa unsay akong gibati nga husto, ang Langitnong Amahan maoy nakahimo sa pagpaila sa usa ka talagsaong tawo sa akong kinabuhi.
Naghunahuna ko kung unsay mahitabo unta kon miatubang ko sa ubang mga gagmay nga desisyon uban sa Kristohanong kinaiya—kung ako lamang gibutang ang laptop sa kilid dihang naay babaye milingkod tupad nako aron mokaon sa iyang paniudto sa campus, o kon akong gipakigbahin ang akong tinuohan sa dihang ang akong higala misulti nga dili siya sigurado sa iyang gibati kabahin sa relihiyon. Mahimong wala ako mobati og kusog nga espiritwal nga pag-awhag niadtong mga higayuna, apan ako nasayud nga mga maayo kadto nga pagabuhaton, ug sigurado ako nga himoong panalangin kadto sa Dios alang sa tanang nalakip. Tungod kay mipili ko sa wala pagbuhat, dili nako masayran unsay mamahimong sangputanan.
Kasagaran manlimbasug kita sa paghimo og mga desisyon kon kita wala hatagi og klaro nga pag-aghat o tubag. Nianang mga higayuna, imbis maghulat og kumpirmasyon gikan sa Dios, atong magamit ang atong gasa sa kabubut-on sa pagpili og maayo alang sa atong kaugalingon. Mitudlo si Mormon, “Ang matag butang nga modapit sa paghimo sa maayo, ug sa pagdani sa pagtuo diha kang Kristo, gipadala pinaagi sa gahum ug gasa ni Kristo; busa kamo mahimo nga masayud uban sa usa ka hingpit nga kasayuran nga kini gikan sa Dios” (Moroni 7:16).
Mao nga sa sunod nga mag-atubang ka og usa ka desisyon, hunahunaa kini sa imong kaugalingon, “Maayo ba kini?” tungod kay ang matag maayo nga butang magagikan sa Dios. Sama nga ang Manluluwas wala magpanuko sa pagbuhat og maayo, makasalig kita sa atong kaugalingon sa pagpili og maayo matag adlaw, sa dinagko ug ginagmay nga mga paagi. Ug ang Ginoo mohimo nianang maayong mga pagpili ngadto sa dagkong mga butang.