F’oth Ntay ko Gin kabay ko fa gi Binaw

1 Nga tomuren nike kol yu Israel fare nam miyad mu’ulung ni yad gubin nga Shiloh ngar n’ufed ngalang fare Tent u p’eowchen SOMOL.

2 Ma kabay medlip e ganong rok e girdi’ nu Israel ndawor ni pi’ bang e binaw ra tafned u lan fare nam.

3 Ere ga’ar Joshua ngak e girdi’ nu Israel, “Bu uw n’umngin nap’an ni ngam son gad mfin mmarod mu koled fare nam nike pi’ SOMOL ni Got rok e pi chitamangimed ni kakrom ngomed?

4 Ra reb e ganong mi gimed pi’ dalip e pumo’on riy ngog. Bay gu pi’rad ngranod u daken fare nam ni ga’ngin ngar yoloyed nga but’ rogon ya’an e yungi binaw ni yad ba’adag ni ngar tafned. Ngemu’ mar sulod ngog.

5 Ma fare nam e bay ni f’oth u dakenrad ni medlip yang; ganong rok Judah e bayi par u lane gin tafen e binaw u lane yimuch, ma ganong rok Josef e bayi par u lane gin ni tafen e binaw u lane lel’och.

6 Mu yoloyed rogon ya’an e mathil ko medlip yang i binaw ney ngam feked i yib ngog. Ma aram e bay gu girengiy e pow nggu fith’ laniyan’ SOMOL ni Got rodad ni fan ngomed.

7 Machane ganong rok Levi e dariy e f’oth rorad ko binaw u lan fare nam ni bod gimed, ni bochan e f’oth rorad e pigpig ni ngu’ur ted ni yad e pi prist rok SOMOL. Ma gimed manang faram ni pi ganong rok Gad, nge Ruben, nge ba’ ni ngek e Manasseh e kan mu’ i pi’ taferad binaw u ba’ ni ngek e Jordan, ni Moses ni tapigpig rok SOMOL e pi’ ngorad.”

8 Me yan fapi pumo’on ni aram e ngar yaliyed ngar yoloyed ya’an e re nam nem u but’ u tomuren nike yog Joshua ngorad e tin ni ngar rin’ed ni ga’ar: “Mmarod u daken e re nam ney ni ga’ngin ngam yoloyed rogon ya’an u but’, mi gimed sul ngog. Ma aram u roy u Shiloh e bay gu fith lanyan’ SOMOL riy ni fan ngomed ko pow ni ngan girengiy.”

9 Ma aram me yan fapi pumo’on u daken fare nam ni ga’ngin ngar yoloyed nga but’ rogon ni kar ted e f’oth ko fare nam ke yan ni aw ni medlip yang u but’, miyad yoloy nga but’ fithingan gubin e pi yuchi binaw ni bay riy. Ma aram miyad sul ngak Joshua ngalan fa gin ni yad be par riy u Shiloh.

10 I Joshua e girengiy e pow ni fan ngorad u lan yu Shiloh u p’eowchen SOMOL, ma tin kabay e ganong nu Israel e ra reb me pi’ bang e binaw u lan fare nam ngak.

Gi binaw nni pi’ ngak Benjamin

11 Fa gi binaw nib milfan ko pi tabnaw ko ganong rok Benjamin e ir e nni duwgiliy nsom’on. Re gi binaw rorad nem e bay u thilin fa gal ganong rok Judah nge Josef.

12 Mathil rorad ko lel’och e tabab ko Jordan me yan nga talang ko fare gi tafarthag ni bay nga lel’och u Jeriko, me yan u rom ko ngal nge yan u daken fare binaw ni go’ burey nge yan i mada’ nga daken e ted u Bethaven.

13 Me yan fare mathil u rom u thartharen e ba’ ni yimuch u Luz (ni ku yima yog yu Bethel ngay), me log nga Ataroth Addar nga daken fare burey ni bay ko yimuch u Lower Beth Horon.

14 Me sor fare mathil u rom nga yug bang, me cheal u rom ko yimuch u ba’ ni ngal ko re burey ney nge mada’ nga Kiriath Baal (ara Kiriath Jearim), ntafen e ganong rok Judah. Irera’ e mathil ko ngal.

15 Ma mathil ko yimuch e tabab ko gin ni mus yu Kiriath Jearim riy me yan u rom ko fapi Alublub nu Neftoah.

16 Ma aram me yan e mathil u rom nga pe’ning nga enggin fare burey ni yira changar riy min guy fare Loway ni Hinnom, ni bay u ley ni lel’och ko fare Loway ni Refaim. Ma aram me sor ko yimuch nge th’ab e Loway ni Hinnom, ko yimuch u p’ebgul e burey ko pi Jebus, me yan riy nga Enrogel.

17 Aram me cheal nge yan ko lel’och nga Enshemesh me yan nga Geliloth, ni bay nga barba’ e kanawo’ nu Adummim pass. Me yan fare mathil u rom nga pe’ning ko fare Malang rok Bohan (Bohan e be’ nib mo’on ni fak Ruben)

18 me yan nge pag p’ebgul e burey u lan e lel’och ni yira changar riy min guy e Loway ni Jordan. Me log ngalan fare loway,

19 me yan nge pag p’ebgul e burey nu Beth Hoglah u lan e lel’och, me yan i mus nga lel’och ko fa gi day ni Dead Sea fithingan, ko gin ni yib fare Lul’ ni Jordan i po’ nga langgin. Irera’ e mathil ko yimuch.

20 Ma lul’ ni Jordan e ireram e mathil ko ngek. Irera’ e pi mathil ko fare gi binaw nni pi’ ntafen e pi tabnaw nu lan e ganong rok Benjamin.

21 Pi binaw nni pi’ ntafen e pi tabnaw nu lane ganong rok Benjamin e Jeriko, Beth Hoglah, Emek Keziz,

22 Beth Arabah, Zemaraim, Bethel,

23 Avvim, Parah, Ofrah,

24 Chefarammoni, Ofni, nge Geba: ragag nge l’agruw e binaw u gubin nib mu’un e yuchi binaw nib liyeg e pi binaw ney ngay.

25 Ma ku arrogon yu Gibeon, Ramah, Beeroth,

26 Mizpah, Chefirah, Mozah,

27 Rekem, Irpeel, Taralah,

28 Zela, Haelef, Jebus (ara Jerusalem), Gibeah, nge Kiriath Jearim: ragag nge aningeg e binaw u gubin nib mu’un e yuchi binaw nib liyeg e pi binaw ney ngay. Irera’ e re gi but’ nni pi’ ni tafen e pi tabnaw nu lane ganong rok Benjamin.